Atuqmanta Huk`uchamantawan

(Willakuy)

Huk p`unchawsi, atuqqa huk`uchawan tarinakuspa nisqa.

Yarqawachkaptinpuni qamqa rikhurirqamunki, kunanqa mikhurqapusqayki! nispa.

Amaraq! amaraq mikhuwayraqchu kumpayry! Huk misk`i mikhunata aparqamusqayki nispa. Atuqpa qinata phukupakunankamas huk`uchaqa api suwakuk rispa. Kutirqamuspansi atuqman apita malliykachin.

- Aaw! misk`illaam kasqa! maymantataq aparqamurqanki? pusarqukuway! nisqa atuqqa.

Chaysi huk`uchaqa ch`isiyaykuytaa atuqta taytakuchakunapa wasinman pusarqusqa api mankata qhawaykachispa. Umanta mankaman winarquspas atuqqa api llaqwayta qallarin. Tukurquspataq umanta mana lluqsichiyta atisqachu.

Chaysi allpa manka p`akinanpaq huk`uchata nisqa:

- Huk k`aspita haywamuway! nispa.

Huk`uchaqa ichhuchallatas haywan.

-Huk rumita haywamuway! nillasqataq.

Huk`uchaqa quwi akachallata haywasqa.

-Maypim maran kachkan! rikuchiway! nillasqataq atuqqa.

Huk`uchaqa taytakuchapa umanta llamiykachin. Chay machulapa umanmansi atuqqa tukuy kallpanwan mankata p`anarqusqa p`akikunankama. Atuqqa taytakuchakunawan hap`irqachikuspas p`anaykachikun; huk`uchataq ak`arisqanmanta asikuspa huk t`uquchamanta qhawasqa.

Pallaq, qillqaq .M.CH.R.