Aturan Pagsambahayang

Aturan Pag-Ayil iban Pag-Sambahayang

[1]

SAMBAHAYANG


Biyaktul sin taymanghud niyu :

Fahad Haris


[2]

l Aturan sin pag-ayil

Apabila kaw mag-ayil subay kaw magniyat halaum sin atay mu sin ikaw mag-ayil hasupaya maig in hadas daying ha baran mu , amuyan in papanaw sin majhab sin al-malikiy , iban majhab ash-shafiey iban majhab sin al-hanbaliy , sabab laung nila in pag-ayil daying ha manga ibadat , daying ha sabab yan mahajat siya pa niyat . Adapun ha majhab sin al-hanafiy minsan kaw dih na mag-niyat sabab ha pangatud nila in pag-ayil pag-lissin lissin sin baran , sumagawah in papanaw makusug amuna in papanaw sin tu majhab, sabunnal tuud in niyat sarat siya sin pag-ayil ., sartah bang kaw magniyat ayaw muna siya lapala sabab in tampat sin niyat laum atay .

1. Ubus ampa kaw magbismillah ( ) BISMI ALLAH : Sabab in pagbismillah duun ha pag-ayil aun daying ha manga kaulamaan laung nila wajib , amuyan in hambuuk baytah daying kan imam hambaliy ( ahmad ibn hambal ) hangkan laung hi imam ishaq ibn rahuya ( lundang panun hi imam hambaliy nangadjih) bang niya tinggalan in pag-bismillah ha pag-ayil piyagtuuran dih masa in pag-ayil niya . sumagawah in papanaw makusug in pagbismillah ha pag-ayil bukun siya wajib , sunnat in hukuman niya amuna in papanaw sin kamatauran ulama sartah amuyan in hambuuk riyawat / baytah daying kan imam ahmad ibn hambal sabab laung niya in riyawat nasabbut in bismillah duun ha pag-ayil daif siya . daying a sabab yan bang mu siya kiyalupahan in pag-ayil mu masa ra siya .Sumagawah in labi marayaw mag-bismillah kaw ha pag-ayil bang mu katumtuman.

2. Ubus ampa mu hugasan in duwa lima mu in labi marayaw makatu mu balikan , ayaw mu labihan daying ha makatu sabab mabilang siya dusa . In hukuman sin pag-hugas sin duwa lima ha panagnaan sin pag-ayil sunnat , sabab wayruun siya nabangkil duun ha ayat sin wuduh , iban sipat iban piyaragbus hi Uhtman Ibn Affan iban hi Alih ibn Abi Talib iban hi Abdullah ibn Zaid kiyaridaan sila sin Allahu taala in hantang sin pag-ayil sin nabiy wayruun nila nasabbut in pag-bismillah , daying ha sabab yan in pag-hugas sin duwa lima ha panagnaan sin pag-ayil sunnat siya . Ha tungud isab sin hukuman sin pag-hugas sin duwa lima batih daying ha katugan sin dum , duwa riwayat baytah daying kan imam ahmad , ha hambuuk baytah daying kaniya sunnat , damikkiyan niya amu yan isab in papanaw sin majhab hanafiy iban majhab malikiy iban majhab sin ash-shafiey . In papanaw hikruwa wajib in hukaman niya , amuyan in papanaw sin majhab ad-dhahiriy sartah ha hambuuk riwayat daying kan imam ahmad ibn hambal . In labi marayaw hugasan mu in duwa lima mu hasupaya kaw maka anib daying ha manga piyagsulangan sin manga kaulamaan .


[3]

3. ISTINSHAQ iban ISTINTHAR Ubus ampa mu gum-guman in simud mu sartah paliguta tuud in tubig halaum sin simud mu . Ubus subay kaw mag ISTINSHAQ kumawah kaw tubig ampa mu hanggitun palaum sin ilung mu , ubus ampa kaw mag ISTINTHAR( ampa mu hisunga ) . In hukuman sin ISTINSHAQ iban ISTINTHAR wajib siya amuyan in hambuuk baytah ha majhab sin hambaliy,sabab in katan nagsipat sin aturan pag-ayil sin nabiy Muhammad salawat iban salam kaniya ha kiyabaytah nila minsan hangka minsan wayruun kiyatinggalan sin nabiy in istinhaq iban sin istinthar .

4. Ubus ampu mu hugasan in bayhuh mu Ubus ampu mu hugasan in bayhuh mu, Bang sawpama usug malabung in pungut niya sartah dih kakitaan daying ha guwah in gimpaisan sin bayhu iban sin takuh niya, in wajib niyara hugasan amuin pungut niya. Adapun bang in pungut bukun malabung kakitaan in gimpaisan niya, wajib niya basaun in pungut iban gimpaisan sin bayhuh iban takuh niya .


[4]

5. Ubus ampa mu hugasan in duwa lima mu iban buktun mu sambil pa siku , sabab in hukaman niya yan daying ha manga parduh sin pag-ayil bang mu wayruun kiyahugasan in manga nasabbut yan dih taymaun in pag-ayil mu .

6. Ubus ampa mu sapuhun palabayan sin tubig in katan uh mu sin duwa lima mu. In pagsapu sin uh magtagnah siya daing ha tuktuk amuin ha panaganaan tiyubuan sin buhuk ubus palabayun mu siya pa ulihan pag-ubus ampa mu hibalik naisab maun pa unahan , Ubus ampa mu hibutang in tudluh mu palaum taynga mu , in bakul mu duun ha guwah niya , in paghugas Makaminsan sadya sartah ayaw muna hugasi in liug mu sabab bukun na siya lamud daying ha aturan sin pag-ayil .


[5]

7. Ubus ampa mu hugasan in duwa siki mu. Bang kaw mag-hugas sin siki mu paunaha in tuu , ubus ampa siki lawa sartah in sunnat in tiyap-tiyap siki makatu mu siya balikan hugasan , sartah pariksaun mu marayaw in utan sin gulamay sin siki mu bang nabasah da sin tubig , karnah bang aun wayruun nabasah tantu dih taymaun in pag-ayil mu .

Pag-ubus mu mag-ayil siyunnat kaymu magduwaa sin duwaa ini :

ASHHADU AN LA ILAHA ILLA ALLAH WAHDAHU LA SHARIKA LAHU, WA ASHHADU ANNA MUHAMMADAN ABDUHU WA RASULUHU, ALLAHUMMA IJALNIY MIN ATTAWWABIN WA IJALNIY MIN ALMUTATAHHIRIN.

Mag-naiksaksih aku wayruun mapatut pag-tag-ipunan malaingkan Allahu taala tunggal siya iban wayruun sakutu niya, sartah magnaik saksih aku bunnal tuud hi Muhammad ipun iban rasul niya, ya tuhan ku suran aku ha laum likusan sin manga ipun mu mag-tatawbat, iban suran aku pa likusan sin manga tau sutsi in baran daying ha najjis iban (sutsi in pag-ibadat daing ha shirik/pagsakutu ) .

Patumtum!

wayruun piyagbiddaan in pag-ayil sin usug iban babai sibuh in aturan niya.


[6]

ATURAN SIN PAG-SAMBAHAYANG In aturan niya subay muna-a hinang in duwa sarat sin hikataymah kaniya sabab dih taymaun sin Allahu taala in pag-sambahayang sin muslim subay maagad niya duwa sarat ini Hika-isa : Subay tulus ikhlas in pag-sambahayang mu karnah sin Allahu taala ha sabda sin nabiy salawat iban salam kaniya sin Allahu taala

[ ] ( Sabunnal tuud in katan ammal subay siya siyasartaan sin niyat ) bukun in mukarnah sin pag-sambahayang mu yan pag-pakitah-kitah atawa pag-parungug-dungug atawa hasupaya dumawhat kabansagan . Hikaruwa : Subay in aturan sin pag-sambahayang mu biyah sin pag- sambahayang sin nabiy Muhammad salawat iban salam kaniya sin Allah ha sabda niya

( ) (sambahayang kamu biyah sin aturan sin pag-sambahayang ku ) daing ha sabab yan ayaw kaw tuud maluman mangasubu ha manga sila taga panghati ha palihalan sin aturan sin kahukum-hukaman sin pag-sambahayang hasupaya mataymah iban masampurnah in pag-sambahayang mu Karnah apabila dih mu maagad in duwa sarat yan tantuh dih taymaun in pag-sambahayang mu mu minsan pa mitum in tuktuk mu ha pagsujuran pa tuhan.

Mga hinangun ha pagsambahayang: Apabila kaw tumindug tumunay sin sambahayang, wajib kaw subay timindug, sartah umalup kaw pa qiblat. Ubus ampa mu angkatun in duwa lima mu biyubuklad siya pa pagtuparun mu siya iban sin taynga mu,ubus ampa kaw

tumakbir sin takbiratu al-ihram ha lapal ALLAHU AKBAR, Bang mu kiyatinggalan in takbir dih masa (taymaun) in sambahayang mu sabab in takbiratul ihram sarat sin hikataymah sin sambahayang. Adapun in tau dih makabissara biyah sin umaw mamarahi na minsan ha atay niya na sadya. Bang in ka-awnan mu imam wajib mu patanugun in pagtakbir mu hasupaya karungugan sin manga mahmum, karnah dih masampurah in pag-agad sin manga mahmum bang dih nila karungugan in takbir sin imam. Adapun bang isa-isa mura mamarahi na minsan baran mu na sadya in makarungug sin takbir mu. (ALLAHU AKBAR )


[7]

Ubus ampa mu hibutang in lima mu duun ha daghal mu , in lima mu lawa ha babah, in lima tuu ha babaw niya,in dalil niya riwayat daying kan wail ibn hujar kiyaridaan siya sin Allahu taala laung niya

: In ka-awnan sin nabiy Muhammad alayhis salatu wassalam kaniya hibutang niya in duwa lima niya duun ha daghal niya. In hukuman niya yan sunnat. Ubus in pangatud mu hibantang mu duun ha tampat sin susujuran , riwayat daying kan Aisha kiyaridaan siya sin Allahu taala

; In ka-awnan sin nabiy Muhammad salawat iban salam kaniya bang siya halaum sambahayang in pangatud niya hibantang niya maun pa tampat susujuran ,

Ubus ampa kaw mamassa sin duwaa istiftah, mataud in kiyabaytah jinisan duwaa malayingkan kumawah na sadya kita hambuuk.

SUBHANAKA ALLAHUMMA WA BIHAMDIKA WA TABARAKA ISMUKA , WA TAALA JADDUKA WA LA ILAHA GHAYRUKA

Wayruun salih sabanding mu mahasutsi mahatinggi kaw ya Allah , ikaw in tuhan ku ikaw in tuput pudjihun ku , sartah in katan kangan nganan mu wayruun salih sabanding niya , piyudjih takaw ya Allah tuhan ku sin sataas taas pamudji , karnah wayruun dugaing tuhan malayingkan tuggal ikaw .


[8]

Ubus ampa kaw mamassa sin

(Audhubi Allahi min ashshaytan arrajim ) mahna niya magpatilubun aku daying ha higung hagas sasat sin saytan , Ubus ampa kaw mamassa sin

(Bismillahir Rahma'nir Rahiym) in mahna niya , ha ngan sin Allahu tagnaan ku mamassa , siya in tuhan baying ulung iban baying kasihun ha manga ipun niya .

Al-hamdulillahi rabbil 'alamin :

In katan sanglit iban pamudji iban pag sukul tuput tunggal ha Allahu ta'ala, Tuhan tag amulahi iban tag milik sin katan a-lam.

Ar-rahman Ar-rahim :

In Ar-rahman, Tuhan baing ulungun ha mga iypun niya dain di ha dunya lungkup in ulung sin Allahu ta'ala sibu' da hi kafir atawa kan hi mu'min/muslim,

Maalikiyaw middiyn :

In Allahu ta'ala siya ra in tuput tuggal tagmilik sin adlaw qiyamat iban adlaw pag hisab.

Iyyaka na'budu wa iyyakanas ta'iyn :

Tuput tunggal ikaw ra o Tuhan namu in pagtag-iypunan namu', iban tuput tunggal ikaw ra in pangangayuan namu'.

Ihdinas siratal mustakim :

O Tuhan namu' patattapa kami iban dugangi in hidayat kiyarihil Mu kamu', iban tunyuki kami pa dan mabuntul.

Siratal ladhiyna an-amta 'alayhim ghayril magdhuwbi 'alayhim walad dallin :

Pa dan sin mga sila amuin kiya hanughara'an mu sin pag iyman,

lamura kami ha mga sila yadtu o Tuhan namu, iban o Tuhan namu', ayaw mu kami palamura ha mga jumlahan sin mga manusiya' (yahudi) amu in piyag mumulka'an iban sin mga manusiya' ( nasrani) nalalaung sin laung amad.


[9]

Ubus ampa kaw mamung sin A~meen

Bang kaw naubus na namassa sin fatiha ampa kaw mamassa ayat atawa surah halaum sin quran Bismillahir rahmanir rahim ( Qul huwa Allahu ahad ) ( Allahu assamad ) (lam yalid wa lam yulad ) (Wa lam yakun lahu kufuan ahad )

( Qul huwa Allahu ahad ) (Pamungan ya kaw nabiy sin Allah siya na in tuhan Allahu taala mahasutsi mahatingi tunggal wayruun salih sabanding duun hakangan ngan niya iban ha katan kasipat-sipatan niya )

( Allahu assamad ) ( In Allah in sipat niya Assamad ( in katan makhluq mag-hajat kaniya pa tatabangan iban sin ridjikih niya sartah dih siya maghajat pa tatabangan sin katan makhluq niya hangsulag unu-unu )

( Lam yalid wa lam yulad ) ( In Allah siya na in tuhan dih mag-anak iban wayruun piyag-anak)

( Wa lam yakun lahu kufuwan ahad ) (siya na in tuhan wayruun sibuh sabanding niya hangsulag unu-unu )

Pag-ubus mu mag-bassa sin ayat ampa kaw rumukuh sartaan mu sin takbir

( ALLAHU AKBAR ) sartah angkatun mu in duwa lima mu biyah sin hantang pag-anggkat ha takbiratu al-ihram. Duun ha rukuh. Subay papagtungparun mu in taykud iban sin uh biyah sin saparati minsan butangan basu dih siya maligad, ubus hibutang mu in duwa lima mu duun ha duwa tuhud mu sartah biyubuklad in gulamay lima mu, Pag-ubus ampa mu bassahun duun ha rukuh in

(SUBHANA RABBIY AL-ADHIM) ya Allah mahasutsi mahatinggi kaw, ikaw in tuhan ku mahabassar

wajib makaminsan bassahun mu in( SUBHANA RABBIY AL-ADHIM ) , in makaruwa atawa makatu sunnat siya.


[10]

Ubus ampa kaw umihtidal tumungas daying ha rukuh sartah angkatun mu in duwa lima mu biyah sin hantang pag-anggkat ha takbiratu al -ihram , ubus ampa kaw mamung

SAMIA ALLAHU LIMAN HAMIDAHU hatniya: tiyaymah sin Allahu taala hisiyu-siyu in namudjih kaniya, in lapal yan wajib siya kabtangun sin imam iban sin munfarid adapun in mahmum dih niya na lapalun. pag-ubus lapalun mu in

RABBANA WA LAKA ALHAMDU hatiniya: ya Allah ikaw in tuhan namuh sartah tunggal ikaw in pudjihun namuh, In lapal yan wajib siya lapalun sin imam, mahmun iban sin munfarid.


[11]

Pag-ubus ampa kaw tumakbir ( ALLAHU AKBAR ) Sumujud , paunahun mu in duwa tuhud paragpakun pa babah daying sin duwa lima mu

Sartah wajib paragpakun mu in pitu anggawtah baran mu pa tampat pag-sambahayangan (duwa padlima, duwa siki iban duwa tuhud, iban tuktuk dana in ilung) Siyunnat papaglayuun mu in duwa tuhud mu, sartah pa pag pikitun mu in duwa siki mu ubus in duwa lima mu harap pa qiblat sartah biyubuklad mu siya

ubus wajib kaw mamassa makaminsan sin ( SUBAHANA RABBIY AL-AHLA )

ya Allah ikaw in tuhan wayruun salih sabanding in ikaw nanaumbabaw ha taas sin aras mu. makaminsan in makaruwa atawa makatu sunnah , Miyakru paragpakun mu in duwa buktun pa babah.

Ubus ampa kaw tumakbir ( ALLAHU AKBAR ) lumingkud sin lingkud iftirash , sartah hibutang mu in duwa padlima mu duun ha paa mu biyubuglad , in duhulan sin gulamay mu duun ha tuhud mu , iban in lima tuu duun ha paa tuu , in lima lawa duun ha paa lawa , sartah wajib bassahun mu duun ini .

(RABBIY IGH-FIRLIY) Ya Allah tuhan ku ampuna aku.

Atawa isab bassaha in duwaa ini


[12]

ALLHUMMA IGHFIR LIY WAR HAMNIY WA AFINIY WAHDINIY WAR ZUQNIY {kiyariwayat hi abu daud}

Ya Allah ampuna iban kaulungi aku, iban lappasi aku daying ha kangian, iban patattapa aku ha pag-ibadat kaymu iban rijjikii aku. In Makaminsan wajib adapun in makaruwa atawa makatu sunnat.

Ubus ampana nakaw isab magbalik tumakbir (ALLAHU AKBAR) sumujud in hantangan niya biyah da sin hantang sin pag-sujud nasabbut taniyu naka una,

ubus ampa kaw timindug magbalik pa rakaat hikaruwa.

In aturan niya biyah da sin rakaat panagnaan, sumagawah ayaw nakaw magduwaa istifta iban mamassa audhu billahi min ash-shaytan nirrajim magbalik apabila kaw mamassa sin fatiha.

ATTAHIYATU LILLAH WAS SALAWATU WAT TAYYIBAT , ASSALAMU ALAYKA AYYUHAN NABIY WA RAHMATU ALLAH WABARAKATUHU , ASSALAMU ALAYNA WA ALA IBADI ALLAH ASSALIHIN ASHHADU AN LA ILAHA ILLA ALLAH WA ASH HADU ANNA MUHAMMADAN ABDUHU WA RASULUHU )


[13]

duun mu patubtubun in tahayat awwal .ubus in lima mu kumkumun mu siya , in duhul sin bakul iban latuan papagsugpatun mu , sartah In pangatud mu hibantang mu siya duun ha tudluh mu atawa isab ha tampat pagsusujuran. Pag-ubus ampa naisab kaw tumindug maun pa rakaat hika tu, in hinangun mu biyah sin pag-hinangun ha rakaat panagnaan sumagawah ayaw nakaw magduwaa istifta iban mamassa audhu billahi min ash-shaytan nirrajim magbalik bang kaw mamassa sin fatiha, sartah in duwa rakaat hinapusan ayaw nakaw magbassa ayat atawa surah.

Pag-ubus mu daying ha rakaat hika tu , sunuan mu naisab sin hika upat rakaat pag-ubus ampa naisab kaw lumingkud puas sin sujud mu hikaruwa(lingkud attawarruk) bya sin ha patta yan.

ampa mu bassahun in tashahhud / tahayat ini :

ATTAHAYATU LILLAH WAS SALAWATU WAT TAYYIBAT , ASSALAMU ALAYKA AYYUHAN NABIY WA RAHMATU ALLAH WABARAKATUHU , ASSALAMU ALAYNA WA ALA IBADI ALLAH ASSALIHIN ASHHADU AN LA ILAHA ILLA ALLAH WA ASH HADU ANNA MUHAMMADAN ABDUHU WA RASULUHU ALLAHUMMA SALLI ALA MUHAMMAD WA ALA ALI MUHAMMAD KAMA SALLAYTA ALA IBRAHIM WA ALA ALI IBRAHIM INNAKA HAMIYDUN MAJIYD WA BARIK ALA MUHAMMAD WA ALA ALI MUHAMMAD KAMA BARAKTA ALA IBRAHIM WA ALA ALI IBRAHIM INNAKA HAMIYDUN MAJIYD


[14]

Mahna sin tahayat: IN KATAN PUDJIH IBAN SAMBAHAYANG IBAN NA SIN KATAN KARAYAWAN TUPUT TUNGGAL PA ALLAH , KASAJAHITRAAN IBAN ULUNG IBAN BARAKAT DAING HA ALLAH DUUN KAYMU YA NABIY MUHAMMAD , SARTAH KASAJAHITRAAN KAMU IBAN SIN KATAN IPUN SIN ALLAHU TALA SALIHIN , MAG-NAIKSAKSIH AKU SIN WAYRUUN MAPATUT PAG-TAGIPUNAN MALAINGKAN ALLAH , IBAN MAG-NAIKSAKSI AKU SABUNNAL TUUD HI MUHAMMAD IPUN IBAN RASUL ( DAAK ) NIYA .

Ya Allah bantuga /sanglita ha manga malaikat mu hi nabiy Muhammad iban na sin katan liud niya amuin miyakad namaratsaya kaniya, biyah sin kabantug mu kan nabiy Ibrahim iban sin liud niya, sabunnal tuud ikaw in tuhan baing ulungun lagih baying kasihun, ya Allah papagbarakata in unu-unu na kiyarihil mu ha nabiy Muhammad iban ha liud niya, biyah sin pag-dihil mu barakat ha nabiy Ibrahim iban liud niya sabunnal tuud ikaw in tuhan baying ulungun iban kasihun.

Sartah pag-ubus mu mag-tahayat sunnat bassahun mu in manga duwaa ini)

ALLAHUMMA INNIY AUDHUBIKA MIN ADHABI JAHANNAM, WA ADHABI AL-QABR , WA MIN FITNATI ALMAHYA WA ALMAMAT , WA MIN FITNATI MASIYHID DAJJAL )

Ya Allah mag-patilibun aku kaymu daying ha siksah sin narkah jahannam, iban ha siksah sin kubur, iban magpatilibun aku kaymu daying ha sasat sin kabuhi iban kamatay, iban ha sasat sin dajjal.

ALLAHUMMA AINNIY ALA DHIKRIKA WA SHURIKA WA HUSNI IBADATIKA). Ya Allah dihili aku kusug ha pagtum-tuman kaymu, iban pagsukur ha manga nihmat dihil mu kakuh, iban hidahayati aku hasupaya dumayaw in pag-ibadat ku.

,

ALLAHUMMA INNIY DHALAMTU NAFSIY DHULMAN KATHIRA WA LA YAGHFIRU ADDHUNUWBA ILLA ANTA FAGFIR LIY MAGFIRATAN MIN INDIKA WA IRHAMNIY INNAKA ANTA AL-GAFUR AL-RAHIM ) Ya Allah sabunnal tuud na anyaya ku in ginhawa baran ku sin pag-mahsiyat sataud-taud, nah! wayruun dugaing mangangampun sin dusa malayingkan tunggal ikaw , dihili aku kaampunan daying kaymu , sabunnal tuud ikaw in tuhan baying ampunun lagih baying ulungun .

Pinih nakaw diin-diin na maluhay hapalun mu daying ha manga duwaa yan.


[15]

Ubus ampa kaw mangbari salam pa tuu mu (ASSALAMU ALAYKUM WARAHMATU ALLAH) ubus ampa palawa. (ASSALAMU ALAYKUM WARAHMATU ALLAH )

Hukuman sin jikir puas sin sambahayang Siyunnat kaymu magjikir puas sin sambahayang parduh, adapun in jikir ammalan mu subay amuin bakas labay nahinang sin nabiy salla Allahu alayhi wassalam atawa kiyabaytah ha hadith niya. in jikir kiyabaytah daying kaniya amun pag-ammalan niya puas sin sambahayang parduh . )

ASTAGFIRU ALLAH, ASTGFIRU ALLAH, ASTAGFIRU ALLAH, ALLAHUMMA ANTAS SALAM WA MINKA ASSALAM, TABARAKTA YA DHAJALALI WA AL-IKRAM) . (Miki ampun aku pa Allah (makatu balikan 3x) ya Allah ikaw in tuhan wayruun Salih sabanding.

(

LA ILAHA ILLA ALLAH WAHDAHU LA SHARIKA LAHU , LAHU ALMULK WA LAHU ALHAMD , WA HUWA ALA QULLI SHAYIN QADIR , ALLAHUMMA LA MANIA LIMA AHTAYTA WA LA MUHTIYA LIMA MANAHTA WA LA YANFAU DHAL JAD MINKA ALJAD ) . Wayruun mapatut pagtag-ipunan malayingkan Allah tunggal siya wayruun sakatu niya, siya in tag-milik sin katan piyapanjari niya, siya tuput tunggal pudjihun, iban siya in makagaus ha katan unu-unu, ya Allah wayruun makagaus iban makapahgang kaymu ha hisiyu-siyu in dihilan mu rijjikih, iban wayruun isab makagaus mangdihil daying ha


[16]

manga ipun mu apabila piyahgangan mu, wayruun makamudarat iban makamumpaat malayingkan daying ha pag-bayah mu.

LA ILAHA ILLA ALLAH WAHDAHU LA SHARIKA LAHU , LAHU ALMULK WA LAHU ALHAMD , WA HUWA ALA QULLI SHAYIN QADIR , LA ILAHA ILLA ALLAH WA LA NAHBU ILLA IYYAHU , LAHU ANNIHMA WA LAHU ALFADL WA LAHU ATHTHANAU ALHASAN , LA ILAHA ILLAH ALLAH MUKHLISINA LAHU ADDIN WALAW KARIHA AL-KAFIRUN ) . Wayruun mapatut pagtag-ipunan malayingkan Allah tunggal siya wayruun sakatu niya , siya in tag-milik sin katan piyapanjari , iban siya in tuput tunggal pudjihun , iban siya in makagaus ha katan unu-unu , wayruun tuhan malayingkan siya , dih kami mag-tag ipun malayingkan kaniya , siya in magdihirihil sin nihmat , siya in tagmilik sin katan rijjikih , siya in tuput tunggal sarayaw-rayaw pudjihun, wayruun mapatut pag-tag ipunan malayingkan Allah in katan ammal ibadat tulus ikhlas karnah niya , minsan pa mabungsi in manga kafir .

Mahasutsi mahatinggi Allah, in pudjih tuput tunggal pa Allah , siya in sangat dakulah . Ubus ampa kaw magjikir sin ( SUBHANA ALLAH ( 33 ) ALHAMDULILLAH ( 33 ) ALLAHU AKBAR ( 33 ) in hika hanggatus niya la ilaha illa Allah wahdahu la sharika lahu, lahu almulk wa lahul alhamd, wahuwa ala kulli shayin qadir.


[17]

Sambahayang asar : in siya upat rakaat , in aturan sin pagsambahayang mu kaniya biyah sin aturan sin sambahayang luhur .

Sambahayang magrib : in siya tu rakaat , in duwa rakaat aun ayat niya in hinapusan niya rakaat wayruun na , in rakaat hikaruwa aun tahayat awwal niya , sartah bang kaw magbassa sin fatiha iban sin surah ha panagnaan duwa rakaat subay siya patanugun bang sawpama in ka-awnan mu imam , adapun bang isa-isa mura mamarahi minsan ikaw na na sadya in makarungug , sartah magtahayat akhir kaw duun ha hinapusan rakaat

Sambahayang isha : in siya upat rakaat , ha panagnaan duwa rakaat subay mu patanugun in pag-bassa mu bang in ka awnan mu imam adapun bang isa-isa mura mamarahi minsan ikaw na na sadya in makarungug magtahayat awwal kaw ha hikaruwa rakaat .

Sambahyang subu : duwa rakaat da siya , panagnaan rakaat iban hinapusan , subay mu patanugun in pag-bassa mu bang in ka awnan mu imam adapun bang isa-isa mura mamarahi minsan ikaw na na sadya in makarungug .


[18]

Mura-murahan papagmumpaatan kakuh iban kaniyu in kitab-kitab ini , sartah bang awun wayruun imamu ha sarah sin Allahu taala iban sin rasul niya in yan daying kakuh iban daying ha saytaan ayaw kamu mag-duwa ruwa magpatumtum kakuh , karnah wayruun manusiya jukup suhurun ku pa tuhan bang mayan taymaun niya in kakahinang ku yan sartah hibutang niya ha karayawan ku ha adlaw kiyamat .

In Kitab-kitab ini Hipagdihil Sadja Dih Makadjari Hipagdagang

Documents

Aturan Pagsambahayang