Nutripuzzle: Paano ito gawin? Gabay para sa paggawa ng sariling nutripuzzle Ano ang nutripuzzle? Ang nutripuzzle ay hango sa pinagtambal na salitang “nutrisyon” at “puzzle”. Ito’y masaya at nakakaenganyong pamamaraan ng pagtuturo sa kahalagahan ng wastong nutrisyon. Ang larong ito ay maaaring baguhin para maging angkop sa mga kasali.

Bakit nutripuzzle? Naglalayon ang nutripuzzle na mas mapalawak ang kaalaman ng mga mamamayan tungkol sa wastong nutrisyon, ehersisyo, Pinggang Pinoy at mga masusustansiyang pagkain tulad ng mga katutubong pagkain. Mga kailangan: 1 printed template ng nutripuzzle sa bond paper (mas mabuti kung mas makapal na papel) 1 long folder o kaya matigas na papel o cardboard Pandikit o glue Scotch tape Gunting 1 brown envelope para maging lalagyan Papaano gawin ang nutripuzzle?

1. Dahan-dahang idikit ang printed template ng nutripuzzle sa folder gamit ang pandikit o glue.

Iwasang damihan ang paglagay ng glue upang hindi kumalat ang ink ng printed template.

2. Lagyan o dikitan ng scotch tape ang buong dinikit na nutripuzzle template—ito ay magsisilbing proteksyon sa basa at mas mapapaganda nito ang kalidad ng nutripuzzle.

3. Gupitin ang nutripuzzle template ng ayon sa gabay na linya para mabuo ang pakawdradong puzzle pieces. Isama sa paggupit ang puwang o margin.

4. Ang natirang kalahating bahagi ng folder ay maaaring gawing frame ng puzzle. Gumupit ng apat na strips ng folder na ang sukat ay kapareho ng haba at taas ng nutripuzzle template. Idikit ito ng patayo sa paligid ng kalahating folder na sukat sa laki ng nutripuzzle. Ang folder strips ay magsisilbing gabay ng frame para sa paglalagyan ng nabuong nutripuzzle.

5. Gumamit ng brown envelope para maging lalagyan ng nutripuzzle.