Ekalesia Faapotopotoga Kerisiano Samoa TUSI ’AU LEOLEO 2016

Copyright © 2016 EFKS

1

Ekalesia Faapotopotoga Kerisiano Samoa

TUSI ’AU LEOLEO 2016

UPU TOMUA

E le faaitiitia le viiga ma le faafetai i le Leoleo Mamoe Sili, ona o lana pule faasoifua ma lona agalelei, ua a’e ai ma le manumalo o tatou faiva alofilima, sa feagai ai ma le paia ma le mamalu o le Ekalesia aoao, i le tatou faigamalaga umi o le 2015.

Ae o le “Ia Tatou Tatalo 2016”, na saunia e le Susuga i le Faifeau Samoa Uili Konelio Teo, o le matagaluega a le Faasaleleaga le masina o Ianuari ia Iuni, a o le Susuga i le Faifeau Samoa Afiga Timu, mai le Matagaluega Aukilani Niusila le masina o Iulai ia Tesema.

Ma e fia faamauina le agaga faafetai i le Susuga i Faafeagaiga, ona o lenei galuega taua e fai ma auau o mafaufauga faa le agaga, mo le manuia ma le filemu o le Ekalesia, faapea foi le lalolagi atoa ma o tatou tagata.

Ia i le Atua poto pea le viiga ma le faafetai, auā o Ia o le Leoleo Mamoe Sili, e manuia ai le tatou folauga ma le faigamalaga faa le Au Leoleo, i lenei tausaga fou ma le lumana’i.

Faafetai tele

Sileli Tauaifaiga FS. EFKS Fagamalo Matagaluega Itu o Tane Sui Peresetene Komiti Au Leoleo


2

Ianuari 03 – 09, 2016 Tusi Faitau. Ioane: 1 - 18 Ola i le Malamalama Faafetai: Ona ua tatou taunuu mai i lenei tausaga fou, o loo tumau pea le malamalama o fofoga alofa o le Atua, ia te i tatou le fanau a tagata. Ona e ui lava sa avea le pouliuli ma tau faafefe i le folauga o lenei tausaga, ae o lona malamalama, ua taoto ai i lagatonu lavasiga uma sa feagai ai. Ona o lona Alo o Iesu Keriso, o Ia lava ua fai ma sulu i le amataga o le malaga o lenei tausaga. Faatoesega: Ona o lo tatou fiafia i le pogisa, o le ola agasala i tu’inananauga o le olaga. Ona ua le susulu atu lo tatou valaauina, ina ua tatou fefefe i le pouliuli, i le tele o ituaso o lo tatou ola. Ona ua tatou manatu faapito mo i tatou lava, ua tatou augata ai e faasusulu atu, lona malamalama mo i latou o manaomia. Manaoga: Ia auai lona malamalama e fai ma malosi fou, tatou te fesaga’i ai ma lu’itau o lenei tausaga, ma manumalo ai i ‘au a le pouliuli. Ia avea pea i tatou ma mea faigaluega na te faaaogaina, e susulu mo lana talalelei. Ia pupula mai lona Agaga Paia i loto uma, ua faapogisaina ona o mailei a le fili, ma fanaufouina ai le ola o lana Ekalesia ma ona tagata. Talosia nai aiga ma uo asiasi mai fafo, aemaise tuuaga a nai `fanau aoga. Ianuari 10 – 16, 2016 Tusi Faitau Esoto 35: 30 – 35 Manatu Autu O loo i le Atua lo ta faatufugaga Faafetai: Ona o lana faatufugaga ua tatou aulia ai i le manuia, le lona lua o vaiaso o lenei tausaga. Ona o lona tamaoaiga e ala i taleni ma agavaa, o loo fesoasoani i le faatumauina o le ola lelei o aso uma. Ona ua tatou maua ai le atamai ma le poto, o ana meaalofa faasoa mai i lona Agaga Paia, mo soo se valaauina. Ona o lona alofa tunoa e ala i lona tumu atoatoa ia Keriso, ua toe faatutumuina ai o tatou ola gaogaoii,ona o le agasala Faatoesega: Ina ua valetuulima ona tatou faaaogaina, o tatou agavaa mai le Atua, ona o lo tatou ola faapalapala ma le faapaie. Ona ua tutumu i tatou i mea e leai se aoga a le lalolagi, ua leai ai se avanoa mo le Alii io tatou olaga. Ona ua avea le maoa’e o le iloa ma le silafia, i faatufugaga eseese, ua laveia ai i tatou i le ola faamaualuga, manatu faapito ma le leai o se alofa. Manaoga: Aoao mai ina ia tatou galue’ina i le faamaoni agavaa, ua Ia faasoa mai mo le manuia o aiga, nuu malo ma le Ekalesia. Foa’i mai mo i tatou uma le faautauta ma le loto matala, e faatonutonu folau i soo se galuega tatou te fai, mo le viiga o lona suafa paia. Talosia i latou uma o mama’i i aiga, ma soo se maota gasegase i totonu o le atunuu.


3

Ianuari 17 – 23, 2016 Tusi Faitau Luka 1: 39 – 45 Manatu Autu E i ai le mafanafana i le mafuta faatasi

Faafetai: Ona o loo logo pea i tino matagi lelei, i lona mafutaina oi tatou, e ala i lona Agaga Paia i aso uma. Ona o le alofa ua atagia i totonu o lotoifale eseese, ua saga faamautuina ai le ola feoeoea’i, ma le galulue faatasi oo tatou tagata, i totonu o mafutaga eseese. Ona o le mafanafana o lona toetu mamalu, ua fai ma faasino ala i loto, pe’ā fesouaina i tatou i puapuaga o le ola. Faatoesega: Ona ua tatou le faatauaina le ola mafuta fa’atasi, ina ua tupu tele ma ola mafala, le laau o le manatu faapito, ma le ola tuto’atasi oo tatou tagata. Ona o lo tatou ola masalosalo i lona mafutaina oi tatou, ua afua ai ona faavaivaia lo tatou ola taumafai mo mea lelei. Ona o le pupu oo tatou loto, i mea e leai se aoga o lenei lalolagi, e mafua ai ona tatou le fia mafuta atu i le Atua. Manaoga: Ina ia e mafutaina o matou loto uma, ma tupu ai lo matou fiafia i lau Afio e le aunoa. Ina ia aoao mai i tatou uma e le Alii, tatou te iloa ai le taua o le ola mafuta i le alofa, i totonu o soo se lotoifale. Ina ia galue atu le Agaga Paia i mafutaga ua malepelepe, ona o le fili ma ana faaosoosoga, ua lepetia ai le nofo lelei o ona tagata uma. Ina ia faamanuia le Atua i soo se mafutaga a le au faatuatua, o e ua talitonu i lau Afio ma lau faaolataga. Ianuari 24 – 30, 2016 Tusi Faitau Pese a Solomona 1: 1 – 4 Manatu Autu Ia nanamu i le Atua lou ola. Faafetai: Ona o le nanamu o le sau o le ola, o loo manuia ai le fanau a tagata i lana tausiga, ua faafiafia ai loto uma i le faamaoni o lona alofa. Ona e ui ina tatou namu leaga ona o le ola agasala, a o lona toetu mamalu ua faauuina ai i tatou, i le uu manogi o le faaolataga i lona alofa tunoa. Ona e ui ina lilofia i tatou uma le fanau a tagata, i le loloto o le agasala ma le amioleaga, ae aapa mai pea aao alofa o le Atua, e laveai ma faaola ia te i tatou. Faatoesega: Ona ua le oooo lo tatou ola ofoina, e fai o se taulaga malie ma manogi, i fofoga o le Atua. Ona o lo tatou fai mea tuulafoa’i, ma le galulue faatumutumulima, ua tatou vaoia ai le puaina atu, o le nanamu o le faaolataga o le ola a le Atua. Ona o lo tatou ola faamaualuga, finau vale, faafiapoto ma le le alofa, ua le malaulau ai fua matagofie, o le ola faafouina i o tatou olaga. Manaoga: Aoao mai lou Agaga i lo matou ola galulue, ina ia matou maua uma ai le loto filiga, e faamaoni ai i soo se feau. Ina ia atagia i o matou olaga le lototele, e faatino ai a matou feau ma galuega, ma ia faatumulia i matou i le alofa, onosai ma le faapalepale, i isi o matou uso a tagata. Ia e faauuina pea i matou, i le suauu manogi lelei o lou alofa tunoa, ina ia nanamu ai pea lo matou ola mo lau Afio.


4

Ianuari 31 – Fepuari 06, 2016 Tusi Faitau Iopu 11: 17 – 20 Manatu Autu O loo i le Atua lou faamoemoe. Faafetai: Ona e ui i le vaofilifili o mea tiga o le ola, ae faafetai i le Atua o Ia lava lo tatou faamoemoe, ua tatou maua ai pea le saogalemu. Ona o faamoemoega lelei sa tatou tulimataia, a ua faataunuu ma iu i le manuia, ona o lona alofa. Ona o le faamoemoe i le ola faavavau i le manumalo Keriso, ua faaolaina ai i tatou. Faatoesega: Ona ua i’uvale ni isi o moomooga lelei, ua le āu o manu foi ni isi lavasiga mo manuia, ina ua tatou faamoemoe i so tatou atamai ma se poto, ae galo le Atua. Ona ua papa’u lo tatou ola faatuatua, ina ua tatou faamoemoe i mea ua vaaia e fano ai, ae tuu lona mana lilo ma lana faamalosi au mai. Ona ua faapogisaina e le fili o tatou mata faaleagaga, i faamoemoega lelei mai le Atua, tatou te maua ai le ola ma maua atili ai lava. Manaoga: Ina ia manuia faamoemoega lelei, o lenei masina lona lua ua aulia, i lona auai mai. Ia faamanuia fanau i le amatalia ai o aoaoga, ia foai mo i latou uma le poto ma le atamai. Ia faamanuia i latou ua mu itiiti lo latou faamoemoe, ona o mea faigata o lutia ai lo latou ola. Ina ia fai pea lou Agaga ma faasino ala, e manuia ai faamoemoega, aua o lau Afio le faatupu ola, o le faatumau ola, ma lo matou faamoemoe ola. Fepuari 07 – 13, 2016 Tusi Faitau Neemia 4: 1 - 6 Manatu Autu Atia’e ma le Atua. Faafetai: Ona o le malosi na faamaite e lou Agaga Paia, ua matou atia’e ai o matou olaga, i faamanuiaga ua matou maua. Ona o lona fesoasoani i mea ua galulue ai o tatou lima, ua atia’e ai aiga o nuu aemaise o le talalelei. Ona o le manuia mautinoa o mea uma tatou te faia, pe a tatou faamoemoe ma faalagolago i le Alii. Faatoesega: Ona o lo tatou faatalalē, e atina’e mea lelei mo lana Ekalesia. Ona ua solomuli le toatele o agaga, ina ua leai so tatou lototele e atia’e faatasi ma le Atua, ina ua tatou toilalo i le faamata’u mai a le Tiapolo. Ona ua leai se galulue faatasi e atia’e mea lelei, ona ua fetotoa’i lagona i le leaga o loto, ma le faasausili o manatu. Manaoga: Foai mai i le au faatuatua le malosi lilo o lou mana, e mafai ai ona matou faaauau atina’e lelei, e manuia ai feau o matou taumafai i ai. Tatalo ia manuia atina’e eseese a le Ekalesia aoao, ae maise aulotu taitasi i Samoa nei, ma atunuu e mamao. Ina ia tatou maua uma le agaga o le tutū ma galulue, ma atia’e faatasi mea uma ma le Atua, e manuia ai o tatou olaga.


5

Fepuari 14 – 20, 2016 Tusi Faitau Luka 9: 23 – 27 Manatu Autu Fai nei loa! Faafetai: Ona e lei vaoia e le Atua mo i tatou ana faamanuiaga, ae na ia faia mea uma e tusa o lona finagalo alofa, e tatau mo lo tatou ola fiafia. Ona e ui i lo tatou faafitia o Ia i le tele o aso, ae na te lē tuulafoaina lava ia i tatou. Ona ua ia faasino mai le ala, mo lo tatou faaolataga ia Iesu Keriso lona Alo, o le na faia lava le finagalo o lona Tama. Faatoesega: Ina ua faasiusiu mata lo tatou iloa, o mea e tatau ona fai, ma foai mo le Atua atoa ma isi, ona ua tatou le lavā ona amo lona satauro. Ona ua iloa i tatou i lo tatou ta’u Kerisiano, a ua silimusa i tatou ona faasatauro, i isi lava o tatou uso a Kerisiano. Ona e tiga ona tatou iloa ma le mautinoa, o Iesu Keriso ua tatou maua ai uma le faaolataga, a ua le fia ma’imau mo Ia lo tatou ola. Manaoga: Tatou tatalo nate tautoalua mai lo tatou vaivai, i le tatou amoga satauro o loo tatou fai nei, mo le viiga o lona suafa. Ina ia liligi mai lona tumu atoatoa, mo soo se taleni ma agavaa, ua ofoina ai soo se soifua, ina ia ola ni isi tagata. Ina ia foai mai le lotomau, e faaauau ai o tatou tofi ma valaaulia eseese, aua le ola manuia o mea uma. Fepuari 21 – 27, 2016 Tusi Faitau Ioane 13: 15 – 20 Manatu Autu A’o, a’oa’o, faaa’oa’o. Faafetai: Ona o le matalasi ma le matafelefele o ou manuia, ua matou talisapaia ma molimau i ai i le olaga nei, ua saga aoaoina ai i matou, i le uiga o lou alofa le mavae mo le tagata. Ona o le Tusi Paia ma lona a’oa’o mai ua matou iloa ai le faatauvaa o le uiga o lo matou ola, ma le silisiliese o lou mamalu. Ona o Iesu Keriso lo tatou Alii Faaola, na Ia mua’i faaaoao mo i tatou le fanau o tagata, le uiga o le ola auauna, e ala i lona soifua atoatoa. Faatoesega: Ina ua ese la tatou e fai, ese foi la tatou e a’oa’o atu. Ona ua tatou le fia a’oa’oina le uiga o le ola auauna atu, ina ua suamalie i le tofo, tamaoaiga o le ola auauna mai o isi. Ona ua tatou le fia mulimuli, i ona tulaga aao ma ana a’oa’oga, ina ua tutumu i tatou i a’oa’oga sese, a le lalolagi e fano ai. Manaoga: Ina ia faamanuia i latou uma ua ofoina le soifua, i le galuega o le a’oa’o atu i totonu o potu aoga, aemaise o matata eseese i le poto salalau, ua faasoa ai faatulagaga o faamanuiaga, mo soo se lotoifale. Faamanuia le Ekalesia i lana molimau i le a’oa’o atu o le tala o lou alofa tunoa, ina ia saga tele ai agaga e faaolaina, mo lau talalelei. Ina ia aua ne’i mapu le avea oi tatou uma, ma faaaoaoga lelei, o le finagalo paia o le Atua mo tagata uma.


6

Fepuari 28 – Mati 05, 2016 Tusi Faitau Numera 11: 21 - 23 Manatu Autu E le oge le Alii i se mea. Faafetai: Ona o lona tamaoaiga e lava pea ma totoe, mo i tatou lana fanau. E ui e i ai pea le mativa ma le lē tagolima, a ua foai mai e le Alii mea uma e tatau mo le aso, e manuia ai lo tatou ola. Ona o Iesu Keriso le Faaaola, ua tatou a’ai maoona ma inu malilie ai i le faaolataga, a’o oge lava le lalolagi i le agasala. Faatoesega: Ona o lo tatou fesiligia o le lava ma totoe o lo tatou Atua, ua mafua ai ona faase’etuagalu ni isi, mai le tautuaina o lona finagalo paia. Ona o le oge o lo tatou ola faatuatua ia te Ia, ina ua tosina i tatou, i le fepulafi o tamaoaiga o le lalolagi nei. Ona tatou te fesiligia pea le alofa o le Atua, e ui ina fau ma soloi faamanuiaga, e liligi mai io tou aao ma o matou lima. Manaoga: Ina ia fesoasoani mai i lo tatou mativa faaleagaga, ma lagaina o tatou loto paie, ia toe faatupu ai se moemoe fou o le ola fia galue, mo ia i soo se tafa ua totofi i ai i tatou. Ina ia faamanuia ma foai mai e le Alii, mea uma ua ia silafia, e tatau mo lo tatou ola i totonu o aiga, o nuu le malo ma le Ekalesia. Ia saga faatupuina pea e le Agaga Paia, lo tatou faatuatua i le Atua, tatou te manuia ai. Mati 06 – 12, 2016 Tusi Faitau I Samuelu 3: 3 – 10 Manatu Autu Faalogo, ia lagona le valaau mai o le Atua. Faafetai: Ona o manuia ua tatou tufitaufao, ina ua tatou usitai faalogo, ma faia le finagalo o le Atua. Ona o le tuumusumusu mai o lona Agaga Sa, na laveaiina ai i tatou ai le i’uleo o Satani, ma ana faaosoosoga. Ona o Iesu Keriso lo tatou Alii, o lona usitai ma faalogo i le finagalo o lona Tama, ua tatou maua ai le olataga i lona toetu manumalo, nai le tuugamau. Faatoesega: Ona ua tutuli le tatou faalogo i le Atua, ina ua leotetele io tatou taliga faafiafiaga, ma tuinanauga o le lalolagi e fano ai. Ona o le fia faia o tatou loto ina ia maua le poto, ae galo ai ona faalogo i le atamai o le Atua e manuia ai. Ona ua tatou faamuamua ma faataua leo o tagata, ae faamulimuli le siufofoga o le Atua, tatou te maua ai le ola ma maua atili ai lava. Manaoga: Aoao mai ia matala le tatou faalogo, ma lagona ai iuleo eseese o tagata uma, o loo manaomia le tatou fesoasoani. Ina ia tatou maua le usitai e faalogo ai ma le totoa, pe se a le uiga o lona finagalo mo lo tatou valaauina. Ina ia manino lelei pea i le tou faafofoga ma le matou faalogologo, le finagalo paia o le Atua, i aso uma o lo tatou ola.


7

Mati 13 – 19, 2016 Tusi Faitau Luka 19: 36 – 40 Manatu Autu Aua le vaoia le afio mai o le Tupu. Faafetai: Ona o lona alofa e le’i mataofia, mo i tatou i aso uma, auā o loo Ia afio mai pea ia te i tatou, e ala i lona Agaga Paia, ma na faamalieina o tatou manaoga. Ona o le alofa o isi tagata, ua faasafua mai mo i tatou, ina ua latou talia Iesu le Tupu o tupu, io latou olaga. Ona o Iesu Keriso lava le Tupu silisili, na faaolaina o tatou tagata augavale, ilona manumalo i le satauro. Faatoesega: Ina ua matou fao lou tulaga Tupu, ua leai ai se avanoa io matou loto ma lau Afio. Ona oi tatou lava o loo faalavelaveina, le alalaga o le au faatuatua, i le viiga o le Alii le tupu silisili. Ona ua avea pea le māa’atu oo tatou loto, i le agasala ma amioleaga, ua fai ma faalavelave i le afio faatupu mai o le Alii. Manaoga: Ina ia liua o matou loto, ma avea i matou o ni isi, e afio tumau ai lau Afio io matou olaga. Ina ia fai i matou uma o ni mea faigaluega, e taualagaina lou mamalu i le lalolagi ao matou i ai. Ina ia lata mai le aso, e te afio mai ai oe le tupu moni, e te pule ma le tonu ma aumai lou filemu, mo i matou i lenei lalolagi vevesi. Mati 20 – 26, 2016 Tusi Faitau Ioane 3: 16 – 21 Manatu Autu E le’i galo tatou i le Atua. Faafetai: Ona o le vaitau o mafaufauga loloto, mo le au faatuatua uma, se’i toe laga ai lagona ma loto i le uiga moni, o puapuaga o le Alii o Iesu Keriso. Ona o le atoaga o le alofa o le Atua mo lana tagata, e le’i galo lava i tatou ia te Ia. Ona e ui oa tatou agasala, le faapogai o lona maliu, ae na Ia alofa mai pea i lona alofa silisili uiga ese. Faatoesega: Ona o lo tatou le fia manatuaina o le Atua, na mafua ai lona masoe i le satauro mataga. Ona e ui ua tatou iloa, o lona maliu e mo i tatou, ae o loo tatou o ese pea mai lona alofa tunoa. Ona o le manatu mai o le Atua mo i tatou, na mafua ai le taulaga mo agasala ia faamagalo, peitai tatou te le’o iloa ona faamaualalo, faamagalo ma faagalo. Manaoga: Ina ia galue mai pea lona Agaga io tatou loto maa’a, ma liua ai e avea ma loto ua fanaufouina, i lona toetu mamalu. Ina ia a’oa’o atili mai mo i tatou uma, le uiga loloto o le salamo, ina ia totogo ai moemoe fou, o le fia ofoina mo le Atua, ma lona finagalo paia. Ina ia aua lava ne’i galo, ia te i tatou uma ma a tatou fanau, le atoatoa o le alofa o le Atua, mo i tatou le tagata agasala.


8

Mati 27 – Aperila 02, 2016 Tusi Faitau Kolose 3: 5 – 11 Manatu Autu Tagata fou ia Keriso. Faafetai: Ona o le taeao fou mo le tagata ua faamagaloina, e ala i le toetu manumalo o lo tatou Alii. Ona ua avea lona manumalo i le satauro, o se faamanuiaga mo tagata uma, o lanu ma gagana, o e ua faatuatua ma talitonu i lona suafa. Ona o le faamaoni o le alofa o le Atua, ua tatou sapi ai nei i faamanuiaga e oo lava i le faavavau, pe a tatou faamaoni foi i ona luma. Faatoesega: Ona o loo lagatila pea le atumatagiga, i le ola tusitusilima ma le faailoga tagata, tainane ua maea tapena e Iesu le faaolataga. Ona o lo tatou laugaina pea, o le ola fou i le Keriso toetu, ae o loo tatou olaina pea ananafi, io tatou olaga. Ona e tiga ona avea i tatou ma tagata fou, ae manumalo pea le pupū oo tatou loto, i tu’inanauga o le agasala ma le amio leaga. Manaoga: Ina ia faamalosiau mai pea le toetu o Keriso mo i tatou uma, i soo se vaipanoa o loo tatou tutu ma galulue ai. Ina ia tatou tumau, tupoupou, tu sa’o ma vaai pea i le Alii, e ala mai ai faamanuiaga. Ina ia avea o tatou foafoaga fou o ni lamepa, e faamalamalama ai i latou o loo i le olaga tuai, ma gaua’i mai ai i le faaolataga. Aperila 03 – 09, 2016 Tusi Faitau Galuega 6: 3 – 6 Manatu Autu Valaau e galue. Faafetai: Ona o lona valaauina oi tatou, e galulue i lana talalelei. Ona o ana tofiga i valaaulia eseese, ua faaaoga i ai le soifua ma le ola auauna, o tagata uma. Ona o le galuega o le faaolataga, ua felanulanua’i ai manuia, o fefaasoaa’i ai le tasi i le isi, e ala i taleni ma agava’a. Faatoesega: Ona ua tatou le faamaoni io tatou valaauina. Ona ua faata’eta’ealuga a tatou faatinoga, ua fai foi ma le lē faautauta o tatou tiute. Ona ua tatou faamaualuga io tatou tofi, ua faasausili fo’i o tatou lagona io tatou tau, ua galo ai ia i tatou, e mai le Atua manuia ua tatou aeae ai. Manaoga: Ina ia foai mai mo i tatou uma le loto maualalo, e galulue ai ma le faautauta io tatou tofi ma tiute. Ina ia faaoloaina i tatou e le Atua, i le lototele lotomatala ma le faamaoni, tatou te feagai ai ma faigata o le ola valaauina. A’oa’o mai ina ia mautinoa io matou loto uma, poo fea lava tatou te galulue ai, oi tatou lava o auauna le aoga, mo le viiga o lē e ana le feau.


9

Aperila 10 – 16, 2016 Tusi Faitau Luka 13: 10 – 17 Manatu Autu O Iesu le foma’i. Faafetai: Ona o le maloloina mai ia te Ia, o loo faaauau ai lo tatou ola ofoina, i le matafelefele o feau o feagai ai. Ona e ui ina laveia pea o tatou tino, i vaivaiga ma ma’i o le ola nei, ae ona o galuega lelei a alii ma tamaitai foma’i, aemaise i latou e atamai i fofo eseese, ua ala mai ai lana faamalologa mo i tatou. Ona ua toe atoatoa lo tatou malosi i le tino, mafaufau ma le agaga, ina ua faamamaina a tatou agasala, i le mana o lona toetu. Faatoesega: Ona ua faano’uno’u o tatou tagata, i le mamafa o le ma’i o le agasala, ua faigata ai ona tatou savavali sa’o atu ia te Ia, mo so tatou faamalologa. Ina ua saili lo tatou maloloina i vaifofo, a le tiapolo ma taulaitu, a ua tatou le momoli atu ia te Ia le fomai sili o tatou vaivai, e ala i le tatalo ma le anapogi. Ona ua avea le matalasi o le lalolagi agasala, e tauaso ai o tatou mata faaleagaga, ia Iesu Keriso le foma’i sili, oo tatou ola atoa ma agaga. Manaoga: Ina ia faamanuia i galuega lelei, o feagai ai le Matagaluega o Soifua Maloloina, aua le soifua ma le ola maloloina lelei, o nai o tatou tagata. Ina ia papa’i mai pea, le tuumumusu a le Agaga Paia io tatou tagata, e maua ai lo tatou malosi, e faatuputeleina ai le ola faatuatua, i ituaso o tofotofoga. Ina ia tatou faatuatua pea i le Alii, e manuia ai le alofaiva o lana aufaigaluega galulue, pe a feagai ma mafatiaga ma puapuaga. Aperila 17 – 23, 2016 Tusi Faitau Salamo 84: 5 – 7 Manatu Autu Savaliga i le vanu o Peka. Faafetai: Ona e ui e i ai pea tiga ma loimata o puapuaga ae o loo tupu pea lo matou faamoemoe, aua o loo ia te oe lo matou malosi. Ona e ui i le faalaulautoafa, o ala o loo matou savalia i le olaga nei, a ua faapuna e Keriso le vaiola i talatu o le oti, ua matou maua ai le malosi e tupu pea, e ala i lona manumalo. Ona ua mautinoa io matou loto uma, e ala i le faatuatua, e tumau pea lo matou manumalo i fili uma, auā e te le tuulafoaiina i matou. Faatoesega: Ona ua fano i le ala o matou loto, i le savaliga i le vanu o Peka, i lo matou ola faatuatua itiiti, ma le palaaai e feagai ma lu’itau o le olaga. Ona ua le taulau o faamoemoega o ni isi, oo matou uso ma tuafafine, i le latou savaliga mo lau Afio, ona ua fai i matou ma vanu, e faalavelaveina la latou taumafaiga. Ona o le matou femoumoua’i ma fiugofie, pe a matou fetaia’i ma puapuaga ma faigata o le ala. Manaoga: Ina ia fesoasoani mai le Alii, e faatupu lo tatou malosi, i le tatou savaliga o faaauau nei. Ina ia taitoalua mai lona Agaga Paia i lo tatou vaivai, ina ia mafai ai ona tatou tufitaufao uaga, o faamanuiaga mai le Alii. Ina ia a’oa’o mai mo i tatou uma le loto maualalo, e faigofie ai ona tatou tausoa faatasi tiga o le ala i Peka, ma tatou taunuu uma ai i Siona, i le mamalu o le Atua.


10

Aperila 24 – 30, 2016 Tusi Faitau Mataio 21: 33 – 46 Manatu Autu O faafitauli o le seleselega. Faafetai: Ona o lona le tuusaunoaina, oi tatou lana tovine i le lalolagi nei. Ona o loo ia faasūsū mai pea i le sau o le ola, ma faatōtō mai uaga o faamanuiaga i soo se auala, e faatumauina ai le lauusiusi ma le lanu lauava, o le soifua manuia o tagata uma. Ona e faamaoni pea le Atua e faalelei ma teuteu lana tovine, ina ia fua mai ini fua matagofie, e faafiafiaina ai lona finagalo paia. Faatoesega: Ona o le lē faamaoni o lo tatou ola, e avea o ni auauna galulue mo Ia, i lana tovine. Ona o lo tatou ola fiapule, faasiliaupule ma le teepule, ua fai ma faafitauli o lo tatou ola ofoina atu, ma ua le maua ai ni fua lelei e viia ai le Atua. Ona o le ola agasala, ma le manao tele ua faaseseina ai le tatou vaai, ma i’u ai ina tatou faasatauroina lo tatou Matai. Manaoga: Ina ia faaolaina i matou uma i lou alofa, e fesoasoani i le maaleale o lo matou ola ofoina, e galulue mo lau afio. Ina ia gaua’i o matou loto i lau Afio, ma fua tele mai atina’e a o matou lima, e viia ai lou lava suafa mamalu. Ina ia avea i tatou uma ma vine, e fua tele mai i mea lelei, auā se manuia o aiga o nuu ma ekalesia, ae faapea foi i le malo ma le atunuu. Me 01 – 07, 2016 Tusi Faitau Esekielu 37: 4 – 6 Manatu Autu O le Atua e ola ai ou ivi. Faafetai: Ona ua tatou mautinoa, o loo i le Atua lo tatou ola. Ona ua lololo o tatou ivi i le ola fou, ona o le manumalo o Keriso le Alii o le ola, na Ia toe faatumauina mea uma, na mamago i le agasala, e liua o ni foafoaga fou i lona alofa tunoa. Ona ua faaali manino mai lava, mo i tatou uma le fanau a tagata, ua na o le Alii lava le Atua, tatou te maua ai le ola ma maua atili ai lava. Faatoesega: Ona ua tele ola ua mamago ivi, ina ua faatuatuana’i i Lē e ou le mānava ola, o le Atua lea. Ona ua faavaivaia le ola tauivi, ona ua lamala lo tatou siosiomaga, i le itu faaleagaga. Ona ua tele ina faagalegale oti lo tatou ola, ina ua le atagia le Atua o le ola, i totonu o o tatou tagata. Manaoga: Sei toe faamalosia mai o matou ivi, ma mānava mai le mānava ola i o matou poga’iisu, e faaauau ai le tautuaina o lau Talalelei i le lalolagi nei, ma saga faaolaolaina ai lau Ekalesia. Ina ia matou ola pea ma le faamoemoe o lau lava Afio, e te faatumauina lo matou ola faafouina i mea uma. Ina ia manino pea ia te i matou i aso uma, e leai lava se mea e tasi e faigata i lau Afio, auā o lou mana e faigofie ai mea uma.


11

Me 08 – 14, 2016 Tusi Faitau Tanielu 3: 16 – 25 Manatu Autu Tu mo lou Atua. Faafetai: Ona o lo tatou Atua, o loo tu mua pea o Ia i lana ta’ita’iga alofa, mo i tatou o ona tagata faatuatua. Ona e ui ina tatou fulitua ma tuulafoa’i ia te Ia, i le tele o taimi o lo tatou ola, ae tumau pea lona alofa ma lona faamaoni, mo i tatou o lana fanau. Ona o lana faaolataga ua mae’a saunia, o le faamaoniga lea o lona alofa faavavau mo le tagata, e tumau mo ia ma le lē faagaeetia. Faatoesega: Ona ua na ona matou iloa lau Afio, a ua matou le mulimuli ia Iesu. Ona ua tele ina laveia i matou i le fefe, pe ā lutia i faigata o le ola ofoina atu, ma matou faafitia ai lau Afio. Ona o le oge o lo matou ola faatuatua i lou faaali mai, ua avea ma ala ua femoumoua’i ai ma le tumau, lo matou loto talitonu i lau Afio. Manaoga: Ina ia faia i matou o ni poutu, mo au feau ma au galuega, i aso uma o totoe o lo matou ola. Ia faamanuia lau Afio i e uma ua tumua i mea lelei, mo le manuia o aiga nuu ma le Ekalesia. Foa’i mai le lototele matou te tutu faatasi ai, e atia’e lau Talalelei. Ia manuia le tauaofia o le Fono Tele, ia tumau mai lou alofa. Me 15 – 21, 2016 Tusi Faitau Mataio 13: 31 – 33 Manatu Autu O le malosi na te suia mea. Faafetai: Ona o le Agaga Paia ma lona malosi, o loo suiga malie ma lagatonu ai faatinoga o o tatou tiute, mai lea aso i lea aso. Ona o lona malosi lilo, e ui ina le vaaia, ae ogaoga lona pa’i mai i o tatou loto, e tupu ai lo tatou mautinoa. Ona o Iesu Keriso le Alii o le ola, e le’i mataofia e le tuugamau lona malosi, na Ia toetu manumalo ai mo le faaolataga, o tagata na malaia i le agasala. Faatoesega: Ona ua le atagia i lo tatou ola, ni suiga lelei mo Keriso ma lona malo, ina ua faafefeteina i tatou, i mea e leai se aoga o le lalolagi nei. Ona ua na ona ta’u o i tatou o tagata o le malo o Keriso, a ua tatou le galulue malosi, mo le tupu talaulau o lana talalelei. Ona ua tatou lafoa’i le Atua, ma lona mana silisiliese i le tele o taimi, a ua tatou faamoemoe ma faalagolago, i lo tatou lava malosi ma le atamai faa-le-tagata. Manaoga: Tatou faatoga pea mo lona mana tatou te auauna ai mo ia, ia faatuputeleina ai, lo tatou malosi faa-le-faatuatua i taimi uma. Ina ia faailoa mai ia te i tatou e le Alii, mea lilo o lona malo, ia malaulau ai lo tatou ola, e faia mea silisili ona lelei, mo lona viiga. Ina ia faaaupegaina i tatou uma ma a tatou fanau, e le malosi o le mana silisiliese o le Atua, e le mafai ai e le fili ma ana faaosoosoga, ona manumalo i lo tatou ola.


12

Me 22 – 28, 2016 Tusi Faitau Faamasino 14: 8 – 9 Manatu Autu E suamalie le manumalo. Faafetai: Ona ua matou a’ai maoona ma inu malie, i le suamalie o le faaolataga i le manumalo o Keriso, i le oti ma le tuugamau. Ona o faalumaga o mea lelei uma, ua e laulauina mo i matou, i manuia ua matou talisapaia i aso uma. Ona o le manumalo o Iesu Keriso, i le oti ma le tuugamau, o le atoaga lea ma le taunuuga o le alofa o le Atua, mo i tatou o le tagata agasala. Faatoesega: Ona e ui ua Ia aumaia mo i tatou, mea lololo ma le suamalie mo lo tatou ola, ae o loo tatou faainumia pea lo tatou Alii, i mea sili ona oona, ona o lo tatou ola agasala. Ona ua tatou mamafi e talileleia, le tautiga o isi tagata mo i tatou, a ua tatou leiloa lava ona faafetai i ia mea. Ona ua tatou le tofo i le suamalie, o i’u o a tatou tauiviga, ina ua tatou to’ilalo i le fili, ma mea oona. Manaoga: Ina ia nanea i ou fofoga i le lagi, lo matou ola finafinau mo mea lelei, e faamanuiaina ai lau feau ma lau galuega. Ina Ia matou fiafia e ofo atu i matou, o ni taulaga e suamalie, mo le ola o isi o matou uso a tagata. A’oa’o mai ina ia matou lototetele, e fesaga’i ma le fili, ma ia matou manumalo ai, e ala i lou faatasi mai. Me 29 - Iuni 04, 2016 Tusi Faitau Galuega 6: 1 – 2 Manatu Autu O le limalima faatasi e manuia ai galuega. Faafetai: Ona o galuega a tua’a ua lagomau mai tiasa, na laga ai lo matou to’ilalo ma aumai le sa’olotoga, mo o matou tagata. Ona o la latou tofa ma le faautautaga, na lalaga faatasi i le galue mai o lou Agaga, lea ua matou sapi ai nei i faamanuiaga. Ona o le faatofalaiga a le au faatuatua, ua a’oa’oina ai i matou i le ola galulue faatasi, le ola e fetufaa’i, ma le ola fegalegalea’i mo mea lelei. Faatoesega: Ona ua le atagia le limalima faatasi i faatinoga o feau, ona ua osofia i tatou i le ola fevaevaea’i ma le manatu faapito o le tagata mo ia lava. Ona ua tatou galulue ma le faamoemoe i lo tatou lava malosi, e aunoa ma le faalagolago atu i le mana o lou Agaga Paia. Ona ua saili lava le manuia o le tagata ia, e aunoa ma se vaai alofa i le Atua, ma le isi ona uso a tagata. Manaoga: A’oa’o mai ina ia tōtō i o matou loto uma, le taua o le tūtū ma galulue faatasi, i le filemu ma le fealofani. Ina ia ta’ita’i ma faasino mai e lou Agaga, a matou mea uma e fai, auā e leai se mea matou te mafaia, pe a aunoa ma lou faatasi mai. Ia faamanuia ia Samoa ma lona malo tutoatasi, ia atagia le limalima faatasi o ona ta’ita’i ma tagatanuu, e saili manuia au i luma, mo a taeao.


13

Iuni 05 – 11, 2016 Tusi Faitau Luka 24: 28 – 29 Manatu Autu Faaafe Iesu i lou fale. Faafetai: Ona o lona auai mai i lotoifale eseese, o e ua talitonu ma faatuatua i lona faaali mai, ua manuia ai mafutaga i aiga, totonu o nuu ma le ekalesia. Ona e le’i sopoloa lana malaga mai le lalolagi agasala, auā na Ia afe ane ma faaola, i lona toetu mamalu. Ona o lo tatou Alii lava na fetalai, ai sē tatala mai, ou te ulufale atu ma talisua faatasi ma ia. Faatoesega: Ona ua atagia io tatou olaga i aso faisoo, le lē iai o Iesu i totonu o o tatou fale. O le faapogai lea o le tele o faafitauli, ua alia’e i mea nei o mafutaga, ua malepelepe ulugalii, ua masesei matua ma fanau, ua sii le ta o le uso I le tasi uso, ua oo lava i le Ekalesia, ua le atagia ai le fealofani e pei ona ia finagalo ai. Ona tatou te fiafia e faaafe satani i o tatou aiga, ae tatou mumusu i le Alii lo tatou Faaola. Manaoga: Ina ia avea pea Iesu ma malo faaaloalogia i o tatou aiga, na te faamanuiaina fuafuaga ma faatatauga, o lavasiga foi ma faamoemoe mo le ola lelei. Ina ia afio mai lo tatou Alii, na te fonofono i tutulu o o tatou fale, ma aumai le filemu i o tatou anofale. Ina ia tatou nonofo ma mau faatasi pea ma Iesu, i aso uma o lo tatou ola. Iuni 12 – 18, 2016 Tusi Faitau Salamo 1: 1 – 6 Manatu Autu Ia fua tele mai. Faafetai: Ona o le ola manuia o ou tagata faatuatua, i le tafe mai o le agalelei o le Atua. Ona ua tatou malilie i le mutimutivale o lona alofa, o i’u ia o le galue mai o lona Agaga Paia. Ona ua tatou ola lauusiusi ma ola mafala i ana faamanuiaga, o le faaolataga lava lea na Ia saunia. Faatoesega: Ona ua faalautagitagi, ma ua le fua mai i o tatou olaga ni fua lelei, ina ua tatou saili i le puna e mate. Ona ua taaaluga a’a o lo tatou ola faatuatua, ua aliali foi le mativa o lo tatou ola faaleagaga, ina ua tatou fiafia i le lalolagi ma ona tu’inanauga. Ona ua tatou le fua mai i fua o le faatoaga a le Atua e faafiafiaina ai lona finagalo, ma fia silasila mai i ai. Manaoga: Ina ia iai Keriso i lo tatou ola, ona mautinoa lea ua olioli lo tatou faamoemoe, auā o Ia lava tatou te fua tele ai. Ina ia sasaa mai lana amiotonu, e toe ola lelei ai lo tatou faatuatua, ia fua mai ai ia ta’iselau, fua o lo tatou faamaoni. Ina ia tatou ola mafala, ma falala solo o tatou lala o le alofa, e fai ma mapusaga mo tagata uma o mafatia, ma fia maua le faaolataga a Keriso.


14

Iuni 19 – 25, 2016 Tusi Faitau Efeso 5: 15 – 20 Manatu Autu Savali lelei ma le Atua. Faafetai: Ona ua mautinoa ua manuia le tatou savaliga, ua lagatonu foi i’u o a tatou feau, e aulia mai lenei vaega o le tausaga, ona sa tatou savavali faatasi, ma le Alii o le filemu. Ona o le Alii lava sa faatonu folau i le ala, i lo tatou a’ea’e ma le ifoifo, i le laulelei fo’i ma le lauleaga. Ona o le mana silisiliese o le Alii lo tatou Atua, e mautinoa ai lo tatou saogalemu ma le manuia, pe a tatou faamaoni ia te Ia. Faatoesega: Ona ua tatou soona savavali i le ituaso e maua ai lo tatou malosi, ua tatou le manatua ai le ta’ita’iga a le Agaga Paia. Ona ua tatou lē fia tausisia, ala ua faasino mai e le Alii, ina ua tosina o tatou loto, i ala o le lalolagi. Ona ua avea le oa ma le tamaoaiga o le lalolagi, ua tatou maua mai i ala pi’opi’o ma le taufaasēsē, ua tatou le fia savavali faatasi ai ma le Alii. Manaoga: Ina ia faailoa manino mai pea, e le Agaga Paia le ala tonu, e tulimata’i ai faamoemoega lelei, e soo se Kerisiano faatuatua. Ina ia foa’i mai le mautinoa i o tatou loto uma, tatou te savavali ai ma le fīfīlemu, ma le olioli i le Atua.Ina ia aua lava ne’i tuulafoaiina i tatou e le Atua, a ia tatou savavali faatasi pea ma Ia, ma puipui ma lavea’i mai i lo tatou ola. Iuni 26 – Iulai 02, 2016 Tusi Faitau Filipi 2: 25 – 30 Manatu Autu Ua manaomia Epaferoti. Faafetai: Ona ua a’oa’o mai le lototetele, o soifua o e na mua i malae i lona finagalo, na faamaite ma faafailele ai, lo tatou ola faatuatua i le Alii, i le faatinoga o a tatou feau. Ona ua tatou mautinoa, o lona Agaga na ia i latou, ua ia i tatou foi lea, ua aveesea ai le le mautonu, o fesoua’iina ai le lalolagi o le fanau a tagata. Ona o Iesu Keriso lo tatou Alii, na Ia lē faapelepele i lona soifua, ina ia fai meaalofa ai mo i tatou, i le faaolataga. Faatoesega: Ona ua le atagia i o tatou olaga, le uiga faa-Epaferoti, ina ua tatou fiafia e galulue na o le taui, ma mea tatou te maua mai ai. Ona ua tatou faapalapala foi, i tiute lelei e ao ona faia mo isi, ina ua atumatagi o tatou loto, i tiga ma faigata o le avea ma soo. Ona ua tatou mumusu e tigaina, ma mafatia mo le Alii, a ua su’e ai a tatou mea, i lona finagalo paia. Manaoga: Ina ia aumai e le Alii le lototele ma le lotolelei, e faatino ma faaauau ai a tatou feau. Ina ia foa’i mai mo i tatou uma le malosi, e tupu ai lo tatou maelega mo mealelei, i soo se faatinoga tatou te fai. Ina ia a’oa’o mai lona Agaga ia te i tatou, ia tatou maua uma le loto maualalo i a tatou aiā tatau, tatou te maua ai le onosai faapei o Epaferoti, e faatino ai lo tatou valaauina. Iulai 03 – 09, 2016


15

Tusi Faitau Kalatia 5: 16 – 26 Manatu Autu Ia fua mai i olaga ma auaunaga a lana Ekalesia fua o le Agaga. Faafetai: Ona o le tumu ma le osaosa, o le tamaoaiga o fua o le Agaga Paia, ua maua e le au Kerisiano o ē ua talia Iesu Keriso, le Alii ma le Faaola i o latou olaga. Ona o le faaaupegaina o le Aufaigaluega ma lana Ekalesia paia i fua o le Agaga, aua le talaiina o le Talalelei, mo lana galuega faaola. Ona o le mana lava o talosaga a le Ekalesia, ma lana tatalo faifai pea ma le lē tutaia gofie, ua faapaiaina ai ma manuia ai galuega uma, e feagai ai ma lana Ekalesia Kerisiano, i Samoa ma atunuu mamao.

Faatoesega: Ona ua le ola faapaiaina le Ekalesia ma ona itutino, ona ua le faaalia i lona ola, o lana amio ma lana galuega faaauauna fua o le Agaga, ona ua sese lana faamamafa. Ona ua tatou le faamaoni, i lo tatou valaauina faa-le-agaga, ona ua faamuamua mea tatou te manatu i ai, aemaise o le paie ma faama’imau o taimi aoga, mo suesuega ma talosaga. Ona ua faigofie ona pauu i tatou i faaosoosoga, ona ua vaivai lo tatou ola mafuta i le tatalo, ua le faapaiaina ai tafa ma agavaa ua foaiina e le Agaga Paia i o tatou tagata. Manaoga: Ina ia tatou tatalo pea ma le lē faalogologo tiga, aua e tali mai lava le Atua pe a tusa ma lona finagalo alofa, pe a tatou le faavaivai. Ina ia oa ma tamaoaiga pea, lana Aufaigaluega ma lana Ekalesia Kerisiano, i fua o le Agaga, ina ia faapaiaina ai lona ola ma ana auaunaga, i soo se tafa o Samoa ma le lalolagi atoa. Ina ia faamanuia le Atua i le Ekalesia aoao, aemaise le EFKS, ma ana feau o lenei tausaga, ma ia manatua, o le ALOFA lava o le atoaga lea o fua o le Agaga, na saunia ai e Keriso lo ta faaolataga. Ia manatua le Kolisi Faafaifeau i Malua. Iulai 10 – 16, 2016 Tusi Faitau Isaia 57: 15 – 16 Manatu Autu O le Atua ua afio ifo i ona tagata. Faafetai: Ona o le paia silisiliese o le Atua, o afio i le mea maualuga ma le mamalu, a ua Ia faafofogaina leo, o lana fanau tauivi ma afio ifo, e soifua faatasi ma ona tagata, loto maualalo ma ua salamo. Ona ua tuu ona mamalu, ae afio ifo e liutino ma militino faatasi ma tagata, ma faailoa lona alofa faaola. Ona ua taunuu le faamoemoe, o le liutino o le alofa tunoa i le afio mai o Iesu Keriso, e soifua ma maliu i le satauro, ma toetu manumalo mo i tatou. Faatoesega: Ona ua afio mai o Ia o le Atua e ofu i le matagofie, ae ua inosia ma lē talia, ma ta’u faatauvaaina, ma tuulafoaiina o Ia. Ona ua oo mai o Ia e faatu lona malo, i lo tatou lalolagi fai taua ma le lē nofo lelei, a ua tatou teena ma le talia o Ia. Ona ua leai se avanoa tatou te faatagaina ai o Ia, e nofo tupu i o tatou loto, ona ua pulea e le tiapolo ma fiafiaga o lenei olaga. Manaoga: Ina ia avea le afio mai o le liutino o le alofa o le Atua, na te vai maluina ma fofoina o tatou mafatiaga, ma puapuaga o lenei ola. Ina ia tatala o tatou loto, ma faasa’olotoina e le Agaga Paia, ma ia tatou maua le ola fou ma le faamoemoe ola. Ina ia avea i tatou le Ekalesia ma ona tagata, e ala atu ai le alofa faaola o le Atua i ē matitiva, tuulafoaiina, teena ma inosia, e faaalia ai le liutino e auai faatasi ma tagata, o manaomia le fesoasoani. Ia manatua A’oga uma a le Ekalesia i talosaga. Iulai 17 - 23 2016


16

Tusi Faitau Luka 14: 28 – 30 Manatu Autu Fai ia mafai, ona lē faitioina lea Faafetai: Ona o le taua o tofi ma galuega uma lava faa-le-Talalelei I totonu o le Ekalesia, ma le Malo o le Atua,ua valaauina I ai o tatou tagata faatauvaa e le Atua. Ona o afioga paia a le Atua, ua faatonuina ma a’oa’oina ai o tatou tagata galulue, ina ia faia mea uma i le faamaoni, ma ia taunuu i le manuia. Ona o le finagalo lava lea o le Atua, e atia’e tagata mo le Atua, e pei ona faia e Keriso mo le lalolagi, ma ua tuuina mai i ona tagata, e galulue faatasi ma le Atua, e i’u ai i le manuia ma viia ai lona suafa. Faatoesega: Ona ua tatou faatalale ma manatu māmā, i o tatou tofi ma valaauina, ua fai fo’i tau ina faataunuu, ma ua aunoa ma le faamaoni. Ona ua le mamafi ma faataua ia i tatou, le manatu mamafa i o tatou tagata faigaluega, o auauna a le Atua mo tagata, aua e le o aunoa ma faitioga. Ona ua tatou fiafia e amata ma atiae, ae faigofie ona malepe, ona ua tuulafoai ma soona fai, ona ua le lelei ona atiae ina ia tumau. Manaoga: Ina ia saunia i tatou uma e le Matai o le galuega mo o tatou faiva, ma ia amata i le manuia ma i’u ai lo tatou ola, a’o tatou lotomaualalo pea. Ia saunia pea e le Atua ma tofia e Ia nisi, latou te atiina a’e pa o ona maota ina ne’i soona fai, a ia lelei ona atiaeina ma ia tumau. Ina ia atiina a’e faatasi ma le Atua le galuega, e ui ina itagia outou e le lalolagi, ae aua le faavaivai pe faato’ilaloina i tatou e le tiapolo, ae galulue fiafia ma faamalolosi pea, se ia i’u ou faiva ma le manumalo. Iulai 24 – 30, 2016 Tusi Faitau I Tupu 22: 1 – 8 Manatu Autu E faigata le galuega a le Atua. Faafetai: Ona ua ofoina mai e Iesu aupega e fai ai lana galuega, e ui ina faigata ile tele o faafitauli, ae ua māmā ona o le fesoasoani mai, o le mana o lona Agaga Paia. Ona ua avea le faigata o le galuega a le Atua ma soo se tiute, ua unaina ai i tatou e faaaoga tatau o tatou taimi ma aso, e tapenaina ai i le nofo sauni i taimi uma, ma faifai pea ma faamasani i le suesue ma tatalo, aua o le savaliga ma le sailiiliga lava, o le olaga atoa. Ona o le loto toa ma le lē solomuli, o le aufaigaluega ma le ekalesia i o tatou tofiga, e ui ina itagia, inosia, tauvaleaina ma tulia, ae onosai ma talia pea ona o le finagalo o le Atua. Faatoesega: Ona o le ita mai ma le faalavelave mai o tagata amio leaga, aemaise le palaai ma le leai o se lototele, e tautino ma faatonu amio, ma faiga le amiotonu a tagata. Ona oo tatou tagata faa-le-lalolagi ma le agasala, i le ola fia taui ma sui, ona o le ita mai o le lalolagi. Ona ua tatou fefefe ma solomuli, e tautino le finagalo paia o le Atua i tagata uma, ina ne’i itagia ma tulia i tatou e tagata o nuu, ona o lo tatou faamaoni i lo tatou Matai, na valaauina i tatou. Manaoga: Ina ia faamalolosi pea Faifeau ma le Ekalesia, e galulue faatasi ma femalamalamaa’i, i le uiga o le galuega faaola a le talalelei, ma faatuatua pea i le mana o le Agaga Paia, e i’u ai i le manuia le galuega a le Atua tatou te faia. Ina ia faamanuia le Atua i ta’ita’i o le malo, nuu, o aiga ma aulotu, pe a latou tautala ma le faamaoni, ma manuia ai le galuega a le Atua, ma ia tupu ai foi lo tatou loto faamaualalo, ne’i o tatou faia se


17

mea, e le finagalo ai lo tatou Tama faalelagi. Talosia le aufaigaluega uma a le Ekalesia, ina ia faamaoni i tiute ma faiva. Iulai 31 – Aokuso 06, 2016 Tusi Faitau Iosua 1: 1 – 8 Manatu Autu Ia tatou faamalolosi ma loto tetele pea. Ona o le faamalosi mai o le Agaga o le Atua, ao tatou tausinio pea ma le loto tetele e le aunoa, aemaise ituaso pogisa e ufitia ai tatou, i puapuaga ma faafitauli ogaoga. Ona o le upu tima’i ma faatupu faamoemoe o le ola i le tino, mafaufau ma agaga i faigata ma lu’itau o le ola, ua le afaina ai le faamoemoe ma le agaga, o le Kerisiano faatuatua. Ona o le faamalosi ma le faalaeiau a le talalelei, ua aoga mo lo tatou ola faimalaga, o le faatuatua o alu nei e le toe fo’i i tua, ae aga’i pea i luma i lona taunuuga, ina ia manuia i le faamalosi mai o le Atua, e pei ona a’oa’o mai e Iesu i lona soifuaga atoa. Faatoesega: Ona o lo tatou ilitata ma faalogologo tiga i lu’itau o le ola, ona o lo tatou vaivai faa-le-faatuatua, ua le au lagonaina ai le a’oaiga o tatou olaga i mea tutupu, ma tatou malamalama i ai i vaega eseese, o fuafuaga paia ma le poto a le Atua. Ona ua tatou faiaina ma toilalo i le ola faavaivai, ona ua tatou taumamao ma le Atua i le tatalo, aemaise ua leai se agaga taumafai mo se isi tauiviga, e toe tu i luga i soo se taimi e paū ai. Ona ua avea le mativa ma le utiuti o le faasoa, ua vaivai ai ma solomuli le ola tautua o le Ekalesia, ona ua leai se lototele e faamalolosi ai, mo mea silisili e viia ai le Atua. Manaoga: Ua na o le tatalo ma le anapogi tatou te malolosi ai, pe a tele tiga ma puapuaga, ma faigata o le galuega. Ina ua manuia faiva o le ekalesia i le faamalosi mai o le Atua, ao malaga le ekalesia agai i luma i le faatuatua, ma le loto maualalo ma usiusitai i le faasinoga a le Tusi Paia. Ina ia faamalosia le molimau a le Aufaigaluega, ao lu’itauina e le malosi, o fesuiaiga tetele o mafaufauga o le lalolagi, ma le matamataita o le tiapolo. Aokuso 07 – 13, 2016 Tusi Faitau Teuteronome 34: 5 - 12 Manatu Autu Ia paū se toa, tula’i mai se toa. Faafetai: Ona o tofiga ma valaauina o mātua ma tuaā o Samoa, ua tofafā mai atu tia, sa latou asaina mai le gasu o le taeao i faiga malo, aemaise foi i le talalelei, ua fai lava lea ma o latou sao taua, e manatua ai pea i latou. Ona o lo latou lototetele ma le lē solomuli gofie, i mea faigata sa feagai ma i latou, ma ua fai lea ma lu’i i o tatou augatupulaga, ma tupulaga fai mai o le lumanai o Samoa, ma le Talalelei. Ona o le anoanoa’i o ana meaalofa, e faaa’upegaina ai toa manumanu o lana Talalelei, ina ia fai ma faata’ita’iga ma faaa’oa’oga, mo tupulaga uma e mulimuli mai, e oo lava i le gataaga. Faatoesega: Ona o loo maua pea i nuu, aulotu, ekalesia ma le malo, finagalo maemaeā ua fai ma aloiafi fitivale, o le ola papa’u ma le poto e le’i lelei ona iloiloina i le soifua fetaia’i ma faigata. Ona ua silafia uma lava le faa-gasegasea o le Ekalesia, ma ua tatau ona iloa le taimi e faase’e tuagalu ai, ae faasolo ane le au malolosi e fai


18

le galuega. Ona ua le soo le fau ma le fau, a’o le fau ma le afa, ona ua popoto ma atamamai e ua tula’i mai, ae leai se faautauta ma se fai mea tonu. Manaoga: Ina ia manatua pea i tatalo tamā o le ekalesia ma nai o latou faletua, aemaise le tuua toatasi o i latou o e sa tautiga i le galuega, ma ua mapu ma malolo i aiga, ina ia faamanuia le Atua ia te i latou. Ina ia faamanuia le Ao o le Ekalesia, i le Aufaigaluega ua tula’i mai, i lenei vaitau o le senituri lua sefulu tasi, i le faaauauina o le galuega a le Ekalesia, i Samoa ma atunuu mamao. Ina ia fesoasoani mai le Agaga o le Atua, i le faigamalaga a le au faatuatua o lana Ekalesia, i Kanana le nuu i le lagi. Aokuso 14 – 20, 2016 Tusi Faitau Neemia 5: 14 – 19 Manatu Autu O le matai tautua lelei. Faafetai: Ona o le tofa mamao fetuutuuna’i a le perofeta o Neemia, ua manuia ai le galuega na ia ofo ai, e fai ma matai tautua lelei, e atia’e muamua loto ma agaga o ona tagata, auā le galuega o le fausia o pa o le aai pele o Ierusalema. Ona o tatou mātua ma tuaā, na latou asa le vao filifili o faigata, ma latou saili malo mo so tatou manuia, e ala i le latou tautua mata vela, lea ua tatou aeae ma manuia ai. Ona ua tu mapu’e ma matila pea, le maualuga ma le tu tasi, o le faata’ita’iga silisili ua tuu e Keriso, e fai ma fu’a taualuga o le tatou tautua lelei, i soo se vaega o le olaga. Faatoesega: Ona ua iloa ma silafia faaletonu e tele, o e na mua i malae i tofiga ma galuega, ae a tatou pale mai foi, ua sili atu le leaga o le o i ma le mapu i tiga, o e o i lalo o le tatou ta’ita’iga. Ona o le avea oi tatou ma ta’ita’i, ma matai tautua le faamaoni i nuu ma aiga, ua oo lava i totonu o le galuega a le Atua, ua malosi le fai manatu, ae pi’opi’o ma fai mea leaga. Ona ua feū o tatou taliga e faalogo, pe a ta’u mai e le lauga lo tatou pi’opi’o ma le lē faamaoni, a ia tatou tatalo pea e pei o le tatalo a Neemia. Manaoga: Ina ia alofa mai le Atua pulepule tetele, tatala mai puipui o le lagi ma liligi faaua ifo manuia, ina ia le ofi ai ou fale apitaga, ia fau ma soloi ma tumu ai ou aupa, ona o lau tautua le Ekalesia pele, i Samoa ma atunuu mamao. Ina ia alofagia pea e le Atua le Aufaigaluega Faifeau, A’oa’o, Tiakono, o faletua ma fanau o tautua ma galulue, e atinae le tino o Keriso, aemaise aiga nuu ma le malo. Ina ia manatua pea o le matai o le matai lava, o le auauna o le auauna lava, ao la Iesu, O le tagata ua tagata lava, ona ua atagia ai foliga o le Atua. Aokuso 21 – 27, 2016 Tusi Faitau Esoto 2: 1 – 10 Manatu Autu E talepe e le alofa moni tuaoi tagata. Faafetai: Ona o le alofa le faatuaoia o le Atua, ua aiga ai tagata uma, ma fesootai ai soo se tagata e leai ni faiā, aemaise o taimi o puapuaga, e faatino ai le alofa moni. Ona o le alofa ma le malamalama o le afafine o


19

Farao, ina ua ia faalogo i le leo o le tagi fiaola a le tamaitiiti Eperu, na liu suavai ai lona loto i le alofa naunau, ina ia ola le tama ua na maua. Ona o le alofa moni faatina, ua na talepe ma sosofa, tuaoi tagata o le Aikupito ma le Eperu, ina ia faasaoina le tama na toina a’e nai le vai, aua le faamoemoe o le Atua mo ona tagata. Faatoesega: Ona ua avea tuaoi tagata i totonu o le ekalesia, ma auala ua faailoga ma faapito tagata ai le alofa, ma ua fua foi i ai ma le faatinoga o lo tatou valaauina. Ona ua mafuli le alofa atu ina ua alofaina mai, aemaise ua taui le alofa i le alofa, ma ua fua pau na o i latou e maua mai ai se mea. Ona ua iloga lava le matuiā o le tali tualima, ma le faailoga tagata o le ‘Au-kerisiano, i le leo ma le tagi mai o uso a tagata mo se fesoasoani, a ua tali i le teena ma le tualima Manaoga: Ina ia fesoasoani ma agalelei mai le Atua i lana Ekalesia, ia faatupuina le alofa i o tatou tagata lotu, ma ia avea pea a’oa’oga o lo tatou Alii, e faavae ai lana galuega tala’i, ma lana tautinoga faa-le-faatuatua. Ina ia le pa puipuia ma faatulafonoina le alofa, o loo taatia ai le faamoemoe o le Talalelei o le faaolataga, ina ia lavea’iina ma fa’a-saolotoina, le fanau a le Atua o fiaola. Ina ia avea le alofa faa-le-Atua na faaalia ia Iesu Keriso, e fai ma sootaga o le leleiga, o le fanau a le Atua. Aokuso 28 – Setema 03, 2016 Tusi Faitau Luka 22: 24 – 38 Manatu Autu O le tagata sili i le malo o le Atua. Faafetai: Ona o le faasaoga sa’o ma le faasinoga tonu, ua aumai e Iesu Keriso le faata’ita’iga maualuga ma le moni atoatoa, e ala i le auaunaina o le Atua, atoa ma le uso a tagata. Ona o le uiga moni o le ola auauna i totonu o le malo o le Atua, o le matuā alu ifo i tulivae o le loto maualalo, ma faalagolago tasi e tuuina atu atoatoa i le Atua, e faataunuuina lona finagalo. Ona o faamanuiaga ua maua, e le auaunaga a le Ekalesia Kerisiano, ona o lona saili malo i le Atua ma lana Talalelei. Faatoesega: Ona o le tele oo tatou uiga vaivai faaauauna a le talalelei, e pei o le mitamitavale, fia viia ma le loto fefete, ua maua ai le toatele o le au Kerisiano lē faamaoni. Ona ua tupu soo i mafutaga a le aukerisiano, le fefinaua’i i tulaga ma tofiga maualuluga, ma ua nunu ai le toau, ma lē maua ai le fealofaniga e tutu ma galulue faatasi ai. Ona o le toatele o le aufaigaluega ua luluina e le tiapolo, ma ua malili ai le ola faatuatua, ma iuvale ai le faamoemoe, se auauna ai mo le Atua. Manaoga: Tatou tatalo pea i le Atua e le aunoa, ona ua tele mea faafiafia ma faatosina loto, ua tofotofoina ai lo tatou ola faatuatua, io tatou tofiga ma valaauina mai le Atua. Ona ua pei Satani o se leona tagi taamilo, e saili ni isi e faaumatia, ona ua faatamala ma mafuli le ekalesia, i fiafiaga ma tamaoaiga o le lalolagi. Ina ia mafuta pea le ekalesia, i lana tatalo e le tutaia gofie i se mea, tusa lava poo le a le faasagatau mai, ma le faifai mai o le lalolagi, tatou te le tali atu lava i se pelu o le taui ma sui, ao le alofa ma le loto faamagalo, ma le faamanuia atu.


20

Setema 04 – 10, 2016

Tusi Faitau Ioane 13: 1 – 11 Manatu Autu E mafai pe ā femulumulua’i i le alofa. Faafetai: Ona ua silafia e Iesu le Alii ma le Faaola, le ala manuia ua ia faailoa mai i tagata uma, i le aoga ma le taua o le ola femulumulua’i faatasi. Ona na o le pau lea o le auala e maua ai le saogalemu, ma le fe-talitonua’i o le fanau a le Atua, ma galulue faatasi ai i le alofa ma le loto maualalo. Ona o faamanuiaga tatou te maua, pe afai tatou te faia mea uma, i le alofa femulumulua’i. Faatoesega: Ona ua tatou mumusu e faia lea galuega maualalo, ona tatou te le fia toilalo i le vaaiga a le lalolagi. Ona ua tatou mananao e mulumulu o tatou vae e tagata, ae le mafai ona tatou faatinoina i nisi, ona o o tatou manatu faasausili ma le faamaualuga. Ona ua tatou faailoga tagata e mulumulu, ua na o i latou e maua mai ai se mea, ae le taulia le au matitiva ma faatauvaa. Manaoga: Ina ia tatou maua uma le loto faamaualalo, a’o tatou feagai ma tiute, aua o loo fesili pea Iesu Lē o loo soifua, po ua tatou malamalama ea, i le mea na Ia faia mo i tatou? Ina ia tatou iloa ona usiusitai ma le loto maualalo, ma femulumulua’i o tatou vae, ina ia māmā mo le talaiina o le Talalelei, ma maua ai le mafutaga ola ma Keriso. Ia alofagia e le Atua tiute fai a le Ekalesia, ma ona itu tino uma, ina ia galulue faatasi e femulumulua’i i le alofa faa-le-Atua, aua se manuia o tagata uma, ma le viiga o lona suafa paia. Setema 11 – 17, 2016 Tusi Faitau Roma 10: 14 – 21 Manatu Autu E le oo le Talalelei e aunoa ma oe. Faafetai: Ona o ulua’i misionare, o tuaā ma mātua, na avea ma muaau o le talalelei, na latou faia le faataitaiga lelei i o tatou tupulaga, ua mu ai loto ma alolofa ia Iesu, ma ofo atu ai le ola, e tala’i le Tala e lelei. Ona o le mana lava o le Agaga Paia ua ofoina mai e Keriso, e fai ma aupega e fai ai, le galuega faaauauna a le au tala’i. Ona o le soifua aoga ma le saili malo o le Ekalesia, o le faalauteleina o le tala o le faaolataga, ua faa-aupegaina ai ana faifeau aua lana misiona, ia maua ni tagata mo le Alii ma lana faaolataga. Faatoesega: Ona ua tatou lē faamaoni, i o tatou tiute ma valaauina mai le Atua, ona ua tatou manatu faa-le-tagata, e alofia le faigata ma le tigaina, ona o le manumanu i le ola ma le fefe i le oti. Ona ua ola faatalanoa ma le fiafia e auauna atu i nisi, ua tatou le asiasi foi i tagata puapuagatia, ma mama’i o tatou nuu ma aulotu. Ona ua fua pau ma gata lava, i ou lotoifale lau galuega tala’i, a ua e le sopoia atu isi tafa, o e o loo manaomia le Talalelei. Manaoga: Ina ia faaosofia pea, finagalo o faifeau ma tagata lotu uma o le EFKS, e ofoina atu i tatou uma, e faaoo ma momoli le feau o le Talalelei, i nuu ma atunuu uma o le lalolagi. Ina ia tupu pea ma lauolaola le Talalelei, i le galuega a le EFKS ma ona tagata galulue, e le gata e manuia ai si o tatou atunuu, ae faateleina ai pea le viiga o le Atua. Ina ia ta’ita’ia e aao alofa o le Atua, le malaga ma auaunaga a le Ekalesia, aua lana galuega tala’i mo le lumanai, e tusa ma lona valaauina.


21

Setema 18 – 24, 2016 Tusi Faitau Mareko 10: 13 – 16 Manatu Autu O le feagaiga gausia. Faafetai: Ona o le manao o le Alii e faataua fanau, aua ua faapei i latou o e o i le malo o le Atua, ma ia a’oa’oina i le faatuatua, ma le olaga faa-Kerisiano. Ona o tautinoga a matua mataala, i le a’oa’oina o fanau a o iti, aemaise o taimi o le papatisoga, o le faavaeina ma le totoina o le fatu, mo le ola lelei o le faatoaga a le Atua. Ona a faamaoni mātua ia latou tautoga, ona tutupu a’e lea o fanau e fai ma poutūtoa o le Talalelei, ae le gata i lea, e fai foi i latou ma malamalama moni, o le Upu o le ola a le Atua. Faatoesega: Ona ua na o ni tautoga gausia, ma tautinoga le moni ua faia e mātua, ma ua matuā galo nimo lava ao tula’i i luma o le Atua, ma le potopotoga i le falesa ma folafola atu, O le a matou faia lava. Ona ua tele le mau tautoga gausia i totonu o le ekalesia, ma o le ala lea o le soli faaleiloga, o iuga ma faiga faavae a le ekalesia. Ona o le ola taufaifai, faasinosinolima ma inosia nai tamaiti, pe a ulavavale pe i ai foi ni mea le lelei, e tutupu i o latou olaga, ma ua le alofagia. Manaoga: Ina ia faamaoni le Ekalesia i lana tautinoga ma lana tautoga, ua ioe i ai i luma o le Atua ma le faapotopotoga. Ina ia le mapu pea le taualaga ma le faamanatu, a le Aufaigaluega e faamalamalamaina mataupu faavae faa-le-agaga, o le Ekalesia i ona tagata tapua’i, aemaise ia taumafai e galulue malosi, ina ia ola fiafia ma manuia fanau. Ia talosia le tele o aiga kerisiano ua malepelepe, ona o le ola agasala ma le malosi o le fili, ina ua le faamaoni tautoga sa faia, ona ua taumamao ma Iesu. Setema 25 – Oketopa 01, 2016 Tusi Faitau Mareko 6: 1 – 6 Manatu Autu O Iesu le Tufuga Paia. Faafetai: Ona o le Atua o le tufuga poto, na foafoaina mea uma ma le mataisau o le foafoaga, ina ua afio mai i lona liutino tagata ia Iesu, ma amata lana galuega i le fale kamuta, seia aulia le tolu sefulu o ona tausaga. Ona ua taupaiaina galuega uma e Iesu le tufuga, ona e taua uma tiute ma soo se galuega, e oo lava i galuega palapala, talu ai le tufuga paia. Ona sa galue Iesu i le fale kamuta, e fia fesoasoani i si ona aiga matitiva, e saili se tupe e tausi ai i latou, ina ua maliu le tama ia Iosefa. Faatoesega: Ona o le vaai faatauvaa ma le maualalo o le lalolagi, i galuega palapala ma i latou e ofu eleelea. Ona o le lē malamalama o tagata, e le na’o galuega a le ekalesia ua paia, ao galuega uma, ae le gata i lea, e leo le galuega ua paia poo le lē paia foi, ao le faigaluega. Ona ua tatou faatamala lava, i galuega ua tatou galulue ai, ma tatou tuua’i ma faitio, i le leaga oa tatou mea fai galuega. Manaoga: Ina ia galulue pea lana Ekalesia, e atiae taleni ma agavaa eseese, aua le manuia o aiga o nuu ma aulotu, faapea foi le malo ma le atunuu. Ina ia ave pea le tatou faamuamua, i le atina’e o le fale faaleagaga, o le soifua faatuatua o tagata, ae le’o le oa ma le tamaoaiga o lenei olaga le tumau. Ina ia faapaiaina pea le


22

aufaigaluega, mo lana faatufugaga mo le galuega a le Atua, ma ia tatou manatua, e paia foi le velevele vao, ma le fai faatoaga faamaoni, a le tagata tautua lotu. Oketopa 02 – 08, 2016 Tusi Faitau Eperu 10: 1 – 10 Manatu Autu O le Satauro le tau o lou Saolotoga. Faafetai: Ona o le silisiliese o le alofa tunoa o le Tolu Tasi Paia, ua avea ai Keriso ma faailoga o lona alofa le faatuaoia, ua oo lava i le satauro, e totogi ai le tau o lo tatou saolotoga. Ona o le taulaga ua saunia e Iesu e tu tasi lava, ma e le toe faaluaina i se taumafaiga lava a le tagata, ae manaomia lo tatou tali atu i le usiusitai, ma le salamo faamaoni. Ona ua manino i le Ekalesia ma i tatou uma, ua na o Iesu Keriso lava tatou te maua ai le saolotoga moni, pe a faa-afio tumau o Ia i o tatou loto ma agaga. Faatoesega: Ona o le ola masalosalo, e mafua ai ona femoumoua’i olaga o le toatele, ua galulue foi ae faatumutumulima ona fai, ona e le o ootia ma loloto le alofa i le Atua. Ona o lo tatou ola faatausuaa’i, ma ua faifai ai Keriso e le lalolagi le kerisiano, ona ua avea le satauro ma mea teufale, e faamanaia ai le vaaiga i fafo, ma ua leai se uiga moni i o tatou olaga. Ona ua le mafai lava ona faasaolotoina o tatou olaga agasala, ina ua tatou faalagolago i galuega lelei e tele, ua tatou faia. Manaoga: Ia fesoasoani mai le Agaga o le Atua io tatou loto, ia tatou iloa ma malamalama i le uiga moni, oa tatou faiga taulaga i tausaga uma, e lē ina ia faamalieina le finagalo o le Atua, a ua tatou malilie i lona alofa. Ina ia tatou ola ma le mautinoa, o i tatou o le Ekalesia ola ma tautua saoloto, ona ua fai le satauro ma Lē na tautau ai, ma oga totonu o mea lelei uma. Ina ia fai le satauro o Keriso, ma faailoga moni o le tatou saolotoga, ina ua faasatauroina ai o tatou tagata tuai, a ia viia le Atua i o tatou tagata fou. Oketopa 09 – 15, 2016 Tusi Faitau Luka 5: 1 – 11 Manatu Autu O tatou uma lava o tagata fagogota. Faafetai: Ona o le faamoemoe sili o le Ekalesia mo a tatou tupulaga, ina ia avea fanau e fai ma Kerisiano tausaafia, e iloa ona ola i le lalolagi, ma faaaoga tatau taleni ma agavaa ua latou maua mai le Atua, mo le atinae o Aiga, Nuu, Malo, ma le Ekalesia. Ona o galuega a le Aufaigaluega ma faaa’oa’oga Kerisiano, ia saunia tupulaga ia iloa ona ola fuafua, i fesuiaiga mai fafo ua oo mai, ua aafia ai o latou olaga. Ona o i tatou o tagata fagogota uma, auā o le galuega tala’i ma le galuega saili agaga ma a’oa’o atu, e le faapitoa na’o le faifeau, ae mo soo se tasi ua fai ma Kerisiano, e pei ona fetalai Iesu, “Oute faia outou ma faifaiva i tagata.” Faatoesega: Ona ua maua i faamaumauga ma tala o leitio ma televise, le faatamala o mātua ma aiga ia latou fanau, ua le o toe avea i ni aoga. Ona o nei faafitauli ua tutupu mai i tupulaga lalovaoa o le atunuu, ua fesiligia ai foi le Ekalesia, po ua fai i ai se tatou galuega fesoasoani, pe leai. Ona ua toatele mātua ua le fiafia e ave a latou fanau, i aoga faifeau ma autalavou, ona ua tafa tasi o latou loto, ia popoto ma ia maua ai ni tupe se tele.


23

Manaoga: Ina ia galulue faatasi uma itutino o le Ekalesia i nuu ma le atunuu, mo se malo Kerisiano, ina ia maua ni faifeau o ni taitai ma mātua, e faamaoni ma amio Atua, aua se lumanai manuia o tupulaga, mo nei ma a taeao. Ina ia tupu ma ola pea le faamoemoe lelei, ma le manao o le Ekalesia, ina ia faa-Kerisianoina au tupulaga, ao malaulau a’e lo latou malosi i le tino, mafaufau ma le agaga, e fai ai i latou ma ave feau o lana Talalelei i le lumanai. Ina ia faamanuia le Atua, i tupulaga lalovaoa uma o le atunuu. Oketopa 16 – 22, 2016 Tusi Faitau Faataoto 24: 15 – 16 Manatu Autu Ia e toe tu i luga i soo se taimi e te paū ai. Faafetai: I le alofa tunoa laveai o le Atua, e le mavae, e faatali pea i taimi uma mo le tagata agasala, ua toe foi atu ia te Ia ma le salamo faamaoni. Ona o lo tatou mamalu ma le tamaliiaga e le o i ai i lo tatou lē pauu, a o lo tatou toe tutu mai i lo tatou pauu, viia le Alii. Ona o le feau faalaeiau o le poto o Solomona, ina ia tatou tutu i luga mai soo se taimi tatou te pauu ai, ma savavali i luma ma vaai ia Iesu, na maliu ma toetu mo i tatou. Faatoesega: Ona ua aveeseina tofi o isi o le Aufaigaluega, ona o vaivaiga sa tatau ona alofia, ona o i latou ua faapaiaina e le Agaga Paia. Ona ua le moni le loto salamo ua tatou tautino ai a tatou agasala, ma ua taumamao ai o tatou tagata, ma le faaolataga ua saunia e lo tatou Alii. Ona e le soona aumaia e le Atua, se amataga fou i le tagata, seiiloga e faamaoni le fanaufouina, ma le faapaiaina o lona olaga. Manaoga: Ina ia tatou talitonu faamaoni i le Atua ma lona alofa tunoa, e mafai ai ona tatou savavali i luga o afi o faaosoosoga, ma manumalo ai. Ina ia aua lava ne’i faaaogaina lo tatou malosi faa-le-tagata, e faataunuu ai ni manaoga leaga, ae tau lava o mea lelei, e fiafia ma fia silasila mai i ai le Atua. Tatou tatalo pea ma le faatuatua o loo soifua le Atua, o Ia lava e fesoasoani mai ma auina mai lona Agaga, e faapaiaina o tatou tino, loto ma agaga mo Ia. Oketopa 23 – 29, 2016 Tusi Faitau Esoto 18: 17 - 26 Manatu Autu E manuia fautuaga a le au-matutua. Faafetai: Ona o le faamalumaluga ma le to’amalie o aiga, nuu ma aulotu ae a le Ekalesia, o loo leoina ma puipuia, e le leo faa-Perofeta o le au-matutua, ma toe ulutaia o le atunuu, o loo i ai le tofa loloto e to’a ai peau lagalaga, ma le tofa matua faa-le-Atua. Ona o Iesu Keriso, na faia toatasi le galuega laveai mo lo tatou faaolataga, na maliu ma toetu ma afio a’e i le lagi, o loo fautua pea i le Tama mo i tatou. Faatoesega: Ona ua mao faatuatuaina foi ni isi o le au matutua, ona ua avea foi lo latou ta’u matuaina, ua tulai mai ai nisi faafitauli le maalofia. Ona ua afaina ai le galuega a le Ekalesia, ua latou manatu o i latou lava na mua i malae, o i latou foi e i ai le pule i mea uma. Ina ia manatua pea le Aufaigaluega faifeau ma aulotu, ua afaina a latou galuega i faiga a le au matutua fiapule, ma le leai o se alofa.


24

Manaoga: Mo le galuega a le EFKS ma le Ekalesia aoao, ina ia mataala ma atamamai i le tele o tagata ola faafoliga, afaina ai le galuega a le Atua, i Samoa nei ma atunuu i fafo. Ina ia faato’ateleina i totonu o aiga, nuu ma ekalesia, le aumatutua e i ai le tofa faa-le-Atua, latou te faato’afilemuina mea uma e tula’i mai, e fevaevaea’i ai o tatou tagata. Ina ia faamanuia le Atua i le au-matutua, o tuaā sinasina o le atunuu, aemaise o tamā ma tinā o le Ekalesia EFKS, o loo punonou pea ma le lē faalogologo tiga, auā le tautuaina o le Atua ma lona finagalo paia. Oketopa 30 – Novema 05, 2016 Tusi Faitau Luka 19: 11 – 27 Manatu Autu O le Atua na foa’i mai. Faafetai: Ona o le Atua o le Matai na foai mai ma lona silafia lelei, e le tutusa le malosi o tagata uma. Ona o le atamai o le tufa mai a le Matai i le faataoto lenei. Ua tutusa uma lava tupe na tuuina i auauna e toatolu, e tofu ma le mina e tasi. Ua oo ane le uluai auauna ma le faasiliga e sefulu, ona faafetai lea i ai. Ua oo ane lona lua ma lana faasiliga e lima, ona faafetai foi lea o le matai. O loo faamanatu mai ai mo i tatou uma e ui ina eseese a tatou meaalofa, e tufa ma faasoa mai e lo tatou Matai Sili i le lagi. Ae tutusa uma lo tatou taui, pe a tatou taumafai ma le faamaoni, e galulue e faaaoga meaalofa a le Atua. Faatoesega: Ona ua le faapea le lona tolu o auauna, ua leai se faasili, leai se toese e tusa ma lona malosi, ae ua faalagolago i upu ma tala, ao aina iloa na i ai se faasili a ua ia faaaogaina, ae faamoemoe i ana upu faafiapoto e lafi ai? Ona o le ola faapalapala ma le paie, ma ua matua leai se loto taumafai, tatou te galulue ai e fai mea sili mo le viiga o le Atua, ma faailoa atu ai lo tatou agaga faafetai ia te Ia. Ona o le taunuuga ma le iuga faanoanoa o le tagata, ua foai mai i ai e le Atua, a ua suia le galuega i upu, aua e fao ese le mina ma tuli i fafo. Manaoga: Ina ia tatou galulue pea ma le loto taumafai ma le agaga faafetai i le Atua, o loo Ia aumaia ma faatuatuaina i tatou, tatou te faagaioi ma faaaoga ma le faamaoni ana meaalofa. Ina ia aua lava nei o tatou faaaogaina meaalofa a le Atua, e su’e ai so tatou manuia mamalu ma le ta’uleleia faa-le-tagata, ae tau lava o le manuia o tagata uma, ma le viiga o le Atua. Ina ia manino pea ia te i tatou uma, o le malo o le Atua e le’o le upu ma le tala, ao le malosi ma le soifua galue. Ia manatua le sauni atu o le Ekalesia, mo ana faigataulaga. Novema 06 – 12, 2016 Tusi Faitau I Timoteo 6: 3 – 10 Manatu Autu O le loto malie faa-le-Atua. Faafetai: Ona o le maua lava ma le alofa tunoa o le Atua, ua aumaia ai e Keriso le saolotoga, ma le faamoemoe lelei tatou te taliaina ai, i le agaga faafetai ma le loto ua malie, i mea ua tatou maua. Ona o le faasinoga a le Tusi Paia ma ana a’oa’oga, ua avea ma faavae faaleagaga o le ola pulea lelei, e mautinoa le manuia ai o le tagata ma lona olaga. Ona o le tele o mea ua tatou maua, e faamalieina ai o tatou manao, aemaise o le oa sili o le amio-Atua, a tatou faamaoni i ai, ona tumau lea o lo tatou manuia, e oo lava i le faavavau.


25

Faatoesega: Ona ua le pulea lelei o tatou mana’o, ua fanau mai ai le tele o mea faatupu mala ma solitulafono, ona o le loto lava ia faamalieina. Ona o le galo si’o, ua usitaia ai e o tatou tagata faapogai o agasala uma, ona o le faamalieina lava o o tatou loto, ma o tatou tu’inanauga faa-le-tagata. Ona o le toatele o tagata ola faapologaina i le mativa, ae ua na o lo tatou misi alofa, ae aunoa ma se tatou fesoasoani. Manaoga: Ina ia faailoa manino i Ekalesia ma tagata uma o le lalolagi, o le maliu ma le toetu manumalo o Iesu Keriso, e mo tagata uma ma mea uma. Ina ia tofu maua e tagata uma o le lalolagi, le filemu moni i totonu o afa ma faigata o le olaga, ma ia manino pea i le vaai i taimi uma, na o Iesu e maua ai le fiafia ma le manuia. Ina ia gata lo tatou mana’o i mea ua maua, ma uu i o tatou lima, ae aua tatou te manao tele, ma pupu o tatou loto i mea ua tatou le maua, auā tatou te solipalaina ai le finagalo paia o le Atua. Novema 13 – 19, 2016 Tusi Faitau Mataio 25: 1 – 13 Manatu Autu O tiute tauave o le Ekalesia. Faafetai: Ona o tiute tauave o le Ekalesia ia faapei o taupou popoto, e ola tapenapena ma tauaveina pea suau’u, ao galulue ma faatalitali i le toe afio mai, o le faato’afaiava. Ona o le tele o le alofa tunoa o le Atua, ua Ia faaaogaina ai o tatou tagata faatauvaa ma le lē atoatoa, ao tatou feagai ai ma o tatou tiute tauave, i aso taitasi. Ona o le tatalo ma le galulue mataala, o le au-faatuatua o Ekalesia Kerisiano i le lalolagi, i le tala’ina o le Talalelei, ma le sueina o ni agaga e faaola, mo le Atua ma lona malo. Faatoesega: Ona o lo tatou ola faapalapala ma le faapaie i le faatinoina o tatou tiute tauave, ua valaauina ma totofi i ai i tatou, e le Matai o le galuega. Ona ua leai se ola tauivi ma tapenapena, o le Ekalesia i ana feau ua totofiina ai, aemaise ua tauau ina mate ma pe malie atu, le ola tapua’i o o tatou tagata, ma ua faasolo lava ina matutu, le tatou suau’u faaleagaga. Ona ua feoa’i solo tagata o Ekalesia Kerisiano, aemaise lava i tagata lotu o le EFKS, e su’e se mea e maua ai se suau’u faaleagaga, ma se malamalamaaga mo latou agaga, ona o le faatamala o i tatou o taitai, ma le Aufaigaluega. Manaoga: Ina ia tatou malamalama, i le uiga o lo tatou ola faimalaga i le olaga faalefaatuatua, e manaomia le utu faatumu ma ia lava le suau’u, e mautinoa ai le taunuu manuia o le tatou faigamalaga. Ina ia saunia le Ekalesia e faaaoga le atamai ma le faautauta lelei, e tapenaina ai tagata uma o le Atunuu, mo le malo o le Atua. Ia tumau lo tatou galulue ma le faamaoni e pei o taupou popoto, ao tatou faatalitali e faafeiloai atu ma le fiafia, le Alii le faatoafaiava, ma ia tumau pea lo tatou mataala, e tetee atu i le matapoto o le tiapolo. Novema 20 – 26, 2016 Tusi Faitau Iopu 3: 1 - 14 Manatu Autu Aisea lava? Faafetai: Ona o le oa o mafaufauga, ua maua mai le loloto o sailiiliga ma suesuega e mafua, e le ona o le iloa o le tali sa’o, ae o le fesiliina o le fesili sa’o. Ona o loo tumu le Tusi Paia i lenei fesili, na faapea ane ai foi Iopu le


26

auauna puapuagatia a le Atua, Aisea na ou le oti ai, ina o faatoā te’a a’u mai le manava o lo’u tina? Ona o Iesu o le Alo o le Atua, na oo i ai puapuaga ae leai se agasala, Ae na sa’i lava i luga o le satauro ma faapea mai, “Lou Tama e, aisea ua e tuulafoaiina ai a’u?” Ioe, ona o fuafuaga mamana ua uma ona polokalame e le Atua, mo lo tatou faaolaina. Faatoesega: Ona o lo tatou fesiligia pea o le Atua, i mea tutupu ma puapuaga o le ola, ao loo i le Atua pea ma ana fuafuaga poto, mea uma e a’oa’oaina ai i tatou, i le ola faalagolago ma faatuatua ia te Ia, tatou te manuia ai. Ona o lo tatou fia-popoto ma le faa-fia-amiotonu i luma o le Atua, ae o loo tumau pea lona onosai ma le faapalepale, ona o le tele o lona alofa tunoa, mo i tatou le fanau agasala. Ona e leai se mea e tupu fua e aunoa ma se mafuaaga, tusa lava pe ufiufi ma tanu lilo, e silafia uma lava e le Atua. Manaoga: Ina ia tatou iloa e lelei le fesili i le Atua, i mea tatou te lē malamalama ai, auā e tali mai lava o Ia e tusa ma lona finagalo, ae le o o tatou manao. Ina ia tatou talia ma le loto maualalo mea e tutupu i o tatou olaga, e lu’itauina ai lo tatou faatuatuaga e uiga i le Atua, ma le faaolataga na Ia saunia mo i tatou le tagata agasala. Ina ia faateleina ma faatupuina pea, lo tatou onosai e le Agaga Paia, tatou te manumalo ai i le faifai mai o le lalolagi, ma le tuuaiina fua o i tatou. Novema 27 – Tesema 03, 2016 Tusi Faitau Luka 6: 17 – 49 Manatu Autu O le ola fetauia’i faa-le-Atua. Faafetai: Ona o saunoaga tuu sao mai le fofoga o lo tatou Alii i ana a’oa’oga, e taula’i uma i le soifua manumalo o ona tagata, e faalogo ma anaana i lona finagalo. Ona o le faasa’oga fou e iloa ai le tagata ua faamagaloina, ua iloa ona faamagalo atu i le isi uso a tagata. Ona ua leai lava se isi auala, ua mafua ai ona ofoina mai e Iesu lona soifua, ona o lona alofa moni e atoatoa ona lelei, mo oe ma a’u le tagata agasala ma le amioleaga. Faatoesega: Ona ua mutia le ala o le Talalelei, i o tatou vaifanua ma siosiomaga, ae o loo ola faa-vaeluatai pea ma faalautagitagi, le soifua faatuatua oo tatou tagata, ona o lo tatou ola fetauia’i faa-Isaraelu. Ona ua aunoa ma le Agaga Paia o le Atua ae ua pulea e le tiapolo loto ma mafaufau, o le toatele o o tatou tagata. Ona ua to’aitiiti tagata e kerisiano moni, i o tatou aiga ma nuu, o ekalesia le malo ma le atunuu, a ua toatele e ola faafoliga ona ua taitaiina e le faamaualuga ma le fia taui ma sui, o latou olaga. Manaoga: Ina ia amata ia i tatou, le olaina o afioga paia o lo tatou Alii, e faaalia i le amio pulea lelei i le onosai ma le alofa, e mafua ai le loto faamaualalo ma le faamagalo, ma ia sili atu isi tagata ia te i tatou. Ina ia tatou fiafia e faitau le Tusi Paia ma tatalo pea i aso uma, ma faatino ai o tatou olaga e le aunoa, ona fau lea ma soloi manuia e liligi faaua mai e le Atua, mo i tatou ma a tatou fanau. Tatou tatalo mo le fevaevaea’i o Ekalesia Kerisiano i le lalolagi, aemaise o le ola fetauia’i o lanu ma gagana, o malo ma atunuu, e pei ona tatou molimauina i lenei vaitau, ia oo atu i o latou luga uma, le alofa ma le filemu o le Atua.


27

Tesema 04 – 10, 2016 Tusi Faitau Mataio 12: 46 – 50 Manatu Autu O lou aiga ma lou valaauina. Faafetai: I le Atua le tama o tatou aiga, mo le fesoasoani i o tatou valaauina, i tofi ma tiute o tatou galulue ma auauna ai. Ona o aoaoga o le Feagaiga Fou, ua faamanino mai ai e Iesu le tulaga o le aiga, i le feagai ai o tagata ma le ekalesia. Ona ua a’oa’o mai e Iesu, le taua o tagata uma o le aiga i lona alofa ma lona finagalo, ina ia o gatasi ma fesootai mea uma, ma le valaauina i ai e lo tatou Tamā. Faatoesega: Ona ua sese le tatou faamamafa ma le faamuamua i le tele o taimi, ona ua avea lo tatou naunau i lo tatou valaauina, ua le amanaia ai isi itutino o le aiga o le Atua. Ona ua tatou mananao e tauave uma, i o tatou tauau le mamafa o le galuega, ma saili ai so tatou ta’uleleia ma viiga, e mafua ai feeseeseaiga o le aiga, ma le tino Keriso. Ona ua to’atele foi tagata o le Ekalesia, ua faamuamua aiga ae faamulimuli le valaauina, ma le finagalo paia o le Atua. Manaoga: Ina ia faamanuia mai le Atua i o tatou aiga ma o tatou valaauina, ma ia tatou iloa o fuafuaga uma ia a le Atua, ma e le mafai ona tatou faamuamua le isi, ae faatamala i le isi. Ina ia tatou faamaoni i le faataunuuina o o tatou valaauina, ma le tausiga lelei o o tatou aiga, aua o le finagalo lea o le Atua, ia faataunuu mea uma mo lona viiga. Ina ia tuu mamao le tofa faa-le-Atua, ma femalamalamaa’i itu e lua, ma amanaia leo o tagata vaivai ma le lē tagolima, auā a lelei ona atiae aiga, ua maua se aulotu se nuu se Pulega, ua maua foi ni Matagaluega ma se Ekalesia tautua fiafia, e pei o la Iesu, “O le faia le finagalo o lo’u Tama, o lou uso lea ma lou tuafafine, ma lou tina lea. Ia manatua Matagaluega uma a le Ekalesia, ma ana Komiti. Tesema 11 – 17, 2016 Tusi Faitau Luka 4: 14 – 30 Manatu Autu O Iesu o le Fomai e le totogia sana pili. Faafetai: Ona ua taunuu upu a Isaia ia Iesu, le ua faauuina i le Agaga, na te faia le galuega a le Talalelei, mo e puapuagatia ma saisaitia i le agasala, ina ia faasaolotoina. Ona o faaaliga o le alofa tunoa o le Atua, ua faaalia ia Iesu i lana pule i agaga leaga, ua Ia faamalolo ai e tausao mata faaletino ma mata faaleagaga, ona o le tiapolo. Ona ua uma ona faatau ma totogi fua e Keriso, o tatou pili i Kalevario i lona toto. Faatoesega: Ona ua tautino lava e Iesu i lona nuu ma ona tagata, o Ia ua taunuu ai le Tusi a le Perofeta o Isaia, a ua latou faataga vivii ma faatausuaa’i i le atalii o le kamuta. Ona o lo tatou teena pea o le Alii, e ala i lo tatou le faamaoni, i le faatinoina oo tatou tofi ma tiute, ua valaauina i ai i tatou e le Atua. Ona ua le tutupu ni vavega i o tatou taimi, ona o lo tatou faalotolotolua, ma le lē moni o lo tatou faatuatua, o le ala lea o lana fetalaiga, “E le talia se perofeta i lona nuu moni.” Manaoga: Mo galuega a alii ma tamaitai fomai, ia latou maua pea le alofa lototele ma le atamai, e faafeagai ai ma faafitauli, o lo latou valaauina. Ina ia manino i le Ekalesia ma i tatou uma, e iai foi la tatou pitolaau, tatou te galulue faatasi ai ma alii ma tamaita’i fomai, o le asiasi lea i tagata mamai, ma tatalo mo i latou. Ina ia mana


28

pea le galuega a le Ekalesia, ma lana galuega faamalolo, ma ia tatou mautinoa, o Ia lava na tauaveina o tatou vaivai, ma na tauave o tatou ma’i ma tiga. Tesema 18 – 24, 2016 Tusi Faitau Galuega 1: 9 - 11 Manatu Autu O le Ekalesia faatalitali. Faafetai: Ona ua mautinoa lo tatou toe tutu i le ola e faavavau, a o tatou galulue i le taimi nei, i le malosi ma le mana o le Agaga, pe a tatou faatalitali pea ma galulue ma le faamaoni, mo le toe afio mai o le Keriso manumalo. Ona ua vaavaai le au So’o i le afio a’e o le Keriso manumalo, ua molimau foi i ai le au Aposetolo, “E faapei ona afio ae, e faapena foi ona toe afio mai, ma e vaaia foi e le lalolagi uma.” Ona o le Agaga e faatalitali ai ma le onosai, ma galulue pea lana Ekalesia mo le faaolaina o agaga agasala, mama’i ma e puapuagatia, e pei ona maliu ai Keriso. Faatoesega Ona ua fiugofie le Ekalesia ma o tatou tagata e faatalitali, ona ua vaivai le ola tatalo ma le mataala pea, i tiute tauave ua uma ona a’oa’o mai e Iesu mo i tatou. Ona ua na ona tatou nonofo ma vaavaai i le lagi, ae le galulue ma tapuai faamaoni, ma faatalitali pea i le pule a’oa’o o mea uma. Ona ua tafefea atu le toatele o le au tapuai, o le Ekalesia faatalitali a le EFKS, i le mau tapuaiga sese ma le lē faavaea, o loo faasoesa mai i lenei vaitau. Manaoga: Ina ia faasaga le ekalesia, e fai ona tiute ma faataunuu lona valaauina, i lona taimi ua tuuina mai, ae faitalia le Atua ma le lumanai, ina ia maua mai i tatou, o loo faapea ona tatou fai. Ina ia tatou faatalitali pea ma molimau ma galulue, ma le faamaoni i le alofa le mavae o le Atua, i lalo ifo o le taitaiga a lona Agaga Paia. Ina ia tuu pea i le Atua mea uma, ae faasaga i tatou e tautua aiga, ekalesia, nuu ma le malo, ma soo se mea o manaomia ai le tatou alofa i le Alii, ma le faamaoni o lo tatou faatuatua. Tesema 25 – 31, 2016 Tusi Faitau Luka 2: 8 – 20 Manatu Autu Ua fanau Iesu i le fale o manu, ae le se manu. Faafetai: Ona o le alofa tunoa o le Atua, ua fetaui ai mea le fetaui i lona finagalo, ona o le faatauvaa ma le maualalo o le ala na Ia filifilia, e fanau mai ai I le fale o manu, ina ia tatou iloa ai, e leai se mea e faigata i le Atua. Ona o lona afio mai I se ala maualalo i lona lava aiga, ua tusa ai o Ia ma tamaiti e fanau mai i totonu o tatou aiga, ma o tatou nuu, a o tuputupu ae o Ia, e fai ma faataitaiga mo fanau, e manuia ai o latou olaga. Ona ua taunuu le faamoemoe o le Atua, e ui sa lei sauni Isaraelu le nuu filifilia, ae ua saunia e le au Makoi ni meaalofa faatupu, e tali atu ai i le afio mai o le Mesia. Faatoesega: Ina ia tatou lagona pea, ma le loto faamaualalo i lenei Kirisimasi, le faamaualaloina o le Atua, ina ua auina mai lona Alo e toatasi i lenei ala faigata, ina ia faaolaina le lalolagi. Ina ua afio mai o Ia o le Mesia ma le Tupu, ae toaitiiti i latou, na latou talia ma le fiafia lona fanau mai, e le’o le ata ea lea o lona inosia ma lona tuulafoaiina? Ona o le faigata pea ona tatou malamalama, i le uiga moni o le Kirisimasi, na malaga ai Makoi


29

i Peteleema, atoa ma le o atu o Leoleo Mamoe ia te Ia, ina ia manino ia te i latou, le uiga moni o le malo ua Ia aumai. Manaoga: Ina ia avea lenei vaitau o le Kirisimasi e faatumuina ai o tatou loto i le olioli, i lona fanau mai o le Tagata lava o tagata, auā le galuega o le faaolataga. Ina ia tatou mua’i lagona foi e i tatou uma taitoatasi, le uiga moni o lo tatou foi fananau mai, mo se faamoemoe lelei aupito sili ona loloto lona aoga, mo le finagalo o le Atua ma lona malo. Ina ia tatou lagona uma, le alofa silisiliese o le Tama mo i tatou, atoa ma le faaolataga ua saunia e Ia, mo soo se tasi e faatuatua ia te Ia. O le faanaunauga sili o le Leoleo Mamoe Sili, mo le Ekalesia ma o tatou tagata, ia faatu lona malo i o tatou loto.

Soifua ma ia manuia

51

Documents

Ekalesia Faapotopotoga Kerisiano Samoa TUSI ’AU LEOLEO 2016