Upload
others
View
34
Download
2
Embed Size (px)
Citation preview
University of the Philippines Manila
College of Arts and Sciences
Department of Social Sciences
“Pagsasakapangyarihan sa Pagdedesisyon ng mga Kababaihan”
Pananaliksik sa paggawa ng desisyon ng mga maralitang kababaihan
patungkol sa paggamit ng kontrasepsyon
Research Report Submitted
In Partial Fulfillment of
The Requirements in
Political Science 198
By
Charisse Marie V. Valero
2009-85026
Submitted to:
Prof. Clarinda L. Berja
22 March 2013
PAGSASAKAPANGYARIHAN SA PAGDEDESISYON NG MGA KABABAIHAN 2
Balangkas ng Nilalaman
I. Abstract …………..……………………………….………….. 3
II. Panimula …………..……………………………….………….. 4
III. Pagsusuri sa mga Kaugnay na Literatura …………………....….. 6
IV. Balangkas ng Pag-aanalisa ………………………………...…. 13
V. Pamamaraan ng Pananaliksik …………………………………….. 19
a. Disenyo ng Pananaliksik
b. Pamamaraan ng Pagkolekta sa Datos
c. Pag-analisa ng Datos
d. Pang-Etikang Konsiderasyon
VI. Paglalarawan ng Resulta ..……………………………………….. 26
VII. Diskusyon ……...……………………………………………….... 33
VIII. Konklusyon …………………...………………………………..…… 37
IX. Bibliyograpiya ……………………...………………………………..…….… 40
X. Apendiks …………………...………………………………..……… 43
a. Gabay na mga Katanungan sa Panayam
b. Liham Para sa Katugon
c. Free, Prior, Informed Consent Form
PAGSASAKAPANGYARIHAN SA PAGDEDESISYON NG MGA KABABAIHAN 3
Abstract
Laganap sa buong bansa ang maraming suliranin na kalakip ng kawalan ng mga
programa ng pamahalaan patungkol sa pagpaplano ng pamilya partikular sa paggamit ng
kontrasepsyon. Tinukoy sa pananaliksik na ito na marami ang isinasaalang-alang ng mga
kababaihan sa kanilang paggawa ng desisyon patungkol sa paggamit ng kontrasepsyon.
Pinagtuunan ng pansin ng pananaliksik na ito ang paggawa ng desisyon sa paggamit ng
kontrasepsyon ng mga kababaihan. Inilahad ang pagkakaiba-iba at maging pagkakapare-pareho
ng mga karanasan ng mga kababaihan na may malaking epekto sa kanilang pagtingin sa usapin
ng paggamit ng kontrasepsyon. Inalam din ang antas ng pagsasakapangyarihan ng desisyon at
paggawa ng desisyon ng mga kababaihan sa tahanan at maging sa lipunan.
Naging batayan ng pananaliksik na ito ang mga konsepto ng agency, gender
subordination at rights-based approach to health mula sa pagtingin ng teoryang feminism. Sa
pag-alam kung paano gumagawa ng desisyon ang mga kababaihan ng maralitang tahanan sa
kanilang paggamit ng kontrasepsyon, sinuri ang mga salik na nakakaapekto sa kanilang paggawa
ng desisyon, kung ano nga ba ang mga pangunahing alalahanin ng mga maralitang kababaihan,
sino-sino ba ang may papel sa paggawa nila ng desisyon at ano nga ba ang mga karanasan nila na
nakakaapekto sa kanilang pagtingin sa paggamit ng kontrasepsyon.
Natuklasan sa pananaliksik na nakatulong ang paggamit ng kontrasepsyon sa mga
kababaihan sa pag-aangat ng kanilang sarili at pamumuhay ng kanilang pamilya. Ang mga
sirkumstansya gaya ng kahirapan, kalusugan at kapakanan ng kanilang pamilya ang pangunahing
dahilan ng mga kababaihan sa kanilang paggamit ng kontrasepsyon. Samakatuwid,
kinakailangang pahalagahan ang pagsasakapangyarihan ng paggawa ng desisyon ng mga
PAGSASAKAPANGYARIHAN SA PAGDEDESISYON NG MGA KABABAIHAN 4
kababaihan hindi lamang patungkol sa bagay na ito ngunit maging sa iba pang bagay na may
epekto sa kanila bilang mga stakeholder sa tahanan at maging sa lipunan.
Panimula
Ang pagpaplano ng pamilya sa pamamagitan ng paggamit ng kontrasepsyon ay laganap
na sa buong mundo. Sa ngayon, ang mga pamahalaan sa mga mahihirap na bansa ay
nagpapatupad ng iba’t-iba mga programa at patakaran upang masolusyunan ang paglaki ng
populasyon at ang katayuan ng reproductive health ng kanilang mamamayan. Ang pagkakaroon
ng ating bansa ng Responsible Parenthood and Reproductive Health Act of 2012 (Republic Act
No. 10354) ay isang malaking hakbang na naglalayong tugunan ang mga nabanggit na suliranin.
Inaasahan ng pamahalaan ang positibong epekto nito sa pamumuhay ng mga mamamayan
partikular na sa mga kababaihan. Noong 2008, hindi pa man naipapasa ang nasabing batas,
mayroon nang ordinansa ang lungsod ng Quezon ang “City Population and Reproductive Health
Management Policy” (City Ordinance No. 1829) na nagtaguyod ng mga programa para sa
populasyon at reproductive health ng mga mamamayan ng siyudad kabilang na dito ang libreng
serbisyo para sa pagpaplano ng pamilya. Batay sa ordinansa, nakita na mas mataas ang insidente
ng kahirapan sa mga pamilya na mas marami ang bilang ng anak kumpara sa mga pamilya na
mayroon lamang dalawa o isang anak. Naglalayong mapabuti ng ordinansang ito ang
pamumuhay ng mga mamamayan ng lungsod ng Quezon partikular na ang mga mahihirap na
kababaihan at mga sanggol. Patuloy ang pagpapatupad ng ordinansang ito sa siyudad at
hanggang sa ngayon mababatid pa rin ang mataas na insidente ng kahirapan at bilang ng mga
mahihirap na pamilya at komunidad sa nasabing lungsod.
PAGSASAKAPANGYARIHAN SA PAGDEDESISYON NG MGA KABABAIHAN 5
Sa ating bansa, may malaking bilang ng mga kababaihan na mayroon nang sariling
pamilya ang nagnanais na limitahan ang bilang ng mga anak at iwasan ang hindi planadong
pagbubuntis, ngunit hindi naman sila gumagamit ng anumang uri ng kontrasepsyon (Likhaan
Center for Women’s Health Website, June 28 2012). Ayon pa rin sa kanilang pananaliksik, mas
gusto ng mga pinakamahihirap na kababaihan na bahagi ng populasyon ang mas maliit na
pamilya ngunit kalimitan ay mayroon silang dalawa o higit pang anak na sobra sa kanilang nais
na bilang. Samakatuwid, laganap sa buong bansa ang maraming suliranin na kalakip ng kawalan
ng mga programa patungkol sa pagpaplano ng pamilya.
Sa pananaliksik na ito, tinukoy na marami ang isinasaalang-alang ng mga kababaihan sa
kanilang paggawa ng desisyon patungkol sa paggamit ng kontrasepsyon. Ang mga desisyon ng
mga kababaihan ay hindi gaanong binibigyan ng importansya kung kaya’t wala itong nagiging
impluwensya sa mga usapin at suliranin sa tahanan at maging sa lipunan. Sa isang maralitang
tahanan, mas maraming suliranin ang dapat tugunan ng mga kababaihan kaysa mga bagay na
may kaugnayan sa kontrasepsyon, kung kaya’t ang usaping ito ay hindi gaanong napagtutuunan
ng pansin (UNPFA Website, September 17 2012). Pinagtuunan ng pansin ng pananaliksik na ito
ang paggawa ng desisyon sa paggamit ng kontrasepsyon ng mga kababaihan. Ilalahad ang
pagkakaiba-iba at maging pagkakapare-pareho ng mga karanasan ng mga kababaihan na may
malaking epekto sa kanilang pagtingin sa usapin ng paggamit ng kontrasepsyon. Naglalayon din
na ipakita ng pananaliksik na ito ang antas ng pagsasakapangyarihan ng desisyon at
pagdedesisyon ng mga kababaihan sa tahanan at maging sa lipunan.
Mga Katanungan sa Pananaliksik
PAGSASAKAPANGYARIHAN SA PAGDEDESISYON NG MGA KABABAIHAN 6
Pangkalahatang Katanungan:
Paano gumagawa ng desisyon ang mga kababaihan ng maralitang tahanan patungkol sa
kanilang paggamit ng kontrasepsyon?
Mga Partikular na Katanungan:
Ano ang pangunahing alalahanin ng mga kababaihan sa mga maralitang tahanan?
Ano ang mga salik (na nakakaapekto) sa paggawa ng desisyon ng mga kababaihan
patungkol sa kontrasepsyon?
Sino-sino ang may papel sa paggawa ng mga kababaihan ng desisyon?
Ano ang mga karanasan ng mga kababaihan na nakakaapekto sa kanilang pagdedesisyon
sa paggamit ng kontrasepsyon?
Pagsusuri sa mga Kaugnay na Literatura
Paglaganap ng kontrasepsyon
Nitong nakalipas na dekada, ang paggamit ng kontrasepsyon sa Pilipinas gaya ng pills,
injectables, diaphragm at IUD bilang mga artipisyal na pamamaraan ng pagpaplano ng pamilya
ay bahagya lamang tumaas. Mula 47% noong taon 1998, ito ay naging 51% noong 2008, na
nangangahulugang 1% lamang kada taon ang itinaas ng paggamit ng mga ito (Likhaan Center for
Women’s Health Website, June 28 2012). Ganito rin ang nangyari sa Pakistan kung saan may
kaunting bahagdan lamang ng populasyon ng kababaihan ang gumagamit ng kontrasepsyon.
Mula sa 5% noong 1975, ang paglaganap ng paggamit ng kontrasepsyon ay umabot lamang sa
18.7% hanggang noong 1995 (Mahmood at Ringheim, 1996, p.2). Samantalang sa bansang
PAGSASAKAPANGYARIHAN SA PAGDEDESISYON NG MGA KABABAIHAN 7
Bangladesh, ang paggamit ng kontrasepsyon ay tumaas ng mahigit-kumulang pitong beses mula
noong 1970 hanggang noong 2007, mula 7.7% ito ay tumaas ng 55.8% (NIPORT et al, 2009
mula kay S. M. Kamal, 2009, p.2). Ganito rin ang pangyayari sa Indonesia, mula noong 1976
hanggang noong 2007 ang paglaganap ng kontrasepsyon ay umakyat mula 18% sa 61% (Rahayu,
Utomo, at McDonald, 2009, p.1). Mapapansin na tumaas ang bilang ng paglaganap at paggamit
ng kontrasepsyon sa lahat ng mga bansang nabanggit ngunit ang pagtaas na ito ay nakabatay pa
rin sa iba’t ibang salik. Samakatuwid, ang paggamit ng kontrasepsyon na tatalakayin sa
pagsusuring ito ay ibabatay sa iba’t ibang mga salik na nakakaapekto sa paggawa ng desisyon ng
mga kababaihan partikular sa desisyon ng mga kakabaihang maralita.
Mga salik
Kaalaman sa pagpaplano ng pamilya
Ang paggawa ng desisyon sa paggamit ng kontrasepsyon ng isang babae ay maaaring
may kaugnayan sa antas ng edukasyon na kanyang naabot. Ayon sa resulta ng mga pananaliksik,
ang mataas na antas na naabot sa paaralan ay nagdudulot din ng mataas na pagtingin sa
kahalagahan at bisa ng kontrasepsyon. Sinasalamin ito ng naging resulta ng mga pag-aaral sa
Bangladesh, Qatar, at Indonesia. Ang mga kababaihang nakatapos ng mababa o di kaya ay
sekundaryang antas ng edukasyon ay mas pinipiling gumamit ng makabagong uri ng
kontrasepsyon kumpara sa mga hindi talaga nakapag-aral na pinipili ang tradisyunal o natural na
pamamaraan ng pagpaplano ng pamilya (S. M. Mostafa Kamal, 2009, p.6). Sa isa namang
pananaliksik sa Qatar at sa Indonesia, ang mga kababaihang hindi nakapag-aral ay karaniwang
hindi pabor sa paggamit ng kontrasepsyon samantalang ang mga nakapag-aral naman ay pabor sa
PAGSASAKAPANGYARIHAN SA PAGDEDESISYON NG MGA KABABAIHAN 8
paggamit nito (Arbab, Bener, at Abdulmalik, 2009, p.16) (Rahayu, Utomo, at McDonald, 2009,
p.24).
Bukod pa rito, ang sapat o hindi sapat na pagkamulat sa mga kaalaman tungkol sa
pagpaplano ng pamilya ay higit na makakaapekto sa kung anong uri ng kontrasepsyon ang
gagamitin ng isang babae. Maaaring piliin ng isang babae ang isang panandalian o kaya naman
ay isang pangmatagalang pamamaraan ng kontrasepsyon batay sa kanyang impormasyong
nabatid (Rahayu, Utomo, at McDonald, 2009, p.7). Ang mass media ay itinuturing na
mahalagang kasangkapan upang makapaghatid ng impormasyon sa maraming tao. Ang
pagpapalaganap ng impormasyon tungkol sa kahalagahan ng paggamit ng kontrasepsyon sa
pamamagitan ng media gaya ng radyo, telebisyon at dyaryo ay nakakapaghikayat upang
magdesisyon ang mga kababaihan na ipagpapatuloy ang paggamit ng kontrasepsyon (Laguna,
Po, at Perez, 2000, p.7).
Mungkahi ng mga kamag-anak, kaibigan at iba pang kakilala
Ang pagkaunawa at pagtanggap ng mga kamag-anak ng asawa ng isang babae sa
pamamaraan ng kontrasepsyon ay isang mahalagang salik sa mga kababaihan. Sa Pakistan, ang
opinyon ng mga kamag-anak ay mahalaga sa kanilang pagdedesisyon sa paggamit o di kaya ay
paghinto ng paggamit ng anumang uri ng kontrasepsyon kabilang na ang IUD, pills, at
injectables (Agha, 2010 mula sa Biomed Website). Sa kabilang banda, sa isang pag-aaral sa
Qatar, ang mga kababaihan ay kadalasang nakakakuha ng impormasyon upang subukan ang iba’t
ibang uri ng pamamaraan ng kontrasepsyon sa kanilang mga kaibigan (80%), kasunod nito ay
ang mga duktor at mga kamag-anak. Bukod dito, ang mga health workers, guro, at mismong
PAGSASAKAPANGYARIHAN SA PAGDEDESISYON NG MGA KABABAIHAN 9
kanilang asawa ay ilan pa sa mga nakapagbibigay ng impormasyon sa kanila tungkol sa iba pang
mga pamamaraan ng kontrasepsyon (Arbab, Bener, at Abdulmalik, 2009. p.15).
Pananaw at gampanin ng asawang lalaki sa pagpaplano ng pamilya
Ang antas ng edukasyon ng asawang lalaki ay isang mahalagang salik na madalas ay
nagtatakda kung ano ba ang gagamitin o kung ang mga kababaihan ay gagamit ng
kontrasepsyon. Sa Indonesia, ang mga babaeng may asawa na may mababa o mataas na antas ng
pinag-aralan ay mas may posibilidad na gumamit ng makabagong pamamaraan ng
kontrasepsyon, kaysa sa mga babaeng hindi nakapag-aral ang asawa. Sa nakalap na datos noong
taong 2007, ang mga babaeng may edukadong asawa ay kadalasang nagdedesisyon na gumamit
ng pangmatagalang pamamaraan ng kontrasepsyon kaysa sa mga babaeng hindi nakapag-aral
ang asawa (Rahayu, Utomo, at McDonald, 2009, p.24). Sa karagdagan, kalimitang naghihinuha
ang isang babae kung papayag ba o hindi ang kanilang asawa sa paggamit ng mga pamamaraan
ng kontrasepsyon. Sa mga bansang Indonesia, Pilipinas, Nepal, India, Kuwait, Mali at Pakistan,
ang pananaw ng asawa sa pagpaplano ng pamilya ay mahalaga sa isang babae. Ang hindi
pagsang-ayon ng lalaki sa paggamit ng kontrasepsyon ay maaaring maging hadlang sa paggawa
ng desisyon ng mga kababaihan na gumamit ng kontrasepsyon (Joesoef et al., 1988; Bongaarts
and Bruce, 1995; Casterline and Sinding, 2000; Shah et al., 2004 mula kina Rahayu, Utomo, at
McDonald, 2009 p. 9).
Gayunpaman, lumalabas sa pananaliksik ni Gubhaju (2008, p.16) sa Nepal na karamihan
sa mga kababaihan ay hindi na sumasangguni sa asawa pagdating sa usapin ng paggamit ng
kontrasepsyon. Ang isyu na ito ay hindi na pinag-uusapan o hindi kaya ay bihirang pag-usapan
PAGSASAKAPANGYARIHAN SA PAGDEDESISYON NG MGA KABABAIHAN 10
ng mga mag-asawa na nagreresulta upang magdesisyon ang mga kababaihan na gumamit ng
kontrasepsyon alam man nila o hindi ang pananaw ng kanilang asawa sa pagpaplano ng pamilya.
Sa karagdagan, karamihan sa mga impormasyon at datos mula sa mga pag-aaral
patungkol sa kontrasepsyon at pagpaplano ng pamilya ay nanggagaling sa mga kababaihan. Isa
sa mga dahilan nito ang mas maraming pamamaraan ng kontrasepsyon na ginagamit ng mga
kababaihan kaysa mga kalalakihan. Ayon kina Bankole at Singh (1998), ang pagpaplano ng
pamilya ay may malaki ring dulot sa pamumuhay ng mga kalalakihan. Bukod pa rito, ang pang-
ekonomikong katayuan ng isang lalaki ay hindi naman nangangahulugan na sila na rin ang
magdedesisyon sa mga bagay na may kinalaman sa pagpaplano ng pamilya. Napagtanto rin sa
ginawang pag-aaral ang kakulangan sa mga pananaliksik at programa ng pagpaplano ng pamilya
na nakatuon sa pananaw ng mga kalalakihan patungkol sa kontrasepsyon.
Komunikasyon at Relasyon sa Pagitan ng Mag-asawa at ng Pamilya
Ang komunikasyon sa pagitan ng mag-asawa ay may malaking impluwensiya sa
paggawa ng desisyon sa paggamit ng kontrasepsyon at maging sa bilang ng anak na kanilang
nais. Ang kagustuhan ng asawang babae o lalaki patungkol sa bilang ng anak ay maaaring
masunod kung magkakaroon sila ng maayos na ugnayan patungkol sa isyu ng pagpaplano ng
pamilya. Ngunit ang komunikasyon na ito ay naaapektuhan ng mga norms gaya ng mas
mababang katayuan ng mga kababaihan sa lipunan. Sa mga bansang bukas sa usapin ng
pagpaplano ng pamilya gaya ng South Korea at Estados Unidos, ang pag-uusap tungkol sa
pagpaplano sa bilang ng anak ay isa nang katanggap-tanggap na norm sa mga mag-asawa (Oh,
1998 at Thomson, 1986 mula kay Mahmood & Ringheim, 1996, p.4). Sa mga pag-aaral naman
sa mahihirap na bansa, lumalabas na mababa ang kaso ng komunikasyon sa pagitan ng mag-
PAGSASAKAPANGYARIHAN SA PAGDEDESISYON NG MGA KABABAIHAN 11
asawa patungkol sa pagpaplano ng pamilya. Nagiging sagabal ito sa pagnanais na gumamit ng
kontrasepsyon at nagbubunga rin ito ng mababang kaso ng paggamit ng kontrasepsyon
[Mukerjee (1975); Bertrand et al. (1982); Pineda et al. (1981); Raju (1987) mula kay Mahmood
& Ringheim, 1996, p.4)].
Base sa mga isinagawang pananaliksik, ang mga desisyon, partikular na ang mga may
kaugnayan sa pamumuhay ng pamilya ay hindi lamang nakabase sa mga kagustuhan ng
indibidwal na miyembro nito (Hall et al., 1995 mula kay Hamilton at Catterall, 2008). Kung
nagkakaroon ng man ng hindi pagkakaunawaan o di kaya ay conflict sa mga kagustuhan at
motibo ang mga miyembro ng pamilya (partikular sa pag-aaral na ito ang sa mga mag-asawa), ito
ay sinusubukang solusyunan gamit ang iba’t ibang pamamaraan. May apat na uri ng pagsasaayos
ng conflict si Sheth (1974): problem solving (kasama dito ang pangangalap ng mga mahahalaga
pang impormasyon tungkol sa conflict), persuasion (pakikipag-ugnayan sa iba pang miyembro
ng pamilya upang masolusyunan ang conflict), bargaining (kaugnay dito ang lantad na pagkilala
sa nagaganap na conflict) at politics (kasama dito ang pagbuo ng koalisiyon upang maihiwalay
ang sinumang miyembro ng pamilya na nagdudulot ng conflict sa kagustuhan ng nakararami)
[(Hamilton at Catterall, 2008)]. Lumabas sa ginawang pag-aaral ni Belch et al. (1980) na ang
problem solving ang pinakapopular na pamamaraan upang masolusyunan ang conflict. Sa mag-
asawa naman, diskusyon at pangangalap ng mas maraming impormasyon tungkol sa conflict ang
kalimitang ginagawa upang masolusyunan ito. Ngunit upang maiwasan ang conflict, kalimitan pa
rin na adjustment o pagpapaubaya sa kagustuhan ng asawang may mas mataas na bargaining
power ang nangyayari (Commuri at Gentry, 2000 mula kay Hamilton at Catterall, 2008).
Katayuang pang-ekonomiya, mga pangunahing
Alalahanin at karanasan ng mga kababaihan
PAGSASAKAPANGYARIHAN SA PAGDEDESISYON NG MGA KABABAIHAN 12
Sa isang pag-aaral sa Bangladesh ni Nashid Kamal (2004, p.8) sa mga kababaihang
manggagawa sa pabrika, naipakita na karamihan sa mga ito ay gumagamit ng mga pamamaraan
ng pagpaplano ng pamilya. Bagama’t nangunguna pa rin ang tradisyonal na pamamaraan (58%),
ito naman ay sinundan na ng mga iba’t ibang modernong pamamaraan ng kontrasepsyon. Ang
paggamit ng hormonal methods gaya ng pills (17%) at injectables (17%) ang pinakapopular sa
mga kababaihang manggagawa. Ito ay nangangahulugan na ang mga kababaihang bahagi ng
lakas paggawa ay mas nakagagawa ng desisyon na gumamit ng kontrasepsyon sa kadahilanang
kailangan nilang kumita para sa kanilang pamilya. Ang mga kontrasepsyon ay hindi naman
ipinapamahagi ng libre ng mga pabrika kung saan sila nagtatrabaho. Ngunit upang hindi
maantala ang kanilang paghahanap-buhay, nagdedesisyon sila na gumamit ng pamamaraan ng
pagpaplano ng pamilya partikular na ang mga makabagong uri ng kontrasepsyon.
Sa karagdagan, ang isyu ng paggamit kontrasepsyon ay hindi isang pangunahing
alalahanin sa loob ng tahanan sa mga maralitang komunidad. Ayon sa pag-aaral ng United
Nations Populations Fund (2002), ang kasarian ay isa ring dahilan kung bakit nakararanas ang
mga kababaihan ng kahirapan maging sa loob ng kanilang tahanan. Ang mga maralitang
kababaihan, bahagi man o hindi bahagi ng lakas-paggawa ay kinakailangang gampanan ang
pagiging maybahay, kung saan hindi naman binabayaran ang kanilang pagtatrabaho. Ang mga
kababaihan ay natatali sa kanilang gampanin bilang mga tagapaglinis, tagapagluto, tagapag-alaga
ng mga anak at tagapag-asikaso ng lahat ng mga gawain sa tahanan. Kasama pa rito ang pag-
intindi sa mga sekswal na pangangailangan ng kanilang asawa kung kaya’t hindi na nila
mapagtuunan ng pansin ang sarili nilang pangangailangan partikular sa kanilang kalusugan.
Kung kaya’t dahil sa mga karanasang ito, ang isyu ng paggamit ng kontrasepsyon ay
nagkakaroon ng iba’t ibang implikasyon sa bawat babae. Dahil dito, aalamin ng pag-aaral na ito
PAGSASAKAPANGYARIHAN SA PAGDEDESISYON NG MGA KABABAIHAN 13
kung paano nga ba gumagawa ng desisyon ang mga kababaihan ng maralitang tahanan hinggil sa
kanilang paggamit ng kontrasepsyon.
Balangkas ng Pag-analisa
Layunin ng pananaliksik na ito na sagutin kung paano ba gumagawa ang mga maralitang
kababaihan ng desisyon sa kanilang paggamit ng kontrasepsyon. Maaaring lantad o patago ang
pagdedesisyon sa paggamit, may pagkakataon din na ipinagpapaliban ang pagdedesisyon na
gumamit, at maaari rin na kinakalimutan na lamang ng isang babae ang paggamit ng
kontrasepsyon. Mula sa pagtingin ng teoryang feminism, ang magiging batayan ng pananaliksik
na ito ay ang mga konsepto ng pagsasakapangyarihan o empowerment, agency, gender
subordination at rights-based approach to health. Sa konteksto ng paggawa ng desisyon,
ipapakita ang pagiging mas mababa ng mga kababaihan sa mga kalalakihan (gender
subordination). Ilalahad din na ang materyal na sitwasyon, karanasan at sirkumstansya ng mga
kababaihan ay may malaking epekto sa kanilang agency. Bukod pa rito, ang malayang paggawa
ng desisyon ng mga kababaihan sa mga bagay na may direktang epekto sa kanila, kabilang ang
paggamit ng kontrasepsyon ay titingnan bilang bahagi ng kanilang pangunahing karapatan.
Ilalahad din ng mananaliksik na ang pagiging empowered o pagiging martir ng isang babae (sa
konteksto ng paggawa ng desisyon sa paggamit ng kontrasepsyon) ay maiuugnay sa pagkakaiba
ng kanilang mga materyal na sitwasyon, karanasan at iba pang sirkumstansya. Ipinapakita sa
larawan sa ibaba ang naging daloy ng pag-aanalisa.
PAGSASAKAPANGYARIHAN SA PAGDEDESISYON NG MGA KABABAIHAN 14
Larawan 1. Balangkas ng Pag-aanalisa
Depinisyon ng Kontrasepsyon
Ang kontrasepsyon ay ang intensyonal na pag-iwas sa pagdadalang-tao, o paglilimita sa
bilang ng anak, sa pamamagitan ng iba’t ibang artipisyal na pamamaran upang hindi magbunga
ang pagtatalik. Kasama sa mga pamamaraang ito ang 1) pagpigil sa semilya ng lalaki na
makalapit sa itlog ng babae upang hindi ito magresulta sa pagdadalang-tao, dito kabilang ang
mga pamamaraan gaya ng condoms, diaphragms, at intrauterine devices (IUD), 2) pagpigil sa
obaryo ng babae na maglabas ng mga itlog sa panahon ng obulasyon upang maiwasan ang
fertilization, dito naman nabibilang ang mga birth control pills at injectables, at 3) sterilization o
ang pirmihang pagpigil sa kakayahan ng mga babae na magbuntis at ng mga lalaki na
makabuntis, gaya ng tubal ligation at vasectomy (U.S.NLM-NIH Website, 17 September 2012).
Sa karagdagan, ang bisa at pagiging epektibo ng mga uri ng kontrasepsyon na nabanggit ay hindi
magkakatulad sa lahat ng taong nais gumamit nito.
Feminism
PAGSASAKAPANGYARIHAN SA PAGDEDESISYON NG MGA KABABAIHAN 15
Ang magiging pagtingin sa pananalisik na ito ibabatay sa pagtingin ng teoryang
feminism. Ang feminism ay ang teorya na humahamon sa di pagkakapantay-pantay sa pagtingin,
pagtrato, at paghusga ng lipunan sa kasarian. Ang mga kababaihan ang pangunahing paksa sa
teorya na ito. Nais ng feminism na siyasatin at ibunyag ang patriarkal na pananaw ng lipunan
batay mismo sa mga karanasan at ayon mismo sa perspektibo ng mga kababaihan. Ang lipunan
na inaasam ng feminism ay isang lipunan na pumapabor sa pagkakapantay-pantay. Sumasang-
ayon din ang teoryang ito na hindi balanse ang pagtitimbang ng kapangyarihan sa pagitan ng
mga kababaihan at kalalakihan, at sa kakayahan ng mga kababaihan bilang aktibong miyembro
ng lipunan (Brayton, 1997). Tinutukoy rin ng feminism na ang mga karanasan ng bawat isa (lalo
na ng mga kababaihan) ay nakabatay sa objective na kondisyon. Ayon kay Patricia Maguire, ang
feminism ay “a belief that women universally face some form of oppression or exploitation; a
commitment to uncover and understand what causes and sustains oppression, in all its forms;
and, a commitment to work individually and collectively in everyday life to end all forms of
oppression” (mula kay Brayton, 1997).
Agency at Gender Subordination
Ang agency ay “an individual’s (or group’s) ability to make effective choices and to
transform those choices into desired outcomes” (The World Bank, 2011, p.150). Sa madaling
salita, ang agency ng mga kababaihan (women’s agency) ay ang kakayahan nilang gawin ang
mga bagay na kanilang pinili at napagdesisyunan. Sa pamamagitan ng agency, ang mga
kababaihan ay maaaring maging empowered. Samakatuwid, ang agency ay maipapaliwanag din
bilang isang proseso kung saan ginagamit ng mga kababaihan (at maging ng mga kalalakihan)
PAGSASAKAPANGYARIHAN SA PAGDEDESISYON NG MGA KABABAIHAN 16
ang mga oportunidad (gaya ng pag-unlad ng ekonomiya) upang magawa ang mga bagay o
gawain na kanilang napagdesisyunan (The World Bank, 2011, p.150).
Ang depinisyon naman ng gender subordination ay ang “institutionalized domination by
men of women” (Women in Politics Website, October 19 2012). Inilalahad ng konseptong
gender subordination na mas mababa ang katayuan at ang kakayahang magdesisyon ng isang
kasarian kaysa sa isa pang kasarian. Tinutukoy ng din ng konseptong ito na ang mga kababaihan
ang kasarian na nasa mas mababang katayuan kaysa sa mga kalalakihan. Isinasalarawan ng
konseptong ito ang mga kababaihan bilang oppressed, mahina at taga-sunod samantalang ang
mga kalalakihan naman bilang dominante, malakas at tagapagpasunod (Women in Politics
Website, October 19 2012).
Ang mga konsepto ng agency at gender subordination ay magiging mahalagang batayan
ng pananaliksik na ito. Nais ipakita ng pananaliksik na ito na ang agency ay apektado ng pang-
ekonomiya at iba pang materyal na sitwasyon ng mga kababaihan. Bukod pa rito, dahil sa gender
subordination, mas mababa ang mga kababaihan sa mga kalalakihan sa konteksto ng paggawa ng
desisyon. Isa sa mga pangunahing nakakaapekto sa agency ng mga kababaihan ay ang kanilang
kontrol sa rekurso, partikular sa kita o kabuhayan ng kanilang tahanan. Ang kababaihang may
kontrol sa kita at rekurso sa tahanan ay may mataas na bargaining power at may kalayaan na
magdesisyon at gawin ang mga bagay na kanilang napagdesisyunan. Ngunit hindi sa lahat ng
pagkakataon ay napapawalang-bisa ng kontrol sa kita ang gender subordination (The World
Bank, 2011, p.150). Nakakaapekto rin sa agency ng mga kababaihan ang kalayaan sa pagkilos sa
loob at labas ng tahanan at ang mga norms ng lipunan. Maaaring maging hadlang at maaring
limitahan ng mga panlipunang norms (social norms) ang mga kababaihan sa pagpili,
pagdedesisyon at pagkilos na gawin ang mga bagay na napagdesisyunan nila (The World Bank,
PAGSASAKAPANGYARIHAN SA PAGDEDESISYON NG MGA KABABAIHAN 17
2011, p.150). Gayunpaman, ang agency ng mga kababaihan ay mahalaga sapagkat ang
kakayahang gumawa ng mga epektibong desisyon at isagawa ang mga desisyon na ito ay
magdudulot ng kaginhawahan (well-being) sa mga kababaihan at sa mga taong nakapaligid sa
kanya (The World Bank, 2011, p.151).
Kontrasepsyon Bilang Isang Karapatan at
Paggawa ng Desisyon Patungkol sa Kontrasepsyon
Ayon sa World Health Organization, ang paggamit ng kontrasepsyon ay bahagi ng
karapatan ng isang tao sa maayos na serbisyong pangkalusugan. Ang konseptong rights-based
approach to health ay nakatuon sa pagsasapangyarihan ng indibidwal at komunidad, partikular
na dito ang mga marginalized. Kinakailangang malaman at maintindihan ng mga indibidwal at
grupo ang kanilang karapatan upang ito ay kanilang maisakatuparan. Bukod pa rito,
kinakailangan din ang partisipasyon at pagsusulong sa mga polisiya na nakabatay sa karapatang
pantao at rights-based approach to health. Sa paggamit ng kontrasepsyon, ang kagustuhan at
pang-reproduktibong pangangailangan ng isang tao ang pangunahing isinasaalang-alang.
Maraming nang pananaliksik ang naggigiit sa kahalagahan ng mga salik na nakakaapekto
sa paggawa ng desisyon ng mga kababaihan patungkol sa paggamit ng kontrasepsyon. Ilan sa
mga ito ang kahirapan o pang-ekonomiyang sitwasyon, kaalaman sa pagpaplano ng pamilya at
kapangyarihan ng asawa at ng iba pang tao. Subalit ang paraan kung paano gumagawa ng
desisyon ang mga kababaihan sa paggamit ng kontrasepsyon ay hindi nakabatay sa lahat ng mga
salik na ito. Ang mga kababaihan ay mayroong iba’t ibang sitwasyon at karanasan na
nakakaapekto sa kabuuan ng kanilang buhay kasama na dito ang kanilang pagdedesisyon. Kung
kaya’t mas magiging matibay ang pananaliksik na ito kung pagbabatayan ang pagkakaiba ng
PAGSASAKAPANGYARIHAN SA PAGDEDESISYON NG MGA KABABAIHAN 18
sitwasyon at sirkumstansya na nararanasan ng mga kababaihan na mas nagdedetermina kung
paano talaga sila gumagawa ng desisyon sa paggamit ng kontrasepsyon.
Bagama’t mahalaga ang komunikasyon sa pagitan ng mag-asawa sa pagpaplano ng
pamilya (Gubhaju, 2008, p.16) (Mahmood & Ringheim, 1996, p.4), ang desisyon ng mga
kababaihan na gumamit ng kontrasepsyon ay maaari nilang gawin ng walang kinokunsultang iba
bukod sa kanilang sarili. Maaari rin nilang gawin ang kanilang desisyon sa lantad o kaya ay sa
palihim na paraan. Ang mga kababaihang mulat sa kanilang karapatan, may sariling kita, o mas
nakaaangat ang katayuan ng pamilya kaysa sa asawa, ay kalimitang lantad na gumagawa ng
desisyon sa paggamit ng kontrasepsyon. Kung sinusubukan man ng mga kababaihang ito na
alamin ang pananaw ng asawa sa kanilang paggawa ng desisyon, ang pagsawalang-bahala ng
kanilang asawa sa usapin ay maaaring magresulta upang ituloy nila ang paggamit ng
kontrasepsyon. Ang mga kababaihang nagdedesiyon na lantad na gumamit ng kontrasepsyon ay
kumakatawan sa mga kababaihang empowered pagdating sa usapin ng paggamit ng
kontrasepsyon.
May mga kababaihan din naman na inililihim ang pagdedesisyon na gumamit ng
kontrasepsyon kahit na hindi nila alam ang pagtingin ng kanilang asawa sa isyung ito.
Samantala, ang bayolenteng reaksyon ng asawa ay maaaring maghikayat upang sila ay gumamit
ng kontrasepsyon sa palihim na paraan (covert). Sa mga tahanang may kakapusan sa pera o di
kaya ay sa mga tahanang maraming alalahanin ang mga kababaihan, may mga pagkakataon na
ipinagpapaliban o kaya ay kinakalimutan na lamang ang balak na paggamit ng kontrasepsyon.
Kinakatawan naman nito ang mga martir na kababaihan sa tahanan man o sa lipunan, na madalas
nagsasakripisyo ng kanilang mga pangangailangan para sa iba.
PAGSASAKAPANGYARIHAN SA PAGDEDESISYON NG MGA KABABAIHAN 19
Mababatid na ang kakayahang magdesisyon ng isang babae para sa kapakanan ng
kanyang sarili ay isang epektibong pagkilala sa kanyang kapangyarihan sa loob ng tahanan at
maging sa lipunan. Ang paggawa ng desisyon ng mga kababaihan patungkol sa paggamit ng
kontrasepsyon ay isa ring pagpapahayag na sila ay may karapatang pumili ng mga pamamaraan
na sa tingin nila ay angkop sa kanilang kalagayan. Sa pamamagitan ng pagdedesisyon na
gumamit ng kontrasepsyon, naipapabatid sa lipunan na ang mga kababaihan ay hindi lamang
dapat kinukonsulta sa mga usaping sila ang pangunahing stakeholder. Hindi dapat ipagkait sa
mga kababaihan ang pagdedesisyon para sa kanilang sarili at lalung-lalo nang hindi dapat
pangunahan ng ibang tao ang kanilang paggawa ng desisyon. Ang paggawa ng desisyon para sa
kanilang kapakanan ay isa sa mga pangunahing gawain na dapat matutunan at dapat isaalang-
alang ng mga kababaihan sapagkat ito ay lubos na makakaapekto sa kanilang kalusugan,
pamumuhay, kaligtasan at maging sa kanilang hinaharap (CEPnet Website, 28 June 2012).
Sa karagdagan, iba’t ibang ang kakayahan ng mga kababaihan na epektibong mamili at
magdesisyon, ngunit tipikal pa rin na mga kababaihan ang nasa mas mababang posisyon kaysa sa
mga kalalakihan sa konteksto ng pagdedesisyon. Dahil dito, kinakailangang pag-aralan ang
pagkakaiba ng sitwasyon ng mga kababaihan. Sa pag-aaral sa iba’t ibang karanasan at
sirkumstansya ng mga ito, mas maipapakita ang pagkakaiba at pagkakapareho sa sitwasyon nila.
Ang paggawa ng desisyon at pagkilos upang maisakatuparan ang ginawang desisyon ay
magdudulot ng pag-unlad sa mga kababaihan, na maaaring mag-angat sa katayuan ng mga
kababaihan sa tahanan at lipunan (The World Bank, 2011, p.151).
Pamamaraan ng Pananaliksik
PAGSASAKAPANGYARIHAN SA PAGDEDESISYON NG MGA KABABAIHAN 20
Disenyo ng Pananaliksik
Sa pananaliksik na ito, inalam kung paano gumagawa ng desisyon ang mga kababaihan
ng maralitang tahanan sa kanilang paggamit ng kontrasepsyon. Sinuri nito ang mga salik na
nakakaapekto sa kanilang paggawa ng desisyon, kung ano nga ba ang mga pangunahing
alalahanin ng mga maralitang kababaihan, sino-sino ba ang may papel sa paggawa nila ng
desisyon at ano nga ba ang mga karanasan nila na nakakaapekto sa kanilang pagtingin sa
paggamit ng kontrasepsyon. Naging angkop na disenyo ng pananaliksik ang case study sapagkat
ang mga kababaihan ng mga maralitang tahanan bilang unit of analysis, ay nangangailangan ng
detalyado at intensibong uri ng eksaminasyon (in-depth examination).
Sampling: Mga Kalahok sa Pananaliksik
Dahil na rin sa case study ang napiling disenyo ng pananaliksik, upang makakuha ng mas
maraming impormasyon na kapakipakinabang, ang ginamit na pamamaraan para sa sampling ay
ang purposive sampling. Ito ay napili rin sapagkat hindi magagawang pag-aralan ng
mananaliksik ang kabuuan ng populasyon ng mga maralitang kababaihan. Samakatuwid, ang
purposive sampling ay ginamit upang makakalap ng mga makabuluhang impormasyon at hindi
upang makagawa ng generalisasyon mula sa iilang sample ng populasyon. Ang mananaliksik ay
pumili ng anim (6) na kababaihan mula sa mga tahanan ng isang maralitang komunidad sa
Tandang Sora, Quezon City. Ang mga pangunahing datos na kinakailangan ng pananaliksik na
ito ay nagmula sa mga kababaihang napili. Bagama’t purposive sampling ang pamamaraang
gagamitin, gumawa ang mananaliksik ng isang talahayanan ng mga kategorya na kakailanganin
sa pagpili ng sample. Ang talahayanan na ito ay ginamit lamang ng mananaliksik na gabay sa
PAGSASAKAPANGYARIHAN SA PAGDEDESISYON NG MGA KABABAIHAN 21
pagpili ng mga kababaihan na maaaring maging sample. Narito ang talahayanan na naglalaman
ng mga kategorya:
Mga Kategorya na kakailanganin sa pagpili ng sample
Kasarian Babae
Estadong Sibil May asawa; Kasal man; hindi kasal; hiwalay
Socio-demographic
status
Lugar (Pook-Urban) Kasalukuyang lugar na pinaninirahan Bilang ng taon ng paninirahan sa lugar Dating lugar na pinaninirahan (kung mayroon man)
Edad (mula 18 hanggang 44 taong gulang) 18 – 26 (1 hanggang 3 ang bilang ng anak) (mahigit sa 3 ang bilang ng anak) 26 – 34 (1 hanggang 3 ang bilang ng anak) (mahigit sa 3 ang bilang ng anak) 35 – 44 (1 hanggang 3 ang bilang ng anak) (mahigit sa 3 ang bilang ng anak) Antas ng naabot na edukasyon Primary Secondary Vocational Tertiary Walang pormal na edukasyon
Pagkakaanib sa isang socio-civic na organisasyon Kasapi Kasaping pinuno Hindi Kasapi
Socio-economic
status
Uri ng paaralang pinasukan Pampubliko Pribado
Trabaho/Kita
Meron Meron, full-time Meron, part-time Wala
PAGSASAKAPANGYARIHAN SA PAGDEDESISYON NG MGA KABABAIHAN 22
Tirahan Kasama ang pamilya at magulang Kasama ang pamilya at magulang ng asawang lalaki Walang kasama, nangungupahan Walang kasama, sariling bahay May kasama, sariling bahay
Pangunahing taga-pagtaguyod ng pamilya, base sa kita:
Lalaki lamang Babae lamang Pareho, mas malaki ang kita ng lalaki Pareho, mas malaki ang kita ng babae Walang kita, umaasa sa magulang/pamilya ng lalaki Walang kita, umaasa sa magulang/pamilya ng babae Iba pang pinagkukunan ng kita
Batay sa talahanayan, nakahanap ang mananaliksik ng anim na kababaihan na may iba’t
ibang karanasan at pinagdaanan sa kanilang pamumuhay. Nasunod ang pagkakaroon ng
dalawang kinapanayam mula sa pagpapa-angkat na ginawa sa talahanayan batay sa edad. Tatlo
sa kanila ang mga simpleng maybahay samantalang ang tatlo naman ay mayroong trabaho o kaya
ay mayroong pinagkukunan ng kita. Ang anim na kababaihang kinapanayam ay nakaabot
hanggang sa pang-sekundaryang antas ng edukasyon at dalawa sa mga ito ang nakatapos
hanggang kolehiyo. Lahat din ng mga kababaihang kinapanayam ay gumagamit ng makabagong
uri ng kontrasepsyon bilang pamamaraan ng pagpaplano ng pamilya. Isa ang pinakamaliit na
bilang ng anak na mayroon ang mga kababaihan na kinapanayam at apat na anak naman ang
pinakamalaki. Apat sa mga kababaihan ang pasyente ng Health Center samantalang dalawa
naman sa mga ito ang bumibili ng sarili nilang kontrasepsyon. Lahat ng kinapanayam na babae
ay nakapisan pa rin sa kanilang asawa kasama ang kanilang mga anak. Tatlo sa kanila ang may
kasama pang ibang kamag-anak sa tahanan. Samakatuwid, mababatid na mayroong iba’t-ibang
karanasan at salik na maaaring makaapekto sa mga kababaihang kinapanayam bagama’t mula
lamang sila sa isang maliit na maralitang komunidad sa lungsod ng Quezon.
PAGSASAKAPANGYARIHAN SA PAGDEDESISYON NG MGA KABABAIHAN 23
Pagkolekta ng mga datos
Nagsagawa ang mananaliksik ng in-depth interview sa anim (6) na kababaihang nasa 23
hanggang 44 taong gulang noong Enero 22, 23, 27 at 28, 2013 sa isang komunidad sa Tandang
Sora, Quezon City. Ang panayam sa bawat isang babae ay magkakahiwalay na isinagawa. Sa
pangangalap ng datos sa Tandang Sora, nakipag-ugnayan din ang mananaliksik sa Tandang Sora
Community Health Care Center ng Family Planning Organization of the Philippines (FPOP),
isang non-government organization na naglalayong maipakalat ang kaalaman sa pagpaplano ng
pamilya sa buong Pilipinas.
Naging angkop na pamamaraan ang in-depth interview sa pag-aaral na ito sapagkat
naging open-ended at conversational ang daloy ng panayam kung saan nagsisilbing tagapakinig
ang mananaliksik. Bilang ang mga kababaihan sa maralitang tahanan ang paksa ng pananaliksik
na ito, kinailangan na sila ay komportable sa pagsasalaysay ng isang napakapersonal na isyu, ito
nga ay ang kanilang pagdedesisyon na gumamit ng kontrasepsyon. Dahil sa personal at
komportableng katangian ng mga pamamaraang ito, mas madaling nakapagbigay ng
impormasyon ang mga kinapanayam at mas nakaagapay ang mananaliksik sa mga pangyayaring
naganap sa buhay ng paksa.
Nakalahad sa ibaba ang isang talahayanang naglalaman ng mga kakailanganing datos,
batis na pagmumulan ng mga datos at pamamaraan ng pagkuha ng datos na inihanda para sa
gagawing pananaliksik.
Datos na Kailangan Pagmumulan Pamamaraan
Pangunahing alalahanin ng
mga kababaihan sa
maralitang tahanan
PAGSASAKAPANGYARIHAN SA PAGDEDESISYON NG MGA KABABAIHAN 24
Pag-analisa ng datos
Ang mga panayam na nakalap ay nai-record ng mananaliksik. Pagkatapos ay isinailalim
ang mga ito sa transcription. Sa ginawang transcription, naitala ang bawat salita (verbatim) at
iba pang reaksyon na nagmula sa kinapanayam. Sa ganitong paraan, mas nakita at naitasa ang
mga detalye na makakatulong sa pananaliksik. Ang mga datos mula sa transcriptions ay
ginamitan ng coding scheme upang magkaroon ng kategorya ang mga nakalap na impormasyon
at higit sa lahat, upang maihiwalay ang mga datos na mahahalaga at magagamit na impormasyon
mula sa mga hindi masyadong mahalaga at walang kaugnayan sa pananaliksik. Nakapagbigay ng
mga kategorya ang mananaliksik mula sa mga datos na nakalap at nakakuha rin ng mga
quotations mula dito. Pinagsikapan ding panatiliin ang daloy ng emosyon ng mga kinapanayam
sa ginawang pananaliksik. Ang anim na panayam ay indibidwal munang iaanalisa. Pagkatapos
Kaalaman ng mga
kababaihan sa paggamit ng
kontrasepsyon
Papel ng ibang tao sa
paggawa nila ng desisyon
Mga karanasan ng mga
kababaihan na nakakaapekto
sa kanilang paggawa ng
desisyon
Paggawa ng desisyon ng
mga kababaihan sa paggamit
ng kontrasepsyon
Pagtingin sa paggamit ng
kontrasepsyon ng mga
kababaihan bilang kanilang
karapatan
Anim (6) na napiling
kababaihan mula sa
maralitang tahanan na may
iba’t ibang karanasan at
kinakaharap na
sirkumstansya sa buhay
In-depth interview
PAGSASAKAPANGYARIHAN SA PAGDEDESISYON NG MGA KABABAIHAN 25
nito, sa pamamagitan ng cross-case analysis, nakita ang pagkakahambing at pagkakaiba ng mga
datos mula sa mga kinapanayam.
Pang-Etikang Pagsasaalang-alang sa Pananaliksik
Ang paggamit ng kontrasepsyon ay isang napakapersonal na isyu sa mga kababaihan.
Bukod pa rito, hindi tanggap ng lahat ng tao sa bansa ang paggamit ng kontrasepsyon bilang
pamamaraan ng pagpaplano ng pamilya. Kung kaya’t isang mahalagang tungkulin ng
mananaliksik ang maproteksyunan ang mga impormasyong ibabahagi ng mga taong maglalahad
ng kwento at karanasan sa gagawing pananaliksik. Ang pagpapanatiling confidential ng
pagkakakilanlan ng mga taong naging bahagi ng pananaliksik ay sinigurado rin. Gagamit ang
mananaliksik ng alyas kung hindi pinahintulutan ng mga naging bahagi ng pananaliksik na
gamitin ang kanilang pangalan upang hindi mailahad ang kanilang pagkakakilanlan. Isang
napakapersonal na isyu ang pagdedesisyon patungkol sa paggamit ng kontrasepsyon kaya
mamarapatin ng mananaliksik na hindi mailagay sa alanganin ang pagkakakilanlan, hanapbuhay,
pananampalataya, at pulitikal na pananaw ng mga taong naging bahagi ng pananaliksik. Ang
mga kababaihan na lihim na gumagamit ng kontrasepsyon na magiging bahagi ng gagawing
pananaliksik ay maaaring mailagay sa alanganin kung makakarating sa kanilang mga asawa ang
mga mangyayaring panayam. Kung kaya’t sisiguraduhin ng mananaliksik na hindi makakarating
sa ibang tao lalo’t higit sa mga asawa ng mga kababaihang naging bahagi ng pananaliksik ang
mga datos na makakalap. Kung hindi naman papayag ang kalahok na irekord ang gagawin
niyang paglalahad, ito ay igagalang ng mananaliksik at isusulat na lamang nito ang mga
impormasyong ibabahagi. Bukod pa rito, tiniyak ng mananaliksik na lahat ng mga nakalap na
PAGSASAKAPANGYARIHAN SA PAGDEDESISYON NG MGA KABABAIHAN 26
datos at impormasyon lalo na ang mga personal at sensitibong bagay ay mananatiling ekslusibo
para lamang sa pananaliksik na ito.
Sinigurado rin ng mananaliksik na malaya ang mga maglalahad ng impormasyon na
umurong kahit anong oras at kahit saang bahagi ng ginagawang pag-aaral. Kung gugustuhin ng
mga naging bahagi ng pananaliksik, sila ay bibigyan ng kopya ng magiging resulta ng pag-aaral.
Makailang ulit kukumpirmahin ng mananaliksik ang pagpayag ng mga magiging kalahok sa
gagawing pag-aaral upang makasigurado na kusang loob nila itong gagawin (Tingnan ang
inihandang free and prior consent form sa Apendiks).
Resulta
Kontrasepsyon at Pagpaplano ng Pamilya
Sa isinagawang pag-aaral, lumalabas na gumagamit ang mga kababaihan ng
kontrasepsyon bilang pamamaraan ng pagpaplano ng pamilya upang magkaroon sila at kanilang
pamilya ng mas maginhawang pamumuhay. Kaugnay nito, iniiwasan din ng mga kababaihan ang
magkaroon ng sunod-sunod na anak dahil sa hirap ng buhay sa panahon ngayon at para na rin sa
ikabubuti ng kanilang sarili. Ayon sa 33-anyos na babaeng may dalawang anak, gumagamit siya
ng pills sa loob ng siyam na taon:
“Para sa pamilya, kasi ayoko dumami ang anak, sa asawa ko, para hindi
rin siya mahirapan diba, kasi yung trabaho niya, hindi rin naman siya
stable…tapos, ayun para sa sarili ko para hindi agad ako mahirapan magpalaki
ng bata.”
Nang tanungin naman ang 44-anyos na babaeng may tatlong anak, gumagamit siya ng
injectables noong hindi pa siya ligated:
PAGSASAKAPANGYARIHAN SA PAGDEDESISYON NG MGA KABABAIHAN 27
“Para sa sarili, sa pamilya, para mabigyan sila ng magandang future,
kasi kung sunod-sunod yun mahirap magpalaki ngayon saka sa sarili mo, kasi
syempre kapag lagi kang may anak, mag-aalaga ka diba, so magiging losyang ka,
para rin sa kalusugan mo, malakas ka, mabigay mo sa mga anak, para sa
pagtanda mo, malakas ka pa rin, kumbaga mapatapos mo talaga sila ng pag-
aaral.”
Nabatid din sa isinagawang pag-aaral sa isang maliit na komunidad sa Tandang Sora na
kalimitang nakakakuha ng kaalaman sa pagpaplano ng pamilya partikular sa paggamit ng
kontrasepsyon ang mga kababaihan mula sa health center sa kanilang lugar. Mababatid na
mayroong libreng family planning services ang mga health centers sa lungsod ng Quezon.
Kasama sa libreng serbisyo ang konsultasyon, pagtuturo sa paggamit ng mapipiling
kontrasepsyon at maging ang kontrasepsyon na gagamitin ng mga kababaihan. Ang pag-aalok sa
pagpaplano ng pamilya ay kalimitang nagiging suhestiyon sa mga buntis na nagpapatingin sa
health center. Ayon pa nga sa 23-anyos na babae na may isang anak, “mahilig kasi sila (health
workers) na mag-alok eh, ewan ko kung training talaga nila yun, nag-aalok sila ng family
planning sa mga nagpapacheck-up na buntis”.
Sa karagdagan, kinikilala ng mga kababaihan ang paggamit ng kontrasepsyon bilang
isang karapatan base na rin sa kanilang boluntaryong pagpayag at pagpili sa kung ano mang
kontrasepsyon ang kanilang nais na gamitin. Batay sa pahayag ng 23-anyos na babaeng may
isang anak kinikilala niyang karapatan ang paggamit ng kontrasepsyon ngunit nakabatay ito sa
pagpili at kagustuhan ng taong gagamit, aniya, “bawat tao, bawat babae pwede, nasasayo naman
yun diba? Choice mo naman kung gusto mo talaga siya”. Dagdag pa rito, naniniwala sila na
karapatan nila ang mamili dahil katawan nila ang pangunahing apektado sa gagawin nilang
paggamit ng kontrasepsyon. Inuusisa lamang ng mga kababaihan ang kontrasepsyon na kanilang
napili kung kaya’t kalimitang ito lamang ang alam nilang gamitin. Anuman ang kahihinatnan at
maging epekto ng kontrasepsyon sa kanilang katawan ay kanilang tatanggapin basta mayroong
PAGSASAKAPANGYARIHAN SA PAGDEDESISYON NG MGA KABABAIHAN 28
katiyakan ang bisa nito bilang kontrasepsyon. Dagdag pa ng 33-anyos na babaeng may dalawang
anak na gumagamit ng pills:
“Bahala na kung baga, kung anuman yung magiging ano man nun, siguro
haharapin mo na lang kung anong magiging epekto diba, pero maraming nagsabi
sa akin, halimbawa sa center, na mas safety naman yung pagpi-pills kesa sa mga
withdrawal ganun.”
Kababaihan: Full-time at All-around sa Tahanan
Bukod sa usapin ng pagpaplano ng pamilya, lumalabas sa ginawang pag-aaral na
maraming alalahanin at gampanin ang mga kababaihan sa tahanan na mas pinagtutuunan pa nila
ng pansin. Kabilang dito ang pag-aasikaso sa mga anak at asawa, pag-intindi sa mga gawaing-
bahay at pagba-budget para sa pagkain at iba pang mga bayarin sa tahanan. Dahil nga ibinatay sa
mga maralitang kababaihan ang pag-aaral na ito kalimitang kakapusan sa pera at pagkain ang
pangunahin nilang hinaing, ayon sa 44-anyos na babaeng may apat na anak, “ang hirap mag-
budget ‘pag walang iba-budget”. Kalimitan din na ang mga kababaihan ang gumagawa ng lahat
ng gawaing bahay sa tahanan, may trabaho man sila o wala. Sa ginawang pag-aaral, kalimitang
tinutulungan sila ng kanilang asawa sa pagluluto, ngunit sa kanila pa rin ang mabigat na trabaho
gaya ng paglalaba, paglilinis ng bahay at pag-aasikaso sa mga anak. Ayon sa 39-anyos na
babaeng may tatlong anak, bukod sa kanyang trabaho mula Lunes hanggang Biyernes siya pa rin
ang “naglalaba, asawa ko sa luto, yan dun siya, pero ako laba, asikaso sa kanila sa umaga, alas
kwatro ng madaling araw gigising ako, tapos sa gabi siya rin magluluto, assignment naman (ng
mga anak)”. Mababatid dito na full-time at all-round ang pagiging ina at asawa ng mga
kababaihan. Bukod pa sa mga ito, kinakailangan pa rin nilang intindihin ang paggamit ng
kontrasepsyon. Ang mga kababaihang gumagamit ng kontrasepsyon na nagmumula sa health
center, kung minsan ay bumibili pa sa botika kapag wala pang suplay ang health center o kaya
PAGSASAKAPANGYARIHAN SA PAGDEDESISYON NG MGA KABABAIHAN 29
ay kung hindi sila nakakabalik agad sa iskedyul nila. Nagmumula naman sa sariling kita ng mga
kababaihang naghahanap-buhay na hindi pasyente ng health center ang pambili nila ng
kontrasepsyon gaya ng pills at injectables.
Sa paggawa ng desisyon ng mga kababaihan sa tahanan, lumabas sa ginawang pag-aaral
na ang mga desisyong nakakaapekto sa pamilya maliban sa usapin ng kontrasepsyon ay
ginagawa ng mga kababaihan kasama ang kanilang asawa. Ang mga pangunahing alalahanin sa
tahanan gaya ng gastusin at pag-aaral ng mga anak ay pinag-uusapan at pinagdedesisyunan
nilang dalawa. Ayon nga sa 25-anyos na babaeng may apat na anak:
“Kasi pangit naman yung ako lang yung nakakaalaman diba, pag may
ano, kunwari pag meron akong ano sa bahay, sinasabi ko sa asawa ko na ganito
ang gawin namin. Asawa ko talaga yun, kasi kung ano yung desisyon namin,
kaming dalawa yun ng asawa ko.”
Dagdag din ng 44-anyos na babaeng may apat na anak:
“lahat syempre kinukonsulta ko, hindi pwedeng ako lang yung
magdedesisyon, kelangan lahat alam niya, para just in case may magiging
problema sa mga anak niya, alam niya rin, hindi yung ako lang diba.”
Bukod pa rito, isinasaalang-alang din ng mga kababaihan ang mga payo at saloobin ng
iba pa nilang kasama sa tahanan gaya ng biyenan, magulang at iba pang kamag-anak sa kanilang
mga desisyon. Kinukonsulta nila ang mga ito sa kanilang paggawa ng desisyon ngunit nasa
kanila pa ring kagustuhan kung susundin ba nila ang mga payo ng mga ito. Ayon nga sa 25-
anyos na babaeng may apat na anak na kasama ang kanyang ina sa tahanan, sinasabi niya dito
ang kanilang mga gagawing desisyon. Dagdag pa niya, “sinasabi ko sa mama ko yun kaso ang
katwiran ng mama ko, kaming mag-asawa ang dapat magdesisyon, kasi ayaw din ng mama ko
na makialam na pag-ano eh, mahirap daw magkaroon ng sisihan”. Isinalarawan naman ng 23-
anyos na babaeng kasama sa bahay ang magulang ng kanyang asawa na humihingi sila ng
opinyon kahit may desisyon na talaga sila. Aniya, “may desisyon na talagang kami pa rin, pero
PAGSASAKAPANGYARIHAN SA PAGDEDESISYON NG MGA KABABAIHAN 30
yung sa bahay ayos lang kami, yung pakikisama syempre”. Sa karagdagan, naiaangat ng
pagkakaroon ng sariling kita ng mga kababaihan ang kanilang kakayahang magdesisyon
patungkol sa mga usapin sa tahanan kasama na rito ang sa paggamit ng kontrasepsyon.
Nagkakaroon ng kalayaan ang mga kababaihan na gawin ang mga bagay na gusto nila nang hindi
na kinakailangang konsultahin pa ang kanilang asawa ngunit prayoridad pa rin ng mga
kababaihan ang mga pangangailangan ng kanilang pamilya. Pinatunayan ito ng mga pahayag ng
kababaihang kinapanayam, ayon sa 39-anyos na babaeng may tatlong anak, may mga binibili
siya na hindi na niya ipinapaalam sa kanyang asawa basta ito ay galing sa kanyang sariling kita.
Aniya, “hindi na niya alam kapag mga sa sahod ko na lang, syempre… sasabihin na lang nun
‘o, may bago naman’. So hindi ko na kailangan ipaalam, huwag lang yung mga mahal kasi
magagalit siya”. Samakatuwid, may mga bagay silang pinagdedesisyunan na hindi na nila
ipinagpapaalam pa sa kanilang asawa gaya ng pagbili ng mga bagay na gusto nila mula sa sarili
nilang kita. Sabi ng 23-anyos na babaeng may isang anak na nagtatrabaho bilang isang
kasambahay, sa pagkakaroon niya ng sarili kita siya ay “parang may sariling kagustuhan, kasi
nga pareho kaming may ano hawak na pera ganun, pero minsan yung kagustuhan din namin na
ng isa't isa nasusunod, kasi okay lang samin,(dahil) yun sa sahod namin”.
Pagdedesisyon at Pananaw Patungkol sa Kontrasepsyon
Sa ginawang pag-aaral, kapansin-pansin na gumagawa ng desisyon patungkol sa
paggamit ng kontrasepsyon ang mga kababaihan ng lantad sa kanilang mga asawa at iba pang
kasama sa bahay. Sila lamang ang gumagawa ng desisyon patungkol sa paggamit ng
kontrasepsyon kung kaya’t ang responsibilidad ng pagpaplano ng pamilya ay sa kanila lamang
nakaatang. Kaugnay nito, bagama’t sumasang-ayon sa usapin ng pagpaplano ng pamilya ang
PAGSASAKAPANGYARIHAN SA PAGDEDESISYON NG MGA KABABAIHAN 31
mga kalalakihan upang magkaroon ng maayos na pamumuhay ang kanilang pamilya, lumabas na
tinitingnan nila ang paggamit ng kontrasepsyon bilang isang bagay na hindi na nila dapat
pakialaman. Kapag tinatanong ng mga kababaihan ang kanilang asawa patungkol sa paggamit ng
kontrasepsyon, “sige, okay lang” ang nagiging tugon ng mga ito at hindi na sila nagtatanong ng
iba pang impormasyon o implikasyon tungkol sa mahalagang desisyong ito na gagawin ng
kanilang asawang babae. Nagiging sarili nila ang paggawa ng desisyon patungkol sa
kontrasepsyon sapagkat kalimitang walang alam sa paggamit ng kontrasepsyon ang kanilang
mga asawa o hindi kaya ay isinasawalang-bahala lamang ng kanilang asawa ang kanilang
paggamit ng kontrasepsyon. Sabi nga ng 44-anyos na babaeng may apat na anak, “ah, sa
pagpipills naman kasi di siya nakikialam dun eh, bahala ka basta kaya mo, syempre dapat diba
hindi mo talaga nakakalimutan yun, para sa kanya kung mas nakakabuti, okay lang”. Dagdag pa
ng 25-anyos na babaeng may apat din na anak, “kung hindi ako magpa-family planning dadami
ang anak namin, syempre siya(asawa) rin ang mahihirapan, sabi ko nga 'ikaw rin ang
mahihirapan' dadami sa pagpapaaral, pagpapakain, isa pang mahirap kapag maysakit (ang
mga anak)”.
Sa mga panayam na isinagawa, nabanggit ng mga kababaihan na wala namang
pagkakataon na nagkaroon nang hindi pagkakaunawaan sa pagitan nilang mag-asawa na nag-
ugat sa paggamit ng kontrasepsyon. Hinggil naman sa usapin ng hindi pagsang-ayon ng kanilang
asawa sa paggamit ng kontrasepsyon, magkakaiba ang pananaw ng mga kababaihan kung
itutuloy pa rin nila ang paggamit ng kontrasepsyon. Ayon sa 33-anyos na babae na may
dalawang anak, itutuloy pa rin niya ang paggamit ng kontrasepsyon kahit ipagbawal pa ito ng
asawa niya sa kadahilanang siya ang magbubuntis at mahihirapan sa pag-aalaga at pagpapalaki
ng bata. Dagdag pa niya, “syempre katawan ko yun, ako yung mahihirapan ‘pag dumami yung
PAGSASAKAPANGYARIHAN SA PAGDEDESISYON NG MGA KABABAIHAN 32
anak ko, hindi naman siya yung magbubuntis eh”. Kaugnay nito, may isa rin sa mga
nakapanayam na naniniwala na maidadaan sa paliwanag ang mga asawa pagdating sa isyu ng
paggamit ng kontrasepsyon. Ayon sa kanya:
“Magko-contraceptives pa rin ako, kahit ayaw niya wala siyang
magagawa. Pero ipapaliwanag mo pa rin sa kanya kung ano din naman yun diba,
paano mo kukumbinsihin yung mga asawa? Hindi rin kasi nila alam. Hindi sila
masyadong aware doon, mas aware kasi ang mga babae pagdating talaga sa
contraceptives, kaya ang gawin mo, halimbawa, hindi kayo magkasundo, magka-
ano sa desisyon, magpaliwanag ka, baka sakaling maintindihan. Papayag din
yun.”
Iba naman ang naging tugon ng isang babaeng kinapanayam tungkol sa hindi pagsang-
ayon ng asawa sa paggamit ng kontrasepsyon. Kung hindi sasang-ayon ang kanyang asawa sa
paggamit ng kontrasepsyon, susundin niya ito dahil sabi niya:
“Kasi ayoko rin na pagdating ng panahon, ayon ang pag-aawayan namin
mag-asawa, pag ayaw niya syempre sa kanya ka makinig, isa pa, siya naman ang
nagpapakain di’ba? Pangit naman na may maririnig ka pa na ‘kapag naman
ikaw, ano gusto mo ikaw lang ang masusunod, pag ako ayaw mo’.”
Epekto ng Paggamit ng Kontrasepsyon ng mga Kababaihan
sa Kanilang Pamumuhay at Pamilya
Batid ng mga kababaihan na kinapanayam na nakatulong sa kanila at sa pamumuhay ng
kanilang pamilya ang paggamit nila ng kontrasepsyon. Ang mga sirkumstansya gaya ng
kahirapan, kalusugan at kapakanan ng kanilang pamilya lalung-lalo na ng kanilang mga anak ang
dahilan ng mga kababaihan sa pagpapatuloy nila ng paggamit ng kontrasepsyon. Nakapagdulot
ng mas magaang pamumuhay ang hindi nila pagkakaroon ng sunod-sunod na anak. Ayon pa nga
sa 39-anyos na babae na may tatlong anak, “kahit papano hindi kami mayaman, nakakaraos
naman, hindi naman hikahos na pati gatas, pati asin, iisipin mo pa kung paano mo mabibili”.
Dagdag pa ng 33-anyos na babaeng may dalawang anak, “kasi hindi kami nahihirapan masyado
PAGSASAKAPANGYARIHAN SA PAGDEDESISYON NG MGA KABABAIHAN 33
hindi katulad nung mga nakikita namin. Kasi kapag may nagustuhan yung anak namin,
halimbawa, 'ma, bili mo ako ng ganyan', napag-iipunan, nabibili naman”.
Diskusyon
Kakayahang Magdesisyon at Paggawa ng Desisyon
Ang pagdedesisyon ng mga kababaihan patungkol sa paggamit ng kontrasepsyon ay
isang mahalagang usapin na makakaapekto hindi lamang sa kanyang sarili kundi sa kabuuan na
rin ng kanyang pamilya at maging sa kanilang kinabukasan. Sa pagdedesisyon ng mga
kababaihan na gumamit ng kontrasepsyon, ang kapakanan pa rin ng kanilang pamilya ang
kanilang prayoridad kahit na hindi naman masyadong napapansin at pinapahalagahan ang
ginagawa nilang ito. Hinggil dito, ipinapakita na ang agency nila, o ang kakayahan nilang gawin
ang mga bagay na kanilang pinili at napagdesisyunan ay isinasakatuparan nila upang magkaroon
ng maayos na pamumuhay ang kanyang pamilya. Kung kaya’t kahit na naisasakatuparan ng
isang babae ang kanyang agency, hindi naman nangangahulugan na ginagawa lamang niya ito
para sa kanyang kapakanan. Dahil dito, nagmimistulang sila na lamang ang mayroong
responsibilidad sa pagpaplano ng pamilya. Bilang mga ilaw ng tahanan, maraming mga
alalahanin at gampanin ang mga kababaihan na kailangan nilang tugunan sa pang-araw-araw,
may trabaho man sila o wala. Dagdag pa sa mga gawaing ito ang paggamit nila ng
kontrasepsyon. Pills ang karaniwang kontrasepsyon na ginagamit ng mga kinapanayam kung
kaya’t kinakailangang hindi nila nakakalimutang uminom nito sa pang-araw-araw. Bukod pa
rito, kinakailangan din nilang regular na bumalik sa health center upang kumuha ng suplay nito o
hindi kaya ay kinakailangan nilang bawasan ang kanilang kinikita (kung nagtatrabaho man sila)
PAGSASAKAPANGYARIHAN SA PAGDEDESISYON NG MGA KABABAIHAN 34
o ang budget sa tahanan (kung wala silang hanapbuhay) kapag kinulang ang libreng
kontrasepsyon upang maiwasan nila ang hindi planadong pagbubuntis. Ang tahanan ay
repleksyon ng ating lipunang patriarkal, makikita sa mga gampanin at alalahanin ng mga
kababaihan dito ang gender subordination kung saan sila ay nasa mas mababang kalagayan
kaysa mga kalalakihan.
Iba’t ibang Salik sa Pagdedesisyon ng mga Kababaihan
Pagdating naman sa usapin ng paggawa ng desisyon sa tahanan gaya ng mga gastusin at
pag-aaral ng mga anak, lumalabas na magkasama itong ginagawa ng mag-asawa. Dahil mga
kababaihan ang karaniwang nakakaalam ng mga suliranin at iba pang pangyayari sa mga
miyembro ng pamilya at sa tahanan, ikinukonsulta niya sa kanyang asawa ang mga bagay na ito
bago siya gumawa ng desisyon dahil na rin sa paniniwala nila na dapat talagang pagdesisyunan
ng mag-asawa ang anumang usapin na may kaugnayan sa pamilya. Kung susuriin ang
pagpaprayoridad sa mga suliranin sa tahanan, makikita na hindi kabilang dito ang paggamit ng
kontrasepsyon ng mga kababaihan. Kung kaya’t ang pagdedesisyon, kung gagawin ng mag-
asawa ay hindi magiging pabor sa sitwasyon ng mga kababaihan sa tahanan bilang hindi naman
sila ang prayoridad dito. Malinaw na ang pagpaprayoridad sa mga suliranin ay isang
manipestasyon ng subordinasyon sa kasarian. Kaugnay nito, nagiging daan din ang pagkakaroon
ng sariling kita ng mga kababaihan upang tumaas ang kanilang bargaining power sa paggawa ng
desisyon sa tahanan. Bukod pa rito, mayroong pagpapahalaga ang mga kababaihan sa opinyon at
pakiramdaman ng iba pang mga kasama sa tahanan gaya ng kanilang biyenan, bayaw at hipag.
Ang pagsasabi nila ng mga bagay na may kinalaman sa kanilang pamilya ay hindi naman
nangangahulugan na susundin nila ang mga payo ng mga ito. Ginagawa nila ito bilang respeto at
PAGSASAKAPANGYARIHAN SA PAGDEDESISYON NG MGA KABABAIHAN 35
pakikisama na rin sa mga taong nabanggit. Batay sa iba’t ibang karanasan ng mga kababaihan,
masasabi na mayroon pa ring epekto ang mga taong ito sa pagsasakapangyarihan ng
pagdedesisyon ng mga kababaihan kahit na hindi man nila sinusunod ang mga payo nila.
Isang malaking salik sa kaalaman ng mga kababaihan patungkol sa pagpaplano ng
pamilya ang pagkakaroon ng mga libreng serbisyong kaugnay nito mula sa health center ng
Lungsod ng Quezon. Dahil dito, nalaman at naintindihan ng mga kababaihan na karapatan nila
bilang isang babae at bilang isang ina ang gumamit ng kontrasepsyon na kanilang napili.
Kalimitan naman na ang napipiling kontrasepsyon ng mga kababaihan ang kanila lamang
inuusisa kung kaya’t wala rin silang sapat na kaalaman sa iba pang uri ng kontrasepsyon at sa
mga maaaring maging epekto nito sa pangmatagalang paggamit. Kaugnay nito, maaaring may
kawalan ng informed choice sa mga kababaihang inaalok ng mga serbisyong para sa pagpaplano
ng pamilya. Kung kaya’t nakikita ang pag-aalok ng mga health workers ng mga pamamaraan ng
pagpaplano ng pamilya bilang malaking impluwensiya sa paggawa ng desisyon ng mga
kababaihan patungkol sa paggamit ng kontrasepsyon.
Ang pananaw ng asawang lalaki sa paggamit ng kontrasepsyon ay mahalagang salik sa
paggawa ng desisyon ng mga kababaihan. Kahit na naniniwala ang lahat ng kababaihang
kinapanayam na karapatan nila ang paggamit ng kontrasepsyon at bagama’t walang naitalang
kaso ng hindi pagkakaunawaan patungkol sa paggamit ng kontrasepsyon sa pagitan ng mag-
asawa, ang usapin ng hindi pagsang-ayon ng asawa sa paggamit ng kontrasepsyon ay nagdulot
ng iba’t ibang implikasyon sa mga kilos at desisyon na gagawin nila. Ang mga kababaihan na
isinasapraktika ang kanilang karapatan at nagsabing “katawan ko yun, karapatan ko yun” ay
gagamit pa rin ng kontrasepsyon kahit na hindi pumayag ang kanilang asawa. Upang maresolba
ang nasabing conflict, may babae naman na nagsabing idadaan niya sa pagpapaliwanag sa
PAGSASAKAPANGYARIHAN SA PAGDEDESISYON NG MGA KABABAIHAN 36
kanyang asawa ang usapin dahil sa hindi naman mulat ang mga lalaki pagdating sa usapin ng
kontrasepsyon. Ang mga kababaihang ito ay nagpapakita ng pagsasapraktika ng kanilang agency
sa pamamagitan ng pagdedesisyon na nagdudulot upang sila ay maging empowered sa mga iba
pang usapin sa tahanan. Mayroon namang nagsabi na hindi na lamang niya itutuloy ang
paggamit kung ayaw ng kanyang asawa dahil ayaw niyang pagmulan ito ng away at dahil sa ang
asawa naman niya ang nagpapakain sa kanila. Ayon sa literatura, ang pangyayaring nabanggit ay
nagsisilbing manipestasyon ng pagiging martir ng kababaihan sa mga usapin patungkol sa
kanilang sarili at kalusugan. Ang pagiging martir na ito ay nagpapakita ng subordinasyon ng
kanilang kasarian. Bukod pa rito, naipakita rin nito na ang desisyon ng mga kababaihan
patungkol sa paggamit ng kontrasepsyon ay depende sa relasyon na mayroon ang mag-asawa.
Pagsasakapangyarihan ng Pagdedesisyon
Ang lantad na paggawa ng desisyon sa paggamit ng kontrasepsyon ng mga kababaihan ay
nagpapakita ng pagiging empowered nila at pagsasapraktika nila ng kanilang agency. Ngunit
dahil sa pagsasawalang-bahala ng kanilang asawa sa pagdedesisyon patungkol sa paggamit ng
kontrasepsyon, mistulang hindi mahalagang desisyon ang bagay na ito. Nakakaapekto rin ang
pagtingin ng mga kababaihan sa kaalaman ng kanilang asawa sa kontrasepsyon sa kanilang
pagdedesisyon. Sa tingin nila, walang alam ang kanilang asawa tungkol sa bagay na ito kung
kaya kinakailangan nilang magdesisyon mag-isa dahil para rin naman ito sa ikabubuti ng
kanilang pamilya. Kahit na kababaihan ang pangunahing stakeholder sa paggamit ng
kontrasepsyon, hindi ito nangangahulugan na sila na lamang ang dapat maging responsable sa
bagay na nakakaapekto hindi lamang sa kanila kundi pati na rin sa kanilang asawa at buong
pamilya. Dagdag pa rito, ang pagiging empowered ng mga kababaihan sa pamamagitan ng
PAGSASAKAPANGYARIHAN SA PAGDEDESISYON NG MGA KABABAIHAN 37
pagsasakapangyarihan at pagsasapraktika ng kanilang agency ay kanilang isinasagawa humigit
sa lahat para sa ikagiginhawa ng kanilang pamilya at bago pa man bilang pangsarili nilang
kagustuhan.
Konklusyon
Ang paggamit ng kontrasepsyon ay isang mahalagang bagay para sa mga kababaihan.
Ginagawa nila ito humigit sa lahat para sa kanilang pamilya bago pa sa kanilang sarili. Dapat
tingnan ang bagay na ito bilang isang malaking hakbang upang magkaroon ng mas maginhawa at
mas maayos na katayuan ang mga kababaihan sa kanilang tahanan at maging sa ating lipunan.
Kung kaya’t kinakailangang pahalagahan ang paggawa ng desisyon ng mga kababaihan sa bagay
na ito. Naging epektibong batayan ng pananaliksik ang feminism kabilang ang mga konsepto ng
agency, gender subordination at empowerment at ang rights-based approach to health. Mula sa
mga balangkas na ito, naipakita ang mga kasagutan sa tanong ng pananaliksik na, “paano
gumagawa ng desisyon ang mga kababaihan ng maralitang tahanan patungkol sa kanilang
paggamit ng kontrasepsyon?”. Batay na rin sa mga nakalap na datos at pag-aanalisa, naging
konklusyon ng pananaliksik ang mga sumusunod:
1) Lantad man o palihim, ang paggawa ng desisyon ng mga kababaihan patungkol sa
kontrasepsyon ay isang komplikadong bagay. Ito ay dahil na rin sa dami ng kailangan nilang
isaalang-alang bago pa sila makagawa ng desisyon, kabilang na dito ang mga alalahanin at
gampanin sa tahanan, opinyon ng ibang tao sa kanilang magiging desisyon at mga karanasan na
natatangi sa kanilang buhay bilang mga ina at mga babaeng sadlak sa karalitaan. Ipinapakita rin
ng pananaliksik na hindi sapat na batayan ng pagsasakapangyarihan at pagsasapraktika ng
PAGSASAKAPANGYARIHAN SA PAGDEDESISYON NG MGA KABABAIHAN 38
kanilang ahensya ang lantad nilang pagdedesisyon patungkol sa paggamit ng kontrasepsyon. Ito
ay dulot na rin ng kawalan ng pakialam ng kanilang asawa sa kanilang paggamit ng
kontrasepsyon dahil hindi naman tinitingnan bilang isang mahalagang desisyon o di kaya ay
isang mahalagang gawain sa tahanan ang paggamit nila ng kontrasepsyon.
2) Sa lungsod ng Quezon kung saan isinagawa ang pananaliksik, ang impluwensiya ng health
center sa paggawa ng desisyon ng mga kinapanayam na kababaihan ay mas malaki kaysa sa
impluwensiya ng ibang tao gaya ng kanilang biyenan o kaya ay ng ibang midyum gaya ng mass
media. Bilang mga kababaihan na nagmula sa maralitang tahanan, ang pagiging libre ng
kontrasepsyon ay isang malaking kaginhawahan sa kanila. Ngunit kahit na kinikilala ng mga
kababaihan ang paggamit nila ng kontrasepsyon bilang isang pangunahing karapatan, mayroong
pa ring kawalan ng informed choice dahil na rin sa kakulangan nila ng komprehensibong
kaalaman tungkol sa bagay na ito. Kung ilalapat ang bagay na ito sa konteksto ng ating bansa
pagdating sa usapin ng reproductive health, maaaring maging isyu rin ang kawalan ng informed
choice kung kaya’t kailangan maipatupad ang isang komprehensibong programa ng pamahalaan
patungkol sa reproductive health, populasyon at pagpaplano ng pamilya para sa ikabubuti ng
mga mamamayan higit sa lahat ng mga kababaihan. Sa karagdagan, makabubuti sa katayuan ng
mga kababaihan sa tahanan at maging sa lipunan kung isasama sa pagtuturo ng pagpaplano ng
pamilya ang kahalagahan ng paggamit ng kontrasepsyon bilang responsibilidad ng mag-asawa at
hindi ng mga kababaihan lamang.
3) Malaking salik sa paggawa ng desisyon ng mga kababaihan ang kanilang mga sari-sariling
karanasan at sitwasyon gaya ng kanilang komunikasyon at relasyon sa kanilang asawa. Ang
PAGSASAKAPANGYARIHAN SA PAGDEDESISYON NG MGA KABABAIHAN 39
pagkakaroon ng sariling kita ng mga kababaihan ay nakakapagbigay ng mas mataas na
bargaining power sa kanilang mga pagdedesisyon tungkol sa mga usapin sa tahanan kabilang na
ang sa paggamit ng kontrasepsyon. Dahil dito, ang pagsasakapangyarihan at pagsasapraktika ng
agency sa paggawa ng desisyon ng mga kababaihan ay nakabatay pa rin sa mga salik na may
iba’t ibang antas ng implikasyon sa bawat babae.
4) Sa pangkabuuan, ang paggamit ng kontrasepsyon ng mga kababaihan ay nakatulong sa pag-
angat ng kanilang sarili at pamumuhay ng kanilang pamilya. Ang mga sirkumstansya gaya ng
kahirapan, kalusugan at kapakanan ng kanilang pamilya lalung-lalo na ng kanilang mga anak ang
dahilan ng mga kababaihan sa kanilang pagdedesisyon at pagpapatuloy na gumamit ng
kontrasepsyon.
PAGSASAKAPANGYARIHAN SA PAGDEDESISYON NG MGA KABABAIHAN 40
Bibliyograpiya
Agha, S. (2010) Intentions to use contraceptives in Pakistan: implications for behavior change
campaign. BMC Public Health 2010. Retrieved from:
http://www.biomedcentral.com/1471-2458/10/450 28 June 2012
Arbab, A.A., Bener, A. & Abdulmalik, M. (2009). Prevalence, awareness and determinants of
contraceptive use in Qatari women. Eastern Mediterranean Health Journal Vol. 17 No.
12011. Retrieved from:
http://applications.emro.who.int/emhj/V17/01/17_1_2011_0011_0018.pdf 28 June 2012
Bankole, A. & Singh S. (1998). Couples' Fertility and Contraceptive Decision-Making In
Developing Countries: Hearing the Man's Voice. International Family Planning
Perspectives, 1998, Vol. 24(1): 15-24. Retrieved from:
http://www.guttmacher.org/pubs/journals/2401598.pdf 20 February 2013
Baxter, P., & Jack, S. (2008). Qualitative case study methodology: Study design and
implementation for novice researchers. The Qualitative Report, 13(4), 544-559.
Retrieved from http://www.nova.edu/ssss/QR/QR13-4/baxter.pdf 03 October 2012
Brayton, J. (1997). What makes Feminist Research Feminist? The Structure of Feminist
Research within the Social Sciences. Retrieved from: http://www.unb.ca/par-
l/win/feminmethod.htm 30 July 2012
Clandinin, D. J. & Huber, J. (in press). Narrative inquiry. In B. McGaw, E. Baker, & P.
P. Peterson (Eds.), International encyclopedia of education (3rd ed.). New York,
NY: Elsevier. Retrieved from:
http://www.mofet.macam.ac.il/amitim/iun/CollaborativeResearch/Documents/NarrativeIn
quiry.pdf 03 October 2012
Contemporary Feminist Theories. (2012). Keel, R. (ed) Retrieved from:
http://www.umsl.edu/~keelr/3210/3210_lectures/feminism.html 30 July 2012
Facts on Barriers to Contraceptive Use in the Philippines. Likhaan Center for Women’s Health
Website. Retrieved from: http://www.likhaan.org/content/facts-barriers-contraceptive-
use-philippines 28 June 2012
Feminist Theories (n.d.). Retrieved from:
http://husky1.stmarys.ca/~evanderveen/wvdv/Gender_relations/Feminist_theories.htm 30
July 2012
Flyvberg, B. (2011). Case Study. In Norman K. Denzin and Yvonna S. Lincoln, eds., The Sage
Handbook of Qualitative Research, 4th Edition, Chapter 17, 301-316. (Thousand Oaks,
CA: Sage, 2011). Retrieved from:
PAGSASAKAPANGYARIHAN SA PAGDEDESISYON NG MGA KABABAIHAN 41
http://www.sbs.ox.ac.uk/centres/bt/directory/Documents/CaseStudy4%202HBQR11PRI
NT.pdf 03 October 2012
Gubhaju, B. (2008). The Differential Impact of Wives’ and Husbands’ Education on
Contraceptive Method Choice in Nepal, 1996-2006. Demographic and Health Surveys
(DHS) in partnership with United States Agency for International Development
(USAID). Working Paper No. 54. Macro International Inc.: Calverton, MD Retrieved
from: http://measuredhs.com/pubs/pdf/WP54/WP54.pdf 14 October 2012
Hamilton, K. & Catterall, M. (2008)Cooperation and Conflict in Family Decision Making. In
European Advances in Consumer Research (Volume 8) /47 Retrieved from:
http://www.acrwebsite.org/volumes/eacr/vol8/eacr_vol8_92.pdf 20 February 2013
Kamal, N. (2004). Determinants Of Contraceptive Use Among Women Workers In The Slums Of
Dhaka, Bangladesh. Retrieved from:
http://centers.iub.edu.bd/chpdnew/chpd/download/publications/Wrk%20Pap_contra_Nka
mal_Sep07.pdf 28 June 2012
Laguna, E.P., Po, A.L., & Perez, A.P. (2000) Contraceptive Use Dynamics in the Philippines:
Determinants of Contraceptive Method Choice and Discontinuation. Calverton,
Maryland: ORC Macro. Retrieved from:
http://www.measuredhs.com/pubs/pdf/FA35/FA35.pdf 28 June 2012
Mahmood, N. & Ringheim, K. (1996). Factors Affecting Contraceptive Use in Pakistan. The
Pakistan Development Review 35:1 (Spring 1996) pp. 1—22 Retrieved from:
http://www.pide.org.pk/pdf/PDR/1996/Volume1/1-22.pdf 28 June 2012
Manifestations of Gender Bias. Module Two: Basic Concepts of Gender. Powerpoint
presentation. Retrieved from:
http://www.onlinewomeninpolitics.org/sourcebook_files/Resources-
GDRRmodules/Manifestation%20of%20Gender%20Bias.pdf 19 October 2012
Mostafa Kamal, S.M. (2009). Contraceptive Use and Method Choice in Urban Slum of
Bangladesh. International Conference on Family Planning: Research and Best Practices.
Retrieved from:
http://www.fpconference2009.org/media//DIR_169701/15f1ae857ca97193ffff83a4ffffd5
24.pdf 28 June 2012
Patton, M. Q. (2002) Qualitative Research and Evaluation Methods, 3rd Edition. Sage
Publications, Inc.
Poverty and Gender. UNFPA State of World Population. (2002) Retrieved from:
http://www.unfpa.org/swp/2002/presskit/english/summary4.htm 17 September 2012
Rahayu, R. Utomo, I. & McDonald, P. (2009). Contraceptive Use Pattern among Married
Women in Indonesia. International Conference on Family Planning: Research and Best
PAGSASAKAPANGYARIHAN SA PAGDEDESISYON NG MGA KABABAIHAN 42
Practices. Retrieved from:
http://www.fpconference2009.org/media/DIR_169701/15f1ae857ca97193ffff83a6ffffd52
4.pdf 28 June 2012
The World Bank (2011). World Development Report 2012: Gender Equality and Development.
Promoting Women’s Agency (Chapter 4). The International Bank for Reconstruction and
Development/The World Bank (2011): Washington, DC. Retrieved from:
http://siteresources.worldbank.org/INTWDR2012/Resources/7778105-
1299699968583/7786210-1315936222006/chapter-4.pdf 19 October 2012
Women’s Empowerment & Family Planning Key to Global Development. Center for
Environment & Population Website. Retrieved from:
http://www.cepnet.org/documents/CEPRioplus20beyondFactSheetWomenFPweb.pdf 28
June 2012
------------ Birth control. Retrieved from: http://www.nlm.nih.gov/medlineplus/birthcontrol.html
17 September 2012
PAGSASAKAPANGYARIHAN SA PAGDEDESISYON NG MGA KABABAIHAN 43
Apendiks
Apendiks 1
Gabay na mga Katanungan sa Panayam
Isang pagaanalisa sa paggawa ng desisyon ng mga maralitang kababaihan
patungkol sa paggamit ng kontrasepsyon
Mga tanong (in-depth interview):
1) Bakit ka gumagamit ng family planning methods?
2) Sapat ba ang kaalaman mo tungkol sa iba’t ibang uri at sa gamit ng kontrasepsyon?
3) Naniniwala ka ba na karapatan mo ang mamili at gumamit ng kontrasepsyon na iyong nais?
4) Ano ang mga pangunahin mong alalahanin sa loob ng tahanan?
5) Ano ang mga gampanin mo sa tahanan (i.e. taga-luto, taga-laba, taga-linis)? Maaari mo bang
ikwento kung ano ang isang tipikal na araw sa buhay mo?
6) Saan nanggagaling ang ginagamit mo na family planning methods? Libre ba ito o binibili mo?
Kasama ba sa budget sa tahanan ang pambili ng kontrasepsyon?
7) Paano ka gumagawa ng desisyon sa loob ng tahanan? Lag mo bang tinatanong ang
asawa/biyenan/kapitbahay mo?
8) Nakatulong ba ang pagkakaroon ng sariling kita/trabaho sa paggawa mo ng desisyon?
9) Paano ka gumagawa ng desisyon sa paggamit mo ng kontrasepsyon?
10) Ano ang pananaw ng iyong asawa sa paggamit mo ng kontrasepsyon?
11) May pagkakataon ba na hindi kayo nagkasundo ng asawa mo dahil sa paggamit mo ng
kontrasepsyon?
12) Kung ayaw ba ng iyong asawa/biyenan/kasama sa bahay na gumamit ka ng kontrasepsyon,
isasagawa mo pa rin ba ito?
13) May mga desisyon ka ba na isinasagawa na hindi alam ng asawa mo? Ano ang nagiging reaksyon
niya tungkol dito? Kapag negatibo ang reaksyon niya, itutuloy mo pa rin ba ang pagsasagawa sa
desisyon mo?
14) Anong mga sirkumstansya sa buhay mo ang nakaapekto sa iyong pagdedesisyon na gumamit ng
kontrasepsyon?
15) Malaki ba ang epekto ng mga nagiging desisyon mo sa iyong pamumuhay at sa pamumuhay ng
iyong pamilya? Sinusunod ba ito ng asawa mo? Ng mga anak at iba pang kasama sa tahanan?
PAGSASAKAPANGYARIHAN SA PAGDEDESISYON NG MGA KABABAIHAN 44
Apendiks 2
University of the Philippines Manila
College of Arts and Sciences
Department of Social Sciences
Political Science Program
Padre Faura St. Ermita, Manila
Enero 16 2012
Sa kinauukulan:
Magandang araw po! Ako po si Charisse Marie V. Valero, magtatapos ng kursong
Agham Pampulitika sa Unibersidad ng Pilipinas Maynila. Rekisito po sa aking kurso ang isang
pananaliksik tungkol sa mga isyu sa ating bansa. Sumusulat po ako sa inyong pamunuan upang
hingin ang iyong permiso sa gagawing kong pananaliksik dito sa inyong lugar. Ito po ay
nakatuon sa paggawa ng desisyon ng mga kababaihan patungkol sa kanilang paggamit ng
kontrasepsyon.
Kung mayroon po kayong katanungan o nais linawin sa aking gagawing pananaliksik,
maaaring po kayong tumawag o magtext sa numerong 09176945614 o di kaya ay magpadala ng
e-mail sa [email protected].
Lubos na gumagalang,
Charisse Marie V. Valero
Pinagtibay ni:
Prof. Clarinda L. Berja
Thesis Adviser
PAGSASAKAPANGYARIHAN SA PAGDEDESISYON NG MGA KABABAIHAN 45
Apendiks 3
University of the Philippines Manila
College of Arts and Sciences
Department of Social Sciences
Political Science Program
Padre Faura St. Ermita, Manila
Enero 16 2012
Magandang araw po! Ako po si Charisse Marie V. Valero, magtatapos ng kursong
Agham Pampulitika sa Unibersidad ng Pilipinas Maynila. Rekisito po sa aking kurso ang isang
pananaliksik tungkol sa mga isyu sa ating bansa. Hinihiling ko po ang inyong paglahok sa
gagawing pag-aaral kung paano gumagawa ng desisyon ang mga kababaihan patungkol sa
kanilang paggamit ng kontrasepsyon. Pakibasa pong maigi ang pormularyong pahintulot na ito
na kung saan nakasaad ang mga impormasyong makakatulong sa inyong magpasiya kung kayo
ay lalahok o hindi sa pag- aaral. Maaari po kayong magtanong sa mananaliksik tungkol sa mga
nilalaman nito na hindi malinaw sa inyo. Kung nasagot na ang lahat ng inyong mga katanungan,
maaari na po kayong magpasiya kung kayo ay lalahok o hindi.
Ang layunin ng pananaliksik na ito ay malaman kung paano gumagawa ang mga
kababaihan ng maralitang tahanan ng desisyon sa kanilang paggamit ng kontrasepsyon. Kung
kayo ay magpasiyang lumahok sa pag- aaral na ito, kayo po ay magiging isa sa anim na
kababaihan na magiging bahagi ng pananaliksik.
Kung kayo po ay magpasiyang lumahok sa pananaliksik, ang pagkuha po ng datos mula
sa inyo ay gagawin sa pamamagitan ng in-depth interview. Sa in-depth interview, may kalayaan
po kayong sumagot sa mga nakahandang tanong at maaari po kayong magbahagi ng inyong mga
karanasan patungkol sa inyong pagdedesisyon sa paggamit ng kontrasepsyon.
Anuman pong oras ay maaari kayong huminto sa paglalahad kung kayo ay hindi na
komportable sa mga impormasyong maaari niyong maibahagi. Tinitiyak po ng mananaliksik na
mananatiling lihim at pribado ang inyong personal na impormasyon. Kung inyo pong
pahihintulutan, irerekord ng mananaliksik ang gagawin ninyong paglalahad, ngunit kung hindi
naman, ito po ay isusulat na lamang ng mananaliksik. Ang impormasyong makakalap mula sa
inyo ay mananatiling ekslusibo sa pag-aaral na ito. Pagkatapos po ng pag-aaral na ito, wala pong
itatabing impormasyon mula sa inyo.
Wala pong kalakip na kompensasyon, materyal na benepisyo, o insurance para sa mga
kalahok sa pag-aaral na ito.
Kung hindi po kayo sang-ayon sa paglahok ay iginagalang po ng mananaliksik ang
desisyon ninyo. Kung mayroon po kayong katanungan o nais linawin sa pananaliksik, maaaring
PAGSASAKAPANGYARIHAN SA PAGDEDESISYON NG MGA KABABAIHAN 46
po kayong tumawag o magtext sa numerong 09176945614 o di kaya ay magpadala ng e-mail sa
Bilang tanda naman po ng inyong kusang pagsang-ayon, marapatin lamang po sana na
lumagda sa baba. Kung labag po sa inyong kalooban ang lumagda ngunit nais niyong pa ring
lumahok sa isasagawang pag-aaral ay maaari rin naman pong huwag na kayong lumagda. Ang
mahalaga po ay malaya ang inyong desisyon sa paglahok.
Salamat po!
Deklarasyon ng Kalahok
Ang pag- aaral na ito ay naipaliwanag sa akin nang maayos. Ang paglada ko ay
nangangahulugang ako ay kusang loob na lumalahok sa pananaliksik na ito. Binigyan ako ng
pagkakataon na magtanong tungkol sa pag-aaral na ito.
______________________________
Pangalan at lagda ng kalahok sa pananaliksik