Upload
vuduong
View
217
Download
2
Embed Size (px)
Citation preview
Avoi 56 KBC BM khawmpi le Hmunthar Kum 50 Tlinnak Sui Jubilee
Feb 7 ni ah ka zungrian in Thinghual khua ah ka kal. Hi ni hi Avoi 56 KBC BM khawmpi le Hmunthar Kum
50 tlinnak Sui jubilee caah khualtlun ni a si. Ka kal pah ah khual tampi ka ton hna. Athaizing cu ka rian ka
dih hnu ah zanlei 3:00 pm in tlun kai thawh. Hmunthar cu 5:30 pm hrawng ah ka pha. Khua chung ka luh
ka in mikip nih na tang ko lai lo maw? An ka ti. Riak law kan in ah rawl na ei lai a timi inn 4/5 hrawng an
si. Ka tha a tho ngai. Kawi Lal (Van Lal) te inn ah kai thum phot. Ka phak hnu ah ka kut ke kai tawl I ka thil
kai thleng. Kai thlen dih ah Kawi Lal nih bahla zu (Cini he uammi) ka tuahmi te hi ding ta, a ka ti. Hraikhat
a ka pek I a thlum tuk I ka dolh kho set lo. Cu lio cun khua upa pakhat a ra. “Kawi Lal, thaizing alan tlaitu
ding kan tlin tung lo. Minung 50 nih tlaih ding a si caah mi kan har ngai” tiah a ti. Kawi Lal nih “Velte zong
a um ko hi teh. Anih cu kan mah khua a si I tlaih ter ve ding a si ko” ati. Khua upa pa cu a holh lo. Tlawm
pal a um ah keimah lei a zoh hrai kha a hmuh. Ai thawh I “Nan nih cu khuami bantuk ah ruah nan si I Mit
sen tuk le zoh chia in maw um lai u cih” a ti I a chuak colh. Achim ka cun a ruah awk ka thei lo. Nu Par
(Ni Par) kha a thin a hang I “Zeitik ah dah mitsen le zoh chia in na um bal. Mahkhua mi hmanh ti khawh
tung lo ah” a ti. Khua ka ruat I ka ngaih a chia ngai. Ka ruat deuh deuh ka lung a ka suk deuh deuh. Zei si
paoh ah tlung than ko ning ka ti I 6:15 pm in kai thawh I Thantlang cu 7 pm ah ka phan. Pate thin tawi
kan ti cu.
Feb ni 9 cu Kum 50 tlinnak lungphun on ni a si. Hmunthar cu ka chuahnak khua a si lo nain ka thannak
khua a si caah ka tlaih chan ngai. Kum 50 tlinnak lungphun I Itel lo cu tiah khua tampi ka ruat. Nain zung
lei ah ka rian nih a tam. Ka pu dam lo si rih. Cu zong ah cun van tenh ta khawh zong a si men lai nain ka
thin nuamh lonak nih a ka ciah rih caah ka kal ti lo.
Cu ni ah cun zingzaan in rawl dumnak a um. Zei an thah ti bel a hal ka philh diam hna. Ca tialtu santlaih
lo a si.
Feb 10 cu zarh pi ni a si I, pumh tanh in kal ding in kai tim. Ka nu le Ka pa don pah a hau caah ka nau pa
Robinson he kan va kal. 9:00 am hrawng ah kan phan. 10:00 am ah pumh cu an thok. Khual lian an cah
mi hna Dr. Rev. Sang Cung Uk nih thawngtha a chim. Rev. M. Thawng Kam nih BM kuzale upa thar thla a
camh hna. Dar Lian Uk (Rulbu), Myanmar Economic Bank Manager nih bia tawi chimnak a ngei. TABC in
Pastor Chan Hup zong ai tel kho. Hi pumhnak ah hin Hla remh zuamnak a um I Mualkai le Hmunthar
lawng ai zuam kho mi an si.
Pu Dar Lian Uk biatawi chim lio
Mualkai nih pakhatnak an ngah I Hmunthar cu pahnih nak(dowlas an ngah )an ngah. Hi khawmpi ah
Chan Thang revival group zong an I tel kho ve. Chun hnu pumhnak cu zaanlei 2:00 ah an thok than. Hi
pumhnak tu ahcun kai tel kho ti lo. Aruang cu ka hngak chiat lio I ka tlon len tawnnak Innva ti va le Tikhur
thing (antam dum) hrawnghrang va zoh ka duh I ka kal caah a si.
Dr. Rev. Sang Cung Uk phung chim lio
Chan Thang Revival Group
Hmunthar hla remh lio
Lakphak dawr
Zaan lei 2:00 pm hrawng ah innva ah cun kan va kal. Van Hmun Lian, Hniang Bik le Siang Za Uk nih an ka
zulh. Van Hmun Lian hi hla sak thiam lawng si loin ca po saih a thiam tak tak. Cun Hniang Bik hi Vanzang
tlang capo saih zuamnak ah pakhatnak voihnih a ngahmi a si. Siang Za Uk hi mi holh cawn a thiam ning
khuaruah har a si ve. Kan kal pah ah capo an ka saih piak I kan I nuam ngai.
Pu Hram Tawi, Jesuh Khrih le Pi Leng Zi lungdonh ah chikkhat
Innva hi tiva hmete a si nain Lahva in nga an kai I nga a tam ngai. Kan hngakchiat lio ah ngahring kan
dawi tawnnak tiva a si. Tiva ka va hmuh cun a thar in ka lung a leng. Leikuang tampi zong a um. Kuangpi
lam he ai thennak in Furlong pakhat 1 hrawng ah Innva cu a si colh. Nain Motor Car cu chim lo Motor
cycle zong a kal kho lo.
Innva ah ka nau le he
Innva cun hman tlawmpal kan I thla hna I kan tlung colh. Inn kan phak ah an rak I pumh saling a
si. Zaanlei 2:30 hrawng a si l a linh ning cu kawl khua te cio a si ko. Tikhur I kal ding cu kan zenh
tuk cio caah zaanlei ni nem tu ah kal te ko hna sih kan ti.
Pumh an dih hnu ah Hmunthar khua tlatu Pu Hram Tawi ka va leng. Bia tampi kan I ruah hnu ah
hman I thla ta usih ka ti I Mandat hmai ah hmanh kan I thla.
Catialtu le Pu Hram Tawi
Cu hnu ah tikhur dum ah ka nau le he cun kan kal than. Tikhur dum ka hmuh lonak kum 10 hrawng a si
cang nain an lam cu ai remh lo I ka hngakchiat lio ning tein a um rih. Khuachung ah ti an ngah cang caah
an antam le kawpi ti tawih an daitlang rua. Kan rak um lio bantuk in an hninghno lo. Amah belte Rual
Peng Hnin nih dum kam hmun lawng cu license a tuah I Thirhri tahmi in a kulh dih. Cu cu ai chapmi a si. A
dum hi Acres 5 hrawng cu a si men lai. A kau tak tak. Zawngtah kung 600 (a ti ko rua ka ti) ka phun a ti.
Fu le banhla zong a cin chih. Atu zawngtah a tlaimi cu kumkhat caah kungkhat 80,000 in 100,000 kar in
an cawk caah hi ning te a si cun a zawngtah tlai tik cu kumkhat ah ting 600 hrawng a hmuh lai. Amah hi
tlangval, mino te a si. Afel i tei a ma tak tak. Cu cu tutan ka tlun I ka hmuhmi ah kai lunghmuih cemmi a
si.
Tikhur an tam dum
Zanlei kan kir cu zanriah ei zat hrawng a si. Cheukhat cu zaan riah ei cangmi zong an um. Khual he lai he
cu lio hrawng cu Khuafo lei kap, Tikhur lam lei le Pu Tawi lungdonh (Bawi Jesuh lungdonh) lei hrawng ah
zu din I a kalmi an tam ngai.
Mui lai hrawng hrang cu zu a ri I a aumi an tam ngai. Hmun thum hrawng ah an buai. Khual lian an
sawmmi hna Dr. Sang Cung Uk, Rev. M. Thawng Kam te pawl hmai khah an um lo ngai. Khualhringtlang
hi zu din kan thiam lo. Zu-ai ngei zong kan tam ngai. Tlang dang ka tlawn tawn ah zu cu an ding cio ko
nain buai hmang mi ka hmu ti hna lo. Khualhring tlang lawng buai kan hmang rih rua ka ti.
Azaan cu donghnak zaan a si caah mino ai pum lomi an um pah. Khual lei in a ra mi le Inn tek nih
pumhnak chungah lomhnak bia le thlahnak bia chim cio a si. Hi khawm chung ah Van Hmun Lian hi pumh
kip ah hla a sa I uar cemmi zong asi. Dongh zaan I chairman tlai pa hi mi capo tak tak a si rua. Amin cu ka
thei lo. Van Hmun Lian hla a sak khawh ah ai thawh I “ Tlangval Van Hmun Lian hi Saya Thawng Kam te
he kan khua an rat lio ah hla sak thiam a si ka thei lo. Ka pawng ahcun dai tein a thu. Zapi hla sak ah
thang taktak in ka sa. Nain Van Hmun Lian cu dai tein athu. Atu hla sak thiam a si ti ka theih I ka ning a
zak tuk. Tlangval Van Hmun Lian kha lio I ka sual palhnak vialte rak ka ngai thiam tiah nawl kan duh”
ati I mipi kan ni dih. Pumh a dih lai te ah Chairman nih ai thawh than I “Lunglomhnak bia tlawmpal te
chim ka duh. Tulio khawm zawh cu a har tuk. Rian le khai he a si fawn. Cu lak I nungak tlangval tampi nih
nan rian lak ah nan van tenh khawh caah lunglomhnak tampi a um. Nupi tha tha, Pasal tha tha le te fa
cawi cawk lo tampi nan ngeih khawh nak hnga nanmah tein tan la rih ko uh” a ti I kan ni dih than. Pumh
cu a dih. Pumh dih hnu ah State show an tuah. Khualhringtlang mino ah hlasak thiam an rak tam ngai.
State show ah Pi Hlawn Cer (US in a rak tlung tami) zong nih hla a sa ve. A aw that kan thei ballo nain a
rak thiam tuk I kan khuaruah a har dih. Zaan suimilam 10:30 hrawng ah thlacamnak he stateshow cu an
dih ter.
Cu hnu ah ka hawi le nih an rak ka leng I Hmunthar sakuh tamnak kong an ka ceihpi. Ramvak huam ngai
mi an si I an chim cun ka lung a tho ngai ve. Zaan 11:00 pm hrawng in kan bawh tawn hna an ti. Cu ti si
cun kei caah tlun a har ngai. Tu zan ah kan kal ko hna lo ka ti hna I, na huam cun kal ding a si ko, an ka ti.
An thil an ka hlanh I kan I tim hna. Zaan 11:00 ahcun kan I thawh I Khuakuatlang timi ah kan kal hna.
Kan kal pah ah Sakuh pakhat kan hmuh nain an kap manh lo. Sakuh kawl cun tlang kip kan cul. Kei
ramvak ballo caah cun khua ruah har a si. Khoika kan phak zong ka thei lo. An ka kalpinak paoh cun ka
zulh hna. Sakuh cu kan hmu ti lo. Varit tal kawl ne u sih an ti I varit um tawnnak ah an ka kal pi. Kan hmu
hlei lo. Zinglei suimilam 3:00 hrawng a si khin tlung ko ne hna usih an ti I kan tlung. Ka tha bat le ka phei
fah cu ka celh bak lo nain ka chim ngam lo. Na tha chia hlah. Hmailei ah a caan a um than te lai tiah an ka
hnemh. Inn kan phak cun 4:00 hrawng a si cang. Ke tawl lo in cu ti cun kan it colh. Zinglei 7:00 hrawng a
si ah ka naupa nih a ka thangh. Ka tho I Ka nu le ka pa nih tlun ding in inntual in an rak ka hngah cang. Ka
hmaizong phiah tilo in thil kai tim I Thantlang lei cu kan panh thluahmah.
Caan tawi te chung lawng ka caam manh nain ka nun chungah philh awk tha lomi ka hmuh ton ta manh I
lungsi ngai in Thantlang ka phan.
Salai Velte