Nulis Karang

Bansa enggau Tukuh Karang Dalam PMR kita deka diberi empat topik ti diberi lumur (a), (b), (c), enggau (d). Raban tanya tu deka bebida tiap-tiap taun. Taja pia, semua tanya karang ti dibantaika dalam keretas peresa nya deka nyerangkung dua puluh bansa karang. Kita dipinta milih seiti topik aja ari empat tanya nya.Topik ti dibantaika dalam keempat-empat tanya nya nyengkaum dua puluh bansa karang nya tadi ti tau dibagi ngagai karang beformat enggau enda beformat. Karang beformat nyengkaum 11 bansa karang baka ti dirintaika di baruh tu:a. Jaku ba mua bala mayuh (ucapan) g. Debat (perbahasan) b. Licha (ceramah) h. Randau / Randauc. Pidato i. Interbiud. Ripot j. Diari e. Surat Formal (Surat Rasmi) f. Surat Enda Formal (Surat Tidak Rasmi)

Karang enda beformat nyerangkaum 9 bansa karang baka ti dirintaika di baruh tu:a. Pemandang enggau f. Karang Jurai (Perbincangan)b. Karang kreatif (Cereka) g. Sempama c. Runding diri (pendapat) h. Jaku Sulu (Cogan Kata)d. Karang Kenang (Ulasan) i. Artikel (Rencana)e. Fakta j. Biografi

Ajar sereta Lalau Nulis Karang

Pengelandik sereta penyikar ngarang ukai semina bepanggai ba pengulih nuan nusun isi tauka fakta dalam pikir nuan aja, tang nuan mega patut pandai nguna semua penemu diri. Pia mega, ukai semua fakta ti ditemu nuan nya ulih dipasuk nyadi isi karang nuan nya. Nuan mesti pintar milih fakta-fakta ti lebih releven sereta iya ti engkeman aja. Enti enda pia, karang nuan deka tepawah ari topik. Kelimpah ari nya, nuan mega patut nyikap diri empu ngena penemu ti dalam sereta tinggi sebedau ngarang. Baka ni chara? Nuan patut rajin macha mayuh leman tukuh karang baka majalah, surat kabar, novel, jerpan, bup teks, etb. Nya baru, karang nuan ulih ngundan isi ti chukup, betusun lapis, padat sereta nemban ba topik ti ditanya.Iya ke bendar, pengawa ngarang ukai pekara ti mar sereta pedis dikereja. Sekeda nembiak nadai konfiden ba diri empu lalu ngumbai diri enda ulih nulis karang ti chukup manah. Sida takut sereta rawan. Kebuah pia, laban sida tu enggai belatih ngarang sereta enda chukup besedia. Sebedau ngasilka sebarang karang, nuan patut ngelangkar karang nuan dulu. Langkar tu beguna bendar, lebih-lebih agi ba maya peresa, laban nuan diberi tatak jam endur nulis karang nuan nya. Langkar nya mega patut nunjukka pekara ti deka ditulis sereta dikenataika nuan. Enti nuan udah nemu lalu sedia nulis isi ti patut ba tiap-tiap paragraf, tentu nuan enda kakang-kakang nulis. Nya meh, enti nuan deka ngasilka karang ti chukup manah, endang bisi teknik, tikas sereta poses ti mesti dititihka nuan. Bacha mayuh agi bup tauka majalah.Sebengkah agi pekara ti patut dikemeratka nuan nya, stail tulis nuan. Tulis nuan mesti terang sereta mudah dibacha pemeresa. Anang sekali nguna stail tulis ti bebungai-bungai sereta pedis dibacha. Tulis ti terang sereta mudah dibacha mega ulih narit ati pemeresa macha karang nuan kedua kali tauka lebih, lalu nambahka sekeda mengga mit mark ti lebih ari enggi orang bukai.

Proses sereta Jalai Ngarang Pengelandik dalam proses ngarang ukai bepanggai ba pengulih nuan nulis enggau jampat. Pekara ti beguna agi iya nya, nuan patut ngembuan tulis ti beresi, terang sereta mudah dibacha pemeresa tauka pemacha. Kelimpah ari nya, karang ti bekualiti nya ngembuan kerembai isi ti chukup, betusun lapis sereta nitihka topik ti ditanya. Sekeda karang penulis tepawah ari menasan topik laban sida enda macha enggau silik sereta meretika pekara ti ditanya. Isi karang nyadi tali seput pekara ti ditulis nuan. Enti nadai fakta enggau penerang ti nemban sereta betul, karang nuan enda ulih narit ati pemeresa. Nya alai, kena nuan nyikap diri empu enggau pekara nya, nuan patut macha sereta bemalinka rengka ti bisi besangkut paut enggau material baka: surat kabar, majalah, bup akademik, chunto karang, artikel, etb.

Teknik NgarangTeknik Ngarang manah sereta engkeman ulih ngasilka karang ti bekualiti tinggi. Ngena chara tu, nuan ulih nerima markah ti tinggi. Bisi lima renggat tauka proses ti beguna lebuh ngarang baka ti dirintaika di baruh tu: milih topik tauka tanya ti patut beratika topik tauka tanya nusun langkar karang nulis lalu ngerembaika isi langkar karang ngedit karang

Milih Topik tauka TanyaPilih SEITI aja ari empat topik ti diberi. Bacha semua tanya tauka topik sebedau milih. Tentuka diri empu amat-amat mereti sereta ngembuan mayuh fakta tauka isi dikena nulis sereta bejurai topik ti dipilih nuan nya. Enti sema nuan asaika bisi penemu ba lebih ari seiti topik, pilih topik ti lebih temu nuan amat-amat. Anang milih topik ti mar, laban semua tanya nya sama aja mark, 40 %. Nuan patut nentuka diri nemu bansa karang sereta format iya.

Beratika TopikSeiti-seiti topik patut diperati sereta dipansik silik-silik. Tuju iya awakka nuan enda salah saut. Dua pekara berat ti patut dipeda enggau silik maya ti beratika topik iya nya: nemu sereta meretika pekara ti patut ditulis nitihka peneka topik tauka tanya nentuka format enggau bansa karang nitihka peneka topik nyaKena nentuka peneka topik, nuan patut ngaris pugu leka jaku dalam tanya nya. Ambika chunto, enti tanya nya nanya pasal penguntung aja, nuan nya patut bejuraika pasal penguntung aja, anang nulis pasal pengerugi. Skop tanya patut dititihka nuan. Nya alai, ari nuan ti mereti amat-amat pasal topik tauka tanya sebedau nulis, ulih nentuka kualiti karang nuan nya.Maya ti nentuka format enggau bansa karang ti patut ditulis, pugu topik tauka tanya ulih mantu nuan. Chunto pugu tanya ti nya baka tu: Tulis sepuchuk surat, Tulis baru teks interbiu, Terangka, Pejuraika, Beri penemu nuan, Terangka, Gaga ripot, Cheritaka, Tulis licha, Tulis berita, Sediaka teks jaku, Punka cherita nuan nya, Kelikuhka, etb.

Nusun Langkar Karang Langkar karang nya sebengkah malin ti beguna bendar kena nuan nulis karang ti chukup manah. Nuan enda deka tepawah ari utai ti ditanya maya nulis enti bisi langkar nya. Tiap-tiap langkar karang mesti ngundan tiga bagi pekara baka: pemuka jaku, isi ti dipeguna, penutup. Semua isi ti dipeguna mesti ditusun nitihka ripih pemerat iya. Isi dalam langkar karang patut ditulis kedut sereta pandak. Kelimpah ari nya, langkar karang mega ulih: nentuka semua isi karang nuan nya releven nusun semua isi tauka fakta nitihka ripih natak pemanjai setiap isi ti dipejuraika nuan nentuka pemanjai karang nuan nyeliahka diri ngulang fakta

Nulis sereta ngerembaika langkar karang Kena nulis karang ti tinggi kualiti, nuan patut bisi pemintar nguna penemu ti meruan dikembuan dalam ati nuan empu. Nuan patut ngerembaika langkar karang ti udah disediaka nuan nya ambika nyadi seiti karang ti menyana sereta nemban nitihka tanya tauka topik.Kena nuan nulis karang ke baka nya, jaku (bahasa) nya sebengkah pekakas ti beguna. Nya alai, sepil, tanda bacha, gaya jaku enggau grama patut enda salah sereta engkeman ba sesebengkah karang.Sebaka enggau langkar iya mega, karang penuh ngembuan tiga bagi: pemuka jaku, isi ti dipeguna, enggau penutup. Bagi pemuka patut nerangka pasal topik lalu ditulis ngena chara pandak sereta padat dalam seiti paragraf. Taja nadai mark ungkup pemuka jaku, tanya iya ulih meransang sereta narit ati pemeresa tauka pemacha ransing ati deka macha karang nuan nya. Isi-isi karang nya meh tubuh karang nuan. Bagi isi tu patut ditulis dalam tiga datai ke lima isi pugu. Tiap-tiap isi mega patut ditulis dalam seiti paragraf. Tiap-tiap paragraf mega patut kurang lebih sama pemanjai lalu iya ulih nentuka pemanjai karang nuan. Ambika chunto, enti karang nuan patut enda kurang ari 200 leka jaku lalu nuan deka ngenataika empat isi dalam empat paragraf mega. Tiap-tiap paragraf patut ngundan antara 50 60 leka jaku. Anang nulis kelalu mayuh, anang mega nulis kelalu mimit. Enti kelalu mayuh dalam seiti paragraf, nuan deka kurang ruang endur ngenataika isi ba paragraf ti bukai. Tuju paragraf mega, ambika karang nuan beresi gaya sereta mudah dibacha pemeresa. Isi-isi ti dikenataika nuan mega mesti bekaul jaul enggau pangan diri lalu beri chunto-chunto ti engkeman.Tiap-tiap karang mesti bisi penutup. Bagi tu patut ditulis dalam seiti paragraf aja. Karang ti nadai penutup sebaka enggau rumah ti nadai pintu belakang. Iya mega sama enggau cherita ti nadai pengujung. Dalam bagi tu nuan semina tau ngetan serta nguatka penemu diri pasal pekara ti udah dibantaika nuan, Anang sekali-kali nambahka isi fakta ti baru.Karang ti manah, patut ditulis ngena ayat ti pandak. Anang sekali-kali nguna ayat ti kelalu panjai sereta bebelit-belit, enggai ke pemacha enda meretika pekara ti deka dikenataika nuan nya. Pekara sereta penerang ti deka dikenataika nuan ngagai pemacha tauka pemeresa nya patut terang.Penulis patut nguna penanda jaku (penanda wacana) ti engkeman dalam karang kena nanda kaul jaul paragraf seiti enggau paragraf seiti. Kelimpah ari nya, penanda jaku mega ulih nyambung ayat enggau ayat. Sekeda ari penanda jaku ti sekalu dikena dalam karang iya nya baka ti di baruh tu: Penambah jaku tambah mega, kelimpah ari nya, lebih-lebih agi, udah nya, agi mega, iya ti bendar, sema jaku, etb. Jaku penyambung taja pia, tang, lalu, ambi ke, enggai ke, enti, sereta, enggau, laban, tegal, Sema banding taja pia, udah ke dibanding enggau, enti dibanding enggau, bebanding enggau, kebuah pia, enti baka nya, etb. Penitih ari nya, keterubah iya, sepengudah nya, ti penudi iya, lebih beguna agi, etb. Chunto ambi ke chunto, baka, reti iya, etb. Maya sepengudah nya, ngena jaku pandak, sebedau nya, berengkah ari nya, ke diatu, agi ke diatu, pengujung iya, etb. Simpul penemu ari nya, ngena simpul penemu, nitihka penemu,

Nitihka Aminuddin Rosli, (2001) penanda jaku bisi dua bengkah, iya nya: a. Penanda jaku ti ti nerangka bantah idea. Ambika chunto, taja pia, enti enda pia, nitihka penemu orang bukai, etb.b. Penanda jaku ti nampung idea baka: kelimpah ari nya, tambah mega, ketegal nya, etb. Kelimpah ari ke meri kaul jaul paragraf seiti enggau paragraf bukai, penanda jaku mega beguna dikena nyambung seiti ayat enggau ayat ti bukai.

Ngedit KarangUdah temu nulis karang, nuan patut ngagihka peluang mimit kena nuan ngedit pekara ti udah ditulis nuan. Sekeda pekara ti patut diedit nuan nya baka:a. Nombor kad pengelala f. Penutup Karangb. Format karang g. Penyampau leka jakuc. Pemuka jaku h. Sepild. Isi-isi enggau kerebai isi i. Pemeresi tulise. Chunto j. Tanda bacha

Struktur KarangTiap-tiap karang ti penuh sereta menyana patut ngundan antar 3 5 pugu isi. Taja pia, penyampau paragraf bepanggai ba pemanjai kerembai jurai pugu isi nya. Kekadang, sekeda karang ngundan lebih ari lima paragraf. Peratika langkar strukur karang di baruh tu.

Paragraf pemuka jakuParagraf 1: Isi kesatuParagraf 2 : Isi keduaParagraf 3 : Isi ketigaParagraf 4 : Isi keempatParagraf 5 : Isi kelimaParagraf penutup

Bisi tiga bengkah pekara ti dikemeratka lebuh orang meresa karang nuan lalu meri mark. Pekara nya baka: pugu isi sereta kerembai isi, gaya jaku (gaya bahasa) enggau chara nuan ngenataika jurai idea nuan.Nuan enda diperansang mantaika lebih ari lima pugu isi dalam karang nuan. Kebuah pia, enggaika nuan enda ulih ngerembaika jurai idea nuan enggau lenak sereta dalam. Enti baka nya, karang nuan enda tentu padat sereta menyana. Sema jaku, enti nuan bejuraika semina tiga pugu isi, kelikuh jurai nuan tentu lebih lenak sereta dalam agi. Penyampau isi mega bepanggai ba tanya tauka topik enggau pemintar nuan bekelikuh tauka bejuraika pugu isi nya. Pekara tu mega bepanggai ba pengerajin nuan macha bup, majalah tauka surat kabar. Enti nuan udah nyediaka diri ngena fakta enggau penerang ti chukup, nuan patut ulih mansutka idea lalu ngasilka karang ti bekualiti.Nuan mega patut nentuka karang nuan enda kelalu panjai sereta ngundan utai ngapa. Utai ngapa reti nya pekara ti enda besangkut paut enggau topik. Taja pia, enti nuan pintar sereta konfiden nguna gaya jaku ti manah, enda ga ngawa enti karang nuan nya panjai mimit ari ti patut.

Gaya Jaku Dalam karang

Grama tauka jalai jakuKarang nuan mesti ditulis ngena gaya jaku ti standard. Ari nya, nuan patut nyeliahka diri ari penyalah grama, sepil, pengaya jaku, terminologi, tanda bacha enggau struktur ayat. Karang ti nadai penyalah ba grama ngemudahka pemeresa meresa sereta meri mark ungkup karang nuan. Gaya jaku enggau variasi jaku ti dikena nuan dalam karang patut engkeman enggau bansa karang ti ditulis nuan nya. Ambi ke chunto, karang ti besangkut paut enggau sains patut nguna variasi jaku sains. Pia mega, karang kreatif tauka karang litericha patut ngundan gaya jaku kreatif sereta puitis. Ari nya, nuan patut pintar milih gaya jaku ti engkeman ba topik karang nuan nya.Kelimpah ari nya, enti nuan ulih nyelitka elemen humor, jaku idiomatik, sempama, elemen saspen, jaku tuai enggau jaku ari orang ke tebilang, nya meh pekara ti ulih nambahka mark ba karang nuan.Karang ti menyana iya nya karang ti ngundan grama ti betul. Ngena simpul jaku ti pandak, karang nuan patut enda ngelanggar atur jaku ti gramatis ti bisi kaul enggau proses ngaga leka jaku enggau ayat. Dalam proses ngaga leka jaku nuan mesti nguasa sereta mereti pasal bansa leka jaku baka: jaku nama, jaku pengawa, jaku adjektif, jaku penyambung, jaku penerang. Penulis mega patut meretika proses ngaga leka jaku nya ngena urup penambah lalu nyadi jaku tumbuh baka: jaku nama tumbuh, jaku pengawa tumbuh, etb.Dalam aspek ngaga ayat, pekara ti beguna bendar iya nya kaul antara subjek enggau predikat. Ayat ti penuh sereta menyana patut ngundan subjek enggau predikat.

Sistem SepilKarang ti manah sereta menyana patut nguna atur sepil ba bup Sistem Jaku Iban ba Sekula, (2006). Semua pengajar Jaku Iban patut nerangka lenak agi pasal pekara ti dipejuraika dalam bup nya, lebih agi ba proses nyepil jaku Iban ti ngena urup penambah. Pekara ti suah agi salah sepil nembiak iya nya, leka jaku ti ngundan penambah di..., ke..., se..., di...ka, dipe...ka. diper...ka, dike...ka, m...ka, n...ka, ng...ka, nge...ka, ngem...ka, ngen...ka, be...ka, ber...ka enggau ...ka.

Tanda bacha & Urup Besai. Karang nuan patut nguna tanda bacha enggau urup besai ti betul. Sekeda penulis enda ingat nguna urup besai ba leka jaku keterubah ba pun ayat. Sekeda mega enda ingat nguna tanda bacha ti engkeman ba ujung ayat. Enti pia, karang nuan mar dibacha sereta tusah deka bulih mark ti tinggi. Tanda bacha ti suah agi dikena maya nulis karang iya nya; tanda titik, tanda koma, tanda tanya, tanda seru, tanda pemuka & penutup jaku (tanda petik), etb. Semua guna bisi diterangka ba bup Jalai Jaku Iban tauka ba bup teks.

Malin Ngarang Surat Formal Surat formal (surat rasmi) ditulis selalu iya ditulis nuju opis perintah tauka opis kompeni. Surat formal tau dibagi ngagai sepuluh bengkah baka ti dirintaika di baruh tu.a. Surat komplin b. Surat bantahc. Surat mesan barang d. Surat ngapil e. Surat notis f. Surat dagangg. Surat janji jual beli h. Surat formal perintahi. Surat formal serikat ukai perintah j. Surat bepadah ngabang

Maya nulis surat bansa tu, nuan mesti nguna jaku sereta sepil ti standard. Anang nguna jaku pasar. Karang ti baka tu mega patut nitihka atur format ti udah ditetapka. Enti enda pia, mark nuan deka dipusil. Format surat kirum formal patut bisi pekara ti di baruh tu: a. Adres pengirum di tulis ba sukut atas sepiak kiba lambar suratb. No. telefon pengirum ba sukut sepiak kanan c. Garis panjai melintang ba baruh no. telefond. Nama & adres penerima ba baruh garis melintang di sepiak kiba, sepengudah langgang dua baris ari garis melintang e. Haribulan ditulis sepiak kanan f. Jaku pengelalug. Pekara topik pekara ti deka dikenataika pengirum dalam surat. Anang engkah tanda titik ba ujung ayat topik tu. h. Paragraf Paragraf kesatu enggau ti penudi enda ibuh diberi nombor. Paragraf kedua sereta iya ke udah nya aja di beri nombor. i. Pengaku pengirum ditulis ba baruh penutup suratj. Nama enggau sain pengirum