Upload
arnar-borsteinsson
View
216
Download
1
Embed Size (px)
DESCRIPTION
Ritgerð úr námskeiðinu atvinnulíf og skipulagsheildir
Citation preview
1
Háskóli Íslands Félags- og mannvísindadeild
FÉL027F haust 2010:
Atvinnulíf og skipulagsheildir - þróun, stefnumótun og stjórnun
ÞÁTTTAKA UNGLINGA OG KYNNI AF ATVINNULÍFINU
Kennari: Halldór Þór Grönvold
Nemandi: Arnar Þorsteinsson
2
Inngangur
Lengi hafa verið skiptar skoðanir á því hversu heppileg þátttaka ungmenna í launavinnu sé.
Þar hafa menn gjarna skipst í tvær fylkingar, þá sem vill leyfa börnum að njóta æskunnar
frjálsum frá alvarleika fullorðinsáranna og hina sem lítur á kynni af atvinnulífinu sem hluta
þess þroskaferlis að nálgast fullorðinsárin auk þess sem nauðsynlegt sé að börn læri að tengja
saman nám og starf.
Í okkar vestræna samfélagi hefur fyrrnefnda sjóðarmiðið verið nokkuð ríkjandi undanfarna
áratugi. Meðal annars hafa verið settar saman prýðilegar vinnuverndarreglugerðir til þess að
minnka líkur á því að þátttaka barna og unglinga í atvinnulífinu komi niður á námi og
persónulegum þroska þeirra. Hitt sjónarmiðið hefur samt sem áður ekki fallið í gleymsku, að
ungt fólk þurfi á einhverjum tímapunkti að kynnast fjölbreytileika atvinnulífsins, veröld
vinnunnar og þar með fullorðinsáranna. Í dag virðist umræðan snúast um hvort ekki megi
fara hér bil beggja, vernda unga fólkið frá hættum vinnunnar en leyfa því að njóta góðs af
kostum hennar. Slíkt geti hugsanlega orðið hvoru tveggja til framdráttar, skólanámi barnanna
og atvinnulífinu.
Í eftirfarandi ritgerð verða þessi tvö viðhorf reifuð og hvernig megi sem best, að minnsta
kosti, kynna börnum og unglingum fjölbreytileika atvinnulífsins með það að leiðarljósi að
þau læri að tengja saman nám og starf. Hugmyndir fræðimanna eru settar í samhengi við
íslenskan veruleika og það hvernig okkur gengur að feta þann meðalveg milli þess að vernda
börn og unglinga frá hættum vinnunnar og þess að kynna þeim þá veröld hennar sem við
tekur að námi loknu.
3
Barnæskan og vinnan
Áhyggjur vegna atvinnuþátttöku barna og unglinga og viðeigandi jafnvægis milli náms og
vinnu hafa verið viðvarandi frá því í upphafi síðustu aldar. Þeirri spurningu hefur verið
varpað fram hvort unglingar séu of snemma hvattir til að líkja eftir lífi fullorðna fólksins sem
síðan komi niður á þroska þeirra og námsárangri. Þar hefur ótímabær þátttaka á
vinnumarkaði verið talinn með öðrum áhættuþáttum (Zimmer-Gembeck og Mortimer, 2006).
Vinna barna og unglinga á sér auðvitað langa sögu en í kjölfar Iðnbyltingarinnar má segja að
margvíslegar vangaveltur um réttmæti slíkrar vinnu hafi orðið áberandi. Skólum fjölgaði
einnig auk þess sem nýjum kenningum um æsku og uppeldi fór að vaxa fiskur um hrygg.
Barnæskan var álitin tímabil þar sem börn ættu rétt á að njóta fullkominnar verndar frá
hörðum heimi fullorðna fólksins og varð þetta viðhorf hinu yfirsterkara sem leit svo á að
fullorðinsárin væru aðeins framlenging af æskunni sem aðeins hefði gott af innsýn í þann
veruleika sem við tæki. Allt olli þetta því að hyggilegra þótti að börn og unglingar sæktu
skóla og sinntu ekki öðrum störfum samhliða námi (Bourdillion, 2006). Börn ættu að fá að
njóta æsku sinnar og öll viðgangsefni þeirra skyldi meta eftir því hvaða andlegu og
uppeldislegu áhrif þau hefðu. Var námið og skólinn, ásamt frístundum þar í fyrsta sæti og
höfðu þessar hugmyndir því afgerandi áhrif á að miklar takmarkanir voru gerðar á
atvinnuþátttöku barna (Zimmer-Gembeck og Mortimer, 2006).
Á fyrri hluta síðustu aldar var því æ meiri áhersla lögð á að börn stunduðu skólann af kappi
enda þekkingin sem þar fengist mikilvægari þátttöku í atvinnulífinu ekki síst vegna aukinnar
sérhæfingar og flóknari verkefna á vinnumarkaði. Í Bandaríkjunum varð þessi þróun til
dæmis mjög hröð, unglingar flykktust í skóla á meðan stöðugt dró úr þátttöku barna og
unglinga í atvinnulífi. Aðeins um 5% útskrifuðust úr „high school“ 1890 en sú tala var
komin yfir 50% 1940 (Zimmer-Gembeck og Mortimer, 2006).
Margt hefur síðan í tímans rás flækt vangaveltur um kosti og galla atvinnuþátttöku fólks undir
18 ára aldri. Skilgreiningar á hugtökum, meðal annars hvað það er að vera barn, auk
mismunandi aðstæðna og áhersla eftir menningarsvæðum hefur, svo dæmi sé tekið, gert
Alþjóðasamninga um málefnið nokkuð flókna (Þóra Björnsdóttir, 2009). Þó er í vestrænum
samfélögum almennt miðað við 18 ára aldur og vinnuverndarlög og reglugerðir, meðal annars
sú íslenska, miðast við þann aldur. Dæmi um þær flækjur sem slíkar skilgreiningar hafa haft í
för með sér má raunar finna strax í fyrstu grein íslensku reglugerðarinnar um vinnu barna og
unglinga (Dóms- og kirkjumálaráðuneytið, 1999). Þar er greint á milli þrenns; „ungmenni“
4
merkir einstakling undir 18 ára aldri, „barn“ undir 15 ára eða í skyldunámi og loks er
„unglingur“ einstaklingur sem náð hefur 15 ára aldri en er undir 18 ára og ekki lengur í
skyldunámi. Einnig hafa áhyggjur af barnaþrælkun, ungum hermönnum og kynlífstengdri
vinnu (Þóra Björnsdóttir, 2009) orðið til þess að flækja málin og er þá samt sem áður fátt eitt
upp talið.
Í stuttu máli má þó segja að tvö sjónarmið hafi tekist á, sjónarmið sem endurspegla ólíkar
hugmyndir um barnæskuna. Annars vegar er horft til æskunnar sem tímabils í lífinu þar sem
fullorðnir vernda börn sem aftur eiga að vera frjáls til að lifa og leika sér án tengsla við
markaðsöfl, ábyrgð og alvarleika lífsmynsturs fullorðna fólksins. Þátttaka í raunverulegu
atvinnulífi er hér því víðs fjarri þó horft sé til þess að börn geti tekið þátt í vinnu til að læra,
svo sem heimilisstörfum, án þess að aðrir hagnist beint af þeirri vinnu. Þetta viðhorf sem oft
er tengt hinum vestræna heimi hafnar allri annars konar vinnu enda sé með því verið að taka
æskuna frá börnunum (Bourdillion, 2006).
Hitt viðhorfið horfir til ólíkra efnahagslegra og menningarlegra aðstæðna sem einnig séu
mismunandi eftir aldri, getu og kyni. Stutt er við rétt barnsins til verndar og stuðnings en
horft á barnæskuna í samhengi við fullorðinsárin þar sem börnin færast smám saman í fang
verkefni fullorðinna eftir því sem hæfni þeirra eykst og möguleikum fjölgar. Samkvæmt
þessu viðhorfi er vinna eðlilegur þáttur í þroska barnsins þar sem þátttaka í atvinnulífi eykst í
lífi þess eftir því sem það þroskast og dafnar (Bourdillion, 2006).
Fyrrnefnda viðhorfið hefur verið nokkuð ráðandi á Vesturlöndum, einskonar
vinnuverndarsjónarmið þ.e. að andlegu og líkamlegu heilbrigði ungmenna sé ekki hætta búin
og að vinna hafi ekki truflandi áhrif á menntun þeirra og þroska samanber Reglugerð um
vinnu barna og unglinga (Dóms- og kirkjumálaráðuneytið, 1999). Þetta sjónarmiðið hefur
raunar verið það ráðandi í okkar heimshluta að Alþjóðastofnanir virðast jafnvel stefna að
afnámi allrar vinnu barna og unglinga þó hugmyndin um slíkt afnám sé ekki síst hugsuð sem
leið að öðrum og göfugri markmiðum svo sem eflingu menntunar, baráttu gegn sjúkdómum,
fátækt og barnaþrælkun í löndum þar sem börn búa við önnur og verri lífsskilyrði en hér á
Vesturlöndum (Þóra Björnsdóttir, 2009).
5
Hins vegar hefur á liðnum árum ítrekað verið bent á að vinna og kynni af vinnumarkaði geti
ekki aðeins haft neikvæð heldur einnig jákvæð áhrif á börn og unglinga, þroska þeirra og
námsframvindu (Bourdillion, 2006). Því hefur umræðan undanfarin ár í auknum mæli snúist
um þá eðlilegu grundvallarspurningu hvernig börn og unglingar geti fengið innsýn í heim
fullorðinna, þar með talið veröld vinnunnar, án þess að það taki tíma frá skóla og hafi áhrif á
persónulegan þroska (Zimmer-Gembeck og Mortimer, 2006).
Sú spurning tengist ekki síst tengslum á milli náms og starfs, samspili þessa tvenns og því
hvernig skólanám nýtist atvinnulífinu og hinu hvernig atvinnulífið geti haft jákvæð og
hvetjandi áhrif á nám barna og unglinga. Líkt og vinna er fullorðnum mikilvæg í fleiru en
efnahagslegu tilliti (Blustein, 2006) er spurning hvort vinnan ætti ekki að geta haft
margvísleg jákvæð áhrif á nám og þroska unglinga ef rétt er á spilum haldið.
Unglingar á vinnumarkaði
Fræðimenn hafa margir hverjir undrast það hversu lítil fræðileg áhersla hefur verið lögð á
áhrif launaðrar vinnu unglinga (Zimmer-Gembeck og Mortimer, 2006; Twenge, Campbell,
Hoffman og Lance 2010). Rannsóknir beinist gjarnan að fjölda vinnustunda en sjaldnar sé
skoðað hvað unglingar eru að gera í vinnunni, viðhorf þeirra til vinnunnar, samskipti þeirra á
vinnustað og almennt jákvæð og neikvæð áhrif vinnunnar og hvernig vinna unglinga getur
haft áhrif á það hvernig þeir standa sig sem fullorðnir í námi og starfi (Zimmer-Gembeck og
Mortimer, 2006).
Aukin réttindi og þátttaka barna og unglinga í samfélaginu hefur raunar orðið til þess að unga
fólkið hefur sjálft látið talsvert til sín taka á þessum vettvangi og barist fyrir sínum eigin
hagsmunum og réttindum á vinnumarkaði (Þóra Björnsdóttir, 2009). Enda svara börnin sjálf
því til að þau vinni til þess að afla sjálfum sér tekna. Börn eru nú einnig, hvort sem okkur
líkar það betur eða verr, mikilvægur markhópur kaupmanna, auk þess sem skoðun foreldra
virðist almennt sú að börn og unglingar geti að mestu ráðið því sjálf hvernig þau eyða eigin
vinnulaunum (Zimmer-Gembeck og Mortimer, 2006).
Þátttaka unglinga í atvinnulífinu samhliða námi er því umtalsverð víða í hinum vestræna
heimi þó rannsóknir hafi fram að þessu fremur snúnist um magn en gæði. Og margt hefur
verið vel gert hvað varðar vinnuvernd eins vikið verður að þegar horft er til stöðunnar hér
heima hvað þá hluti varðar.
6
Sem fyrr segir tengist spurningin hvort vinna ungmenna sé af hinu góða eður ei langvinnri
þrætu milli þess eðlilega markmiðs að vernda og hins að kynna veröld vinnunar og fá innsýn í
veruleika fullorðinsáranna (Zimmer-Gembeck og Mortimer, 2006). Fylgismenn síðarnefnda
viðhorfsins vitna meðal annars til skrifa Erikson (1968) sem hélt því fram að kynni af vinnu
og atvinnuleit væri eitt af lykilatriðum þess að læra að þekkja sjálfan sig, ekki síst í nútíma
tæknivæddum samfélögum. Það geti jafnvel leitt til margskonar persónulegra erfiðleika fái
ungt fólk ekki tækifæri til tengingar við vinnu og atvinnulíf.
Þetta viðhorf hefur nú verið að skjóta upp kollinum á ný og hefur hugsanlega aldrei fallið í
gleymsku því strax árið 1974 varpaði bandarísk vísindaráðgjafanefnd (Panel of Youth:
President´s Science Advisory Committee) fram þeirri spurningu hvort hugsanlega væri lögð
of mikil áhersla á skólanám sem undirbúning ungs fólks fyrir fullorðinsárin. Tekið var fram
hversu fáar vinnandi fyrirmyndir börn og unglingar hefðu aðrar en foreldra sína og kennara.
Mælt var með því að skólar og atvinnulífið tækju höndum saman við að kynna ungu fólki
raunverulegar vinnuaðstæður og að fullorðnir tækju virkari þátt í leiðsögn barna og unglinga
hvað varðar þátttöku í atvinnulífinu (Zimmer-Gembeck og Mortimer, 2006).
Í dag virðist áherslan í fræðaheiminum einmitt þessi; að samþætta hin tvö ólíku sjónarmið
enda spurningin kannski einmitt sú hvernig kynni barna og unglinga af atvinnulífi geti virkað
hvetjandi í námi, stuðlað að persónulegum þroska og aukið líkur á skynsamlegri tengingu á
milli náms og starfs. Þetta viðhorf má enda víða finna án þess að ætlunin sé að gera lítið úr
áherslu á hefðbundið skólanám. Bourdillion (2006) tekur til dæmis fram að auðvitað eigi
börn að fá öll tækifæri til að þroskast eðlilega, andlega sem líkamlega. Formlega menntun
þurfi einnig að bæta ásamt því að bæta aðgengi að henni og alla vinnu sem hamli slíkri
menntun eigi ekki að líða. Hins vegar geti nám og vinna vel samræmst hvort öðru og
skólabörn geti í mörgum tilfellum haft margvíslegan hag af því að sinna störfum sem þau
ráða vel við.
Zimmer-Gembeck og Mortimer (2006) virðast á sömu skoðun og vitna meðal annars í
rannsóknir á viðhorfum foreldra sem virðast trúa því að vinnan geti göfgað unglingana rétt
eins og þau töldu þátttöku í atvinnulífinu hafa hjálpað þeim sjálfum á sinni tíð. Þar lærist
enda margt jákvætt svo sem að bera ábyrgð, skuldbinda sig verkefnum, skipuleggja tíma sinn
og nota peninga skynsamlega. Einnig geti það styrkt sjálfstraust, sjálfsþekkingu, virðingu
fyrir sjálfum sér og trú á eigin hæfileika auk þekkingar á atvinnulífinu og þeirri hæfni sem þar
7
er krafist. Fyrir nú utan þann kost að læra að velja og hafna, þekkja úr óspennandi störf og
gera sér í leiðinni hugsanlega grein fyrir mikilvægi menntunar.
Þetta viðhorf er einnig að finna hjá Blustein (2006) sem segir að eitt hið mikilvægasta sem
komið hafi fram í fjölda rannsókna og yfirlitsgreina sé að nám og starf eigi að tengja vel og
skilmerkilega í námskrám, stoðþjónustu og félagsstörfum í tengslum við nám. Áherslan í
skólakerfinu eigi að vera sú að námsráðgjafar og kennarar aðstoði hvern og einn nemenda við
að skilja tengslin á milli náms og starfs. Niðurstöður Blustein sýna einnig fram á að tengsl við
aðra sem einkennast af stuðningi eru mjög hjálpleg við yfirfærslu frá skóla til vinnu og leggur
hann þar áherslu á mikilvægi hvetjandi námsumhverfis og stuðning fullorðinna við að fóta
sig í námi og starfi.
Miðað við niðurstöður nýlegra rannsókna ætti þessi málamiðlunarleið svo sem ekki að koma
á óvart. Í yfirlitsgrein Zimmer-Gembeck og Mortimer (2006) er farið vítt og breytt yfir það
svið. Þar kemur meðal annars fram að þó svo að unglingar í Bandaríkjunum stefni á
framhaldsnám tengja þeir hvorki núverandi né tilvonandi nám mikið hugsanlegri framtíð á
vinnumarkaði. Við slíkar aðstæður geti framtíðarstörf orðið nær fantasíum en raunverulegum
framtíðarmarkmiðum byggðum á skipulagi og tilgangi. Þar kemur einnig fram að það sé ekki
endilega sá tími sem vinna tekur frá náminu sem skipti máli heldur alls ekki síður „gæði“
þeirrar vinnu sem stunduð er. Því sé mikilvægt að auka rannsóknir á kostum og göllum vinnu
og vinnuumhverfis barna og unglinga því tilgangur slíkrar vinnu hljóti, að minnsta kosti
öðrum þræði, að vera sá að þau læri jákvæða hluti á borð við að bera ábyrgð, stýra tíma
sínum og standa sína plikt. Margt jákvætt annað geti þar spilað inn í svo sem aukið
sjálfstraust, sjálfsþekking og sjálfsvirðing, trú á eigin getu og það að læra að þekkja úr
áhugaverð störf með tilliti til eigin áhuga og hæfileika.
Vinnan geti hins vegar einnig verið vettvangur skipulagsleysis, mistaka, samstarfserfiðleika,
einhæfni og óviðunandi vinnuskilyrða sem við viljum eðli máls samkvæmt vernda börnin
gagnvart í lengstu lög (Zimmer-Gembeck og Mortimer, 2006).
Zimmer-Gembeck og Mortimer segja mjög vanta fræðilegan ramma sem stýri tilgátum milli
hinna margvíslegu hliða sem óneitanlega séu á vinnu unglinga. Eitt af því sem þurfi nánari
skoðun sé að hvaða leiti þarfir þeirra séu ólíkar þörfum hinna sem eldri eru. Vel geti verið að
sumir þættir vinnunnar séu unglingum mikilvægari svo sem möguleikinn til að þróa
félagshæfni sína, kynnast ólíkum starfsvettvangi, takmarka árekstra á milli skóla og vinnu og
fá styðjandi og skipulagða leiðsögn yfirmanna. Hins vegar geti störf sem fullorðnum finnist
8
óspennandi falið í sér áskoranir fyrir unglinga og ýtt undir hæfileika þeirra. Með því að
styrkja tengslin á milli vinnu og skóla eigi einnig að vera hægt að auka líkurnar á því að ungt
fólk skynji vinnuna sem framhald af náminu, hvoru tveggja til hagsbóta.
Þó það sé almennt samþykkt að menntun undirbúi ungt fólk undir hlutverk á vinnumarkaði,
er hún ekki eina sviðið þar sem ungt fólk undirbýr sig undir vinnu. Gagnsemi hvors tveggja
náms og reynslu af vinnu mætti styrkja með frekara samstarfi og viðurkenningu á hvoru fyrir
sig.
Því virðist sem að hugsanlega megi fara bil beggja milli hinna tveggja, að því er virtist,
andstæðu sjónarmiða um vinnu unglinga. Að minnsta kosti í því umhverfi sem við á
Vesturlöndum búum við, þar sem áhyggjur af barnaþrælkun og alvarlegri misnotkun barna á
vinnumarkaði eru af allt öðrum toga en víða annars staðar í veröldinni. Í því tilliti er rétt að
líta til okkar nánasta umhverfis.
Vinna barna og unglinga á Íslandi
Löng hefð er fyrir vinnu barna og unglinga hér á landi þó mikið hafi breyst í þeim efnum
undanfarin ár og áratugi í samræmi við þær hröðu samfélagsbreytingar sem hér hafa orðið.
Íslenskar rannsóknir sýna þó að enn er talsvert algengt að nemendur stundi vinnu með námi
þó þær rannsóknir hafi snúið að fjölda vinnustunda fremur en viðhorfum unglinganna eða
vinnuaðstæðum. Þannig kemur fram að 2006 virtust um 36% nemenda í 9. og 10. bekk vera í
hlutastarfi með námi og hafði þá lítið breyst frá 1997 þó vikulegur vinnutími hefði lengst
(Álfgeir Logi Kristjánsson, Inga Dóra Sigfúsdóttir og Jón Sigfússon 2006). Í annarri könnun
sem gerð var skólaárið 2007-2008 kom fram að um 26% nemenda í 9. bekk ynnu með námi
(Amalía Björnsdóttir, Baldur Kristjánsson og Börkur Hansen, 2009) en þessar tölur virðast
hækka mikið þegar upp í framhaldsskóla er komið. Þannig sögðust 62% framhaldskólanema
þriggja skóla vinna með námi 2005 (Hannes I. Ólafsson, Björk Þorgeirsdóttir og Garðar
Gíslason, 2006).
Þetta ætti sennilega ekki að koma á óvart þar sem börn og unglingar eru mikilvægur
markhópur kaupmanna sem beina í æ meiri mæli markaðssetningu sinni í þá átt. Raunar
munu engin lög í landinu sporna við slíku samkvæmt nýlegum fréttum (Ríkisútvarpið, 2010).
9
Lítið ef nokkuð mun hins vegar til af rannsóknum á viðhorfum íslenskra unglinga til
vinnunnar, líðan þeirra á vinnustað eða annarra þeirra þátta sem áður hafa verið raktir. Ljóst
er að undanfarin ár höfum við lagt rækt við verndunarsjónarmiðið sem glögglega má sjá í
Reglugerð um vinnuvernd barna og unglinga. Þar er í 4. grein almennt ákvæði þar sem segir:
„Við öll störf ungmenna undir 18 ára aldri skal við val og skipulagningu á vinnu leggja
áherslu á að öryggi og andlegu og líkamlegu heilbrigði ungmenna sé ekki hætta búin og að
vinna hafi ekki truflandi áhrif á menntun þeirra og þroska.“ (Dóms- og kirkjumálaráðuneytið,
1999).
Er þetta í samræmi við fyrrnefnd sjónarmið Alþjóðasáttmála (Þóra Björnsdóttir, 2009) og í
takt við leiðbeinandi reglur Evrópusambandsins í þessum efnum þar sem ekki verður betur
séð en banna eigi vinnu grunnskólabarna undir 15 ára aldri og mjög strangar reglur eigi að
gilda um vinnu 15 – 18 ára (Lög Evrópusambandsins, 1994).
Á Íslandi höfum við sem betur fer ekki þurft að hafa miklar áhyggjur af tengslum vinnu barna
og unglinga við barnaþrælkun eins og víða er raunin (Þóra Björnsdóttir, 2009). Hér er einnig
lítil hætta á að ungmenni neyðist til að hverfa frá námi vegna þátttöku í atvinnulífinu.
Reglugerð um vinnu barna og unglinga tekur einmitt sérstaklega til þess að „... vinna hafi
ekki truflandi áhrif á menntun þeirra og þroska“ (Dóms- og kirkjumálaráðuneytið, 1999) og
er augljóslega ætluð til að styðja einmitt við þær jákvæðu afleiðingar vinnunar sem minnst
hefur verið á; skapa unglingum möguleika til að eiga samskipti við mikilvægar fullorðnar
fyrirmyndir og þannig stutt þá við að byggja upp eigin sjálfsmynd og velta fyrir sér þeim
leiðum sem færar eru í námi og starfi. En þar er aðeins hálf sagan sögð. Tengsl náms og
starfs, fjölbreytileiki atvinnulífsins og þjálfun við ný og ögrandi verkefni fæst ekki lært með
vinnuverndarlöggjöf einni saman hversu góð sem hún annars er.
Það er aðkallandi spurning hvort atvinnuþátttaka ungs fólks á Íslandi í dag ýti undir þessa
fyrrnefndu jákvæðu þætti. Hvað er atvinnulífið, skólakerfið og ríki/sveitarfélög að gera til að
atvinnuþátttaka ungs fólks sé ekki aðeins mögulega heldur beinlínis líklegt til að stuðla að
jákvæðri upplifun og ýta undir metnað til frekari landvinninga á því sviði? Í Bandaríkjunum
hafa menn áhyggjur, ekki síst af þeirri staðreynd að margir eru í framhaldsnámi án nokkrar
tengingar við eitthvað sem þeir geta hugsað sér að starfa við að námi loknu (Zimmer-
Gembeck og Mortimer, 2006) og í nýlegri rannsókn Guðbjargar Vilhjálmsdóttur (2010) þar
sem fjallað er um tengsl starfshugsunar og brottfalls úr framhaldsskólum kemur fram að
framfarir í starfshugsun á aldrinum 15 – 16 ára auki líkur á að þau ljúki námi. Þykja þær
10
niðurstöður mikilvægar fyrir starfandi náms- og starfsráðgjafa og hvatning fyrir eflingu
náms- og starfsfræðslu fyrir unglinga í grunnskólum.
Náms- og starfsfræðsla
Nú hafa margir skoðanir á því hversu heppilegt það sé að börn og unglingar taki virkan þátt í
atvinnulífinu samhliða námi í grunn- og framhaldsskólum. Við það eru hvort tveggja kostir
og gallar eins og áður er rakið og fer nokkuð eftir aðbúnaði þeirra á vinnustað, samskiptum
og því hvaða áhrif vinnan hefur á ástundun námsins. Fræðsla um tengsl náms og starfs og
innsýn í fjölbreytileika atvinnulífsins ætti þó að vera, að minnsta kosti, nokkuð hættulítið
skref í þá átt að kynna börnum og unglingum veröld vinnunar og aðstoða þau við að skilja
mikilvægi hennar. Hvernig skyldi þeim þætti sinnt af skólakerfi og atvinnulífi?
Í skýrslu nefndar menntamálaráðherra til Alþingis (2008) er bent á að náms- og starfsfræðsla
sé „... frekar óburðug grein í íslensku skólakerfi.“ (s. 16). Markviss náms- og starfsráðgjöf
geti hins vegar „... gefið ungu fólki forskot í að afla sér grunnþekkingar og hæfni sem það
þarfnast á leið sinni til farsæls náms- og starfsvals.“ (s. 18). Að lokum er þar bent á að
fræðsla og ráðgjöf um nám og störf ætti að vera fastur liður í námsskrá hvers skóla auk þess
sem bæta þyrfti úr brýnni þörf fyrir námsefni í greininni.
Í lífsleiknihluta nýrrar Aðalnámskrár grunnskóla (2007) er í inngangi minnst á aukna áherslu
á náms- og starfsfræðslu sem í nánari útfærslu er fylgt eftir með markmiðum á borð við að
nemendur „geri raunhæfar áætlanir um náms- og starfsleiðir er standa til boða við lok
grunnskóla og geti nýtt sér ráðgjöf og upplýsingatækni í þeim tilgangi“, „geti sett sér raunhæf
markmið til að stefna að í lífinu“, „öðlist skilning á atvinnulífinu í samhengi við námsleiðir
og starfsval“ og „nýti ráðgjöf um náms- og starfsleiðir.“ Fátt er hinsvegar að finna um það
hvernig best sé að nálgast þessi góðu markmið og raunar virðist alvöru umræða um náms- og
starfsfræðslu í grunnskólum enn á byrjunarstigi þrátt fyrir fögur fyrirheit.
Náms- og starfsfræðsla er raunar ekki lengur til sem sérstök námsgrein heldur felld undir hatt
lífsleikni í námskrám hvort tveggja grunn- og framhaldsskóla og þó svo að í lögum um
framhaldskóla (2008) segi að skólinn skuli búa nemendur undir þátttöku í atvinnulífinu og
frekara nám virðist hvorki þar né í grunnskólanum hugað sérstaklega að almennri náms- og
starfsfræðslu að minnsta kosti ekki fyrir milligöngu þeirra náms- og starfsráðgjafa sem þar
starfa (Sigríður Dísa Gunnarsdóttir, 2006). Frá þessu virðast þó einstaka undantekingar sem
11
þá byggja á einstaklingsframtaki á borð við námsefni Tækniskólans ”Lífsbrautin” (Sigurjóna
Jónsdóttir, 2010).
Um þátttöku atvinnulífsins á þessu sviði virðist svipað ástatt, einstaka einstaklingsframtak en
engin heildarstefna að því er best verður séð. Þar virðast ýmis sóknarfæri sem eru vannýtt en
sem dæmi má nefna að stefna Vinnuskóla Reykjavíkur virðist tengjast umhverfisvernd,
garðyrkju og þekkingu á höfuðborginni miklu fremur en að veita unglingum innsýn í heim
vinnunnar (Vinnuskóli Reykjavíkur, e.d.). Eru þau markmið auðvitað góðra gjalda verð en
samt sem áður spurning hvort við getum ekki gert svo miklu, miklu betur.
Niðurstöður/umræða
Þó svo að sú áhersla sem lögð hefur verið á vinnuvernd barna og ungmenna í okkar
heimshluta sé mjög af hinu góða, og margt hafi áunnist í þeim efnum, virðist sem að fleiru sé
að hyggja. Eins og bent hefur verið á getur þátttaka barna og unglinga á vinnumarkaði
vissulega verið farvegur neikvæðra hluta á borð við mistaka, samstarfserfiðleika, einhæfni og
óviðunandi vinnuskilyrða. Ekki má þó gleyma þeim þáttum sem við í áranna rás höfum lært
af þátttöku í atvinnulífinu; ábyrgð, skuldbindingu gagnvart því sem okkur er treyst fyrir,
þekkingu á okkur sjálfum; styrkleikum og veikleikum ásamt, ef vel hefur tekist til, aukins
sjálfstrausts, sjálfsvirðingar og trúar á eigin getu.
Nám og starf tengjast órofa böndum enda taka flestir á endanum þátt í atvinnulífinu með
einum eða öðrum hætti. Flestir byrja einnig sennilega að hugsa beint eða óbeint af einhverri
alvöru um þátttöku í atvinnulífinu á unglingsárum, ekki endilega vegna tengingar við nám sitt
heldur af öðrum og markaðsvænni ástæðum. Hvernig við aðstoðum unglinga við að gera
þátttöku í atvinnulífinu að jákvæðri uppbyggilegri reynslu hlýtur samt sem áður að skipta
máli þannig að sú þátttaka verði þeim hjálpleg við að læra að standa á eigin fótum fremur en
að upplifa þar deilur, mistök og ofríki sem aftur hefði hamlandi áhrif á nám þeirra og þroska.
Skipulagning þess hvernig börn og unglingar kynnast atvinnulífinu hlýtur að þurfa að taka
mið af þessu en ekki vera tilviljunarkennt ferli með það eitt að markmiði að fyllt sé upp í þau
störf sem aðrir vilja ekki sinna og börnin fái skotsilfur til að geta uppfyllt óskir sínar sem
neytendur. Við hljótum að vilja sjá unglinga kynnast atvinnulífinu á þann hátt að þau kynni
12
takmarki árekstra við skóla, börnin kynnist þeim möguleikum sem felast á vinnumarkaði og
geti lært að velja og hafna út frá þekkingu á sjálfum sér, áhuga og getu. Við þurfum að velta
fyrir okkur hvort þau störf sem unglingar sinna samhliða námi feli í sér viðeigandi áskoranir,
hvort ýtt sé undir hæfileika þeirra og hvort vinnan sé þeim hvatning til frekara náms og starfs.
Miðað við þau störf sem börn og unglingar hafa sinnt hér á landi undanfarin ár er kannski
vafasamt að ýta undir frekari þátttöku að óbreyttu. Afgreiðslustörf þar sem yfirmaður er árinu
eldri er kannski ekki sú mynd sem fræðimenn hafa dregið upp sem æskilega samþættingu
náms og starfs. Skipulögð og styðjandi leiðsögn ábyrgra fullorðinna hlýtur alltaf að vera
grunnur að atvinnuþátttöku ungs fólks sem leitt getur til jákvæðrar niðurstöðu og hvatt það til
dáða.
Fyrsta skrefið í þessa átt gæti því falist í aukinni náms- og starfsfræðslu þar sem skólakerfið
og atvinnulífið tækju höndum saman. Með því að styrkja þessi tengsl ætti að vera hægt að
auka líkurnar á því að ungt fólk skynji vinnuna sem framhald af náminu, hvoru tveggja til
hagsbóta. Þar erum við því miður stutt á veg komin, jafnvel enn styttra en fyrir hartnær hálfri
öld þegar fræðsla um nám og störf var þó viðurkennd námsgrein í íslensku skólakerfi.
Þrátt fyrir að erlendar rannsóknir á þessu sviði séu enn sem komið er af skornum skammti
verður ekki betur séð en fræðimenn séu í dag hallir undir þá skoðun að nám og vinna geti vel
samræmst hvort öðru sé vel á málum haldið og skólabörn geti í mörgum tilfellum haft
margvíslegan hag af því að sinna störfum sem þau ráða vel við. Fræðsla um slík störf ætti því
til að byrja með að vera nokkuð hættulítil.
13
Heimildir:
Aðalnámskrá grunnskóla (2007). Lífsleikni. Menntamálaráðuneytið.
Amalía Björnsdóttir, Baldur Kristjánsson og Börkur Hansen (2009). Tíminn eftir skólann
skiptir líka máli. Um tómstundir og frítíma nemenda í 1., 3., 6. og 9. bekk grunnskóla. Netla –
veftímarit um uppeldi og menntun. Sótt 5. október 2010 af
http://netla.khi.is/greinar/2009/010/index.htm
Álfgeir Logi Kristjánsson, Inga Dóra Sigfúsdóttir, Jón Sigfússon (2006). Ungt fólk 2006.
Menntun, menning, tómstundir og íþróttaiðkun ungmenna á Íslandi. Rannsókn meðal
nemenda í 9. og 10. bekk grunnskóla vorið 2006. Reykjavík: Rannsóknir og greining. Sótt 7.
október 2010 af bella.mrn.stjr.is/utgafur/ungt_folk_2006.pdf
Blustein, David. (2006). The psychology of working: A new perspective for career
development, counseling, and public policy. Mahwah, NJ: Lawrence Erlbaum.
Bourdillion, M. (2006). Children and Work. A Review of Current Literature and Debates.
Development and Change, 37(6), 1201-1226.
Dóms- og kirkjumálaráðuneytið (1999). Reglugerð um vinnu barna og unglinga 426/1999.
Sótt 5. október 2010 af
http://www.reglugerd.is/interpro/dkm/WebGuard.nsf/b7fd33650490f8cf00256a07003476bb/
07126cdc4b575cf000256a0800322a61?OpenDocument
Erikson, E. E. (1968). Identity: Youth and crisis. New York: Norton.
Guðbjörg Vilhjálmsdóttir (2010). Occupational Thinking and Its Relation to School Dropout.
Journal of Career Development. Published online 5 March.
Hannes I. Ólafsson, Björk Þorgeirsdóttir og Garðar Gíslason (2006). Vinna
framhaldsskólanema með námi. Könnun á vinnu framhaldsskólanema á höfuðborgarsvæðinu
gerð 2005. Fjölbrautaskólinn við Ármúla, Kvennaskólinn í Reykjavík og Menntaskólinn í
Kópavogi. Sótt 7. október 2010 af www.ismennt.is/not/gardarg/Vinna.doc
Lög Evrópusambandsins (1994). On the protection of young people at work. Sótt 6. október
2010 af
http://eur-lex.europa.eu/LexUriServ/LexUriServ.do?uri=CELEX:31994L0033:EN:NOT
14
Lög um framhaldsskóla nr. 92/2008.
Ríkisútvarpið (2010). Frétt 6. október: Markaðssetningu beint að börnum. Sótt 6. október
2010 af http://www.ruv.is/frett/markadsetningu-beint-ad-bornum
Sigríður Dísa Gunnarsdóttir (2006). Að stuðla að þróun starfsferils nemenda: Þáttur náms-
og starfsfræðslu í grunn- og framhaldsskólum. Óbirt meistararitgerð: Háskóli Íslands,
Félagsvísindadeild.
Sigurjóna Jónsdóttir (2010). Árangursmat á náms- og starfsfræðslu í starfsmenntaskóla.
Óbirt meistararitgerð: Háskóli Íslands, Félags- og mannvísindadeild.
Skýrsla nefndar menntamálaráðherra til Alþingis (2008). Skýrsla nefndar um gildi aukinnar
náms- og starfsráðgjafar í grunn- og framhaldsskólum, sem úrræðis gegn brottfalli nemenda
í framhaldsskólum og fyrir farsælu náms- og starfsvali. (Óútgefið handrit).
Twenge J. M., Campbell S. M., Hoffman B. J., Lance C. E. (2010). Generational Differences
in Work Values: Leisure and Extrinsic Values Increasing, Social and Intrinsic Values
Decreasing. Journal of Management, 36, 1117-1142.
Vinnuskóli Reykjavíkur (e.d.). Stefna Vinnuskóla Reykjavíkur. Sótt 8. október 2010 af
http://www.vinnuskoli.is/?s=6&siduID=45&men=7
Zimmer-Gembeck, Melanie J., Mortimer, Jeylan T. (2006). Adolescent Work, Vocational
Development, and Education. Review of Educational Research, 76, 537-566.
Þóra Björnsdóttir (2009). Er öll vinna barna slæm? Baráttan um barnavinnu og vestræn
áhrif á gerð alþjóðasáttmála. Óbirt BA – ritgerð: Háskóli Íslands, Félags- og
mannvísindadeild.