GERALDINE

TREVOR

ZAHRA

Ms. Marica Micallef

Our Lady Immaculate School

META FORSI KELLI GĦAXAR SNIN,

FIL-KLASSI KIEN HEMM TIFLA,

GERALDINE,

GĦAJNEJHA BLU U XAGĦARHA NNUKKLAT,

U WIĊĊHA MGERMED,

U L-QMIS IMKEMMXA

U D-DUBLETT TAGĦHA DEJJEM MIMLI TRAB.

U META FREDDIE L-BULI,

BIEX JAGĦMILHA TAL-GUSTUŻ,

KIEN MAR ĦATAF MINN DENBU LILL-QATTUS,

U BEDA, MINGĦAJR ĦNIENA,

IDAWRU BĦAL RADDIENA,

U TELQU JTIR U SPIĊĊA FIL-PRINJOLA

FIL-ĠNEJNA TAL-ISKOLA,

GERALDINE,

TATU DAQQA BEJN GĦAJNEJH

U NIŻŻLITU GĦARRKOPPTEJH...

B’XUXTU KOLLHA BEJN IDEJHA

MILWI TNEJN MAĠENB RIĠLEJHA

KELLU JWEGĦIDHA LI ŻGUR AKTAR MA JERĠAX...

U FREDDIE L-BULI,

BULI AKTAR MA BAQAX!

KIEN PROPJU DAK IL-ĦIN

LI JIEN TLIFT GĦAQLI WARA GERALDINE.

U L-GĦADA TAJTHA LAPES ĠDID FJAMANT

KAXXA TAL-OXO,

U STAMPA TA’ LJUNFANT,

WER\ŻEQ ĠO BOTT,

ĊAVETTA

W KARTOLINA,

U NOFS IL-MARS LI TATNI Z-ZIJA LINA...

AVOLJA SA MA ĦADTHA ’L GERALDINE

MINN ĊIKKULATA SARET PLASTISIN!

SIRNA ĦBIEB KBAR

U T-TFAL TAL-KLASSI TIEGĦI

MA KINUX JAZZARDAW JEĦDUHA MIEGĦI.

DARBA WAĦDA

GERALDINE....

ĦADITNI MAGĦHA FIL-ĠNEJNA TAL-ISKOLA

FIR-ROKNA MWARRBA, ĦDEJN IS-SIĠAR KBAR

FEJN SUPPOST JERSAQ BISS IL-ĠARDINAR;

IŻDA HEMM

GERALDINE KIENET SKOPRIET

ĦAWĦA DAQSIEX LI ĠA KIENET IMTLIET

BIL-ĦAWĦ MISJUR,

ISFAR SKUR

KOLLU TIKKI ĦAMRANIN....

U TRID TARAHA LIL GERALDINE,

TIXXABBAT MAZ-ZKUK,

TAQTA’ U TWADDABLI,

U JIEN NILQAGĦHOM....

B’ĦADDEJJA VAMPA NAR

GĦAX MOĦĦI FIS-SURMAST U L-ĠARDINAR.

U KILNA IKLA ĦAWĦ

JIEN U GERALDINE...

IMMA RANA XI ĦADD...MA NAFX SEW MIN,

(GĦALKEMM WAĦĦALNA MINNUFIH

FI FREDDIE L-BULI.)

MA NINSA QATT KEMM BŻAJT U KIF TWERWIRT

META S-SURMAST ĦATAFNA....

KIF INKSIRT!

IŻDA GERALDINE BAQGĦET TITBISSEM

IŻŻEBBEĠ DAWK L-GĦAJNEJN

GĦALIHA QISU MA KIEN ĠARA XEJN.

IMMA JIEN QLAJT GĦAJTA MINN MISSIERI

MINN OMMI

MIZ-ZIJA LINA

MIN-NANNU PETER

U N-NANNA SALVINA...

U BIEX IKOMPLI JŻID MAL-FRATTARIJA

FIN-NOFS ĠIE ANKI ŻŻATTAT ĦIJA!

U N-NANNU...MA NAFX JEKK HUX B’BOTTA

QALLI: “IBNI ATTENT MINN MARA LI TTIK FROTTA!”

U OMMI SPIĊĊAT TGĦIDLI:

“HAWN ARA Ċ-ĊINTURIN,

INDEWWAQHULEK

JEKK TAGĦMILHA AKTAR MA’ GERALDINE!”

U GĦALKEMM BQAJNA ĦBIEB

MARRITLI L-ĦILA,

U BDEJT INFITTEX AKTAR LIS-SUBIEN

INKELLA LILHA;

GĦAX NGĦID IS-SEW

IL-BIŻA’ MILL-IMBIEREK ĊINTURIN

KIEN AKBAR MILL-IMĦABBA

TA’ GERALDINE!

U LLUM

LI GĦADDEW JIĠRU DAQSTANT SNIN

GĦADNI NIFTAKAR TA’ KULTANT

F’GERALDINE

B’GĦAJNEJHA BLU U B’XAGĦARHA NNUKKLAT,

U WIĊĊHA MGERMED,

U L-QMIS IMKEMMXA

U D-DUBLETT TAGĦHA DEJJEM MIMLI TRAB;

GERALDINE...

ĦABIBA FAVORITA,

LI MAGĦHA GĦALL-EWWEL DARBA DOQT

FROTTA PPROJBITA.