Upload
others
View
4
Download
0
Embed Size (px)
Citation preview
1
RREGULLAT
PËR
SIGURIMIN E PERSONELIT
I. OBJEKTI DHE FUSHA E VEPRIMIT
Neni 1
Objekti i kësaj rregulloreje është:
a) përcaktimi i rregullave për zhvillimin e procedurave të verifikimit të
sigurisë ndaj individëve që do të njohin, do të prodhojnë, do të ruajnë, do
të administrojnë, do të transportojnë dhe do të transmetojnë informacion
të klasifikuar gjatë ushtrimit të detyrave zyrtare ose në përmbushje të një
veprimtarie në kuadrin e respektimit të parimit “nevojë për njohje”;
b) përcaktimi i rregullave, mbi bazën e të cilave veprohet për lëshimin,
ripajisjen, refuzimin, heqjen dhe pezullimin e “Certifikatës së sigurimit të
personelit, për edukimin e sigurisë, inspektimet dhe të drejtën e
ankimimit të individëve.
Neni 2
Fusha e veprimit
Rregullat për sigurimin e personelit zbatohen nga të gjitha ministritë,
institucionet shtetërore, si dhe nga operatorët ekonomikë të interesuar për të
qenë palë në kontrata të klasifikuara.
Dispozitat e kësaj rregulloreje zbatohen në të njëjtën mënyrë ndaj të gjithë
individëve që u nënshtrohen procedurave të verifikimit të sigurisë për t’u pajisur
me “Certifikatë të sigurimit të personelit” për njohjen, prodhimin, ruajtjen,
administrimin, transportimin dhe transmetimin e informacionit të klasifikuar
gjatë ushtrimit të detyrave zyrtare ose në përmbushje të një veprimtarie në
kuadrin e respektimit të parimit “nevojë për njohje”.
2
II. PËRKUFIZIME DHE PARIME TË PËRGJITHSHME
Neni 3
Në zbatim të kësaj rregulloreje do të përdoren përkufizimet e mëposhtme:
1. “Informacion i klasifikuar”, është çdo dokument ose material,
pavarësisht nga forma, natyra ose mënyra e transmetimit të tij, i përgatitur
ose që përgatitet, për të cilin është vendosur një nivel i caktuar
klasifikimi në interes të sigurisë kombëtare dhe në përputhje me
legjislacionin në fuqi që kërkon mbrojtje ndaj çdo shkeljeje, shkatërrimi,
përvetësimi, përhapjeje, humbjeje ose aksesi të ndonjë individi të
paautorizuar dhe të çdolloj tjetër komprometimi sigurie.
2. “Autoritet i Sigurimit Kombëtar”, është autoriteti i brendshëm
shtetëror i një shteti përgjegjës për kontrollin dhe zbatimin e standardeve
të sigurimit të informacionit të klasifikuar. Drejtoria e Sigurimit të
Informacionit të Klasifikuar (DSIK) është Autoritet i Sigurimit Kombëtar
në Shqipëri.
3. “Autoritet verifikues”, është Shërbimi Informativ i Shtetit (SHISH),
Agjencia e Inteligjencës dhe e Sigurisë së Mbrojtjes (AISM) dhe
Shërbimi për Çështjet e Brendshme dhe Ankesat, në Ministrinë e Punëve
të Brendshme, në përbërje të të cilave janë ngritur njësitë strukturore të
specializuara për kryerjen e verifikimeve të sigurisë ndaj individëve që do
të njohin, do të prodhojnë, do të ruajnë, do të administrojnë, do të
transportojnë dhe do të transmetojnë informacion të klasifikuar.
4. “Pyetësori i sigurisë”, është formulari që plotëson çdo individ që kërkon
të njihet me informacion të klasifikuar dhe mbi bazën e të cilit kryhet
verifikimi i sigurisë si dhe vlerësohen të dhënat për të lëshuar ose jo
“Certifikatën e sigurimit të personelit”.
5. “Nevojë për njohje”, është nevoja për të pasur akses tek informacioni i
klasifikuar, në kuadrin e një pozicioni të caktuar dhe me qëllim
përmbushjen e një detyre specifike.
6. “Certifikata e sigurimit të personelit”, në vazhdim CSP, është
dokumenti zyrtar i Drejtorisë së Sigurimit të Informacionit të Klasifikuar
ose i një autoriteti kompetent të sigurisë së një vendi tjetër i cili vërteton
nga pikëpamja e sigurisë se një individ i plotëson kushtet e përcaktuara
3
për njohjen, ruajtjen, administrimin dhe transferimin e informacionit të
klasifikuar.
7. “Brifimi”/“Debrifimi”, janë tërësi instruksionesh dhe udhëzimesh
sigurie lidhur me procedurat e sigurimit të informacionit të klasifikuar
dhe përgjegjësitë individuale për shkeljet e rregullave të sigurisë, të cilave
u nënshtrohen individët që kërkojnë të kenë mundësinë për njohje të
informacionit të klasifikuar ose janë të pajisur me CSP.
8. “Shkelje sigurie”, është një veprim ose mosveprim në kundërshtim me
përcaktimet e legjislacionit në fuqi që rezulton ose mund të rezultojë në
vjedhjen, humbjen, dëmtimin, komprometimin apo përhapjen e
paautorizuar të informacionit të klasifikuar.
9. “Verifikimi i sigurisë”, është tërësia e masave dhe e procedurave të
aplikuara ndaj një individi, mbi bazën e të cilave do të vlerësohet lëshimi,
refuzimi, pezullimi i përkohshëm ose heqja e “Certifikatës së sigurimit të
personelit”.
10. “Rrezik i papranueshëm sigurie”, konsiderohen rrethanat e përshkruara
në këtë rregullore, në bazë të të cilave DSIK-ja refuzon dhënien e
CSP-së ose vlerëson se duhet të ndërmarrë masën e heqjes ose të
pezullimit të përkohshëm të saj.
11. “Rrethana të urgjencës së jashtëzakonshme”, konsiderohen kushtet e
pamundësisë objektive për të ndjekur procedurat normale të pajisjes me
CSP, për shkak të ushtrimit të një detyre afatshkurtër zyrtare të
pjesëmarrjes në një aktivitet të paparashikuar ndërkombëtar, zgjatjes së
afateve të misioneve ushtarake në vende të ndryshme etj.
12. “Oficer sigurie”, në vazhdim OS, është punonjësi përgjegjës ose
struktura e ngarkuar nga titullari i ministrisë apo i institucionit shtetëror
për mbikëqyrjen dhe zbatimin e kërkesave për sigurimin e personelit dhe
disiplinat e tjera të informacionit të klasifikuar.
Neni 4
Kriteret për njohjen e informacionit të klasifikuar
Kanë të drejtë të njihen, të ruajnë, të administrojnë e të transferojnë informacion
të klasifikuar vetëm individët, që:
4
a) sigurojnë të drejtën e njohjes nga titullari i ministrisë/institucionit ose
Oficeri i Sigurimit Industrial i Kontraktorit për shkak të detyrës që
kryejnë;
b) kanë zotësi të plotë për të vepruar;
c) janë të brifuar më parë për njohjen e procedurave të sigurisë së
informacionit të klasifikuar dhe të përgjegjësive individuale për shkeljet e
sigurisë;
ç) janë të pajisur me CSP, me përjashtim të rasteve për njohjen me
informacionin e klasifikuar në nivelin “I kufizuar”.
Neni 5
Detyrimet e autoriteteve verifikuese dhe të institucioneve të tjera shtetërore
DSIK-ja ka të drejtë të kërkojë informacion nga autoritetet verifikuese dhe
institucionet shtetërore që marrin pjesë në procesin e verifikimit lidhur me
procedurat e zbatuara, të dhënat dhe dokumentacionin provues lidhur me
verifikimin e rrezikut të mundshëm të sigurisë për individët që kanë aplikuar
ose janë të pajisur me CSP për njohjen, ruajtjen, administrimin dhe transferimin
e informacionit të klasifikuar.
Autoriteti verifikues dhe çdo strukturë shtetërore që merr kërkesën e paraqitur
nga DSIK-ja për të kryer verifikimet e sigurisë ka detyrimin e kthimit të
përgjigjes me shkrim së bashku me informacionin e kërkuar, sipas afateve të
përcaktuara në këtë rregullore.
Ky informacion duhet të jetë i plotë, i analizuar dhe i bazuar në dokumente
origjinale ose/dhe dyshime të arsyeshme të mbështetura gjithmonë tek
informacionet e vërtetuara.
Në rastet kur informacioni i përcjellë pasqyron dyshime të arsyeshme lidhur me
ekzistencën e rrezikut të papranueshëm të sigurisë së informacionit të
klasifikuar ndaj një personi që ka aplikuar për CSP, DSIK-ja, deri në qartësimin
e plotë të situatës dhe marrjen e vendimit përkatës, përcakton një plan veprimi
me masa të detyrueshme për zbatim nga autoriteti verifikues dhe institucioni
shtetëror, pjesë e të cilit është aplikanti.
Procedura e parashikuar në paragrafin e katërt të këtij neni përdoret edhe në
rastet kur informacioni i përcjellë pasqyron dyshime të arsyeshme lidhur me
ekzistencën e rrezikut të papranueshëm të sigurisë së informacionit të
klasifikuar për një person i cili është mbajtës i një CSP-je të vlefshme.
DSIK-ja dhe çdo strukturë shtetërore që merr pjesë në kryerjen e procedurave të
verifikimit për pajisjen e një individi me CSP përgjigjen për ruajtjen dhe
5
administrimin e dokumentacionit të grumbulluar, sipas kërkesave të
legjislacionit në fuqi.
Neni 6
Autoritetet verifikuese dhe çdo strukturë shtetërore kanë për detyrë që gjatë
angazhimit në procesin e verifikimit të sigurisë së një aplikanti:
a) të ruajnë dinjitetin e individit që verifikohet;
b) të respektojnë parimin e ligjshmërisë, objektivitetit, balancimit të
interesave dhe të paanësisë;
c) të angazhojnë punonjës me përvojë në kryerjen e procedurave të
verifikimit;
ç) të kryejnë verifikimin e sigurisë, sipas kritereve të përcaktuara në këtë
rregullore dhe procedurave të miratuara nga titullari i institucionit me akt
të veçantë;
d) të respektojnë afatet e verifikimit të sigurisë;
dh) të grumbullojnë, të përpunojnë, të analizojnë dhe të dërgojnë me shkrim
informacionin e kërkuar nga DSIK-ja.
Neni 7
Listat e funksioneve për njohjen e informacionit të klasifikuar
Ministritë dhe institucionet shtetërore të cilat, për shkak të veprimtarisë që
kryejnë, prodhojnë informacion të klasifikuar ose gjatë bashkëpunimit me
institucione të tjera e përftojnë këtë kategori informacioni, kanë për detyrë të
miratojnë dhe të dërgojnë me shkrim në DSIK:
a) listën e funksioneve organike që, për shkak të detyrave zyrtare, mund dhe
duhet të njihen me informacionin e klasifikuar të prodhuar nga
institucionet shtetërore ose/dhe të përftuar në kuadrin e bashkëpunimit
dy- ose shumëpalësh me shtete dhe organizata ndërkombëtare;
b) listën e funksioneve organike që, për shkak të detyrave zyrtare, mund dhe
duhet të njihen me informacionin e klasifikuar të NATO-s;
c) listën e funksioneve organike që, për shkak të detyrave zyrtare, mund dhe
duhet të njihen me informacionin e klasifikuar të BE-së.
Kategoritë e listave të përmendura në shkronjat “a”, “b” dhe “c”, të këtij neni,
miratohen me urdhra individualë të titullarit të institucionit, brenda 30 ditëve
kalendarike nga hyrja në fuqi e kësaj rregulloreje.
6
Rishikimi i këtyre listave bëhet periodikisht dhe në përputhje me ndryshimet e
strukturës organike të institucionit. Dërgimi në DSIK i këtyre akteve të
rishikuara kryhet jo më vonë se 30 ditë kalendarike nga data e miratimit.
III. PROCEDURAT E APLIKIMIT DHE TË VERIFIKIMIT TË
SIGURISË
Neni 8
Mënyrat e aplikimit për t’u pajisur me CSP
Mënyrat e aplikimit për të pajisur një individ me CSP janë, si më poshtë:
a) Me kërkesë të titullarëve të ministrive dhe institucioneve shtetërore ose
personave të autorizuar për punonjësit dhe stafet e tyre, të kontraktuarit
ose kategoritë e individëve të parashikuar për të marrë pjese në një
prokurim të klasifikuar;
b) Me kërkesë të Autoritetit të Sigurimit Kombëtar të një vendi tjetër, anëtar
i NATO-s, BE-së ose vend me të cilin Republika e Shqipërisë ka
nënshkruar marrëveshje të përbashkët për mbrojtjen e informacionit të
klasifikuar;
c) Me kërkesë të autoritetit kompetent të sigurisë së NATO-s, të një
strukture të saj apo të BE-së;
ç) Me kërkesë të drejtpërdrejtë të përfaqësuesit ligjor të një operatori
ekonomik vendas, në kuadrin e procedurave për pajisje me CSI e CSP,
sipas kërkesave të legjislacionit në fuqi.
Neni 9
Verifikimi paraprak
Në rastet kur kërkesa e aplikimit për pajisje me CSP kryhet sipas kushteve të
parashikuara në shkronjat “a” e “ç”, të nenit 8, titullari i ministrisë apo i
institucionit shtetëror ose përfaqësuesi ligjor i një operatori ekonomik vendas
marrin masa përmes OS-së, OSI-së apo strukturës së ngarkuar për kryerjen e
verifikimit paraprak që konsiston në paraqitjen nga aplikanti të:
a) dëshmisë së penalitetit;
b) vërtetimit të gjykatës;
c) vërtetimit të prokurorisë;
ç) vërtetimit të zyrës së përmbarimit.
Dokumentet e verifikimit paraprak mbahen nga OS-ja, OSI-ja ose struktura e
ngarkuar e institucionit shtetëror.
7
Ndërsa për rastet e shkronjave “b” e “c”, të nenit 8, aplikanti është i detyruar që
dokumentacionin e kërkuar në funksion të verifikimit paraprak, parashikuar në
shkronjat “a”, “b”, “c”, “ç”, të këtij neni, ta dorëzojë në DSIK.
Neni 10
Dokumentacioni bazë i aplikimit për pajisje me CSP
Dokumentacioni i aplikimit për pajisje me CSP që i adresohet DSIK-së përbëhet
nga:
a) kërkesa e nënshkruar nga titullari, sipas përcaktimeve në shkronjat “a”,
“b”, “c”, “ç”, të nenit 8;
b) pyetësori i sigurisë së aplikantit, shoqëruar me fotografinë e tij;
c) deklarata për ruajtjen e informacionit të klasifikuar, nënshkruar nga
aplikanti;
ç) deklarata për dhënien e pëlqimit për mbledhjen e informacionit dhe
kryerjen e verifikimeve, nënshkruar nga aplikanti;
d) fotokopje e kartës së identitetit të aplikantit;
Modelet e dokumenteve të parashikuara në shkronjat “a”, “b”, “c”, “ç”, të këtij
neni, përcaktohen e miratohen nga DSIK-ja.
Neni 11
Shqyrtimi fillestar
Pas paraqitjes së aplikimit për t’u pajisur me CSP, DSIK-ja ka të drejtë që,
brenda 10 ditëve kalendarike, të shqyrtojë kërkesën dhe dokumentacionin
bashkëlidhur dhe, kur e gjen të bazuar në kërkesat e legjislacionit në fuqi, fillon
procedurën e verifikimit të sigurisë për pajisjen me CSP.
Në rastet kur aplikimi për t’u pajisur me CSP ka mangësi, DSIK-ja e kthen
praktikën e aplikimit për t’u plotësuar tek institucioni ose operatori ekonomik i
interesuar, brenda afatit të përmendur në paragrafin e parë të këtij neni.
Neni 12
Kushtet për fillimin e verifikimit të sigurisë
Procedurat për verifikimin e sigurisë së personelit shërbejnë për të përcaktuar
nëse një individ, duke vlerësuar besnikërinë, besueshmërinë dhe sigurinë e tij,
mund të autorizohet për të njohur, ruajtur, administruar dhe transferuar
8
informacionin e klasifikuar pa shkaktuar rrezik të papranueshëm sigurie për
këto kategori informacionesh të klasifikuara.
Ky vlerësim realizohet nga DSIK-ja, bazuar në përmbajtjen e informacioneve të
përftuara nga autoritetet verifikuese dhe çdo strukturë tjetër shtetërore që
angazhohet në verifikimin e sigurisë, sipas kritereve të përcaktuara në këtë
rregullore.
Verifikimi i sigurisë fillon vetëm pasi individi aplikues ka pranuar dhe ka dhënë
pëlqimin me shkrim që:
a) të mblidhen të dhëna dhe të kryhen procedurat e verifikimit të sigurisë,
sipas kërkesave të pyetësorit të sigurisë;
b) të mblidhen të dhëna dhe të kryhen procedurat e verifikimit të sigurisë
edhe pas pajisjes me CSP, në funksion të sqarimit të dyshimeve të
bazuara në ndryshimin e gjendjes së pasqyruar në pyetësorin e sigurisë,
për aq kohë sa ekzistojnë kushtet e nevojës për njohje të informacionit të
klasifikuar.
Trajtimi i të dhënave personale dhe i informacioneve të grumbulluara në
procesin e verifikimit të sigurisë kryhet në përputhje me kërkesat e legjislacionit
në fuqi.
Neni 13
Kërkesat e përgjithshme të vlerësimit të sigurisë
DSIK-ja, autoritetet verifikuese dhe çdo strukturë tjetër shtetërore që përfshihet
në procedurat e verifikimit të sigurisë duhet t’iu përmbahen kërkesave të
përgjithshme të vlerësimit të sigurisë, të cilat janë, si më poshtë:
a) Verifikimi i saktë i identitetit, gjenealiteteve dhe statusit të shtetësisë, në
të shkuarën dhe të tashmen, për çdo individ.
b) Kontrolli i rekordeve në nivel lokal e kombëtar, në funksion të sigurisë
kombëtare dhe të tendencave kriminale.
c) Statusi financiar i aplikantit, me qëllim verifikimi, nëse ai mund të
ndodhet nën presion për shkak të paqëndrueshmërisë, vështirësive serioze
financiare apo të zotërimit të ndonjë pasurie të pajustifikuar.
ç) Informacioni për edukimin arsimor të individit pas moshës 18-vjeçare ose
për periudhën e gjykuar si të përshtatshme nga autoriteti verifikues apo
struktura të tjera shtetërore të përfshira në procesin e verifikimit të
sigurisë.
9
d) Informacioni për punësimin e individit duke marrë në konsideratë
referencat e punëve të mëparshme, bazuar te raportet e punëdhënësve.
dh) Informacioni për pjesëmarrjen në operacione ushtarake apo kohëzgjatjen e
shërbimit në forcat e armatosura.
e) Vlerësimi i përgjithshëm, nëse individi mund të vihet nën presion nga një
forcë e huaj jomiqësore.
Neni 14
Kriteret themelore të vlerësimit të sigurisë
Kriteret themelore, mbi bazën e të cilave vlerësohet ekzistenca ose jo e rrezikut
të papranueshëm të sigurisë për informacionet e klasifikuara që shërbejnë si
bazë për të lëshuar, refuzuar pajisjen ose mbajtjen e mëtejshme të një CSP-je,
janë rastet kur një individ rezulton se:
a) ka qenë, është ose tenton të angazhohet fshehurazi, vetëm në
bashkëpunim apo në përbërje të një organizate ilegale, në veprimtari
spiunazhi, terrorizmi, tradhtie, rebelimi apo dhune të armatosur ndaj
rendit kushtetues apo ka nxitur aktivisht dikë të kryejë veprimtari
spiunazhi, terrorizmi, tradhtie, rebelimi apo dhune të armatosur ndaj
rendit kushtetues;
b) është apo ka qenë bashkëpunëtor në spiunazh, terrorizëm, tradhti, rebelim
apo dhunë të armatosur ndaj rendit kushtetues, ka dyshime të ketë qenë i
tillë apo bashkëpunëtor i përfaqësuesve të organizatave, shteteve të huaja,
duke përfshirë këtu shërbimet e inteligjencës të cilat mund të cenojnë
sigurinë e vendit tonë dhe/ose të shteteve anëtare të NATO-s, BE-së,
përveç rasteve kur këto bashkëpunime janë të autorizuara për shkak të
detyrës;
c) është apo ka qenë anëtar i një organizate, e cila me mjete të dhunshme,
armiqësore, të paligjshme, ka qëllim të rrëzojë qeverinë apo të ndryshojë
rendin kushtetues;
ç) është apo ka qenë mbështetës i një organizate të përshkruar si në
shkronjën “c” ose është apo ka qenë i/e lidhur ngushtë me ndonjë anëtar
të një organizate të tillë;
d) qëllimisht ka fshehur, ka keqprezantuar apo ka falsifikuar një informacion
të një rëndësie të madhe, të një natyre sigurie të veçantë apo qëllimisht ka
gënjyer gjatë plotësimit të pyetësorit të sigurisë apo intervistës së
sigurisë;
dh) rezulton i dënuar për një ose më shumë vepra penale;
e) ka një historik varësie nga alkooli, përdorimi i drogave të jashtëligjshme,
apo keqpërdorimi i drogave të ligjshme;
10
ë) ka sjellje të keqe, tendenca kriminale e përfshirje në krim të organizuar,
gjë që sjell rrezikun e dobësisë përballë shantazhit apo mund të
influencohet seriozisht nga presione të ndryshme;
f) me anë të veprimeve konkrete apo në mënyrë verbale ka shprehur
mungesë besnikërie, besueshmërie dhe sigurie;
g) ka kryer shkelje sigurie apo në mënyrë të përsëritur ka nëpërkëmbur
rregullat e sigurisë së informacionit të klasifikuar apo ka tentuar dhe ka
arritur të kryejë aktivitet të paautorizuar në sistemet e komunikimit të
informacionit të klasifikuar;
gj) vuan nga çrregullime mendore kronike.
Neni 15
Shkëmbimi i drejtpërdrejtë i informacioneve ndërmjet autoriteteve
verifikuese
Autoritetet verifikuese, në funksion të procedurave të verifikimit të sigurisë,
janë të detyruara të shkëmbejnë në mënyrë të ndërsjellë dhe të drejtpërdrejtë
informacionet që ato disponojnë për të gjitha kategoritë e individëve të punësuar
apo që do të punësohen në strukturat e SHISH-it, Ministrisë së Mbrojtjes dhe të
Ministrisë së Punëve të Brendshme, për të cilët ata janë të ngarkuar të kryejnë
apo kanë kryer verifikime sigurie, sipas legjislacionit në fuqi.
Aplikimet e adresuara në DSIK për pajisjen me CSP të punonjësve të SHISH-it,
të strukturave civile e ushtarake të Ministrisë së Mbrojtjes dhe të Ministrisë së
Punëve të Brendshme, përveç dokumentacionit të kërkuar referuar në nenet 9 e
10, të kësaj rregulloreje, shoqërohen edhe me dokumentin e verifikimit të
sigurisë, formuluar nga struktura përkatëse e cila ka kryer verifikimin e sigurisë,
sipas akteve normative në fuqi.
Në këto raste, vlerësimi i sigurisë bëhet i bazuar në informacionet e shkëmbyera
më parë dhe në mënyrë të drejtpërdrejtë, në funksion të këtij procesi, ndërmjet
Shërbimit Informativ të Shtetit, Agjencisë së Inteligjencës e Sigurisë së
Mbrojtjes dhe Shërbimit për Çështjet e Brendshme dhe Ankesat, në Ministrinë e
Punëve të Brendshme.
Në rastet kur një autoritet verifikues zotëron apo i dalin të dhëna që rezultojnë
me rrezik të papranueshëm sigurie për një individ të pajisur me CSP, atëherë
autoriteti verifikues ka detyrimin të njoftojë menjëherë DSIK-në dhe, sipas
rastit, titullarin e institucionit shtetëror ku është i punësuar ky individ.
Neni 16
11
E drejta e DSIK-së për të kërkuar informacione sqaruese shtesë
Në rastet kur verifikimi i sigurisë për një aplikant rezulton me ekzistencën e
rrezikut të papranueshëm të sigurisë, DSIK-ja ka të drejtë t’i kërkojë autoritetit
verifikues informacione sqaruese shtesë, si dhe të njihet në mënyrë të
drejtpërdrejtë me përmbajtjen e këtyre informacioneve.
Pas kryerjes së këtyre procedurave, analizimit të rrethanave dhe përmbajtjes së
informacionit provues, DSIK-ja vendos të lëshojë, të pezullojë, të refuzojë
pajisjen ose mbajtjen e mëtejshme të CSP-së për një individ të caktuar.
Në rastet kur verifikimi i sigurisë për një aplikant rezulton i pranueshëm,
DSIK-ja vijon me procedurat e mëtejshme për lëshimin e CSP-së.
Neni 17
Koha që mbulon verifikimi i sigurisë
DSIK-ja u kërkon autoriteteve verifikuese dhe çdo strukture shtetërore që e
gjykon të nevojshme kryerjen e verifikimeve të sigurisë, në përputhje me
përcaktimet e neneve 13 e 14, të kësaj rregulloreje.
Verifikimi i sigurisë mbulon një periudhë jo më pak se 10 vitet e fundit dhe, kur
kjo periudhë është e pamjaftueshme, verifikimi shtrihet nga mosha 18 vjeç deri
në moshën aktuale.
Neni 18
Afatet e kryerjes së verifikimeve të sigurisë
Afati i përgjithshëm për kryerjen e procedurave të verifikimit dhe lëshimit të
CSP-së nga DSIK-ja është deri në 120 ditë kalendarike. Brenda kësaj periudhe
përfshihen edhe afatet e verifikimit të sigurisë nga ana e autoriteteve
verifikuese.
Ky afat mund të jetë më i gjatë kur verifikimet kushtëzohen nga kryerja e
procedurave në bashkëpunim me autoritetet e sigurimit kombëtar të vendeve të
tjera ose kur drejtori i DSIK-së udhëzon kryerjen e verifikimeve shtesë.
Afati i përgjithshëm për kryerjen e procedurave të verifikimit fillon vetëm pas
paraqitjes së plotë dhe pranimit të dokumentacionit nga ana e DSIK-së.
Autoriteti verifikues dhe çdo strukturë tjetër shtetërore, që merr kërkesën e
paraqitur nga DSIK-ja për të kryer verifikimin e sigurisë, ka detyrimin të kryejë
procedurat dhe të kthejë përgjigje duke dhënë informacionin e kërkuar me
shkrim, jo më vonë se 45 ditë kalendarike nga data e marrjes së kërkesës.
12
Për raste të veçanta, me kërkesë të arsyetuar të titullarit të autoritetit verifikues
dhe me miratim të drejtorit të DSIK-së, ky afat mund të zgjatet edhe 30 ditë të
tjera kalendarike.
Neni 19
Rrethi i personave që verifikohen
Verifikimi i sigurisë përfshin verifikimin e aplikantit dhe të lidhjeve të ngushta
të përcaktuara në shkronjat “b” e “c”, të këtij neni.
Verifikimi i sigurisë së lidhjeve të ngushta kryhet për të arritur në përfundim
nëse ekziston rreziku real që aplikantit t’i bëhet presion përmes këtyre lidhjeve,
të cilat, në bazë të verifikimeve të sigurisë, mund të rezultojnë të cenueshme
nga shërbimet e huaja jomiqësore, grupet terroriste apo organizatat e tjera
kriminale.
Verifikimi i sigurisë përfshin:
a) vetëm personin aplikues, kur kërkohet njohja me informacionin e
klasifikuar, të nivelit “Konfidencial”;
b) personin aplikues, fëmijët, bashkëshortin/ bashkëshorten, bashkëjetuesin/
bashkëjetuesen, kur kërkohet njohja me informacionin e klasifikuar, të
nivelit “Sekret”;
c) personin aplikues, fëmijët, bashkëshortin/bashkëshorten, bashkëjetuesin/
bashkëjetuesen, prindërit si dhe personat e tjerë që jetojnë së bashku në të
njëjtën familje kur kërkohet njohja me informacionin e klasifikuar, të
nivelit “Tepër sekret”.
Neni 20
Intervista e sigurisë
Autoritetet verifikuese kanë të drejtë të kryejnë intervista me individë të cilët
kanë aplikuar për t’u pajisur me CSP dhe në drejtim të tyre janë ndërmarrë
procedurat e verifikimit të sigurisë.
Intervista mund të kryhet edhe me persona të tretë të paanshëm, të cilët njohin
të shkuarën dhe aktivitetet e personit që i është nënshtruar verifikimit të
sigurisë.
DSIK-ja interviston individë të cilët kanë aplikuar për t’u pajisur me CSP
ose/dhe kërkon prej tyre paraqitjen e dokumenteve shtesë, veç atyre të
përcaktuara në këtë rregullore, kur:
13
a) individi aplikues kërkon të njihet me informacionin e klasifikuar të
NATO-s ose BE-së;
b) individi aplikues ka deklaruar ose rezulton se ka qenë subjekt i
procedurave për azil politik, mban dyshtetësi, ka pasur ose ka shtetësi
tjetër;
c) gjatë procesit të verifikimit të sigurisë është mbledhur informacion me
përmbajtje kontradiktore, me ndikim të drejtpërdrejtë në vendimmarrjen e
DSIK-së për lëshimin ose jo të CSP-së.
IV. LËSHIMI, RIPAJISJA, REFUZIMI, HEQJA DHE PEZULLIMI I
PERKOHSHËM I CSP-SË. ANKIMIMI DHE RRETHANAT E
JASHTËZAKONSHME
Neni 21
Nivelet e CSP-së të lëshuara nga DSIK-ja
CSP-ja lëshohet nga DSIK-ja, në përputhje me rregullat e parashikuara në një
nga nivelet e mëposhtme:
a) “Konfidencial”;
b) “Sekret”;
c) “Tepër sekret”.
Njohja me informacionin e klasifikuar kryhet në përputhje me nivelin e
CSP-së. Zotëruesi i një CSP-je me nivel më të lartë ka të drejtë që në kushtet e
nevojës për njohje të ketë akses tek informacione të klasifikuara të një kategorie
më të ulët.
Për individët e vendeve të tjera, CSP-ja lëshohet nga autoritetet e sigurimit
kombëtar ose çdo autoritet kompetent sigurie i vendit, shtetësinë e të cilit mban
individi.
Përpara se të lëshohet CSP për një person i cili mban dy shtetësi, DSIK-ja
bashkëpunon me autoritetet homologe për kryerjen e verifikimeve përkatëse.
Me kërkesë të strukturës përgjegjëse të NATO-s, BE-së apo të autoritetit të
sigurimit kombëtar të një vendi tjetër, anëtar i NATO-s, BE-së ose vend me të
cilin Republika e Shqipërisë ka nënshkruar marrëveshje të përbashkët për
mbrojtjen e informacionit të klasifikuar, DSIK-ja lëshon CSP-në përkatëse kur
nuk ekzistojnë rrethana që përbëjnë pengesa ligjore për lëshimin e saj.
14
Neni 22
Tipet e CSP-së
CSP-ja lëshohet nga DSIK-ja për njohjen, ruajtjen, administrimin apo
transferimin e:
a) informacioneve të klasifikuara të NATO-s;
b) informacioneve të klasifikuara të BE-së;
c) informacioneve të klasifikuara, të prodhuara nga institucionet tona
shtetërore ose/dhe të përftuara në kuadrin e bashkëpunimit dy- ose
shumëpalësh me shtete dhe organizata të tjera ndërkombëtare.
Modelet për tipet e CSP-së miratohen nga DSIK-ja.
CSP për njohjen, ruajtjen, administrimin apo transferimin e informacioneve të
klasifikuara të NATO-s dhe të BE-së lëshohen në gjuhën angleze dhe në
përputhje me kërkesat e këtyre organizatave.
Neni 23
Vlefshmëria e CSP-së
CSP-ja e lëshuar nga niveli “Konfidencial” e lart, në kushtet e kërkesave, sipas
parashikimeve në shkronjat, “a”, “b”, “c”, të nenit 8, ka një afat vlefshmërie deri
në 5 vite.
Ndërsa për kushtet e parashikuara në shkronjën “ç”, të nenit 8, DSIK-ja e lëshon
CSP-në me një afat vlefshmërie deri në 4 vite.
Në rastet kur një individ, i cili zotëron një CSP të vlefshme, transferohet në një
vend pune që sipas listës së funksioneve organike të miratuar të institucionit të
ri duhet të ketë CSP, atëherë DSIK-ja, pas kërkesës së arsyetuar me shkrim të
institucionit të ri, bën konfirmimin e vlefshmërisë së CSP-së dhe modelimin e
saj në përputhje me të dhënat e reja të pozicionit të punës.
Neni 24
Ndryshimi i nivelit të CSP-së
Në rastet kur një individ, i cili zotëron një CSP të një niveli më të ulët, caktohet
në një funksion organik, i cili parashikon nevojën për mbajtjen e një CSP-je të
një niveli më të lartë se ajo që disponon, DSIK-ja, pas kërkesës me shkrim të
paraqitur nga titullari i institucionit të interesuar, nis kryerjen e procedurave
shtesë të verifikimit në përputhje me referimet e nenit 19, të kësaj rregulloreje.
Afati i vlefshmërisë për CSP-në me nivelin e ndryshuar është i njëjtë me afatin
që ishte parashikuar në CSP-në e nivelit më të ulët.
15
Neni 25
Detyrimi për njoftim
Individët e pajisur me CSP, përgjatë periudhës së vlefshmërisë së saj janë të
detyruar të vetëdeklarojnë me shkrim, brenda 15 ditëve kalendarike, çdo
ndryshim të ndodhur lidhur me kushtin e sigurisë, sipas kërkesave të listuara në
pyetësorin e sigurisë.
Ky vetëdeklarim i paraqitet personit të ngarkuar ose oficerit të sigurisë, i cili e
adreson për administrim e vlerësim të mëtejshëm në DSIK.
Neni 26
Ripajisja me CSP
Ripajisja me CSP kryhet nga DSIK-ja, sipas procedurave të miratuara në këtë
rregullore.
Procedura për ripajisjen me CSP fillon rishtazi me aplikim nga e para.
Afati i fillimit të procedurës për ripajisjen me CSP është jo më vonë se 150 ditë
kalendarike përpara se të përfundojë afati i vlefshmërisë së CSP-së ekzistuese.
Dokumentacioni i riaplikimit dorëzohet i plotë në DSIK, jo më vonë se 120 ditë
kalendarike përpara se të përfundojë afati i vlefshmërisë së CSP-së ekzistuese.
Pas kryerjes së procedurave të riverifikimit dhe kur nuk ekzistojnë rrethana që
përbëjnë pengesa ligjore, DSIK-ja bën ripajisjen e aplikantit me CSP.
Neni 27
Refuzimi, heqja dhe pezullimi i përkohshëm i CSP-së
DSIK-ja ka të drejtë të marrë vendim për refuzimin, heqjen ose pezullimin e
përkohshëm të CSP-së, në rastet kur nëpërmjet autoriteteve verifikuese ose/dhe
strukturave shtetërore të përfshira në procesin e verifikimit është përftuar
informacion, sipas të cilit vlerësohet se pajisja ose mbajtja e mëtejshme e
CSP-së nga një individ i caktuar përbën rrezik të papranueshëm sigurie, referuar
neneve 13 e 14, të kësaj rregulloreje.
Njoftimi për vendimin e marrë nga DSIK-ja për refuzim, heqje ose pezullim të
përkohshëm të CSP-së i komunikohet me shkrim titullarit të strukturës
kërkuese, i cili ka të drejtë të paraqesë kërkesë me shkrim për rishqyrtimin e
vendimit të marrë nga DSIK-ja.
16
Kjo kërkesë i adresohet titullarit të DSIK-së brenda 15 ditëve kalendarike nga
data e marrjes së njoftimit të vendimit për refuzimin, heqjen ose pezullimin e
përkohshëm të CSP-së.
Titullari i DSIK-së e shqyrton dhe vendos për kërkesën e paraqitur brenda
30 ditëve kalendarike nga dita e pranimit të saj.
Në rastet e mospajtimit me përgjigjen e titullarit të DSIK-së, brenda 15 ditëve
kalendarike nga data e marrjes së njoftimit, titullari i strukturës kërkuese ka të
drejtë ta ankimojë atë me shkrim tek Kryeministri.
Kryeministri, pas marrjes së ankesës, brenda 30 ditëve kalendarike, shprehet me
akt të veçantë i cili është përfundimtar dhe i detyrueshëm për zbatim nga
DSIK-ja dhe struktura që ka bërë ankimimin.
Neni 28
Kohëzgjatja e pezullimit
Vendimi për pezullimin e CSP-së është i vlefshëm deri në momentin e shuarjes
së rrethanave që përbëjnë rrezik të papranueshëm sigurie ose deri në momentin
kur CSP-së i ka kaluar afati i vlefshmërisë.
Gjatë kohëzgjatjes së pezullimit të CSP-së, titullari i institucionit shtetëror dhe,
sipas rastit, përfaqësuesi ligjor/administratori i operatorit ekonomik, kanë
detyrim të marrin masat përkatëse për ndalimin e aksesit tek informacioni i
klasifikuar për personin të cilit i është pezulluar CSP-ja.
Neni 29
Afati i riaplikimit në rastet e refuzimit apo heqjes së CSP-së
Individët, të cilëve u është refuzuar ose hequr CSP-ja, kanë të drejtë të
riaplikojnë përsëri, me kusht që të ketë kaluar një vit kalendarik nga data e
shkresës njoftuese për heqjen ose refuzimin e CSP-së, adresuar titullarit të
aplikantit.
Neni 30
Lëshimi i CSP-së në rrethana të urgjencës së jashtëzakonshme
1. Në kushtet e rrethanave të urgjencës së jashtëzakonshme, DSIK-ja ka të
drejtë të lëshojë CSP pa iu nënshtruar procedurave normale të verifikimit,
kur:
17
a) një individ ndodhet në kushtet e ushtrimit të një detyre afatshkurtër
zyrtare, për të cilën ka qenë e pamundur ndjekja e procedurave, sipas
afateve kohore të parashikuara;
b) një individ ka nevojë për pjesëmarrje në një aktivitet të paparashikuar
ndërkombëtar, për të cilin ka qenë e pamundur ndjekja e procedurave,
sipas afateve kohore të parashikuara;
c) një individ, i cili nuk ka qenë i pajisur me CSP, ndodhet në kushtet e
zgjatjes së afateve të pjesëmarrjes në misione ushtarake, për të cilat
kërkohet një CSP e vlefshme.
2. Për çdo rast të referuar në shkronjat “a”, “b”, “c”, të këtij neni, nuk duhet
të ekzistojnë dyshime paraprake për mundësinë e rrezikut të
papranueshëm të sigurisë. Gjithashtu, duhet të plotësohen edhe kushtet e
mëposhtme:
a) Të depozitohet në DSIK një kërkesë zyrtare, ku sqarohen rrethanat e
urgjencës së jashtëzakonshme dhe të pamundësisë për të aplikuar
sipas procedurave normale për pajisjen me CSP, duke shpjeguar se
“nuk ekzistojnë dyshime paraprake për mundësinë e rrezikut të
papranueshëm të sigurisë”. Kjo kërkesë shoqërohet me të gjitha
dokumentet e aplikimit për t’u pajisur me CSP, sipas nenit 9 dhe
DSIK-ja vijon ndjekjen e procedurave të verifikimit të sigurisë.
b) Individit, për të cilin kërkohet lëshimi i CSP-së në kushtet e
përcaktimeve të këtij neni, duhet të mos i jetë refuzuar me parë
CSP-ja.
3. Në çdo rast, lëshimi i CSP-së në kushtet e rrethanave të urgjencës së
jashtëzakonshme kryhet jo më shumë se një herë në vit dhe për një
kohëzgjatje jo më shumë se 30 ditë kalendarike.
4. Niveli i CSP-së mund të jetë “Konfidencial” ose “Sekret”. Përjashtohet
lëshimi i CSP-së në nivelin “Tepër sekret”.
5. Në çdo rast, individi që do të pajiset me CSP në kushtet e rrethanave të
urgjencës së jashtëzakonshme duhet më parë të brifohet dhe të
nënshkruajë për njohjen e procedurave të sigurimit të informacionit të
klasifikuar dhe të përgjegjësive të tij individuale për shkeljet e sigurisë.
CSP-ja në kushtet e përcaktuara në këtë nen lëshohet vetëm pas
depozitimit të plotë dhe të njëhershëm në DSIK të dokumenteve të
kërkuara.
Neni 31
Zgjatja e afatit të CSP-së në rrethanat e urgjencës së jashtëzakonshme
18
Në kushtet e rrethanave të urgjencës së jashtëzakonshme, DSIK-ja ka të drejtë
të zgjatë afatin e CSP-së së një individi vetëm një herë, deri në 30 ditë
kalendarike gjatë ciklit të vlefshmërisë së saj, me kushtet e mëposhtme:
a) Individi, për të cilin kërkohet zgjatja e afatit, duhet të mbajë një CSP të
vlefshme, lëshuar me procedurë të plotë, sipas përcaktimeve në këtë
rregullore.
Përjashtohen rastet e zgjatjes së afateve për një CSP e cila është e lëshuar
në kushtet e rrethanave të urgjencës së jashtëzakonshme, parashikuar nga
neni 30.
b) Ekziston një kërkesë zyrtare që sqaron rrethanat e urgjencës së
jashtëzakonshme dhe provon rrethanat e pamundësisë për të aplikuar
sipas procedurave normale për ripajisjen me CSP të re, kur:
i. një individ ndodhet në kushtet e ushtrimit të një detyre afatshkurtër
zyrtare, për të cilën ka qenë e pamundur ndjekja e procedurave,
sipas afateve kohore të parashikuara;
ii. një individ ka nevojë për pjesëmarrje në një aktivitet të
paparashikuar ndërkombëtar, për të cilin ka qenë e pamundur
ndjekja e procedurave, sipas afateve kohore të parashikuara;
iii. një individ, i cili ka qenë i pajisur me CSP, ndodhet në kushtet e
zgjatjes së afateve të pjesëmarrjes në misione ushtarake jashtë
vendit dhe të pamundësisë për të aplikuar, sipas procedurave
normale për ripajisjen me CSP të re.
Zgjatja e afateve të CSP-së me kushtëzimet e sipërpërmendura
lejohet për CSP-në e nivelit “Konfidencial”, “Sekret” dhe “Tepër
sekret”.
V. EDUKIMI ME RREGULLAT E SIGURIMIT TË PERSONELIT
Neni 32
Brifimi dhe debrifimi
Çdo individ i pajisur me CSP të vlefshme, jo më pak se një herë në vit, duhet të
brifohet e të nënshkruajë përpara oficerit të sigurisë ose strukturës përgjegjëse të
institucionit ku punon për njohjen e procedurave të sigurimit të informacionit të
klasifikuar dhe të përgjegjësive individuale për shkeljet e rregullave të sigurisë.
Individët e pajisur me CSP, në rastet e ndërprerjes së marrëdhënieve të punës
apo të ndryshimit të funksionit organik, kur nuk kërkohet mbajtja e mëtejshme e
19
CSP-së, dorëzojnë CSP-në tek oficeri i sigurisë ose struktura përgjegjëse e
institucionit ku ato punojnë dhe u nënshtrohen procedurave të debrifimit, duke
nënshkruar në dokumentin përkatës. Ata janë përgjegjës për ruajtjen e
informacionit të klasifikuar edhe pas ndërprerjes së marrëdhënieve të punës.
Institucionet ruajnë dhe administrojnë regjistrimet (rekordet) e individëve të
brifuar dhe të debrifuar.
Neni 33
Trajnimet
DSIK-ja kryen trajnime të programuara për sigurimin e personelit që gëzon të
drejtën e njohjes, ruajtjes, administrimit dhe transferimit të informacionit të
klasifikuar, në kushtet e ushtrimit të detyrave zyrtare ose në përmbushje të një
veprimtarie në kuadrin e respektimit të parimit “nevojë për njohje”.
Programet e trajnimit hartohen nga DSIK-ja në bashkëpunim me institucionet
shtetërore dhe operatorët ekonomikë të interesuar për të qenë palë në kontrata të
klasifikuara.
VI. INSPEKTIMET
Neni 34
Autoritetet verifikuese dhe çdo strukturë shtetërore që merr pjesë në procesin e
verifikimit të sigurisë së një individi u nënshtrohen inspektimeve dhe
mbikëqyrjes për nivelin e respektimit të kërkesave të legjislacionit në fuqi.
Drejtuesit e autoriteteve verifikuese janë të detyruar që, brenda 30 ditëve
kalendarike nga dita e miratimit, të dërgojnë në DSIK aktet normative për
procedurat e verifikimit të sigurisë që aplikojnë.
DSIK-ja informohet dhe mbikëqyr me hollësi gjithë procedurën e verifikimit të
sigurisë të nisur nga autoritetet verifikuese dhe çdo strukturë tjetër shtetërore e
përfshirë në këtë proces.
Neni 35
Inspektimet periodike të DSIK-së tek autoritetet verifikuese dhe strukturat e
tjera shtetërore kryhen sipas programit të miratuar lidhur me aplikimin e
standardeve të sigurimit të personelit, bazuar në kërkesat e parashikuara në këtë
rregullore dhe në aktet normative të nxjerra nga titullarët e autoriteteve
verifikuese dhe të strukturave të tjera shtetërore.
20
Me përjashtim të rasteve të veçanta, njoftimi dhe programi i inspektimit i
dërgohen titullarit të autoritetit verifikues apo strukturës shtetërore që është
parashikuar të inspektohet jo më vonë se 10 ditë kalendarike përpara datës së
fillimit të inspektimit.
Autoriteti verifikues apo struktura shtetërore që do të inspektohet, përmes
titullarit, ka të drejtë që brenda afatit të parashikuar në paragrafin e dytë, të këtij
neni, të parashtrojë kërkesa të veçanta tek drejtori i DSIK-së lidhur me
programin e inspektimit. Zgjidhja e këtyre kërkesave bëhet në mirëkuptim
ndërmjet dy titullarëve, bazuar në kërkesat e legjislacionit në fuqi.
Neni 36
Pas inspektimeve të kryera, DSIK-ja i adreson titullarit të autoritetit verifikues
apo të strukturës shtetërore të inspektuar raportin përkatës, me rekomandimet e
masave dhe afatin e fundit për korrigjimin e parregullsive e të shkeljeve të
konstatuara.
Titullari i autoritetit verifikues apo i strukturës shtetërore të inspektuar, brenda
20 ditëve kalendarike nga dita e marrjes së raportit të inspektimit të DSIK-së, ka
detyrimin t’i njohë strukturat dhe individët e inspektuar me detajet e raportit të
inspektimit.
Titullari i autoritetit verifikues apo i strukturës shtetërore të inspektuar ka të
drejtë të paraqesë në DSIK kërkesë me shkrim lidhur me rishikimin e
elementeve të paraqitura në raportin e inspektimit.
DSIK-ja përgjigjet me shkrim, jo më vonë se 30 ditë kalendarike nga data e
marrjes së kërkesës për rishikimin e elementeve të raportit të inspektimit.
Mospërmbushja e masave të rekomanduara dhe e afateve të lëna për korrigjimin
e parregullsive dhe të shkeljeve të sigurisë të konstatuara nga raporti i
inspektimit të DSIK-së përbën shkak të mjaftueshëm për aplikimin e masave
administrative dhe pezullimin e përkohshëm ose heqjen e CSP-së për personat
përgjegjës.
21
VII. DISPOZITA TË VEÇANTA
Neni 37
DSIK-ja mban, administron dhe përditëson sistemin qendror të të dhënave për të
gjithë individët, ndaj të cilëve është lëshuar, refuzuar, pezulluar apo hequr
CSP-ja.
Ministritë, institucionet shtetërore dhe operatorët ekonomikë të interesuar janë
të detyruar të mbajnë, të administrojnë dhe të përditësojnë regjistrin e modeluar
dhe të miratuar nga DSIK-ja dhe bazën elektronike të të dhënave lidhur me
punonjësit dhe stafet e tyre, për të cilët është lëshuar, refuzuar, pezulluar apo
hequr CSP-ja; si dhe, një herë në vit, të bëjnë rakordimet e këtyre të dhënave me
sistemin qendror të të dhënave në DSIK.
Neni 38
Ministritë, institucionet shtetërore dhe operatorët ekonomikë të interesuar të
marrin masa për zbatimin e kërkesave të kësaj rregulloreje.
Ngarkohet DSIK-ja për kontrollin e zbatimit të kërkesave të kësaj rregulloreje.
...................................................................