Click here to load reader
Upload
latinista-humanista
View
288
Download
5
Embed Size (px)
DESCRIPTION
Epistula Petrarcae de ascensu ad montem Ventosum
Citation preview
Circulus Latinus Valentinus
Die decimo sexto mensis Februarii celebrandus
Titulus: Epistula Petrarcae ad Dyonisium de Burgo Sancti Sepulcri
Imago:
Textus:
1. Altissimum regionis huius montem, quem non immerito Ventosum uocant,
hodierno die sola uiuendi insignem loci altitudinem cupiditate ductus, ascendi.
Multis iter hoc annis in animo fuerat; ab infantia enim his in locis, ut nosti, fato res
hominum uersante, uersatus sum. Mons autem hic late undique conspectus fere
semper in oculis est.
2. Cepit impetus tandem aliquando facere quod quotidie faciebam, præcipue
postquam relegenti pridie res Romanas apud Liuium (Liu. Ab urbe condita 40,21,2-4;
40,22,4-6) forti ille mihi locus ocurrerat […]. Ne enim cunctos euoluam, Pomponius
Mela (de chorographia 2,17) cosmographus sic esse nihil hæsitans refert; Titus Liuius
falsam famam opinatur; mihi si tam propmta montis illius experimentia esset quam
huius fuit, diu dubium esse non sinerem.
3. Ceterum, ut illo omisso, ad hunc montem ueniam, excusabile uisum est in iuuene
priuato quod in rege sene non carpitur: sed de socio cogitanti, mirum dictu, uix
amicorum quisquam omni ex parte idoneus uidebatur: adeo etiam inter caros
exactissima illa uoluntatum omnium morumque concordia rara est.
4. Hic segnior, ille uigilantior; hic tardior, ille celerior; hic mæstior, ille lætior; denique
hic stultior, prudentior ille quam uellem; huius silentium, illius procacitas; huius
pondus ac pinguedo, illius macies atque imbecillitas terrebat; huius frigida
incuriositas, illius ardens occupatio dehortabatur; quæ, quamquam grauia,
tolerantur domi –omnia enim suffert caritas (1 cor. 13,17) et nullum pondus recusat
amicitia; uerum hæc eadem fiunt in itinere grauiora.
5. Itaque, delicatus animus honestæque delectationis appetens circumspiciensque
librabat singula sine ulla quidem amicitiæ læsione, tacitusque quicquid proposito
itineri præuidebat molestum fieri posse, damnabat. Quid putas? Tandem ad
domestica uertor auxilia, germanoque meo unico minori nato quem probe nosti rem
aperio. Nihil poterat lætius audire, gratulatus quod apud me amici simul ac fratris
teneat locum.
6. Statuta die digressi domo, Malausanam uenimus ad uesperum; locus est in
radicibus montis, uersus in Boream. Illic unum diem morati, hodie tandem cum
singulis famulis montem ascendimus non sine multa difficultate: est enim prærupta
et pæne inaccesibilis saxosæ telluris moles; sed bene a poeta dictum est: labor omnia
uincit improbus (Verg. Georg. 1,145 sq.). Dies longa, blandus ær, animorum uigor
corporum robur ac dexteritas et si qua sunt eiusmodi, euntibus aderant: sola nobis
obstabat natura loci.
7. Pastorem exactæ ætatis inter conuexa montis inuenimus, qui nos ab ascensu
retrahere multis uerbis enixus est, dicens se ante annos quiquaginta eodem iuuenilis
ardoris impetu supremum in uerticem ascendisse nihilque inde retulisse præter
poenitentiam et laborem, corpusque et amictum lacerum saxis ac uepribus, nec
umquam aut ante illud tempus aut postea auditum apud eos quemquam ausum
esse similia.
8. Hæc illo uociferante nobis, ut sunt animi iuuenum monitoribus increduli, crescebat
ex prohibitione cupiditas. Itaque senex ubi animaduertit se nequiquam niti,
aliquantulum progressus inter rupes, arduum callem digito nobis ostendit, multa
monens multaque iam digressis a tergo ingeminans. Dimisso penes illum siquid
uestium aut rei cuiuspiam impendimeto esset, soli dumtaxat ascensui accingimur
alacresque conscendimus.
9. Sed, ut fere fit, ingentem conatum uelox fatigatio subsequitur; non procul inde
igitur quadam in rupe subsistimus. Inde iterum digressi prouehimur sed lentius: et
præsertim ego montanum iter gressu iam modestiore carpebam et frater
compendiaria quidem uia per ipsius iuga montis ad altiora tendebat; ego mollior ad
ima uergebam, reuocantique et iter rectius designanti respondebam sperare me
alterius lateris faciliorem aditum, nec horrere longiorem uiam per quam planius
incederem.
10. Hanc excusationem ignauiæ pratendebam aliisque iam excelsa tenentibus per
ualles errabam cum nihilo mitior aliunde pateret accessus, sed et uia cresceret et
inutilis labor ingrauesceret, interea cum iam tædio confectum perplexi pigeret
erroris, penitus alta petere disposui, cumque operientem fratrem et longo refectum a
cubitu fessus et anxius attigissem, aliquamdiu æquis passibus incessimus.
11. Vixdum collem illum reliqueramus, et ecce prioris anfractus oblitus, iterum ad
inferiora deicior, atque iterum peragratis uallibus, dum uiarum facilem
longitudinem sector, in longam difficultatem incido, differebam nempe ascendendi
molestiam, sed ingenio humano rerum natura non tollitur, nec fieri potest huc
corporeum aliquid ad alta descendendo perueniat. Quid multa? Non sine fratris risu
hoc indignanti mihi ter aut amplius intra paucas horas contigit.
12. Sic sæpe delusus quadam in ualle consedi. Illic a corporeis ad incorporea uolucri
cogitatione transiliens, his aut talibus me ipsum compellabam uerbis: «quod totiens
hodie in ascensu montis huius expertus es, id scito et tibi accidere et multis
accedentibus ad beatam uitam; sed idcirco tam facile ab hominibus non perpendi,
quod corporis motus in aperto sunt, animorum uero inuisibiles et occulti.
13. Equidem uita, quam beata dicimus, celso loco sita est; arcta, ut aiunt, ad illam ducit
uia (Mt. 7,14). Multi quoque colles intereminent et de uirtute in uirtutem præclaris
gradibus ambulandum est; in summo finis est omnium et uiæ terminus ad quem
peregrinatio nostra disponitur; eo peruenire uolunt omnes, sed ut ait Naso, uelle
parum est, cupias, ut re potiaris, oportet (Ou. ep. 3,1,35).
14. Tu certe, nisi, ut in multis, in hoc quoque te fallis, non solum uis sed etiam cupis.
Quid ergo te retinet? Nimirum nihil aliud, nisi per terrenas et infimas uoluptates
planior et, ut prima fronte uidetur, expeditior uia. Uerumtamen, ubi multum
erraueris, aut sub pondere male dilati laboris ad ipsius te beatæ uitæ culmen oportet
accendere aut in conuallibus peccatorum tuorum segnem procumbere; et si, quod
ominari horreo, ibi te tenebræ et umbra mortis (Ps. 107,110) inuenerint, æternam
noctem in perpetuis cruciatibus agere».
15. Hæc mihi cogitatio incredibile dictu est quantum ad ea quæ restabant et animum et
corpus erexerit. Atque utinam uel sic animo peragans iter illuc, cui diebus et
noctibus suspiro, sicut superatis tandem dificultatibus, hodiernum iter corporeis
pedibus peregi! At nescio annon longe facilius esse debeat quod per ipsum animum
agilem et inmortalem sine ullo locali motu in ictu trepidantis oculi fieri potest, quam
quod successu temporis per moribundi et caduci corporis obsequium ac sub graui
membrorum fasce gerendum est […].