Upload
others
View
0
Download
0
Embed Size (px)
Citation preview
1
Mt 21, 28 – 32 Kabubut-on sa Dios
Dihay batan-ong pari nga bag-ong nadestino sa usa ka parokya isip
assistant sa Kura Paroko. Nakita niya ang panginahanglan nga magsugod
og pundok alang sa pagtuon sa Bibliya aron makat-on ang mga tawo ug
malig-on ang ilang pagtoo. Humag Misa usa niana ka buntag gipadayag
niya ang maong hunahuna ngadto sa nanambong nga madasigon kaayong
mipakita sa ilang kahinam ug pag-uyon. “Nindot kaayo ni nga idea!” matud
pa nilang tanan. Busa ang batan-ong assistant miduol sa Kura Paroko ug
malipayong mibalita nga nalipay kaayo ang mga tawo sa sugyot nga
magpasiugdag bible class. Ang mas guwang ug mas taas og kasinatian
nga pari miawhag sa iyang kauban nga usbog konsulta ang mga tawo ug
nga ipadayag sa laing paagi ang mao rang sugyot. Busa, humag Misa
sunod adlaw gipangutana pag-usab sa pari ang mga tawo, “Kinsa man
ninyoy buot magpalista para sa bible study?” Upat ra ka buok ang mipataas
sa ilang kamot! Nakaamgo dayon ang batan-ong pari nga ang pagtando
dakog kalainan sa pagbuhat.
Sa ebanghelyo karong adlawa giasoy ni Jesus and sambingay bahin
sa duha ka anak nga lalaki nga lain ang gisulti ug lain pud ang gibuhat. Ang
usa mibalibad sa amahan sa pag-adto sa parasan ug pagtrabaho didto
apan nausab ang iyang hunahuna ug mitrabaho siya didto. Sa laing bahin
ang ikaduha matinahurong misugot sa amahan apan wala gyud moadto sa
trabaho. Kinsa man sa duha ang mituman sa sugo sa amahan? Klaro na
lang nga ang unang anak, nga mibalibad kaniya.
Gisaysay ni Jesus kining sambingaya sulod sa templo sa Jerusalem
pipila ka adlaw una siya dakpa ug ilansang sa krus. Tolo ka tuig niyang
gisangyawan ang mga tawo ug gidapit paghinulsol ug pagtoo sa Maayong
Balita. Nakita niya nga sa tinuoray ang giilang makasasala sama sa mga
kobrador sa buhis ug sa mga dautang babaye maoy mitubag sa iyang
imbitasyon. Imbis motoo mipadayon sa pagsupak kang Jesus ang mga
Skriba ug Pariseo bisan human nila maamgohi ang diosnong tinubdan sa
iyang mensahe. Ingon sab niana ang ilang pagtratar kang Juan nga
2
Magbubunyag. Nasayud sila nga gikan sa Dios ang gitudlo ni Juan apan
wala gihapon nila dawata. Matud ni Jesus: “bisan human kini ninyo makita,
wala ninyo usba ang inyong hunahuna ug wala kamo motoo kaniya"
(Matthew 21:32). Usahay ang mga tawong relihiyoso kusog kaayo mopakita
nga sila maoy husto ug busa dili na hinoon makapamati sa tingog sa rason
ug sa Dios.
Makita sa sambingay nga ang mga kobrador sa buhis ug ang
dautang mga babaye nahisama sa unang anak nga sa sinugdanan
mibalibad apan sa ngadtongadto mibuhat sa gisugo sa amahan, samtang
ang mga Skriba ug mga Pariseo nahisama sa anak nga madasigong
mitando apan wala motuman sa gisugo. Usa ka pundok dili maayo sa
pulong apan maayo sa buhat samtang may laing pundok nga maayong
manulti apan way maayong buhat. Nagsalamin sila sa duha ka klaseng
mga tawo ug sa lainlaing paagi sa pakiglambigit sa Dios. May mga tawo
nga walay maanindot nga pulong sama niadtong nag-ingon nga wa silay
pagtoo, wa silay simbasimba, wa silay pag-ampo. Apan kon naa na gani
inhustisya sa dakbayan, silay unang mobarug ug mosaway niini. Kon naa
na gani mga tawo nga nag-antus sa katugnaw, silay unang mohatag ug
mga habol. Kon naay kagutom o linog silay unang magpuasag tabako ug
pagkaon aron makaamot sila alang sa mga biktima. Kining mga tawhana
walay maanindot nga mga pulong nga ikapadayag ngadto sa Dios o bahin
sa Dios, apan ang ilang gibuhat nagpakita nga nagtuman sila sa gisugo sa
Dios natong tanan.
Duna pud natoy maayo kaayong mamulong kay kanunay man nga
mosimba matag Domingo ug moingon sa Dios, “Amen! Nagatoo kami!”
Nagsul-ob tag mga uniporme, scapular ug mga medalya isip pamaagi sa
pagpadayag sa atong pagtoo. Apan usahay, kon gikinahanglan na ang
konkretong aksyon nga nasayran natong maoy kabubut-on sa Dios,
nagpakita tag kakulang dihang bahina. Ug kon magpadayon ta nga ingon
niana, angay tang maminaw sa pasidaan nga maunhan ta sa ubang mga
tawo sa pagsulod sa Gingharian sa Dios.
3
Agig panapos, kinahanglan natong maamgohan nga ang sambingay
karong adlawa, sambingay gayud sa duha ka malditong anak. Kinsa man
sa duha ang angay natong isipong modelo ug sulondong anak: kadto bang
prankang mibalibad sa iyang amahan o kadto bang mitando apan wala
motuman? Ang tubag mao nga wala nilay solundon. Kay ang maayo ug
solundong mga anak mao kadto sila nga moingon og “yes” sa ilang
ginikanan ug unya motuman gayud sa gisugo. Kana maoy angayan natong
sundon – mga laki ug babae nga nagpadayag sa pagtoo sa pulong ug sa
buhat – uban sa kaamgohan nga “Dili tanan nga moingon , „Ginoo, Ginoo‟
ang makasulod sa gingharian sa langit, kondili kadtong nagtuman sa
kabubut-on sa akong amahan nga atua sa langit.” (Matthew 7:21). Amen.
+ Emmanuel T. Cabajar, C.Ss.R. D.D.
Obispo sa Pagadian