Upload
others
View
7
Download
0
Embed Size (px)
Citation preview
1
KUVENDI
Komisioni për Edukimin dhe Mjetet e Informimit Publik
PROCESVERBAL
Tiranë, më 24.04.2018, ora 10:00
Drejton mbledhjen:
Milva Ekonomi – nënkryetare e Komisionit
Rendi i ditës:
Shqyrtimi i raportit për veprimtarinë vjetore të RTSH-së për vitin 2017.
Marrin pjesë:
Milva Ekonomi, Fidel Ylli, Musa Ulqini, Fatmir Velaj, Ismet Beqiraj, Fadil Nasufi,
Adelina Rista, Bujar Çela, Sezai Rrokaj, Nora Malaj, Anduel Xindi (zëvendësues).
Mungojnë:
Albana Vokshi, Luçiano Boçi, Luan Baçi, Valentina Duka, Romeo Gurakuqi, Kejdi
Mehmetaj, Vilma Bello dhe Almira Xhembulla.
Të ftuar:
Thoma Gëllçi - drejtor i Përgjithshëm i RTSH-së,
Kristaq Traja - kryetar i Këshillit Drejtues të RTSH-së,
Pandi Madhi - kryetar i Bordit të Administrimit në RTSH,
Sokol Gjoshi - drejtor i Drejtorisë Juridike në RTSH.
2
HAPET MBLEDHJA
Milva Ekonomi- Mirëmëngjesi të gjithëve!
Sot, sipas kalendarit, kemi analizën vjetore për Raportin e vitit 2017 të
Radiotelevizionit Shqiptar dhe të ftuar kemi përfaqësuesit e Radiotelevizionit.
Mbledhja mund të zhvillohet, sepse në bazë të nenit 34 të Rregullores, kuorumi
realizohet.
I ftuar është zoti Thoma Gëllçi, drejtor i Përgjithshëm i Radiotelevizionit, zoti Kristaq
Traja, kryetar i Këshillit Drejtues të Radiotelevizionit, zoti Pandi Madhi, kryetar i Bordit të
Administrimit, dhe zoti Sokol Gjoshi, drejtor i Drejtorisë Juridike.
Në fakt, ne e kemi marrë raportin tuaj që në muajin mars të këtij viti dhe mbledhjen e
sotme e kishim planifikuar që të ishin të dyja palët politike në takim, por, siç e shihni, jemi
vetëm ne. Ndërkohë, para se ne të vinim në këtë takim, Shërbimi i Monitorimit të Kuvendit ka
bërë vëzhgimin e raportit tuaj dhe ata na kanë sugjeruar disa komente, por, përpara se ne të
fillojmë pyetjet dhe diskutimet për raportin, duam të dëgjojmë nga ju se cilat kanë qenë arritjet
kryesore të vitit 2017.
Gjithashtu, dua t’ju njoftoj se, kur kemi raporte të tilla, caktojmë një relator që është
anëtar i komisionit, i cili relaton për këtë raport të aktivitetit vjetor dhe komisioni ka caktuar
relator të raportit zotin Musa Ulqini.
Zoti Traja, fjala për ju.
Kristaq Traja – Mirëdita!
Unë dua të flas shumë shkurt, sepse raporti që kemi paraqitur është i hollësishëm dhe i
plotë. Unë dua të flas vetëm për Këshillin dhe pjesën tjetër dua t’ia lë ekzekutivit, që
përfaqësohet nga kryetari i Bordit Administrativ ose Financiar.
Vitet e fundit Këshilli është mbledhur me më pak intensitet dhe arsyeja ka qenë e
thjeshtë, punët u vunë në vijë rreth viteve 2016-2017, kur u vunë të gjitha bazat normative,
rregullat e brendshme në përputhje me ligjin e mediave audiovizive. Gjithashtu, mund t’ju them
se klima ndërmjet Këshillit dhe drejtorit të Përgjithshëm të Administratës është shumë e mire.
Nuk ka qenë kështu në të kaluarën, por tani nuk kemi kontradikta dhe merremi vesh. Tensioni
midis palëve tani ka kaluar, Këshilli punon normalisht dhe brenda normativës ligjore. Ne
mblidhemi një herë ose dy herë në muaj.
Që të mos marr shumë kohë, më lejoni që t’ia jap fjalën Drejtorit të Përgjithshëm.
Faleminderit!
3
Thoma Gëllçi - Ju falënderoj për ftesën!
Unë do të përqendrohem më shumë tek arritjet që po bëhen për herë të parë në
Radiotelevizionin Shqiptar.
Po e nis me progresraportin për rekomandimin për hapjen e negociatave për pranimin
e Shqipërisë në Bashkimin Europian, i cili për herë të parë vë në dukje progresin e bërë në
RTSH në drejtim të forcimit të pavarësisë editoriale, forcës së tij dhe ndikimit të tij në publik.
Gjithmonë ka pasur vlerësime negative në drejtim të kësaj dhe këtë ne e quajmë si një shpërblim
për punën e bërë.
Dua të përmend disa gjëra se çfarë kemi bërë ne për herë të parë vitin që kaloi.
Për herë të parë ne kemi nisur një transmetim për kanalin RTSH Kuvend, i cili synon
që në një të ardhme të sjellë seancat, komisionet parlamentare, intervistat dhe zhvillimet
parlamentare. Aktualisht ne transmetojmë direkt vetëm punimet e seancave plenare të
parlamentit, por është një hapësirë e dedikuar për punimet parlamentare.
Me rastin e 55 - vjetorit të Orkestrës Simfonike të RTSH-së, më 18 maj të vitit 2017
filloi transmetimin një frekuencë e re, 101.2 mgh në FM, që quhet “Radio Tirana Klasik”, e
cila është një nismë dinjitoze dhe emancipuese për t’u ofruar dëgjuesve shqiptarë të radios
vetëm muzikë klasike, e para e llojit të saj në historinë e radios shqiptare, pa asnjë qëllim
komercial, por në shërbim të publikut.
Për herë të parë në RTSH po transmetohet një cikël emisionesh investigative për
mjedisin, ku preken interesa të gjithanshme të shoqërisë shqiptare për këtë temë të rëndësishme,
por janë edhe një realizim artistik i përsosur, që mund të krahasohet me televizionet e
përparuara të botës.
Për herë të parë raporti i vëzhguesve ndërkombëtare të OSBE-ODIHR-it ka vlerësuar
paanshmërinë dhe profesionalizmin e mbulimit të zgjedhjeve të muajit qershor të vitit 2017.
Për herë të parë kanali RTSH 2 ka startuar në 5 gjuhë të huaja të minoriteteve përpara
se të dilte ligji i minoriteteve, përkatësisht në gjuhën e pakicave kombëtare, që tani bëhen 6;
emisioni për komunitetin egjiptian, ku transmetimi është bërë i mundur në gjuhën maqedonase,
vllehe dhe për herë të parë në gjuhën rome. Ky kanal ka mbulim në të gjithë territorin e
Republikës së Shqipërisë në analog dhe digjital.
Për herë të parë gjatë vitit 2017 Radiotelevizioni Shqiptar ka nisur transmetimet lokale
digjitale.
Për herë të parë RTSH-ja ka një kanal dedikuar sportit, RTSH Sport, i cili nuk plotëson
vetëm nevojat e publikut për argëtim dhe sport, por shërben edhe për edukimin e brezave të
rinj me sport dhe me jetë të shëndetshme.
4
Në vitin 2017 u transmetuan drejtpërsëdrejti, në kualitetin me rezolucion më të lartë në
RTSH 1 dhe RTSH Sport Kampionati Botëror i Notit 2017, Kampionati Botëror i Atletikës
2017, aktivitete që zgjatën 2 javë. Gjithashtu, në maj të vitit 2017 u transmetuan Lojërat
Olimpike 2017 me një kualitet dhe cilësi të lartë transmetimi.
Për herë të parë, në bashkëpunim me federatat përkatëse, u transmetuan lojërat
kombëtare, siç është Albania Open, fluturimet në hapësirë, kampionatet e mundjes, të notit, të
atletikës, të çiklizmit, të basketbollit, të volejbollit, duke u shtrirë deri në klasat sportive të
Shqipërisë, për të dhënë një kontribut në masivizimin e sportit në Shqipëri.
Për herë të parë ne ndryshuam teknologjinë e transmetimit në satelit, nga një teknologji
e vjetëruar, një kanal me cilësi shumë të dobët, këtë vit me të njëjtën vlerë parash, ne bëmë të
mundur, duke e rinovuar teknologjinë e transmetimit satelitor, të transmetojmë 6 kanale
televizive dhe 8 radio, duke mos lënë pas dore rinovimin teknik të prodhimit, ngritjen e
stacioneve transmetuese, që janë pjesë e platformës digjitale të transmetimeve të RTSH-së.
RTSH-ja i ka hedhur sytë nga e ardhmja me një platformë të re që e quajmë “Advanced
RTV”, që janë transmetime në over the top tv me bazë internetin dhe në platformë mobile. Ky
është një revolucion në fushën e transmetimeve, pasi bën të mundur aksesin e programeve të
RTSH-së në çdo cep të botës dhe në çdo kohë që do t’i shikosh, duke futur shërbimin video on
demande, catch up tv, arkivin e të tjerë.
Për herë të parë në RTSH është krijuar një skuadër që merret me përditësimin e lajmeve
dhe me mbulimin e emisioneve online në rrjetet sociale të dedikuara. Gjithashtu, emisionet
kryesore të RTSH-së transmetohen drejtpërdrejt në rrjetet sociale.
Për herë të parë në RTSH është futur EPG-ja, Udhëzuesi Elektronik i Programit, që
është pa dyshim një nga arritjet e padiskutueshme të vitit. EPG-ja është një shërbim, që
kryesisht përdoret në aparaturat e zgjuara digjitale, por që vlen edhe për transmetimet e
zakonshme tokësore, ku në çdo kohë mund të gjejmë programet e televizionit.
Për herë të parë, të gjitha investimet e bëra në teknologji në RTSH janë shoqëruar me
trajnime, të cilat kanë qenë pjesë e kontratave të blerjeve të pajisjeve dhe software-ve të reja.
Mund të them se kemi bërë një revolucion të madh, pasi RTSH-në e kemi paraqitur me një
pamje krejt të re grafike.
Data 21 dhjetor e vitit 2017, e cila përkoi me premierën e Festivalit të Këngës, shënoi
këtë datë të ndryshimit grafik të RTSH-së. Tashmë rrjeti i RTSH-së ka një fytyrë krejtësisht të
re, inovative dhe me grafika të dedikuara, logo moderne dhe konfigurim të pastër cilësor.
5
Pavarësisht mungesave financiare, gjatë vitit 2017 kemi pasur studio të reja moderne,
që janë konceptuar sipas tematikave, siç janë “Pasditja ime”, “Kthehemi në bibliotekë”,
“Përballë java”, “Bulëza”, “Emisione sportive”, “Mirëmëngjesi Shqipëri” e të tjerë.
Struktura e programeve ka pësuar ndryshime rrënjësore. Emisionet janë reduktuar në
minutazh për t’i dhënë ritëm informacionit. Gjithashtu, i është dhënë prioritet fragmentarizimit
të emisioneve në rubrika më të shkurtra.
Për herë të parë RTSH-ja ka ndërtuar database-n e fondit filmik dhe për herë të parë
është ndërtuar infrastruktura e nevojshme për të filluar punë me digjitalizimin e arkivit.
Unë mund të zgjatem shumë, por nuk besoj se është e nevojshme që të zgjatem më
tepër, sepse problemet konkrete janë trajtuar gjerë e gjatë në raportin prej 115 faqesh, të cilin
e keni përpara dhe do të jem i gatshëm t’u përgjigjem pyetjeve për interesa të veçanta. Ju kërkoj
ndjesë që nuk u përqendrova tek të metat, sepse, sigurisht, kemi të meta, por më pëlqeu në
fillim të thosha arritjet, sepse sikur na japin zemër më shumë dhe vullnet për të ardhmen.
Milva Ekonomi - Faleminderit!
Mendoj se mund të fillojmë me pyetje dhe diskutime. Por dua të them se duke lexuar
raportin që ka bërë Shërbimi i Monitorimit të Kuvendit, ka nevojë që raporti vjetor që ju keni
sjellë të shoqërohet edhe me vendimin e Këshillit Drejtues për miratimin e këtij raporti.
(Ndërhyrje pa mikrofon.)
Nuk diskutohet që ju e keni, por duhet të depozitohet pranë Kuvendit.
Mendoj të vazhdojmë me pyetjet me radhë. Unë kam disa pyetje, por do t’i lë për në
fund.
Urdhëroni, zoti Nasufi!
Më pas fjalën e ka zoti Rrokaj.
Fadil Nasufi – Duke pasur parasysh se para 2 muajsh Radiotelevizioni Publik ishte
këtu në komision dhe raportoi gjerësisht, dua të ndalem shkurt në disa konsiderata dhe disa
problematika që janë trajtuar edhe në raportin që na paraqitet. Për mendimin tim, ky është një
raport analitik, transparent dhe shumë profesional, që i trajton gjerësisht çështjet dhe
përmbushjen e misionit që ka Televizioni Publik Shqiptar. Në gjykimin tim, por edhe nga çfarë
marrim nga publiku, ka një trend rritës të interesit të publikut për ndjekjen e Televizionit Publik
Shqiptar, me të gjithë konkurrimin e medieve që operojnë sot në Shqipëri. Televizioni Publik
Shqiptar është futur në rrugën e reformimit të plotë, duke qenë konkurrues dhe dominues në
tregun e medieve. Po shënon hapa pozitivë edhe në përmirësimin e teknologjisë bashkohore
dhe larminë e programeve, po futen edhe programet digjitale. Po e nxjerr vetveten nga
problematika e sinjaleve të dobëta, e teknologjisë së amortizuar, që ka pasur më përpara, por
6
edhe ngeljes pas, nga vetë praktikat e mëparshme, që nuk e kanë pasur si monopol publik, por
si monopol të politikave shtetërore, që kanë dominuar edhe në stafin e Televizionit Publik.
Më vjen mirë që ka vlerësime pozitive edhe nga ndërkombëtarët, sidomos nga raporti i
OSBE-së, sidomos për pjesën e monitorimit të partive politike në fushatën elektorale, që ka
qenë tepër korrekt dhe ka qenë një proces i monitoruar, dhe ka dhënë shembullin e të qenurit
konsekuent në respektimin e ligjit për partitë politike në fushatën elektorale. Nuk është
përqendruar thjesht dhe vetëm në përmirësimin e teknologjisë, në larminë e programeve dhe
në përmbushjen e misionit që ka Televizioni Publik Shqiptar, por është marrë me kualifikimin
dhe me përforcimin e sistemit të karrierës, qoftë të gazetarëve, qoftë të kameramanëve dhe të
gjithë stafit që punon sot në Televizionin Publik Shqiptar. Nga përvoja që kam, por edhe nga
kontaktet me Televizionin Publik Shqiptar, dua të shpreh konsideratat më të larta për shumë
profesionistë të cilët punojnë në Televizionin Publik Shqiptar, falë përvojës së tyre të gjatë dhe
eksperiencës. Këta profesionistë i kanë rezistuar edhe tundimit të pagave dhe janë kthyer në
një vlerë kombëtare në fushën e medies. Ata po e rigjejnë veten, ku janë vlerësuar si nga ana
morale, por edhe nga statusi që kanë duke punuar në këtë medie.
Ne kemi një rubrikë, që mbulon jetën parlamentare, e cila, për mendimin tim, ka qenë
e pakontestuar, të paktën për periudhën e këtij mandati që jemi ne deputetë në parlament. Dua
të them se në programet e Televizionit më shumë vend duhet të zërë zbatimi i ligjshmërisë,
sensibilizimi për njohjen e ligjshmërisë dhe rubrika të tilla, si ato me karaktere ekonomik, për
të promovuar reforma, sepse publiku ynë është mësuar më shumë me propagandë partiake dhe
elektorale, ose me dalje të lidershipeve politike më shumë në faqet e ekranit sesa me specialistët
që duhet t’i mëshojnë shumë edukimit ligjor të publikut për zbatimin e ligjeve dhe për njohjen
e detyrimeve që kanë qoftë si taksapagues, qoftë edhe si qytetarë, që duhet të zbatojnë ligjin.
Pra, duhet të ketë programe tematike, që të zënë vend në këtë fushë, e cila është pak difiçitare
në këtë aspekt.
Së dyti, mendoj se duhet të dominojnë sa më shumë programet e edukimit ligjor dhe
programet me karakter edukues, sepse janë shumë medie në treg dhe ka shumë emisione apo
rubrika, që i mëshojnë negativizmit, i mëshojnë çedukimit të brezave. Në këtë fokus, ne duhet
të dominojmë drejt pozitivitetit dhe futjes së larmisë së programeve, që luajnë rol në edukimin
dhe fuqizimin e vlerave morale, të solidaritetit social e kështu me radhë, që janë pjesë e
përditshmërisë së jetës në Shqipëri.
Problemet teknike kanë të bëjnë me mosmbulimin në disa zona, siç është zona e
Poliçanit apo e disa fshatrave, për shkak të aplikimit të vendosjes së dekoderëve dhe nuk
mbulohen me antenat apo me shpërndarësit e valëve të transmetimit.
7
Së dyti, duhen larguar antenat që ndodhen në kalanë e Beratit, që janë në kundërshtim
me ligjin e trashëgimisë, qoftë si imazh, por edhe për shkak të mbulimit të shpërndarjes me
transmetim të Televizionit Publik Shqiptar. Ato duhen çmontuar dhe duhet respektuar kjo
ligjshmëri në fushën e trashëgimisë.
Unë i uroj Televizionit Publik Shqiptar, stafit, Këshillit Drejtues që ashtu siç e tha dhe
kryetari i Këshillit Drejtues, mbi të gjitha, ka një klimë dhe një bashkëpunim shumë miqësor,
shumë profesional dhe shumë institucional. Kjo gjë është shumë pozitive, sepse duke pasur një
klimë të tillë dhe një frymë që e shëndosh të gjithë ekipin, do të ketë edhe cilësi në atë mision
që kryen Televizioni Publik Shqiptar.
Milva Ekonomi – Faleminderit!
Fjalën e ka zoti Rrokaj.
Sezai Rrokaj – Faleminderit!
Vitin e kaluar ka pasur disa raporte dhe rekomandime për Radiotelevizionin Publik
Shqiptar. Shkurtimisht dua të di, ne kemi rezolutën e Kuvendit, kemi progresraportin e
Bashkimit Europian të vitit 2016, ku ndër të tjera citoj “Shqipëria nuk ka përfunduar kalimin
nga transmetimi analog në atë numerik, si dhe ka shënuar regres në drejtim të konsolidimit të
pluralizmit në media. RTSH-ja ka bërë përparime në ndërtimin e rrjeteve digjitale. Progresi
duhet përshpejtuar, për të garantuar hollësinë e programeve të RTSH-së dhe të operatorëve
lokalë në këto rrjete”. Pra, ku është RTSH-ja, lidhur me këtë rekomandim?
Gjithashtu, ka një raport të Këshillit të Europës, që lidhet me RTSH-në dhe këtu dua
një mendim të shkurtër.
Ndërsa, vlerësimi i OSBE-ODIHR-it është pozitiv për sa i përket garantimit të kohës
së barabartë për fushatën elektorale, dua të di: cili është mendimi i drejtuesve të RTSH-së për
sa i përket faktit që në Shqipëri dominojnë transmetimet me regji të dedikuar dhe Televizioni
Publik, që është më i paanshmi dhe duhet të jetë më i paanshmi, pra si e përballon këtë në
synimin e tij për t’u dhënë shqiptarëve atë që quhet vlerësimi i paanshëm i një ndodhie dhe të
mos përfshihet në atë që quhet transmetues i regjisë së dedikuar? Sepse ndryshe nga
televizionet tjera, që mund të kenë interesa të tjera, Televizioni Publik qëndron mbi të gjitha
palët dhe mbi të gjitha interesat partiake. Pra, si gjendeni ju përballë transmetimeve me regji të
dedikuar, krahasuar kjo me misionin që ka Radiotelevizioni Publik?
Pyetja tjetër ka të bëjë me mbulimin e territorit: sa shqiptarë në të gjithë territorin e
shikojnë RTSH-në? A ka probleme? Ju disa gjëra i keni thënë. Si qëndron problemi i
shikueshmërisë, besueshmërisë dhe paanshmërisë në raport me televizionet e tjera private? Jo,
8
për të sharë ata, por vetëm në misionin e RTSH-së besueshmëria, shikueshmëria dhe natyra e
televizionit, natyrisht kërkon të dallojë nga televizionet e tjera kombëtare.
Nga informacioni që unë kam, ka një përmirësim të buxhetit nga ana e shtetit, i cili e
ka zhvendosur kurbën, ku 38% financon shteti dhe 62% e siguron vetë RTSH-ja, në raport me
një vit më parë, ku raporti ishte me 71%. Këtë informacion e kam marrë nga ju, nuk është se e
kam gjetur gjetkë. Sigurisht, ky raport të ardhurash më intereson, pra a ka të detyrime nga të
tretët, që janë detyrime historike, të cilat e kanë vënë në vështirësi RTSH-në për arsye nga më
të ndryshme, edhe të konflikteve me televizionet private? Pra, detyrime për të mbledhur falë
shërbimeve që u kanë dhënë, edhe në raport me operatorë të tjerë sot? A ka një politikë sot për
mbledhjen e tyre, a ka sukses, a ka zgjidhje për të siguruar atë detyrim që i takon, atë të ardhur
që i takon Televizionit Publik?
Kam edhe një pyetje të fundit: ne kemi marrë rekomandimin për çeljen e negociatave
dhe urojmë shumë që këto negociata të çelen, sepse besojmë shumë që ato, në radhë të parë,
do t’u shërbejnë shqiptarëve, sepse kjo është një arritje e shqiptarëve për gjithçka që ata kanë
dashur dhe kanë ëndërruar që prej viteve ’90. Në këtë kuptim, mendoj se opinioni publik nuk
ka, në vështrimin tim, një vetëdije se çfarë i pret ata në fillim si vend kandidat, pastaj edhe
anëtar në Bashkimin Europian. Pyetja është edhe më e thjeshtë: ju, si RTSH, për vetëdijesimin
e shqiptarëve a mendoni se duhet të keni një qasje më ndryshe në prag të këtij hapi që është
hedhur nga Shqipëria për rekomandimin, pastaj për çeljen e negociatave?
Mila Ekonomi – Fjalën e ka Fideli.
Fidel Ylli – Unë nuk dua të zgjatem e të flas për punën e mirë që është bërë në RTSH,
pasi ajo është e dukshme. Vite më parë, të jemi i sinqertë, nuk e merrja mundimin ta çoja
telekomandën te RTSH-ja, sepse kishte programe të vakëta, sinjali nuk ishte i mirë, njerëzit në
zonën time të thellë, ku kam qenë dikur, ankoheshin se nuk u shkonte sinjali, si dhe shumë
probleme të tjera, të cilat i kemi ngritur në komision.
Unë tani dua të flas për disa gjëra konkrete, që më interesojnë jo vetëm si deputet, por
edhe si teleshikues i mirë dhe ndjekës i TVSH-së në vite. Duke qenë se ka shumë kanale
private, me intereson shumë kanali 24, që do të thotë 24 orë transmetim. Shikoj që keni nxjerrë
logon aty dhe mua e publikut të gjerë do të na interesonte që ky kanal të informohet, se është
një grup audience që mund të shikojë telenovela, që mund të ketë kohë që të rrijë para
televizorit; është një grup tjetër që do të shikojë sport, por një grup i mirë njerëzish që janë në
lokale, në punë apo në zyra shikojnë RTSH-në ose kanale të tjera që kanë lajme të shkurtra dhe
kjo është me shumë interes për RTSH-në.
9
Përveç kësaj më intereson edhe faqja e web-it të RTSH-së, që është një faqe e
rëndësishme. Të gjithë deputetët shikojnë faqe të ndryshme, që nuk dua t’i përmend, dhe
menjëherë kur ka një lajm, u vjen në faqe. Mendoj se kjo faqe duhet të fuqizohet me lajme të
minutës së fundit.
Por që të merrni një gazetar, po përmend Fevizun, i cili e ka filluar karrierën e tij te
RTSH-ja me emisionin “Dritare”, të cilin e ktheu në “Opinion”, çfarë mendoni për rrogat që
keni?! Si mund të vijë një gazetar te ju, kur paguhet më pesëfishin e një rrogë në një televizion
privat? Pra, çfarë metodash ligjore duhet të ndiqni që t’i thithni ata gazetarë? TVSH-ja bën dy
emisione politike, por nuk janë ende në nivelin e këtyre që janë vite që janë në treg, të cilët
janë kryesisht të enjten, të martën, pra ditë jave. Mendoj se është e rëndësishme që një gazetar
i mirëfilltë të bëjë një emision politik atje, që të ketë audiencë. Kjo ndoshta ka të bëjë me pagën
ose, nuk e di, mund të më jepni ju një shpjegim.
Për sa i përket kanalit të Kuvendit, në mandatin tim si deputet kam shkuar në shumë
parlamente të Europës dhe të vendeve që nuk janë në Europë, duke filluar nga Kina deri në
Ukrainë, ku ishim me zonjën Kodheli dhe me zotin Strazimiri dhe atje kishte jo thjesht një
kanal të dedikuar, por një kanal që 24 orë merrej me parlamentin, pra jo vetëm ditën e seancës,
por edhe të komisioneve. Në çdo komision mediet ishin të pranishme. Çdo deputet që dilte,
çdo kryetar komisioni, sa dilte, kishte sallën e konferencave, ku jepej i gjithë informacioni se
çfarë bëhej në komision. Kjo është një gjë shumë e rëndësishme për të gjithë teleshikuesit, që
të marrin vesh qoftë live, qoftë nëpërmjet ritransmetimeve të ndryshme, që bëhen gjatë ditës,
se çfarë bëhet me taksat e tyre, sepse është një medie që paguhet nga taksapaguesit.
Tjetra është kanali sportiv. Unë mendoj se TVSH-ja ka bërë një punë mjaft të mirë për
sa u përket aktiviteteve sportive. Ka shumë kampionate botërore që kanë qenë me të drejta nga
TVSH-ja, si Lojërat Olimpike. Kam parë që këto ditë keni marrë edhe Formula One. Është një
gjë e mrekullueshme që për vite me radhë e kanë pasur televizionet private, të cilat paguanin
goxha para. Mendoj se në fazën e Champion League dhe Europa League dhe të këtyre
aktiviteteve të rëndësishme, duhet të hyni në tender, të gjeni mënyrën me sponsorë të ndryshëm
për t’i marrë, sepse kjo rrit audiencën. Është shumë i rëndësishëm sporti në Shqipëri dhe
TVSH-ja, që ka një sinjal të fuqishëm në të gjithë Shqipërinë, të jetë prezente pranë të gjitha
televizioneve shqiptare.
E fundit që kam. Dje këtu kishim kryetarin AMA-s për raportin vjetor të institucionit.
Aty u hodh një ide për taksën e aparatit. Ne thamë që do të diskutojmë sot me drejtuesit e
RTSH-së. Për shembull, në një familje që në çdo dhomë mund të ketë 7 televizorë do ta paguajë
7 herë këtë taksë? Në një lokal që mund të ketë 5 televizorë, do ta paguajë 5 herë këtë tarifë
10
aparati? Mendoj se kjo kërkon një studim të mirë, në qoftë se do të merrni një vendim, sepse
do të na krijojë probleme.
Faleminderit për praninë!
Milva Ekonomi – Fjalën e ka Ismet Beqiraj.
Ismet Beqiraj – Pyetja ime e parë lidhet me shqetësimin që tha edhe zoti Rrokaj
Para se të bëj pyetjet, ju falënderoj si staf për përpjekjet që keni bërë, në mënyrë të tillë
që TVSH-ja jo vetëm të jetë një televizion i dashur për publikun, i pavarur tërësisht politikisht,
por edhe interesant. Nga ana tjetër, u bashkohem edhe sugjerimeve që bëri kolegu im, Fideli,
por një nga sugjerimet e para që do të bëja është që në logon e parë, që jep RTSH-ja, duhet të
jetë më tërheqëse. Nga ana tjetër, vazhdoj të bëj disa pyetje që kanë të bëjnë edhe me
revolucionin teknik dhe teknologjik në këtë instrument të fuqishëm të edukimit dhe informimit
audioviziv, që është RTSH-ja dhe ka të bëjë me digjitalizimin, si dhe me aparaturat e kohës.
Sa përqind është realizuar transferimi i teknologjisë, sidomos nga arkivi, që është memoria
historike dhe janë vlerat historike të jetës shqiptare, që është filmi, qindra dhe mijëra bobina,
kaseta, të cilët duhet të hidhen në server, që është një nga pajisjet bazë të teknologjisë së
digjitalizimit? Çfarë duhet të bëni për ta realizuar këtë gjë? Mund t’i keni marrë të gjitha të
tjerat, por keni lënë trurin e gjithë kësaj teknologjie që implementon digjitalizimin e plotë të
RTSH-së.
Pyetja tjetër: në këto kushte dhe me përpjekjet aktuale, sa përqind të audiencës zënë të
gjitha kanalet e RTSH-së, të krahasuara edhe me televizionet e tjera private dhe kombëtare?
Si pyetje të fundit: a vuani nga pirateria e emisioneve dhe programeve tuaja? Cili ka
qenë qëndrimi juaj? Si mendoni në perspektivë për këtë fenomen, sepse është kthyer në një
sëmundje, sidomos në Shqipëri? Po tani që është më në kontroll, si është situata?
Dje, kur diskutua raporti i AMA-s, ne diskutuam në komision, që ne si komision të
vijmë ta shikojmë institucionin e RTSH-së, në mënyrë të tillë që të shohim mjediset e
brendshme, nëse janë në mjerim apo nëse janë si homologet e tyre, pra si mjediset e
televizioneve private në Shqipëri, pasi për të paguajnë taksapaguesit shqiptarë në çdo cep të
Shqipërisë. Nëse do të duhen pak gjëra dhe nëse e shihni të nevojshme, edhe ne si komision
mund t’ju mbështesim fuqimisht.
Faleminderit!
Milva Ekonomi – A keni nevojë të merrni kohë për përgjigjet? Kemi edhe tre kolegë
që duan të bëjnë pyetje. A t’i mbledhim edhe këto tri pyetje?
(Reagim pa mikrofon.)
Fjalën e ka zonja Rista.
11
Adelina Rista – Faleminderit që jeni sot këtu! Ne, në fakt, e kemi lexuar raportin tuaj
me shkrim dhe ato që ju i thatë me gojë na i qartësoi më mirë situatën, megjithëse me këto që
kemi përpara jemi të qartë. Unë ju falënderoj për analizën! Në krahasim me analizën e së
kaluarës, ju pikat e rezolutës, detyrimet që rrjedhin nga rezoluta, i keni përmbushur të gjitha,
madje jeni në përfundim të procesit të digjitalizimit dhe ju falënderoj edhe për këtë!
Dua t’ju drejtoj vetëm një pyetje. Unë i kam merak burimet njerëzore, pasi prej vitesh
e kam mbuluar këtë fushë, pra kam punuar me burimet njerëzore. Jam dakord që zhvillimi
shkon gjithmonë paralel me burimet njerëzore të specializuara dhe të kualifikuara. Dua të di
nëse stafi juaj, burimet njerëzore kanë nevojë për trajnime dhe kualifikime, programe trajnimi,
kualifikimi në drejtim të specialiteteve të caktuara. Nëse i keni këto programe, si shkon
kualifikimi dhe trajnimi i burimeve njerëzore?
Faleminderit!
Bujar Çela – Unë ju përgëzoj për punën! Si gjithmonë, ju jeni lider në komunikim.
Jeni televizioni i parë kombëtar. Tani janë edhe tri të tjera.
Pyetjen e parë, të mos më keqkuptojë Fideli, por dua të di nëse ka ikur Fideli nga zona
apo ka shkuar sinjali atje, sepse ka disa zona që kanë mungesë sinjali?
Pyetja e dytë: flasim për pirateri, vjedhin të gjithë, po ju në stafin tuaj a keni nga ata që
u shërbejnë të tjerëve, duke marrë nga magazinat, nga vlerat, nga arkivat tuaja, pra rrinë te ju,
punojnë te ju, paguhen nga ju, por u shërbejnë rivalëve tuaj?
Faleminderit!
Musa Ulqini - Faleminderit!
Për shkak se siç u tha jam relator, fjalën time do ta ndaj në dy pjesë. Pjesa e parë është
një vlerësim për raportin.
Pjesa e dytë ka të bëjë me disa çështje të cilat u theksuan në mënyrë të pjesshme ose
të plotë nga kolegët, por mendoj se janë çështje për të cilat kemi nevojë jo thjesht për një
përgjigje në komision, por që me siguri do të jenë pjesë e punës që ju do të bëni, planifikimit
që keni bërë për vitin në vazhdim, që do të shërbejë për të ndërtuar rezolutën e re të komisionit,
e cila do të miratohet edhe në seancën plenare në parlament. Nuk është e tepërt të themi se
ky raport që kam përpara po ta krahasojmë me raportin e vitit 2013 dhe me çdo raport tjetër,
nuk ka të krahasuar, po flasim për pjesën formale, por ajo që është thelbësore nuk ka të
krahasuar me atë se çfarë përmban raporti. Kjo nuk ka lidhje me artikullshkruesit, me atë që
ka shkruar raportin, por me atë se çfarë po ndodh realisht në Radiotelevizionin Shqiptar, pra
pa diskutim që ka qenë viti më i suksesshëm.
12
Një falënderim nuk është i tepër për drejtorin e Përgjithshëm, për Këshillin Drejtues,
për të gjitha bordet dhe për të gjithë punonjësit e RTSH-së.
Kam një vlerësim me emër të përveçëm për punonjësen, këshilltaren e Shërbimit të
Monitorimit të Institucioneve të Pavarura që mbulon RTSH-në, zonjën Kadare, e cila ka bërë
një material shumë të detajuar, shumë të rëndësishëm, që është një ndihmë për ne anëtarët e
komisionit. Do të sugjeroja që ky material t’u vihet në dispozicion edhe Këshillit Drejtues
dhe ekzekutivit të RTSH-së përpara se ne ta diskutojmë, sepse është vërtet një material shumë
i rëndësishëm, ku bëhet një ballafaqim i detajuar mes kërkesave ligjore dhe asaj çfarë RTSH-
ja ka bërë gjatë një viti.
Raporti i RTSH-së respekton kërkesat e ligjit nr.97, të vitit 2013, rezolutën e Kuvendit
të Shqipërisë miratuar një vit më parë, kontratën e shërbimit të miratuar me AMA-n, statutin
e RTSH-së, parimet editoriale dhe kërkesat e progresraportit të BE-së për RTSH-në për vitin
2016. Dy risi dua të theksoj këtu.
E para, është hera e parë që ne kemi ballafaqimin në raport pikë për pikë me të gjitha
shkresat e rezolutës së miratuar në Kuvendin e Shqipërisë, që tregon një seriozitet të Këshillit
Drejtues dhe të ekipit menaxhues të RTSH-së, sepse është një rezolutë, një dokument themelor
i miratuar nga Kuvendi i Shqipërisë. Për herë të parë kemi një ballafaqim me të gjitha pikat
e kësaj rezolute.
E dyta, besoj se është e rëndësishme të theksoj se ky raport, nëse ballafaqohet me
platformën për të cilën u votua drejtori i Përgjithshëm i RTSH-së, është në zbatim të asaj
platforme. Për herë të parë ne kishim një drejtor të votuar me një platformë. Puna e bërë, ky
raport respekton atë platformë. Nuk ka gjëra të ndryshme, që me tjetër platformë miratohet
drejtori i Përgjithshëm dhe të tjera gjëra ndodhin në RTSH.
Do të them shkurt se çfarë mendoj se ka qenë e veçantë për vitin 2017 në RTSH.
E para, përsëri mund të them se viti 2017 ishte viti kur ne kishim një institucion publik
të strukturuar sipas ligjit, statusit, standardeve të mënyrës se si funksionojnë transmetuesit
publikë, pra një ekip i ri, struktura të reja dhe standarde të reja. Kjo është shumë e rëndësishme,
sepse për vite të tëra kanë munguar ose nuk kemi pasur statutin, ose nuk kemi pasur ligjin
ashtu siç duhet, sidomos nuk kemi pasur të plotësuar ekipet ekzekutive dhe ekipin e Këshillit
Drejtues.
E dyta, është viti kur është punuar më shumë se asnjëherë për kalimin në transmetimet
numerike. Sipas asaj që unë kam, edhe nga kontaktet që kam me drejtuesit e RTSH-së, besoj
se deri në fund të vitit do të bëhet e mundur që më në fund RTSH-ja të kalojë në transmetime
13
numerike, që do të jetë një arritje shumë madhe, e cila është në përputhje me detyrimet që
Shqipëria ka me konventat që kemi miratuar.
E treta, oferta e RTSH-së këtë vit ka qenë më e mira në historinë e RTSH-së. Këtu u
tha se janë 10 kanale falas: 3 gjeneraliste, 7 tematike. Pa diskutim është sukses i madh që
ne kemi një RTSH Kuvend, por ky i fundit ashtu siç është në platformën tuaj dhe siç u tha
këtu nga kolegët, duhet që të mos mbetet te transmetimet, por të bëjë edhe hapin e dytë: të
jetë një kanal që të ketë diskutime për çfarë ndodh në Kuvend e të tjera. Kemi 4 radio
kombëtare, është risi ajo që u tha edhe këtu nga ju, për një kanal dedikuar muzikës klasike,
është çështje kulture kjo. Shqipëria dhe publiku shqiptar e meritojnë një gjë të tillë. Kemi
transmetime satelitore që nuk kanë qenë asnjëherë, janë 6 kanale, 8 radio, një mundësi e madhe
që shqiptarët që janë jashtë atdheut të ndjekin atë që ndodh në Shqipëri përmes transmetuesit
publik. Kemi ndryshime cilësore në 2 studiot lokale në Korçë e Gjirokastër. Unë besoj se
shumë shpejt e njëjta gjë do të ndodhë edhe në Shkodër, ndoshta edhe në Kukës.
Aplikacioni i RTSH-së, u fol këtu, mendoj se është një arritje shumë e madhe. Para
disa ditëve ishin 760 mijë përdorues, sot mund të jenë 80 mijë, por është një mundësi e madhe,
sepse RTSH-ja ecën në një hap me teknologjitë e reja, siç janë edhe këto mjete që kemi në
dorë dhe i jep mundësi publikut që ta ndjekë RTSH-në online kudo që është.
Nga pikëpamja e programeve ka shumë programe të reja: festivali, një bum i
jashtëzakonshëm për sa i përket sportit. Por arritje shumë e madhe, që i ka dhënë pikë
Shqipërisë besoj se është mënyra se si trajtohen nga transmetuesit publikë pakicat
kombëtare. Asnjë vend i rajonit tonë nuk bën këtë që bën RTSH-ja. Është një arritje shumë
e madhe nga pikëpamja e standardeve. Duhet të thuhet me zë të lartë një gjë e tillë. Edhe
dizajneri i ri, që u tha këtu, është diçka që i jep sharm, klas, e bën RTSH-në më konkurruese
në treg.
Një gjë që ka qenë pjesë e gjithë aktivitetit tuaj, mund të ishte thënë pak më shumë në
raport, megjithëse ju e keni theksuar, nuk ka ndodhur ndonjëherë që institucionet
ndërkombëtare të kenë pasur një qasje siç kanë pasur gjatë vitit 2017 ndaj transmetuesit publik.
Kjo është e kuptueshme, sepse ishte një transmetues që ishte shumë larg së qenurit publik,
ishte një transmetues me shumë probleme në lidhje me politikën. Sa më shumë ndryshime
bën RTSH-ja, aq më shumë institucionet ndërkombëtare kanë një qasje pozitive ndaj këtij
transmetuesi.
OSBE-ja gjatë vitit të kaluar ka pasur një lidhje shumë të ngushtë me RTSH-në, shumë
aktivitete, trajnime. Është për t’u cilësuar që në konferencën kombëtare të organizuar nga
OSBE-ja që bëhet çdo vit, një çështje e madhe ishte e gjithë problematika e RTSH-së, ku
14
përfaqësuesit kryesorë të OSBE-së, të Delegacionit Europian, të Këshillit të Europës folën për
herë të parë me fjalët më pozitive për atë që po ndodh në RTSH për sa u takon reformave. Atë
që ka ndodhur në raportin e OSBE/ODIHR-it ne duhet ta themi me krenari, sepse për herë
të parë pas 25 vjetëve në një raport të OSBE/ODIHR-it, që është institucioni me i besueshëm
kur flasim për zgjedhjet, bën një vlerësim jo për përqindjet e partive politike, siç tha profesori,
por flet për diçka tjetër, flet për një përqasje të një transmetuesi publik që është i pavarur dhe
zbaton thelbin e asaj se çfarë duhet të jetë sjellja e një transmetuesi publikë, kur është fjala
për zgjedhjet politike.
EBU-ja është një institucion, i cili grupon transmetuesit publikë. Ky është viti ku besoj
se numri i trajnimeve dhe i marrëdhënieve të RTSH-së me EBU-në ka qenë më i madhi. Besoj
se është historike që për herë të parë një mbledhje e të gjithë drejtuesve të bordeve të
transmetuesve publikë të planetit do të vijnë në Tiranë, në Shqipëri. 200 drejtues të
televizioneve, që nga gjigandë, si: RAI, BBC-ja dhe ekranet e tjera do të jenë të pranishme në
Tiranë. Nuk vijnë për shkak të rotacionit të germave të alfabetit, por vijnë për shkak të asaj
se çfarë po ndodh në RTSH. Është një gjë të cilën RTSH-ja do të ketë rast jo ta shesë, por ta
menaxhojë si një arritje shumë të madhe, që të na bëjnë krenarë të gjithëve, jo vetëm ne
anëtarët e komisionit, deputetët e Kuvendit të Shqipërisë, por të gjithë shqiptarët. Do të jetë
qendër e një mbledhjeje, e cila ka ndikim shumë të madh; është reklamë e madhe për Shqipërinë
për turizmin, për historinë e të tjera. Do të vijnë nga Japonia, nga Afrika e Jugut, nga Amerika
e Jugut, nga vende të vogla, të mëdha, nga SHBA-të, nga të gjitha vendet ku ka transmetues
publik.
E fundit, vlerësimi në progresraportin e BE-së, publikuar më 17 prill, përsëri edhe këtu
gjejmë vlerësimin e parë pozitiv për pavarësinë e RTSH-së. E gjitha çfarë thashë ka një matës
që është performanca ose audienca, ka një debat, të gjithë “armiqtë” e RTSH-së, RTSH-ja
nuk ka armiq, ka kundërshtarë, por në fakt ka edhe armiq, kur vjen fjala për të anatemuar
RTSH-në, edhe sot përdorin audiencën e ulët të RTSH-së. Vetë RSH-ja, Këshilli Drejtues,
ekipi menaxhues e kanë sfidë të madhe, e kanë pjesë të diskutimit të tyre. Unë kam qenë pjesë
e disa prej këtyre diskutimeve dhe për herë të parë po bëhen përpjekje serioze nga vetë RTSH-
ja për të matur audiencën. Po për herë të parë OSBE-ja ka bërë një gjë të tillë, është futur në
këtë çështje, për t’i dhënë kredibilitet kësaj gjëje, sepse konkurrenca bën që shifra audiencash,
për shkak të konkurrencës, të mos kenë asnjë lidhje me të vërtetën. AMA, që është një
institucion kredibël në Shqipëri, flet për pozitivitet kur është fjala për rritjen e audiencës.
OSBE-ja thotë: “ 42% e shikuesve thonë se programet e RTSH-së po ndryshojnë”. 26,5%
thonë se nuk ka ndryshim; ata nuk vërejnë ndryshim. Ndërkohë, Shqipërisë ende i mungojnë
15
agjencitë e pavarura të mirëfillta, që nuk përdoren nga komercialët, për të bërë matjen e
audiencës.
Këto ishin çështjet, të cilat desha t’i shenjoja si arritje, ndërsa tani ka ardhur momenti
të flas për disa çështje që janë probleme, por janë edhe pyetje. Këtu, në komision, duhet një
përgjigje nga ju që përfaqësoni RTSH-në, në lidhje me çështjen e digjitalizimit. Raporti i
djeshëm i AMA-s kishte disa të dhëna shqetësuese, por që konsiderohen të vjetëruara, kjo jo
për fajin e AMA-s, po për shkak të procesit që ecën shumë shpejt. Ai raport ka ardhur këtu në
fillim të marsit, është hartuar diku nga shkurti, ndërsa sot, që jemi në fund të prillit, procesi ka
ecur dhe shumë nga bashkitë që nuk mbuloheshin me sinjal, sot mbulohen.
Në raport ju thoni se deri në fund të vitit ky proces do të përfundojë. Pra, 92 apo 98 %
e popullsisë së Shqipërisë do të mbulohet me sinjalin e ri. Pra, një përgjigje në lidhje me këtë
çështje, pasi besoj se edhe kolegët e prekën këtë çështje në mënyra të ndryshme, dikush duke
u nisur nga zona përkatëse elektorale, dikush në përgjithësi.
Çështja e dytë. Çështja e dytë ka të bëjë me dekoderët. Edhe në qoftë se ne e mbarojmë
procesin e digjitalizimit, nëse familjet shqiptare nuk pajisen me dekoderë, atëherë kjo punë e
jashtëzakonshme e këto vështirësi të mëdha që janë kaluar, rrezikojnë të mos kenë atë për të
cilën është bërë investimi.
Në raport ka një kapitull për këtë çështje. Ky është një problem serioz dhe ka disa
alternativa. Megjithatë, unë mendoj se nga ana juaj do të duhej një përgjigje sot, këtu, e
shkurtër, por thelbësore, se cila do të ishte zgjidhja.
Çështja e tretë ka të bëjë me tarifën për aparatet televizive. Ka keqkuptime për këtë
çështje, publiku nuk është i informuar. Pas publikimit të këtij raporti, rrezikohet të ketë një
politizim të çështjes, të ketë keqinformim. Ju keni qenë shumë të hollësishëm aty, keni bërë
krahasimin e taksës me të ardhurat, sepse, nuk mundet të krahasohet me tarifën e Bashkimit
Europian, por me të ardhurat për frymë. Që të jemi të qartë se si është kjo, jo në vlerë absolute,
por ju e krahasoni edhe me vendet e rajonit, është shumë e rëndësishme të kemi një përgjigje
të qartë për këtë çështje. Unë ju ftoj që, në lidhje me këtë çështje, të jeni më agresivë e t’i
informoni njerëzit, me qëllim që të mos e lejoni politikën, secilën nga anët e politikës, ta
keqpërdorë. Kjo është një çështje shumë sensitive, ndaj duhet të jemi shumë të qartë kur flasim
në lidhje me të.
Çështja tjetër ka të bëjë me mënyrën se si ua paraqisni ofertat shqiptarëve, sa e keni
performuar ju atë, a ka vend për ndryshime? Ju thoni se keni bërë disa takime, si në Shkodër,
Gjirokastër, Korçë. Ju thoni se këshilli i dëgjuesve dhe i shikuesve ka qenë aktiv. Megjithatë,
unë mendoj se fakti që 26, 5 % e shqiptarëve mendojnë se nuk po ndodh asnjë ndryshim në
16
RTSH, ju detyron juve, ju obligon juve, që përveç Këshillit të Dëgjuesve e të Shikuesve,
përmes gjithë fuqisë që keni, të jeni më agresivë në treg, përmes aktiviteteve të mëdha, duke ia
filluar këtu, nga Tirana. Unë di që keni një plan për të bërë diçka të madhe këtu, që t’i ftoni të
gjithë, edhe kundërshtarët, armiqtë e RTSH-së, se RTSH-ja ka plot armiq, edhe të interesuarit,
të gjithë faktorët, edhe ndërkombëtarët, edhe përfaqësuesit e shoqërisë civile, edhe
përfaqësuesit e minoriteteve e të tjerë, që ju, në mënyrë publike, me tërë fuqinë që keni, t’ua
bëni të njohur shqiptarëve atë që po ofron RTSH-ja çdo ditë dhe se cila është oferta juaj në
tregun e sotëm.
Besoj se kjo është e rëndësishme. Ju mendoni, shumë veta mendojnë, se ajo çfarë
transmeton çdo ditë RTSH-ja s’ka nevojë për reklamë, sepse është një ofertë që flet vetë.
Absolutisht që bie dakord me këtë, por është po kaq e rëndësishme, për shkak të traditës, për
shkak të konkurrencës, për shkak të shumë gjërave të tjera, që ju të jeni më agresivë për të
informuar shqiptarët në lidhje me ofertën e re që ju, çdo ditë e më shumë e në mënyrë cilësore,
ofroni përmes programeve e kanaleve të RTSH-së.
Faleminderit!
Milva Ekonomi – Faleminderit, Musa! Edhe unë, para se t’ju jap fjalën, do të doja t’ju
bëja disa pyetje.
Së pari, bashkohem me të gjithë kolegët e mi, që raporti është i hartuar mirë, ndjek të
gjitha rregullat që duhet të ndjekë një raport i këtij lloji lidhur me ligjin, lidhur me rezolutën e
Kuvendit të vitit të kaluar, lidhur me detyrimet që ka lënë Kontrolli i Shtetit, apo edhe të tjera
strategji, të cilat janë miratuar pranë institucionit tuaj. Ajo ku dua të ndalem me më shumë
vëmendje është fakti se kur lexon dy rekomandimet e Bashkimit Europian, atë të vitit 2016 e
atë të vitit 2017, gjëja e rëndësishme është statuti i munguar, rregullorja e veprimtarisë së
RTSH-së, dhe tani rregullorja e re që ju keni, me të cilën organizoni veprimtarinë e brendshme.
Është një nga ngjarjet e rëndësishme, ajo që dua të theksoj, që komisioni ynë, sa here që ka
qenë në ballafaqim me ndërkombëtarë, me grupe nga OSBE-ja, nga Këshilli i Europës, nga
Komisioni Europian apo edhe nga BIRN, ta përmendë këtë si arritje.
Ndërkohë, meqë përmenda BIRN-in, dua t’ju them se, përveç arritjeve që përmendën
nga këto institucione ndërkombëtare, ka edhe një raport të dalë nga BIRN-i dhe nga Gazetarët
pa Kufi, që mbase e keni lexuar, bëhet për të gjithë Ballkanin, nuk bëhet vetëm për Shqipërinë,
por ende ka disa probleme në lidhje me monopolizimet në medie dhe kërkohet të fuqizohet më
shumë roli i RTSH-së.
Thënë këtë gjë, unë dua t’ju bëj një pyetje, e cila lind edhe nga analiza e bërë nga
Shërbimi i Monitorimit. Në raportin tuaj, por edhe te analiza e Shërbimit të Monitorimit, ne
17
vëmë re se buxheti juaj është një buxhet në rritje. Kjo për sa u takon të ardhurave të akumuluara
si nga buxheti i shtetit, po ashtu edhe nga të ardhurat që ju grumbulloni nga privatët. Edhe
struktura ka ardhur duke u përmirësuar. Pavarësisht nga kjo, unë dua t’ju pyes: kjo strukturë e
të ardhurave që ju grumbulloni, a është e mjaftueshme për t’ju bërë juve konkurrues në tregun
mediatik shqiptar, siç kërkohet sot, sidomos nga raporti i BIRN-it, sidomos nga Këshilli i
Europës, sidomos nga raporti i progresit? Kjo kërkohet nga të gjithë partnerët tanë
ndërkombëtarë.
Pyetja e dytë lidhet me rritjen e audiencës. Ju keni rritur audiencën dhe kjo është një
gjë e mirë, të cilën na e vuri në dukje edhe AMA dje, duke na treguar edhe përqindjen e rritjes.
Edhe dje, kur kishim AMA-n në raport, u ngritën disa çështje. Njëra çështje lidhej me faktin se
sa shumë e informojmë ne publikun lidhur me mbrojtjen e konsumatorëve nga produktet e
duhanit.
Kjo pyetje u bë për të kuptuar nëse në RTSH ka programe për shëndetin, për më tepër
kur kemi edhe një ligj, i cili kërkon që ky të jetë informacion në prime time.
Profesor Rrokaj e tha sot, por edhe dje e diskutuam: në këtë moment ku jemi, si do të
ndryshojë programacioni, për të pasur vëmendje ndaj anëtarësimit në Bashkimin Europian?
Cilat do të jenë kërkesat e reja që do të ketë programacioni i televizionit tuaj?
Pyetja e tjetër lidhet me një shqetësim që keni ngritur ju. Në fakt nuk është pyetje, por
ka të bëjë me faktin se ne kemi vendosur t’ju japim një suport. Ju keni një problem lidhur me
pagesën e TVSH-së për pajisjet që përdorni për digjitalizimin dhe i keni bërë një kërkesë
Ministrisë së Financave me idenë që, nëse këto të ardhura do të lëvrohen, do të jetë shumë mirë
edhe për juve, që t’i riinvestoni pikërisht në digjitalizim, e për këtë arsye keni filluar dhomën
e digjitalizimit apo ngritjen e bazës filmike që keni, për të bërë database-n filmik. Ne do të
bënim dy aksione për t’ju ndihmuar. E para, të bënim një vizitë, si komision, pranë kësaj
qendrës suaj, sallës suaj të vogël ose të madhe, por që tani është shumë inovative. E dyta, them
se ne mund t’i shkruajmë një letër Ministrisë së Financave, ku t’i kërkojmë lehtësi në lidhje me
këtë çështjen e TVSH-së, duke e kuptuar se sinjali që ju prodhoni është një e mirë publike, e
kësisoj ka një koncept të përfituar, edhe për rimbursimin e TVSH-së në lidhje me këtë pajisje
që keni marrë për digjitalizim.
Faleminderit!
Fjala për ju!
Thoma Gëllçi – Unë ju falënderoj shumë për fjalët e mira, të cilat pa diskutim e rrisin
optimizmin e ekipit të RTSH-së për të vazhduar rrugën e ndryshimeve. Për të mos thënë shumë
fjalë, po u përgjigjem pyetjeve shkurt, një e nga një.
18
Në fillim do ta nis me problemin e mosmbulimit në disa zona të Beratit, që ju, i nderuar
deputet, përmendët, si dhe për antenën e kalasë në Berat.
Si në Berat, si në Lezhë, si në një vend tjetër, që s’e mbaj mend, ne ndeshemi me një
problem: që vendet ku janë vendosur antenat janë qendra arkeologjike apo qendra të
rëndësishme kulturore dhe në këto qendra RTSH-ja nuk i ka më. Për shembull, në Berat nuk
kemi antenë në kala, apo në Lezhë nuk kemi antenë tek tyrbja sipër. Këtu është një problem
tjetër: qe vetëm RTSH-ja e respekton këtë fakt, duke tërhequr antenat nga qendrat arkeologjike
e kulturore, ndërsa të gjitha antenat e tjera ndodhen në kala. Kështu, për të parë RTSH-në,
shikuesit duhet ta kthejnë antenën nga krahu i kundërt i antenave të tjera, ku janë antenat
tradicionale apo ato të televizioneve të tjera. Kjo na vë shumë në vështirësi, sepse, nëse nga ne
kërkohet dhe ne e zbatojmë, duhet që me të njëjtën forcë, autoritetet shtetërore t’u kërkojnë
edhe operatorët privatë që të ndryshojnë vendin e antenave. Sepse, njeriu s’mund ta ndryshojë
drejtimin e antenës herë nga Dajti për të parë Klan-in dhe Top-in, e herë nga Durrësi për të parë
RTSH-në. Kjo është e pamundur.
Sa për mosmbulimin në disa zona, si në zonën e Beratit, kjo ndodh për shkak se ne nuk
kemi filluar ende transmetimet digjitale në stacionin e Gllavës, i cili është stacion me fuqi
shumë të madhe, që do të mbulojë edhe Beratin, edhe pjesën e pambuluar të Poliçanit. Nga ana
e RTSH-së është mbaruar krejt puna, që prej rreth gjashtë muajsh. Për shkak të dimrit të zgjatur
e vështirësive, kompania gjermane nuk e pati të mundur t’i instalonte këto. Tashti presim nga
dita në ditë, që ata të vendosin transmetuesit dhe të fillojmë transmetimet.
Nga ana e RTSH-së, gjatë vitit të kaluar është bërë një investim jo i vogël, që të gjitha
pikat e vjetra, të cilat ishin lënë gabimisht jashtë projektit të digjitalizimit, me atë kredinë e
famshme, që janë pagesa shtesë, ne i kemi mbaruar tashmë dhe janë të gatshme të gjitha të
presin transmetimet, duke përfshirë Gllavën, Petreshin në Elbasan, Taraboshin, Çervenakën në
Korçë, që do të mbulojë zonën e rrëzës së Moravës, Sopotin në Gjirokastër e në Vlorë, Milenë.
Nga ana e RTSH-së është gjithçka gati për të pritur aparaturat. Tashti që moti është i mirë, kjo
është një punë disajavëshe dhe ne mund të fillojmë transmetimet e plota.
Po u jap përgjigje disa shqetësimeve të përbashkëta, duke i grupuar në të njëjtën pikë.
Kuptohet, ka mungesa të sinjalit të RTSH-së në transmetimet analoge në shumë zona. Kjo
sepse, e kam theksuar edhe herë të tjera këtu, repetitorët e RTSH-së, një numër i madh prej 300
repetitorësh, nuk ishin në varësi të Radiotelevizionit Shqiptar, por në varësi të pushtetit vendor.
Pushteti vendor caktonte njerëz, të cilët kujdeseshin për këto apo bënte pagesën e energjisë
elektrike.
19
Pasi ndryshoi sistemi i ndarjes administrative, kur nga komuna u kalua në bashki të
mëdha, shumë repetitorë mbetën pa zot. Nuk u mor ndonjë vendim se kush i kishte nën
kujdesje, nuk u paguan faturat e energjisë elektrike, nuk u paguan njerëzit që kujdeseshin për
to e të tjera. RTSH-ja ka bërë të pamundurën që të mbajë gjallë transmetimet analoge, por
njëkohësisht, po ju them se ka të pamundur, sepse është edhe inefektive, të investojë në
riparimin e transmetimeve me analog, për shkak se brenda dy-tre muajsh do të fillojnë
transmetimet numerike dhe ato do të fiken.
Kështu, nëse deri më sot kemi pasur ankesa në zona të caktuara, prapëseprapë po u
them se gjatë vitit të kaluar është bërë një punë shumë e madhe për shtirjen e sinjalit analog në
gjithë Shqipërinë dhe përmirësimin e tij.
Sot transmetimet analoge në të gjitha zonat ku kemi ndërhyrë janë të mira, por ato e
kanë jetën jo më shumë se 2-3 muaj, se ato do të fiken dhe të fillojnë transmetimet. Kështu që
unë besoj se i jap përgjigje pyetjes suaj, që unë e them me rezervë, duke mos shprehur shumë
optimizëm, deri në fund të vitit projekti i digjitalizimit mbaron, sepse ne do ta mbarojmë
përpara këtë projekt. Në gusht apo në shtator ka marrë fund ajo histori. Gjithë Shqipëria do të
ketë sinjal të pastër digjital.
Besoj se i dhashë përgjigje kështu edhe pyetjes së profesor Rrokajt, se ku qëndrojmë
me problemet e digjitalizimit.
Profesor Rrokaj pyet se si qëndron problemi me transmetimet me regji të dedikuara?
RTSH-ja e ka bërë të qartë se ne nuk pranojmë materiale të gatshme. Iu kemi dërguar
materiale të shkruara qeverisë, partive politike etj., që ata mund të bëjnë transmetime me regji
të dedikuara sa të duan, po ne kemi gazetarët tanë që mbulojnë lajmet, kur e shikojnë redaksitë
të arsyeshme se këto do t’i mbulojnë.
U vumë në vështirësi vitin e kaluar, kur sinjali i RTSH-së, që pasqyron punimet e
Kuvendit, nuk u dha falas për televizionet private dhe u bë gjithë ajo zhurmë e madhe në
Kuvend, kur ne nuk kërkojmë pagesë, por kërkojmë që të respektohet logoja e RTSH-së. Të
gjitha kanalet private ta marrin sinjalin falas, s’ka problem fare, por të jetë nën logon e RTSH-
Kuvend. Se si punojnë zyrat e shtypit të qeverisë apo të partive politike me regji të dedikuara
apo jo, kjo është punë e tyre. Ne nuk kemi punë me ta. Të gjitha materialet që transmetojmë
në RTSH janë prodhime të RTSH-së.
Në lidhje me besimin dhe paanshmërinë, prapë nga profesor Rrokaj.
Sfida më e madhe që ka pasur RTSH-ja gjatë kohës që unë kam qenë drejtor, dy vjet,
ka qenë sfida e reputacionit. RTSH-ja ka pasur një reputacion të shkatërruar në popull, ku të
gjithë pa përjashtim thoshin se ne nuk e hapim televizionin, e paguajmë kot taksën. Tani
20
rezultat i kujt ishte ky dëmtim kaq i rëndë i reputacionit, unë nuk kam ndër mend ta zgjas këtu.
Kuptohet që arsyeja kryesore se pse RTSH-ja ishte në këtë gjendje, është se RTSH-ja ishte
kthyer në një mjet propagandistik të qeverive të radhës. Thjesht bënte kronikën e qeverive, të
ministrave, të politikës së partisë në pushtet, cilado qoftë ajo e të tjera. Kjo e kishte rrënuar
reputacionin e televizionit publik si një zë qeveritar që ishte një zë i maxhorancës kundër
opozitës në vazhdimësi.
Kuptohet që e nisëm një punë që nuk kishte të bënte me vullnetin thjesht të individëve
që punojnë dhe drejtojnë RTSH-në sot, por duke miratuar disa dokumente bazë siç janë parimet
territoriale, të cilat janë të detyrueshme për zbatim, jo vetëm për gazetarët, operatorët,
kameramanët e të tjerë, por për të gjithë punonjësit, qoftë drejtorin e përgjithshëm e të tjerë,
që të mos bëjë siç ka qejf ai apo si ia thotë mendja atij, por të bëhet sipas disa parimeve të
shkruara, që nuk ka njeri në dorë t’i ndryshojë. Kjo ka sjellë pa diskutim rritjen e besimit, ka
sjellë rritjen e shikueshmërisë dhe ka sjellë edhe rritjen e paanshmërisë të programeve të
TVSH-së dhe të Radios në publik.
Për problemin e detyrimeve ndaj të tretëve do t’ia lë fjalën Pandit, kryetari të Bordit të
Administrimit.
Pandi Madhi – Lidhur me problemin e debitorëve në RTSH për të gjithë ato subjekte
që nuk janë treguar korrekte në zbatimin e kontratave për shërbimin e ofruar, kanë filluar
menjëherë procedurat gjyqësore. Pozitiv është fakti që të gjitha proceset gjyqësore janë fituar
nga ana e RTSH-së dhe shumë prej këtyre detyrimeve janë arkëtuar. Një pjesë e këtyre
detyrimeve janë bërë edhe me kontrata këmbimi me subjekte të caktuara, për arsye të
problemeve financiare që kanë pasur, por që është shlyer pjesa e detyrimit që ato kanë pasur
ndaj RTSH-së. Ka akoma subjekte që janë në vijim të procedurave gjyqësore për arsye të
moszbatimit të detyrimeve kontraktore, por ka edhe pak subjekte, mbi 20 vjet më parë, me të
cilat janë fituar proceset gjyqësore, por që nuk ju gjendet adresa për arsye se ndonjë prej tyre
edhe është mbyllur fare, ndonjë edhe ka humbur dhe gjykata nuk e gjen dot. Po ashtu, edhe nga
ana e RTSH-së është e pamundur të gjenden këto subjekte, të cilat janë shumë pak, 4 subjekte.
TV Arbëria, për shembull, është një nga këto që nuk ekziston më.
Përgjithësisht, gjërat kanë ardhur duke u përmirësuar. Detyrimet debitore janë në ulje
nga viti në vit. Përgjithësisht detyrime të reja nuk ka pasur.
Faleminderit!
Thoma Gëllçi - Pyetja e zotit Fidel për kanalin RTSH 24. Kemi nxjerrë siglën, por nuk
kemi filluar transmetimet. Jemi duke punuar dhe shumë shpejt do të dalë kanali. Do të ketë 24
orë lajme. Besoj se për një muaj do të jetë afati përfundimtar.
21
Vërejtja për web-in është e drejtë. Ne jemi duke bërë një web të ri, që është shumë më
aktiv. Shpejt do të mbarojë edhe kjo punë, por jemi mbrapa. Kemi hapur një faqe të dedikuar
për Botërorin, për sportin. Mund ta gjeni në sportrtsh.al, por akoma po punohet dhe punë orësh,
punë ditësh do të bëhet aktiv.
Në lidhje me pyetjen se a mund të marrim ne gazetarë me pagesa më të mira, mund t’ju
them se po, ne kemi hapësirën ligjore që me anë të projekteve të rekrutojmë gazetarë që
paguhen më mirë se të tjerët dhe e kemi aplikuar. Kuptohet se konkurrenca në emisionet
politike është e lartë, por kemi filluar përpjekjet dhe po bëjmë dy emisione politike.
Unë kam shumë besim se emisionet do të ngrihen, do të kenë më shumë interes, por
nuk mund të mbetemi në 2-3 figura, të cilat kanë bërë emër në televizionet private dhe e kanë
audiencën e tyre të krijuar me punë. Kjo është punë konkurrence dhe ne do të krijojmë figurat
tona të reja, që të konkurrojnë me figurat e tyre, por hapësirën për të marrë një, dy apo tre
gazetarë me pagesa më ekstra, e kemi, se hapësira ligjore na e lejon.
Ne nuk kemi bërë ndonjë reformë pagash në RTSH dhe kjo për arsye sepse reforma e
pagave është një gjë që ka të bëjë me lëvizje njerëzish apo me shkurtime. Atje ku janë për t’u
bërë shkurtime, sigurisht që janë bërë dhe do të bëhen, por kuptohet që edhe shkurtimet në
RTSH nuk janë si në vendet e tjera, por janë më shumë kosto, sepse ne i paguajmë të gjitha
detyrimet që rrjedhin në bazë të Kodit të Punës. Për shembull, në qoftë se u mbyllën
transmetimet me valë të shkurtra në stacionet e Fllakës dhe të Shijakut, aty punonin rreth 50
punonjës teknikë, të cilët kishin rreth 30-40 vjet punë në RTSH dhe për të gjitha këto RTSH-
ja ishte e detyruar dhe ua kreu pagesat që u takonin, 20 rroga mujore, vjetërsinë e punës e të
tjera. Kështu që, bëmë një reformë shkurtimesh, jo si qëllim në vetvete, por ristrukturime dhe
kjo është një reformë me kosto të madhe financiare për ristrukturimet e të tjera. Edhe kjo është
një reformë me kosto të madhe financiare për ne. Ne nuk e kemi atë luks, hëpërhë, që të bëjmë
një politikë tjetër pagash.
Për kanalin e Kuvendit, që është hapur, kuptohet hëpërhë vetëm për transmetime e
seancave plenare, në administratën e Kuvendit ka filluar puna, sepse duhet një infrastrukturë
me kamera dhe regji. Ne i kemi kërkuar një ambient administratës së Kuvendit se ku do të
vendosim regjinë, se nuk mund të vendosim një autobus përditë, se kemi dhe punë të tjera. Aq
mjete kemi. Pra, të kemi lidhje me sistemin e kamerave që janë këtu ku zhvillohen punimet e
komisioneve etj. Dhe ata vetë thonë që nuk janë shumë të qartë vetë se ku do të shkojë kjo, ku
do të shkojë ajo, se ka projekte për ndryshim këtu. Por po punojmë bashkë me administratën e
Kuvendit. Kuptohet, synimi është që kanali i Kuvendit të jetë një kanal me program 24 orë
22
qoftë nga arkiva, qoftë nga punimet direkte, qoftë nga emisionet tematike, por kjo do të bëhet
gradualisht.
Kanali sportiv. Ne jemi krenarë për kanalin sportiv që kemi bërë. Kuptohet jo thjesht
se kemi ekskluzivitetet më të mëdha të botës. Mund të jetë kanali më i mirë sportiv në Europë
për ato që ofron, kampionatet botërore apo europiane. Nga të gjitha sportet arritja më e madhe
ishte për Formula uno që e firmosëm dje. Ne e kemi Europa League, e transmetojmë atë, kemi
lidhur kontratën edhe për vitet e ardhshme për Europa League. Jemi në diskutime për
Champions League. Jemi ekskluzivë në Botërorin e Moskës, që do të bëhet tani. Jemi
ekskluzivë në Botërorin e Katarit që do të bëhet 5 vjet më vonë. Kemi siguruar të gjitha ndeshjet
e Kombëtares Shqiptare për 4 vjetët e ardhshme. Kemi siguruar të gjitha ndeshjet e Kampionatit
Europian të ardhshëm, shumë sporte të tjera, si: tenis, çiklizëm, not, atletikë.
Por kjo është njëra anë. Ana tjetër është që kanali i sportit u është futur sporteve
shqiptare, sporteve të cilat nuk janë aq të pëlqyera, me shumë spektatorë. Për shembull, ne
transmetojmë direkt Kampionatin e Mundjes, Kampionatin e Peshëngritjes, transmetojmë
direkt ndeshjet e volejbollit, të basketbollit për meshkuj dhe femra. Ne transmetojmë
kampionatin e kategorisë së parë në futboll, por dhe futbollin e femrave. Për këtë kemi marrë
vlerësime shumë pozitive nga drejtuesit e federatave apo nga ata që merren me sport, si trajnerë
etj.
Ne mendojmë se kjo i ka shërbyer rritjes së seriozitetit të sportit. Ndryshe është kur
luhet një ndeshje në një fushë të shkatërruar gjithë baltë, ku luhet kampionati i kategorisë së
parë të futbollit, ndryshe bëhet kur kjo ndeshje, pavarësisht fushës së shkatërruar dhe me baltë,
transmetohet në një televizion kombëtar, ku edhe arbitri dhe lojtarët kanë një seriozitet më të
madh në fushë.
Për taksën e aparatit ne kemi hedhur këtu në raport një mendim për tarifën e aparatit
televiziv. Kuptohet që tarifa e aparatit televiziv që paguhet është shumë e ulët. Është më e ulëta
në Europë dhe nuk i përgjigjet fare nivelit të transmetimeve të sotme të RTSH-së. Kuptohet që
ajo paguhet për çdo familje, jo për televizorët. E ka ligji për abonentët familjarë ku paguhet
vetëm për një aparat. Dhe të kesh 20 aparate, do të paguash vetëm për një aparat. Ne mendojmë
se kjo taksë, që është e ardhura kryesore e RTSH-së, është bazamenti i pavarësisë së RTSH-së.
Në qoftë se ne nuk do të kërkojmë që kjo taksë të shtohet, por do të kërkojmë që të shtohen
financimet buxhetore, ne, në të njëjtën kohë, kërkojmë që të vëmë veten edhe nën varësinë e
buxhetit të qeverisë dhe të qeverive që do të vijnë. Taksa e aparatit, pavarësisht se fjala taksë
tingëllon e ashpër, kjo taksë është garancia më e madhe e pavarësisë së RTSH-së. RTSH-ja
23
është pronë e publikut. Çdo shqiptar është aksioner në këtë ndërmarrje të madhe dhe kështu
duhet kuptuar.
Por publiku me të drejtë deri më sot nuk ka qenë i bindur që taksa që ai ka paguar, qoftë
ajo taksë simbolike, të shkonte në drejtimin e duhur. Ajo shkonte për propagandën e njërit
krah kundër krahut tjetër. Sfida jonë është që publiku ta miratojë taksën, ta miratojë me mendje
dhe me zemër edhe shtimin e taksës. Ne nuk kemi kërkuar në raport ndonjë shtim, por kemi
bërë një pasqyrë të gjendjes. Taksa e aparatit nuk është e mjaftueshme për veprimtarinë e
RTSH-së, sepse vetëm shpenzimet për mbajtjen në këmbë të rrjetit të digjitalizimit dhe pagesa
e kredisë që është ngarkuar RTSH-ja është pothuajse sa taksa që mblidhet. Në qoftë se këtu do
të llogarisim edhe shpenzimet për karburant, energji elektrike, shërbimin e sigurisë dhe të
mirëmbajtjes, apo shërbimin e transmetimit të fm-ve etj. E dimë që ky rrjet nuk i shërben vetëm
RTSH-së, sepse gjysma e këtij rrjeti u shërben kanaleve të tjera private. Ky do të jetë një
vendim, një diskutim që do t’ju vijë patjetër në të ardhmen.
Herë pas here ngrihet problemi i audiencës, se sa përqind në audiencën shqiptare zë
paketa e programeve të RTSH-së. Për fat të keq unë nuk kam përgjigje për këtë gjë, sepse nuk
kemi matje të sakta të audiencës në Shqipëri. Matjet që bëhen nga dy kompani private janë
komplet të kundërta nga njëra-tjetra dhe nuk janë kredibël për ne. Ne mendojmë që nuk janë
të sakta.
RTSH-ja po punon për një projekt të matjes së audiencës jo për propagandë, por për të
parë impaktin që programet tona kanë në publik, që në bazë të tyre të ndërtojmë punën se cili
program duhet të vazhdojë, cili program duhet të ndërpritet, çfarë duhet të rregullojmë etj.
Sigurisht që RTSH-ja vuan nga pirateria, por zyra juridike e RTSH-së ka gati çdo ditë ankesa,
letra, në lidhje me programet, prodhime të RTSH-së në vite, dhe që keqpërdoren pa të drejtë
nga televizione të tjera private. Kuptohet që ky fenomen ka ardhur duke u zvogëluar, sepse i
kemi qëndruar në kokë problemit. Çfarëdolloj sinjali që vjen në RTSH, në çfarëdolloj forme, e
gjen ankimimin tek AMA dhe letra paralajmëruese për gjykatat. Një zyrë e posaçme e RTSH-
së merret me mbrojtjen e të drejtës së autorit, e cila respektohet...
Milva Ekonomi – Unë kam përshtypjen se pyetja që bëri Bujari nuk lidhej me këtë lloj
piraterie. Ajo lidhej me faktin që brenda sistemit tuaj, gjërat dalin...
Thoma Gëllçi – Nuk kemi shkuar te pyetja e Bujarit. Kjo është pyetja e Ismetit. As
nuk bëhet fjalë të dalë nga RTSH-ja...
Milva Ekonomi – Është bërë, por mbase nuk do të bëhet më. Janë gjetur mjetet që të
mos bëhet.
24
Thoma Gëllçi – Unë po flas për sot. As që bëhet fjalë se mund të dalë qoftë edhe një
...
…Protokolle të sakta të përcaktuara dhe të shkruara qartë. Se kësaj s’i kalon nga një
type në file dhe si do të punohet me këtë file. Kush e menaxhon file-n? Prandaj kemi ndërtuar
edhe infrastrukturën e duhur, sistemin e duhur të mbrojtjes të të drejtave. Ajo punë që po bëjmë
e bën 100% të pamundur vjedhjen e pasurisë intelektuale të RTSH-së nga të tretët.
Trajnimet. Ne kemi nevojë për trajnime dhe për kualifikime të vazhdueshme. Në raport
ne kemi theksuar që për herë të parë e gjithë teknologjia e re që blihet, blihet bashkë me
trajnimin. Pra, jo thjesht ta mbajmë dhe të mos e përdorim, dhe të mbetet në ndonjë qoshe.
Bëhen trajnimet, sidomos trajnimet teknike. Por në RTSH ka mungesa të theksuara të
kualifikimit, sidomos të personelit teknik, i cili është i vjetër dhe nuk ka pasur mundësi të
kualifikohet me teknologjitë e reja, se ato nuk kishin hyrë në Shqipëri. Ne e kemi shumë të
vështirë ta kualifikojmë ose nuk ia vlen t’i futemi kualifikimit për një njeri që del për një
muaj, për një vit, apo dy vjet në pension.
Për shembull: kishim disa trajnime në Kinë dhe njëra nga kërkesat vinte nga një person
që punon në RTSH, i cili pas 6 muajsh del në pension. Sigurisht që ai njeri nuk do të dërgohet
për kualifikim, por ne duhet të dërgojmë të rinjtë.
Në strukturën organike kemi edhe akademinë e Radiotelevizionit Shqiptar, e cila ende
nuk është strukturuar me një program të saktë akademik të trajnimeve dhe kualifikimeve. Janë
bërë hapa të rëndësishëm në këtë drejtim, duke ardhur disa herë, për disa javë, një përfaqësues
nga Akademia e Bashkimit të Transmetuesve Europianë, i cili pasi ka bërë shumë intervista e
takime, ka nxjerrë nevojat për trajnime. Tashmë e kemi një platformë të qartë se si do të
funksionojë akademia e RTSH-së, por ende nuk jemi në pikën që kemi filluar punë në mënyrë
të plotë me akademinë, por sigurisht trajnime janë bërë dhe vazhdojnë të bëhen çdo ditë. Kemi
marrë trajnime qoftë në fushën e financave, në fushën e teknikës, në fushën e kameramanëve,
regjisorëve dhe në fushën e gazetarëve, por ende nuk e kemi filluar me një program të qartë
akademik. Plani është ndërtimi i një akademie të rregullt për t’u njohur të gjithë gazetarët me
teknologjitë e reja të transmetimit, të cilat ndryshojnë vazhdimisht.
Besoj se pyetjeve për piraterinë dhe zonave me mungesë sinjali, u jam përgjigjur.
Zoti Ulqini ngriti dy probleme shumë të rëndësishme: problemi i dekoderave dhe
problemi i tarifës së përdorimit të aparatit televiziv.
Për tarifën folëm, po sqaroj punën e dekoderave: vazhdimisht kemi informuar edhe
Kuvendin, edhe qeverinë, që transmetimet e reja digjitale nuk kanë infrastrukturën e duhur
marrëse nga populli, sepse aparatet marrëse janë të vjetra dhe kanë nevojë për përshtatës që
25
sinjali të merret, kështu që rreth 80% e aparateve televizive në Shqipëri do të duhet të pajisen
me dekodera. Kuptohet, një punë është bërë, dekoderi i Digjitalbit, i Tringut dhe dekodera që
shiten në rrjete, plotësojnë një pjesë të nevojave të marrësave digjitalë, por prapë këto janë të
pamjaftueshme. Ky problem e bëri AMA-n që ta ndryshonte strategjinë e fikjes së analogut në
Tiranë dhe të vazhdonin me fikjen e analogut në Berat, Korçë dhe Fier, së fundi, dhe duke
kaluar në Tiranë, që tregu të pajisej me dekodera, sepse as në treg nuk kishte. RTSH-ja nuk
qëndroi mbrapa në këtë drejtim, pavarësisht se nuk gjeti mbështetje me fonde as nga qeveria
dhe as nga Kuvendi, sepse janë fonde shumë të mëdha. Mendimi ynë ishte që çdo familjeje t’i
jepej një dekoder, por ato janë fonde shumë të mëdha. Ne kemi përgatitur dekoderin tonë të
brand-uar me RTSH-në, i cili po prodhohet dhe do të dalë me një çmim të prodhimit në kosto.
Kuptohet që këtë nuk e kemi bërë vetë, sepse nuk kishim fonde, por me vendim të Këshillit
Drejtues dhe me propozim të Drejtorisë së Përgjithshme, janë përdorur lidhje me kompani
private që shesin dekodera. Ata kanë pranuar që të brand-ojnë dekoderin dhe do të jetë me
kosto shumë më të ulët sesa dekoderat që janë sot në treg.
Për rreth një muaj, dekoderi i bukur i RTSH-së do të jetë në treg.
(Diskutim pa mikrofon.)
Qeveria ka menduar për njerëz në nevojë dhe u shpërndau atyre 84 mijë dekodera.
Milva Ekonomi - Ajo që përpiqesha të shikoja ishte që ne kemi një numër familjesh
që shkon rreth 760-765 mijë në vend.
Thoma Gëllçi - Një milion familje që paguajnë tarifën.
Milva Ekonomi - Janë familje dhe biznese, sepse numri i familjeve është edhe nga
regjistrimi i popullsisë. Nga këto, 80 mijë i keni të mbuluara me dekoderat që jepen nëpërmjet
ndihmës ekonomike dhe pjesa tjetër vjen nga ata që kanë të ardhura mbi mesataren. Ngelet një
marzh i vogël që nuk e dimë se sa është. E dimë sa është ky marzh i atyre që kanë nevojë të
mbulohen me dekodera? Si e ndërmorët këtë iniciativë që të prodhonit dekodera, duke mos e
ditur marzhin e familjeve që kanë nevojë?
Thoma Gëllçi - Ne nuk po vemë në familjet që kanë nevojë.
Milva Ekonomi - Jo, jo, familjeve që kanë nevojë për dekodera për të kaluar nga një
platformë te tjetra!
Thoma Gëllçi - Kemi bërë studim.
Milva Ekonomi – Sa është numri i nevojës?
Thoma Gëllçi - Numri i nevojës vetëm për alokmentin e Tiranës dhe të Fierit është
rreth 500 mijë.
(Diskutim pa mikrofon.)
26
Kur filluam punë, kemi gjetur shumë projekte të shkruara për digjitalizimin e arkivit, i
cili është një vlerë e kulturës kombëtare etj., etj., të gjitha këto projekte janë para. Shifrat
variojnë në 10-15 milionë euro, që arkivi të digjitalizohet. Ka pasur propozime nga kompani si
“SONY” etj.. Duke pasur parasysh gjithmonë shifrat e mëdha me kompanitë e mëdha, me
shpresë se dikush do të vinte t’i paguante një ditë, arkivi i RTSH-së edhe sot ka mbetur në
gjendjen që ka qenë dikur, i padigjitalizuar dhe i papërdorshëm për transmetimet e reja; në
pjesën më të madhe këtë vit ka qenë 98%.
Gjithashtu, arkivi i RTSH-së vuan edhe nga diçka tjetër, nuk ka një sistem të arkivimit
të materialeve të reja të produktit të sotëm. Mirë ai që është prodhuar dikur, që e kemi në kaseta
të formateve të ndryshme, por ky që bëjmë sot... Problemi nuk ishte i disa projekteve të firmave
të mëdha, me emra të mëdhenj e me shumë para, por është një problem i brendshëm i RTSH-
së. Nuk është e mjaftueshme që një material i vjetër në film, në bet, në bosch apo çfarë janë ato
formatet, të kthehet në file, sepse ai file, që të bëhet i dobishëm për RTSH-në, duhet të arkivohet
në një sistem që njeriu ta gjejë dhe ta përdorë. Kjo duhet parë frame pas frame duke i shënuar
në atë time/kohë, meta date-t e duhura të bërjes së një arkivi të përdorshëm. Prandaj, pavarësisht
mungesës së parave, kemi nisur punën në dy drejtime:
1) Përmirësimin e kushteve fizike të mbajtjes së arkivit të vjetër që të mos prishet,
derisa të kalojë procesin e digjitalizimit, sepse kushtet e arkivit janë pothuajse në gjendje
skandaloze nga ana e ajrimit, kondicionimit, temperaturave, lagështisë, etj.. Për fat të mirë,
gjendja aktuale e arkivit nuk është e keqe, pavarësisht dëmtimeve të vogla.
2) Ndërtimi i infrastrukturës së duhur për digjitalizimin e arkivit.
Vitin e kaluar vumë fonde dhe ndërtuam data center dhe blemë sistem arkivi digjital, i
cili bën të mundur që tashmë të jemi të gatshëm të presim edhe materialin e ri të arkivit, edhe
materialin e vjetër.
Me përkrahjen e prezencës së OSBE-së në Shqipëri, kemi bërë disa takime me
televizionin slloven dhe kemi vendosur një partneritet strategjik me ta, sidomos në fushën e
arkivit. Ata kanë të njëjtën histori si ne, janë një televizion që vjen nga një sistem si yni, por
janë më përpara se ne në këtë fushë. Ne nuk kemi pse shpikim rrugë të reja, por do të ndjekim
shembullin slloven të digjitalizimit të arkivit. Deri tani kanë ardhur dy ekipe me specialistë
sllovenë, që kanë studiuar arkivin tonë. Ekipet e teknikëve tanë të inxhinierëve kanë shkuar në
slloveni. Janë bërë investimet e duhura në infrastrukturën pritëse të arkivit. Tashmë do të na
duhet të blejmë pajisje, të cilat bëjnë skanimin e materialeve. Një pajisje të tillë, film skaner,
do ta blejmë këtë vit dhe do të fillojmë zbardhjen e arkivit, jo vetëm zbardhjen e tij nga tape
në file, apo nga film në file, por edhe zbardhjen frame mbas frame të arkivit, që ai të jetë i
27
përdorshëm për RTSH-në, jo thjesht për prodhimet e saj të reja, por edhe për publikun, sepse
siç e kam shkruar edhe në raport, në rrjetin tonë të OTT-së një vend të rëndësishëm zë arkivi
që kushdo mund të aksesojë; me para apo pa para, kjo është një çështje që do të zgjidhet në të
ardhmen kur të bëhet kjo punë, nëpërmjet aparaturave të zgjuara, dekoderave, internetit dhe
celularëve në platformat e OTT-së.
Nuk e di nëse isha i qartë për arkivin?
Për sa i përket buxhetit në rritje, përpara se t’ia jap fjalën Pandit, që është specialist
shumë i mirë për këtë fushë, dua t’ju them diçka. Po në vitin 2017 struktura buxhetore ndryshoi
pak nga investimet në teknologji që bëri qeveria, e cila na ka dhënë një ndihmë me 200 milionë
lekë më tepër se çdo vit tjetër vitin e kaluar, por për fat të keq zgjati vetëm një vit, pasi këtë vit
jemi prapë në gjendjen ku ishim më përpara, edhe më keq...
Milva Ekonomi – Është herët, nuk ka mbaruar viti akoma...
Thoma Gëllçi – Shpresojmë.
Pandi, ke ndonjë gjë?
Pandi Madhi - Ju e thatë, drejtor, por viti 2018 për arsye të pakësimit të mbështetjes
buxhetore për 200 milionë lekë, edhe buxheti i RTSH-së dhe të ardhurat që do të realizohen
gjithsej, qoftë me financim buxhetor, qoftë nga vetë RTSH-ja, janë me një zbritje të ulët ndaj
vitit 2017, por shpresojmë të rikuperojmë sa të jetë e mundur dhe ecuria të jetë normale.
Jemi në proces analizash, si dhe në një moment mjaft të rëndësishëm, sepse ka filluar
puna për hartimin e planit të biznesit, është hera e parë që hartohet, ndoshta jo vetëm, por nga
të gjitha mediet në Shqipëri në përgjithësi, në procesin e përgatitjes, kështu që kemi përcaktuar
afatet konkrete, për të cilat ju do të informoheni në vijimësi.
Faleminderit!
Milva Ekonomi – Fjalën e ka kërkuar profesor Rrokaj, dhe besoj se do të jetë e fundit.
Sezai Rrokaj – Mendoj që në përfundim të gjithçkaje që u prezantua, si dhe nga pyetjet,
në këndvështrimin tim mund të nxjerrim dy lajme për shqiptarët.
Lajmi i parë, në fund të vitit me kalimin nga analogë në numerikë do të kemi një
hapësirë të mbuluar të zonave të mbulimit me sinjalin e RTSH-së dhe për këtë, natyrisht, nuk
më mbetet gjë tjetër veçse t’ju përgëzoj.
Lajmi i dytë që mund t’u themi shqiptarëve është taksa, e cila propozohet të rritet apo
studimi që ka ardhur, ku mendohet vënia e taksës; aty thuhet për frymë sipas studimit për
familje dhe besoj se në morinë e taksave të rritura kjo nuk ka për t’u mirëpritur. Pra, nuk ka për
t’u mirëpritur, sepse shqiptarët e paguajnë një taksë dhe ky është televizion public, dhe besoj
se edhe në morinë e paketave që shiten sot apo edhe të dekoderave, që gjoja jepen për ndihmë
28
dhe më pas familjet detyrohen të blejnë paketat përherë, kështu që ata nuk e çojnë deri në fund,
sepse po ta çonin deri në fund dekoderin dhe paketën me të vërtetë do të ishte ndihmë, por ata
japin një gjë dhe më pas u varin litarin në fyt, që njerëzit të bëhen të varur nga kjo. Këto janë
dy gjëra që nuk shkojnë me njëra-tjetrën, prandaj po ju them se boll kanë paguar taksa dhe
tarifa shqiptarët.
Gjithashtu, modelet që na sillen, e kuptoj që drejtori bën punën e tij dhe ka vizionin e
tij se si RTSH-ja të ecë mirë, por ne këtu jemi në politikë, zoti drejtor, kështu që ju bëni punën
tuaj dhe ne bëjmë punën tonë.
Ajo që më shqetëson mua janë modelet që na sillen, siç është modeli i tarifës apo taksës
siç u quajt për Rrugën e Kombit, ku na thuhet se në Europën Juglindore është më shtrenjtë, por
në Europën Juglindore nuk ka raste si Shqipëria që rruga të jetë e vetmja mundësi për të kaluar
banorët e Kukësit, të Hasit, të Tropojës e kështu me radhë. Pra, në të gjitha vendet e Europës
atje ku vihet një taksë për rrugën, për banorët ka një rrugë dytësore apo siç quhet në disa
terminologji superstradë, ku banorët kalojnë me kohë të zgjatur, por e kanë një mundësi kalimi.
Modelet që na vijnë ne se si i ka Europa janë shumë të mira, por ne duhet t’i bëjmë gjithmonë
pyetje vetes: a jemi ne shqiptarët si gjithë Europa? Sigurisht duam të bëhemi si gjithë Europa,
por nuk jemi si gjithë Europa, sepse po jua them se ka probleme shumë të mëdha me varfërinë
në Shqipëri. Pagat në Shqipëri janë më të ulëtat në rajon dhe këto janë statistika që i kanë dhënë
organizmat e tjerë dhe nuk dua të ndalem në këtë gjë.
Do t’ju lutesha shumë, pasi e di që ju e keni vetë shqetësim dhe e keni sjellë si një
propozim, si një ide, si një studim, por merreni me qetësi, me këmbë në tokë për të mos ndërtuar
kështjella, të cilat janë të bukura, por kur vendosen në rërë ato fundosen. Kështu që mua kjo
gjë sapo e pashë nuk më tingëlloi mirë, pasi edhe zoti Ulqini e tha edhe vetë që kjo do të ketë
një tingëllim politik...
(Diskutime pa mikrofon.)
Unë nuk po them të pavërteta, pasi në raport propozohet një studim, ku mendohet...
Milva Ekonomi – Më falni profesor Rrokaj...
Sezai Rrokaj – Të lutem, të mbaroj unë...
Milva Ekonomi – Duhet të hapni raportin në faqen 28 dhe të shihni referencën që jeni
duke bërë dhe pastaj e diskutojmë.
Sezai Rrokaj – Shqiptarëve sot u bëhet një propozim për...
Milva Ekonomi – Ky nuk është lajm, nuk është fare..
Sezai Rrokaj - ... sipas të cilit...
Milva Ekonomi - ... nuk është kjo, prandaj po ju them lexoni faqen 28.
29
Sezai Rrokaj – Televizioni Shqiptar merr taksën e duhur nga banorët për të kryer një
shërbim digjital të përsosur e kështu me radhë. Unë po ju them që nuk është lajm i mirë as ideja
dhe as kjo që u tha.
Së dyti, dua t’ju them një gjë shumë të rëndësishme për një televizion publik në
këndvështrimin tim, por jo vetëm. Televizioni publik duhet të shquhet nga antikoformizmi në
të mirë të së drejtës publike për informim dhe të mbrojtjes të së drejtës publike. Pra, televizioni
publik, siç e tha edhe drejtori, gjithmonë ka qenë në trysni dhe është, edhe për shkak të
buxheteve që ai merr nga qeverisjet, është nën trysninë e qeverisjeve. Mua do të më vinte keq
që ne të mos ishim kaq realist, sa përtej sheqerosjeve të mendojmë se ky televizion sot ka
shpëtuar nga ndikimi i qeverisjes, nuk do ta besoja. Nuk është mirë që për hir të ndershmërisë
dhe të transparencës ndaj publikut të jemi më realist në këto çështje. Do të më vinte mire, për
shembull, në qoftë se televizioni publik do të ballafaqohej me tematika shumë të rëndësishme
publike, si: përse po largohen në mënyrë masive qytetarët shqiptarë? Pse po e braktisin vendin?
Pse të rinjtë nuk kanë besim tek e ardhmja këtu? Si ballafaqohemi ne me problemet e drogës
në shkolla dhe të drogës në tërësi, me problemet e korrupsionit, me problemet e varfërisë dhe
probleme të tjera sociale që lidhen me taksat që janë shtuar? Si i presim? Si matet nga
televizioni publik perceptimi i publikut?
Pra, në qoftë se duam të bëjmë një televizion publik që i sheh në sy problemet, në qoftë
se duhet të bëjmë një televizion publik, jam dakord me të gjitha arritjet dhe sukseset dhe ju
përgëzoj për këto që keni bërë. Unë nuk jam nga ata që mohoj dhe dua të kritikoj, ju keni arritur
shumë gjëra të mira, por them se ia vlen që tematika si varfëria në Shqipëri, pabarazia që po
krijohet, polarizimi që po krijohet sipas statistikave të Bankës Botërore...
(Diskutime pa mikrofon.)
I kam lexuar.
Pra, sipas aftësisë për konsum që kanë familjet shqiptare, ku një pjese aftësia për
konsum u është rritur disa herë, ndërsa 90% e popullsisë nuk e ka. Ndoshta këto që jam duke
ju thënë, mund të tingëllojnë edhe si kritika, por kjo gjë mua më dhemb dhe mendoj se duhet
t’u dhemb të gjithëve, por mendoj që një televizion publik në Shqipëri duhet të ballafaqohet
edhe me problemet e keqqeverisjes, sepse është mbrojtësi i publikut, jo i qeverisë dhe i partive.
Për sa kohë është mbrojtësi i publikut, duhet ta mbrojë atë dhe të jetë avokat i popullit në
mbrojtjen e kauzave të tij. Kauzat e popullit janë braktisja, shërbimi shëndetësor, kanë apo nuk
kanë probleme njerëzit, janë koncesionet e të tjerë.
Milva Ekonomi – Profesor, këto janë kauzat tuaja politike, por nuk do të thotë se janë
kauzat e popullit.
30
Sezai Rrokaj – Unë ju mirëkuptoj në këtë që ju po thoni, e nderuar kolege dhe
drejtuese e seancës, e respektuar, por mendoj se edhe populli opozitar përsëri popull është dhe
e meriton vëmendjen e atij televizioni. Kështu që politikë në ajër nuk ka, parti politike në ajër
nuk di që të ketë. Ka një testim që bëhet në fushata elektorale, ku thuhet se kaq keni ju, kaq
kemi ne, ju keni më shumë popull sesa kemi ne, por mos na thoni që ne nuk kemi popull. Mbase
këta që ishin të detyruar të iknin mund të jenë populli ynë, por mendoj që të mos bëjmë politikë.
Ju nuk mund të na thoni neve se në vitet 2015-2017 në Europë nuk kanë kërkuar azil
132 mijë shqiptarë. Pra, kjo problematikë është edhe përtej revolucionarizimeve, ecjeve para,
këto janë kauza, që duhet t’i shikojmë jo për fajësuar maxhorancën apo për të ngritur opozitën,
por sepse janë probleme të shqiptarëve. Pra, duke i parë këto kauza, mund të gjejmë zgjidhje
më të mira se sa duke i anashkaluar. Ky është mendimi im, sepse po i anashkaluam dhe nëse
nuk do t’i shikojmë këto kauza, sigurisht do të kalojnë ditët, do të vij një e nesërme, ndoshta
më e mirë për çdo qeveri, por jo aq e mirë.
Unë jam plotësisht dakord me të gjitha hapat e mira që keni hedhur, nuk do të lëviz
asnjë presje nga këto që thashë, por unë jam pjesëtar në politikë dhe më duhet ta bëj politikën
ashtu siç mendoj se duhet të jetë.
Së treti, e bëra në formë pyetjeje, është kauza e integrimit. Unë përfaqësoj një forcë
politike me emrin Lëvizja Socialiste për Integrim. Sipas njohurive që unë kam, mendoj se
shqiptarët kanë një problem.
Shqiptarët, përveç faktit kur u liberalizuan vizat dhe faktit kur u pranuam në NATO,
nuk kanë vetëdije se çfarë i pret, se çfarë detyrimesh dhe çfarë të drejtash kanë në procesin e
rekomandimit për çeljen e negociatave dhe integrimin. Prandaj, më mirë se sa televizioni
publik, duhet një platformë e gjerë, që ofron më shumë se televizioni publik. Ju keni pjesën
tuaj, por unë mendoj se kjo duhet të ishte një sipërmarrje shtetërore, duhet të ishte për shkollat,
duhet të ishte për grupet e interesit e kështu me radhë.
Megjithatë, këtu jemi për televizionin, i cili ka një aftësi diverguese shumë të madhe.
Mua më vjen mirë që bëhen programe për pakicat, siç nuk ndodh të bëhen në vende të tjera, që
t’u kushtohet vëmendje ashtu siç ne iu kushtojmë pakicave. Shumë mirë bëjmë, sepse ne e
dimë që kjo është edhe një nga kushtet e Bashkimi Europian, në përputhje me rezolutën e
Këshillit të Europës.
Ligji që ne kaluam në parlament, për mendimin tim personal, edhe në cilësinë e një
studiuesi, është i diskutueshëm, sepse u futën të gjitha në një emërtesë, u quajtën “pakica”,
ndërkohë që tradita e studiuesve nuk e ka ruajtur atë emërtesë. Kështu që shumë mirë që bëhet
për ata, por t’u kushtojmë më shumë rëndësi vetë qytetarëve shqiptarë, jo vetëm në ngjizjen e
31
hapësirës mbarëkombëtare, ku sinjali duhet të shkojë përtej kufijve shtetërorë, por sidomos në
integrimin e tyre. Unë këto kisha për të thënë.
Faleminderit që më dëgjuat!
Milva Ekonomi – Faleminderit, zoti Rrokaj!
Në fakt, po marr shkas nga fjala juaj për të thënë diçka.
Në raportin vjetor mbi ecurinë e RTSH-së, po të shikoni në faqen 28, nuk thuhet asgjë
për planin e ri tarifor që ka RTSH-ja. Përkundrazi, kur RTSH-ja bëri shpjegimin se si
funksionon buxheti i saj, ka thënë disa fjalë për tarifat që mblidhen në rajon dhe ka bërë një
tabelë krahasuese se ku qëndron Shqipëria krahasuar me vendet e tjera. Pra, nuk ka asnjë rresht
në atë paragraf, në faqen 28 dhe që vazhdon deri në fund të faqes 29, që të thuhet se ka një
qëllim për të shtuar tarifën për aparatin televiziv. Në raport është bërë vetëm një shpjegim, ku
tregohet se struktura e mbledhjes së kësaj tarife në krahasim me buxhetin e shtetit nga viti në
vit ka ardhur duke u përmirësuar. Në vitin 2017 shënon një rritje të të ardhurave nga burimet e
saj dhe nga burimet e treta, pra grumbullimi i të ardhurave është 99%. Kështu që nuk ka asnjë
shenjë që ky dokument që kemi para të synojë rritjen e tarifës. Unë nuk besoj se e vendos dot
RTSH-ja këtë gjë, sepse nuk ka fuqi ta marr këtë vendim.
(Ndërhyrje pa mikrofon.)
Unë edhe mund t’jua lexoj!
Sezai Rrokaj – Unë po ju lexoj diçka. Në materialin që më ka ardhur ...
Milva Ekonomi – Materiali është raporti që na ka ardhur.
Sezai Rrokaj – Unë do ta lexoj.
Milva Ekonomi – Ja ku është materiali.
Sezai Rrokaj – Së pari, nuk mund të bëhet asnjë studim nëse ai studim nuk shërben për
të ...
Milva Ekonomi – Këtu para kemi raportin dhe ka një kontekst ku vihet raporti.
Sezai Rrokaj – Në lidhje me çështjen e pagesës së taksës së aparatit marrës, RTSH-ja
ka paraqitur në raport një statistikë krahasimore të aparatit marrës për frymë dhe familje në
vendet e Europës Juglindore dhe kërkesën për rritjen e kësaj tarife, me qëllim përballimin e
kostos së digjitalizimit, si dhe nevojën për mbështetje edhe në vitet e ardhshme nga buxheti i
shtetit.
Milva Ekonomi – Ku është e shkruar kjo gjë, sepse ju po e lexoni, por unë nuk e shikoj
në raport.
Sezai Rrokaj – Unë uroj që të mos ketë kërkesë.
(Diskutime pa mikrofon.)
32
Milva Ekonomi – Ai material është raporti i monitorimit, të cilin na e kanë vënë në
dispozicion neve, që të kemi kujdes ...
(Ndërhyrje pa mikrofon.)
Ja ku e keni raportin e RTSH-së dhe janë dy gjëra të ndryshme.
Sezai Rrokaj – Unë uroj që të jetë kështu siç thoni ju...
Milva Ekonomi – E keni para raportin, ndaj, ju lutem, mos më uroni!
Sezai Rrokaj – Zonja kryetare, uroj që unë ta kem gabim dhe shqiptarët të fitojnë dhe
të mos kenë më shumë taksa.
Milva Ekonomi – Ju lutem, lexojini faqet 28 dhe 29.
Sezai Rrokaj – Unë uroj që ju të keni të drejtë.
Milva Ekonomi – Këtë gjë urojmë edhe ne bashkërisht, por ju duhet të lexoni me
kujdes faqet 28 dhe 29.
Sezai Rrokaj – Kjo është gjëja më e mirë për shqiptarët, por në qoftë se do të kemi
taksë apo nëse kërkohet një taksë, nuk është gjë e mirë.
(Ndërhyrje pa mikrofon.)
Milva Ekonomi – Të mbaroj unë, më pas po jua jap fjalën edhe juve! Meqenëse unë
nuk e ndërpreva profesorin, besoj se edhe profesori nuk do të më ndërpresë.
Profesori ngriti çështjen e tarifës dhe unë besoj se raporti vjetor, që ju keni bërë, ka
vendosur një kontekst të ardhurash që mblidhen nga tarifa. Unë nuk shikoj asnjë rresht, ku ju
të bëni propozim për rritje tarife.
Tjetër gjë e rëndësishme në këtë raport është se duhet të kemi parasysh situatën e
varfërisë në Shqipëri. Shqipëria nuk është një vend i pasur, por është një vend që lufton me
varfërinë dhe nga viti në vit po bën përpjekje për ta ulur atë. Beteja më e madhe për të luftuar
varfërinë është që Shqipëria të rrisë të ardhurat ekonomike. Megjithatë, ka edhe diçka tjetër të
rëndësishme lidhur me varfërinë, të cilën duhet ta kemi parasysh, që është mirëqeverisja
fiskale.
Raporti i pranverës së Bankës Botërore, që bëhet për të gjitha vendet e Ballkanit
Perëndimor, shyqyr ato sot janë në APS-e, siç keni bërë edhe ju APS-e RTSH-në, thotë diçka
të rëndësishme: “Shqipëria ia ka dalë të ketë një qëndrueshmëri fiskale që nga viti 2013 deri
në vitin 2017. Falë qëndrueshmërisë fiskale që ka, Shqipëria ka treguar se ka ulur pabarazinë.
Janë dy vende në rajon që është Shqipëria dhe Mali i Zi, që kanë ulur pabarazinë. Pabarazia
matet me një koeficient që quhet gini.
Gini është krahasuar për Shqipërinë 5.% dhe është përmirësuar për Malin e Zi 7. %”.
Domethënë, edhe beteja për varfërinë është një betejë që Shqipëria po e vazhdon dhe përpiqet
33
të rrisë ekonominë e saj dhe të ulë varfërinë. Këtë e ka në vëmendje kjo qeveri. Ndërkohë,
problemi i programacionit të RTSH-së është se kam përshtypjen se linja juaj editoriale duhet
të jetë e tillë, prandaj kemi Këshillin Drejtues, në mënyrë që të mos ketë influenca nga asnjë
parti politike. Kjo është beteja që ne kemi sot.
Unë besoj se ka një shembull të qartë, për të kuptuar që mbi ju qeveria aktuale nuk bën
asnjë lloj presioni. Fakti që ekziston një medie sociale, siç është facebook-u, një televizion
ekranmbulues për dhënie informacioni që mban siglën ERTV, tregon se nuk ka nevojë të bëjë
presion mbi ju. Sot është e lirë që të përdoren mediet sociale.
Unë besoj se këto janë argumente të mjaftueshme për të treguar se programacioni juaj
dhe linja juaj editoriale duhet të bëhen, dhe po synojnë të shkojnë drejt mosinfluencës nga forca
politike. Gjëja tjetër që dua të them është se, pa dyshim që Shqipëria ka nevojë të informojë
popullin për mundësitë që ata kanë për të parë emisione, për të cilat nuk paguajnë. Besoj se
kalimi nga analog në numerik këtë gjë bën, pra të kesh mundësi të shohësh edhe ca kanale më
shumë, kur nuk ke mundësi të paguash. Prandaj këto kanale kanë nevojë që të jenë të pavarura.
Kjo është lufta që synojmë tani. Në fakt, ajo që vumë re nga leximi i analizës, është pikërisht
që Radiotelevizioni Shqiptar me arritjet që ka bërë në vitin 2017, për sa i takon rregullit të
brendshëm, miratimit të buxhetit, mënyrës se si lëvizet stafi, ka marrë vlerësime për përpjekjet
pozitive jo nga ne, por nga ndërkombëtarët, dhe kjo synon të bëjë një televizion publik të
paanshëm. A do t’ia dalim dot ta bëjmë shumë të mirë dhe të krahasueshëm me vendet e rajonit?
Kam përshtypjen se për disa gjëra e kemi tejkaluar rajonin, jemi më mirë, por për disa gjëra të
tjera do të na duhet më shumë përpjekje.
Thoma Gëllçi – Kam disa gjëra për të thënë në lidhje fjalën e deputetit të nderuar
Rrokaj, me të cilin më ka lidhur puna edhe më përpara dhe nuk kemi pse të shqetësohemi nga
këto gjëra, por po e them thjesht për sqarim.
E para, financimi i Radiotelevizioni Shqiptar bëhet në dy mënyra: nga tarifa mbi
aparatin televiziv dhe nga buxheti i shtetit, që financon disa shërbime strikte të ndara nga
veprimtaria tjetër, domethënë, financon programin për shqiptarët jashtë atdheut, radion në
gjuhë të huaj etj.. Por nuk ka rëndësi kjo gjë, rëndësi ka që si nga tarifa e aparatit, ashtu dhe
nga buxheti i shtetit, populli është ai që e paguan, se buxheti i shtetit nuk vjen nga qielli, por
nga taksa që merren nga populli në fusha të tjera. Edhe rrogën tuaj, zoti deputet, populli e
paguan, se unë paguhem nga tarifa. As rrogën e Kryeministrit, as rrogën e ministrave nuk i
paguan perëndia, por populli me taksat e veta dhe do të ishte mirë që në sistemin e taksave, të
shënohet: kaq taksë për rrogën e deputetëve, kaq taksë për rrogat e ministrave, me qëllim që të
dihet se sa taksë paguajnë shqiptarët për çdo gjë. Dihet se çfarë takse paguajnë shqiptarët për
34
Radiotelevizionin Publik, sepse tarifa që mblidhet me angazhimet që i janë vënë në kurriz
RTSH-së është e pamjaftueshme. Se si do të vejë kjo, a do të vijë financimi nga buxheti i shtetit
apo nga një kredi e BE-së, pra grand, kjo nuk ka rëndësi. Do Zoti na e japin! Por nëse paguhet
nga buxheti i shtetit, prapë del nga taksat e shqiptarëve dhe ne e quajmë më të mirë lidhjen e
taksës së aparatit me punën tonë, me cilësinë tonë. E quajmë një gur të fuqishëm në pavarësinë
e RTSH-së, se nëse televizioni shqiptar nuk do të financohej nga taksa e aparatit, por nga
buxheti i shtetit, misioni që ky televizion të bëhet publik është i pamundur, se do të ishte një
organ i financuar nga qeveria, i cili do të bënte punën e qeverisë. Këtu ne themi që duhet të
shkëputemi patjetër nga buxheti i shtetit jo me rritjen e taksës, se nuk e kemi kërkuar këtë gjë,
por....
Sezai Rrokaj – Të jemi të qartë, zoti drejtor me shqiptarët! Ju keni në programin tuaj
të bëni një propozim për rritje takse për aparatin, apo jo? Dhe këtu pastaj mbyllet gjithçka. Por
nëse ju thoni jo, nuk do të ketë, jemi në rregull dhe unë tërhiqem. Nuk ka asnjë problem. Nëse
këtë studim apo propozim ju e lidhni me një takes, atëherë është problem, por nëse ju e mohoni
tani që nuk do të ketë asnjë propozim, unë tërhiqem, kërkoj falje dhe shoh punën time. Ama
gjërat t’i themi, që ta dimë çfarë do të ketë!
Thoma Gëllçi – Nga ana e Televizionit shqiptar nuk është bërë asnjë propozim për
rritje takse.
Sezai Rrokaj – A do të ketë?
Thoma Gëllçi – Ku e di unë!
Sezai Rrokaj – Ju jeni drejtor.
Thoma Gëllçi – Po të them që nga ana e Televizionit shqiptar nuk ka ardhur asnjë
propozim për rritje takse të aparatit dhe ne nuk e kemi në tagër, madje as të parashikuar që në
buxhet do të kemi ndonjë taksë të rritur, pra nuk kemi asnjë parashikim, por RTSH-ja ka hartuar
për herë të parë një strategji të zhvillimit 5-vjeçar të saj dhe po përpilon edhe një plan të
biznesit. Është ngritur një grup pune, i cili po bën një plan biznesit të hollësishëm. Përfundimet
e këtij....
Sezai Rrokaj – Zoti drejtor, unë jam plotësisht dakord me filozofinë tuaj, por ju jeni
drejtor.
Thoma Gëllçi – A ka mundësi, se unë nuk ju ndërpreva?
Kur të kemi përfundimet e hartuesve, pra të grupit të punës, që po bën një studim se si
do të zhvillohet Radiotelevizioni Shqiptar në tri vjetët e ardhshëm, atëherë mund të jem në
gjendje që të përgjigjem se cilat janë rrugët që ne propozojmë, por jo sot, se nuk kemi plan se
35
as nuk kemi parashikuar ndonjë gjë në buxhet, as nuk kemi sjellë ndonjë propozim. Ne thjesht
kemi bërë një pasqyrë të gjendjes financiare të RTSH-së, nevojës sonë për të financuar, le të
na vijnë nga të duan, jo thjesht digjitalizimin e jashtëm, por edhe digjitalizimin e brendshëm të
RTSH-së, pra prodhimin që futet në arkiv, që futet në ndërtimin e një rrjeti të IT-së së
brendshme, që nuk e ka, rregullimin e linjave elektrike të cilat nxjerrin tym sa herë që ndizen
projektorët, rregullimin e ndriçimit, rregullimin e godinës që është në mes të Tiranës për faqe
të zezë, se pikon, etj. Të gjitha këto duan financime që ne i kërkojmë nga buxheti i shtetit sot
për sot dhe nuk kemi kërkuar rritje, dhe nuk e kemi diskutuar, pasi jemi në diskutimin se si
RTSH-ja të menaxhojë më mirë burimet e brendshme, të shtojë më shumë reklama, të marrë
më shumë projekte të ndryshme dhe të marrë pjesë në to. E gjithë kjo bëhet me qëllimin që, në
fund të fundit, brenda një periudhe 5-vjeçare të shkëputet tërësisht nga varësia e buxhetit të
shtetit, sepse ky është hapi më i rëndësishëm, pra shkëputja e RTSH-së nga politikat shtetërore.
Milva Ekonomi – Unë besoj se nuk ia vlen të diskutohet më për këtë çështje, sepse e
morëm përgjigjen.
Sezai Rrokaj – Unë e mirëkuptoj të gjithë strategjinë tuaj dhe jeni shumë koherentë.
Ju doni të menaxhoni një institucion dhe shihni si burime ato që siguroni vetë, taksën dhe
mbështetjen shtetërore. Ju thoni se që televizioni të bëhet i mirë, duhet të rrisë të ardhurat e
veta. Pra, problemi nuk qëndron te vizioni juaj, sepse jeni në rregull me të, por këtu jemi në
politikë dhe qytetarët duhet të dinë....
Milva Ekonomi – Ne nuk na ka ardhur asnjë taksë. Pse diskutojmë një gjë që nuk
ekziston?
Sezai Rrokaj – A synoni ju që kërkesën....?
Milva Ekonomi – Po diskutojmë për një gjë që nuk ekziston, po krijojmë dallgë në
gotë.
Sezai Rrokaj – Një minutë, ta mbaroj! Nevojat që ju keni për një televizion publik të
denjë për shqiptarët, do t’i kompensoni nëpërmjet një mbështetjeje të shtuar të shtetit, të
qeverisë, apo do të kërkoni të rrisni taksën akoma për qytetarët?
Milva Ekonomi – Profesor, ju lutem, nuk ia vlen të diskutojmë, sepse morëm përgjigje
nga dokumenti, morëm edhe përgjigje gojore nga profesor Gëllçi që kjo gjë nuk do të ndodhë.
Unë nuk e kuptoj pse ju shihni një ëndërr dhe diskutoni për të?!
(Ndërhyrje pa mikrofon.)
Po ja ku e keni materialin që të ka ardhur në zyrë nga RTSH-ja dhe nuk e keni të shkruar
aty, por keni një kontekst ku të bëhet krahasimi i tarifës për disa vende. Çfarë është kjo gjë që
po thoni? Të ngresh problem diçka që nuk ekziston!
36
(Ndërhyrje pa mikrofon.)
Ne duhet të jemi të kujdesshëm të mbrojmë interesat e qytetarëve, sepse kjo është detyra
jonë dhe duhet ta kemi në vëmendje të gjithë. Ne nuk kemi asnjë propozim për të rritur tarifën
e Televizionit shqiptar. Nuk e kuptoj pse i hyjmë një diskutimi që nuk e kemi në letër!
(Ndërhyrje pa mikrofon.)
Kërkojani Sonila Kadaresë t’jua shpjegojë, që ka bërë atë dokumentin. Le t’jua
shpjegojë ajo se çfarë ka dashur të thotë, që ta kuptoni! Unë besoj se tani jemi të qartë për gjërat
që kemi diskutuar. Do t’ju lutesha shumë që të vazhdonit punën tuaj për pavarësinë tuaj dhe të
rregulloni programacionin sipas kërkesave që bëmë sot!
Gjëja tjetër e rëndësishme, që dua t’ju them, është se duhet të bashkëpunoni me
relatorin, nëse ai do të ketë nevojë për informacion shtesë dhe ta mbështesni atë! Ndërkohë,
grupi ynë do të përgatisë relacionin dhe do të kemi shumë shpejt një mbledhje.
Ju faleminderit shumë dhe punë të mbarë!
Ditën e mirë!
MBYLLET MBLEDHJA
37