WUJUD KRITIK SOSIAL WONTEN ING DONGENG ZULFULUS

ANGGITANIPUN PRIJANA WINDUWINATA

(Makalah Sastra)

Tugas menika dipunsusun kangge nyekapi tugas mata kuliah

Seminar Bahasa, Sastra, dan Budaya Jawa

Dosen Pengampu : Hardiyanto M. Hum

Dipunsusun Dening :

Nama : Rista Sapta Perwitasari

NIM : 10205241074

Kelas : B PBD 2010

PENDIDIKAN BAHASA DAERAH

FAKULTAS BAHASA DAN SENI

UNIVERSITAS NEGERI YOGYAKARTA

2013

2

BAB I

PURWAKA

A. Dhasaring Panaliten

Karya sastra boten namung wujud wacana fiktif rekaan panganggit

ingkang boten wonten ing kasunyatan. Karya sastra mijil saking panguda

raos ingkang dipuwujudaken ing satunggal asil karya kanthi bumbu imajinasi

panganggit. Panguda raos menika sumberipun saking sedaya lelampahaning

gesang ingkang sampun nate utawi nembe dipunprangguli sastrawan ing

gesang saha pagesangan. Karya sastra minangka asil proses kreatif

sastrawan nggambaraken perkawis ingkang kedadosan ing masyarakat.

Sumardjo (1982: 393) ngandharaken bilih karya sastra minangka

asiling rekaan kreatif sastrawan inggih menika perangan gesang ing bebrayan

ageng ingkang mahyakaken perkawis bab masyarakat, arupi (1) sesambetan

antawisipun masyarakat kaliyan masyarakat, masyarakat kaliyan individu,

antar-individu, antawisipun prastawa ingkang dumadi ing batos manungsa.

Karya sastra karantam saking jaringan kemasyarakatan tertamtu ingkang

dipungambaraken dening sastrawan kanthi jujur lan nyata miturut imajinasi.

Sastra mahyakaken maneka warna kasunyatan gesang saha

pagesangan ing masyarakat kanthi jujur. Salah satunggal cara kangge

mahyakaken kasunyatan menika kanthi kritik. Karya sastra ingkang ngandhut

kritik dipunwastani sastra kritik. Sarwadi (1975: 1) ngandharaken bilih sastra

inggih menika bab ingkang ngandhut kritik ing salebetipun. Kritik ing sastra

minangka pembimbing kagem masyarakat. Sastra kritik gadhah sikap utawi

pambiji bab perkawis tartamtu, saged awujud pasarujukan utawi panampik,

sikap lan pamanggih sarta paugeran-paugeran tartamtu.

Grebstein (ing Tarigan, 1986: 210) ngandharaken bilih jenis kritik ing

sastra kritik dipunjumbuhaken kaliyan kasunyatan ingkang ndhasari mijilipun

karya sastra kasebat. Salah satunggalipun inggih menika kasangsaran

ingkang kapanggihaken ing lingkungan bebrayan antawisipun kelompok

satunggal lan sanesipun ing masyarakat. Kritik ingkang kados mekaten

3

dipunwastani kritik sosial. Punjering kawigatosan kritik sosial inggih menika

interaksi antawisipun karya sastra lan pagesangan.

Miturut Hadiwardoyo (1990: 82) interaksi-interaksi ingkang dados

punjering kritik sastra menika boten namung ngewrat implikasi-implikasi

sosial, ekonomi, saha politik ingkang wonten ing salebeting karya sastra. Ing

pangertosan ingkang langkung wiyar interaksi menika ngewrat maneka

bidang tartamtu, tuladhanipun keadilan sosial, kependudukan, karukunan

utawi ras, keturunan, keagamaan, kamiskinan, pangangguran, saha

pencemaran lingkungan. Wondene, cara sastrawan anggenipun

ngandharaken kritik sosial ing salebeting karya sastra saged kanthi langsung

menapa dene simbolik. Aliran simbolik menika kathah dipunpilih para

sastrawan ingkang badhe mbungkus karya sastranipun. Karya sastra

dipunbungkus supaya boten ketingal menawi ngewrat piweling saha kritik

ingkang pedhes.

Aliran simbolik biasanipun arupi karya ingkang ngandharaken pikiran

saha pangraosipun migunakaken simbol-simbol tartamtu. Simbol-simbol

dipundamel kangge narik kawigatosan saha raos penasaran pamaos. Simbol

ingkang asring dipunginakaken awujud barang-barang mati utawi titah

ingkang sanes manungsa. Tuladha liran simbolik inggih menika

panganggening paraga-paraga sato utawi tetuwuhan ingkang saged micara.

Saking aliran menika mijil dongeng-dongeng, legendha, saha mite. Cerita

kados menika minangka gambaraning gesang manungsa, sanajan

paraganipun kathah-katahan sato. Ing Indonesia, aliran simbolik sampun

nate misuwur nalika tuwuh dongeng-dongeng sato kewan. Tuladhanipun,

Dongeng Sato Kewan anggitanipun Prijana Winduwinata (Suwardi, 2003).

Dongeng Sato Kewan anggitanipun Prijana Winduwinata minangka

salah satunggaling kapustakan Jawi ingkang ngewrat maneka warna kritik

sosial ingkang kagambaraken kanthi cariyos bab sato utawi asring

dipunwastani fabel. Dongeng Sato kewan kawedalaken dening Penerbit Balai

Pustaka tahun 1952. Buku menika kempalan saking gangsal dongeng

anggitanipun Pak Prijana Winduwinata. Salah satunggaling cariyos ing buku

Donngeng Sato Kewan menika Zulfulus, ingkang badhe katliti ing panaliten

menika.

4

Dongeng Zulfulus dipunpilih dados sumber data panaliten amargi ing

salebertipun dongeng menika kathah sanget prastawa ingkang memper

kados prastawa ingkang kedadosan ing masyarakat. Zulfulus dipunangit

minangkang karya sastra ingkang ancasipun kangge paring kritik dhateng

masyarakat. Panaliten menika katindaken kangge mbuktekanen panduga

wonten kritik sosial ing selebetipun cariyos wonten Zulfulus anggitanipun

Prijana Winduwinata. Kejawi saking menika, alasan kangge nindakaken

panaliten menika amargi karya sastra menika dereng nate dipuntaliti,

kamangka ngewrat kathah sanget kritik ingkang dereng dipunbedhah saha

seged dados sarana instropeksi ingkang ideal dening para pamaos mliginipun

lan sedaya masyarakat umumipun.

Saking andharan ing nginggil, panaliten menika katindakaken kangge

manggihaken kritik sosial ingkang wonten ing dongeng Zulfulu saha kados

pundi caranipun ngandharaken kritikipun. Panaliten menika katindakaken

kanthi teori sosiologi sastra. Panaliten menika kanthi irah-irahan Kritik Sosial

Wonten Salebeting Dongeng Zulfulus Anggitanipun Prijana Winduwinata.

B. Wosing Perkawis

Adhedhasar dhasaring panaliten ingkang sampun dipunandharaken,

wosing perkawis ing panaliten menika, inggih menika: Wujud kritik sosial

menapa kemawon ingkang wonten ing salebetipun Kempalan Dongeng Sato

Kewan anggitanipun Prijana Winduwinata?

C. Ancasing Panaliten

Jumbuh kaliyan wosing perkawis, ancasing panaliten menika saged

dipunandharaken ing ngandhap menika: Ndheskripsikaken wujud kritik sosial

ingkang wonten ing salebetipun Kempalan Dongeng Sato Kewan

anggitanipun Prijana Winduwinata.

5

BAB II

GEGARAN TEORI

A. Sosiologi Sastra

Miturut Kamus Besar Bahasa Indonesia (1989: 855), sosiologi sastra

inggih menika kawruh bab sipat saha pengrembakaning masyarakat

ngengingi bab sastra anggitanipun para kritikus lan sejarawan, utaminipun

ngandharaken panganggit ingkang angsal pangaribawa saking status sosial

masyarakat asalipun, ideologi politik kaliyan ideologi sosial, kahanan ekonomi

saha masyarakat ingkang dipuntuju.

Suwardi (2003: 78) ngandharaken bab ingkang wigati ing sosiologi

sastra inggih menika konsep cermin. Sastra dipunanggep mimesis utawi

tiruan masyarakat, ananging sastra ugi tetep dipunanggep minangkang ilusi

utawi khayalan ingkang tuwuh saking kasunyatan. Sastra boten namung

wujud photocopy kahanan ing donya ananging kahanan donya ing

sanyatanipun dipuntafsiraken dening panganggit kanthi alus saha endah. Bab

menika boten saged dipunlirwakaken awit panganggit gesang ing madyaning

masyarakat utawi ing kahanan sosial tartamtu, ingkang gadhah norma

kaliyan pranata nilai sami sesambetan ing salebetipun. Awit saking menika,

sastra boten saged madeg piyambak, ananging kaiket dening kahanan

lingkungan papan karya sastra dipunlairaken.

B. Kritik Sosial Ing Salebeting Karya Satra

Sastra ingkang ngemot kritik dipunwasrani sastra kritik, asring mijil

ing satengahing masyarakat nalika kedadosan bab-bab ingkang kirang beres

ing pagesangan sosial saha masyarakat (Nurgiyantoro, 2003: 331). Kritik

sosial ing karya sastra kangge nggambaraken ketimpangan sosial ingkang

kedadosan ing masyarat. Paedahipun minangka pengemut-emut (reminder)

kangge masyarakat saengga saged ndandani kahanan masyarakatipun saha

ningkataken kualitas moral masyarakat.

Abar (1997: 47) ngandharaken kritik sosial inggih menika satunggal

wujud komunikasi ing masyarakat ingkang ancasipun minangka kontrol

dhateng lampahipun sistem sosial utawi proses masyarakat. Miturut Susanto

6

(1985: 93) kritik sosial menika pambijin ilmiah utawi ujian dhateng kahanan

masyarakat wonten ing satunggal wekdal. Kritik sosial minangka media

kangge masyarakat utawi individu ngandharaken pamanggihipun babagan

sedaya kahanan, bab, tumindak, utawi samubarang menapa kemawon

ingkang nyimpang saking paugeran.

Kritik sosial saged dipunandharaken langsung menapa dene boten

langsung. Kritik sosial kanthi langsung umpaminipun demo, unjuk rasa.

Kanthi boten langsung kritik sosial kaandharaken mawi media. Media kangge

ngandharaken kritik sosial menika maneka warni. Karya sastra inggih menika

satunggaling media ingkang sae sanget kangge ngandharekan kritik menika,

salah satunggalipun dongeng.

Karya sastra miturut Damono (1979: 1) boten namung nggambaraken

kasunyatan pegesangan masyarakat ingkang mentah, ananging sampun

dipunrenungaken makna saha nilai ingkang badhe dipunaturaken dhateng

pamaos liwat paraga-paraga ingkang dipunripta, dados saged dipunnikmati

dening pamaos. Karya sastra ugi saged dados srana pengendali sosial ing

pagesangan masyarakat. Karya sastra dipunangkah sanget paring

pangaribawa dhatang cara pikiripun manungsa ngengingi bener lan lepat, sae

lan awon, ing caranipun gesang piyambak utawi bangsanipun.

Kritik sosial ing karya sastra boten namung gegayutan kaliyan

perkawis sugih lan miskin, ananging ngewrat sedaya perkawis sosial ingkang

wonten ing masyarakat, sesambetan manungsa kaliyan manungsa,

manungsa kaliyan masyarakat, manungsa kaliyan kelompok sosial, manungsa

kaliyan panguasa, sesambetan antawisispun manungsa kaliyan institusi

ingkang wonten ing sakiwatengenipun (Damono, 1983: 25)

7

BAB III

ASILING PANALITEN SAHA PIREMBAGAN

A. Asiling Panaliten

Perkawis-perkawis sosial ingkang dipunkritik wonten ing dongeng Zulfulus

menika maneka warni. Wujud kritik sosial wonten ing Dongeng babon

Mardika saged dipuntingali ing ngandhap menika:

Tabel 1. Wujud Kritik Sosial ing Dongeng Zulfulus

No. Wujud Kritik Sosial Data

Kritik Sosial Varian Fenomena Wujud Kritikan

1. Politik Praktek Korupsi lan

nepotisme

Pacelathon

antawisipun paraga

Hal 62 baris 9 ;

Hal 71 baris 24

Narasi saking

penganggit

Hal 67 baris 29 :

Hal 68 baris 10 ;

Hal 71 baris 14;

Hal 69 baris 9

Dhiplomasi ingkang

nyimpang saking

paugeran

Narasi saking

penganggit

Hal 64 baris 25

Hal 66 baris 20

2. Kemiskinan Rakyat tansaya

miskin lan sangsara

Narasi saking

penganggit

Hal 76 baris 20 ;

Hal 70 baris 20 ;

Hal 71 baris 2

3. Moral Cethil Narasi saking penganggit

Hal 59 baris 3

Boten Jujur Narasi saking

penganggit

Hal 76 baris 23;

Pacelathon

antawisipun paraga

Hal 64 baris 20 ;

Hal 65 baris 4

Pemimpin ingkang

boten wicaksana

Narasi saking

penganggit

Hal 60 baris 1

Pacelathon

antawisipun paraga

Hal 75 baris 26

4. Khukum Ukum ingkang

boten adil

Narasi saking

penganggit

Hal 69 baris 9;

Hal 76 baris 25

B. Pirembagan

Kritik sosial ing dongeng Zulfulus menika mliginipun ngengingi

sekawan perkawis, inggih menika politik, moral, kamiskinan, saha khukum.

8

Menggah pirembagan ingkang jangkep saben perkawisipun, wonten

ngandhap menika:

1. Politik

a. Praktek Korupsi

Praktek KKK utawi korupsi, kolusi, nepotisme menika sampun

ngrembaka ing Indonesia wiwit jaman rumiyin. Korupsi wonten mriki

saged dipunwastani tumindak ingkang pados bandha kangge

awakipun piyambak menapa kangge kula-gotranipun kanthi cara

nyalahgunakaken kakuwasan ingkang sampun dipunpercayakaken

dhateng piyambakipun (http://asrihandayani.wordpress.com/2010/

03/31/pengertian-korupsikolusidan-nepotisme/. Wonten ing dongeng

Zulfulus tumindak korupsi menika katindakaken dening para

panggedhe tinggi ing Kanthilnagara. Kasus menika saged katingal

saking cuplikan, menika:

,,Wah djatuh Kanilnagara!

,,Hlo keprije ta, kok djatuh?

,,Amarga sing mbajari negara. Yen aku sakantja lelungan kuwi

sing mbajari ragade negara.

,,Jen mangkono, hla kok nganggo kopikir barang? Hla wong kowe

ewe ora tjutjul wae kok nganggo mikir tarip. Weruhmu rak mung

lelungan nunggang Tjoro. Mengko saben habis bulan rekening tak

wenehake kas nagara. Dadi kowe ewe ora usah ngurus bab

opahku. Hla wong negara wae kok dirembug! Anggere kowe ewe

wis kepenak rak uwis! (Winduwinata, 1952: 62)

Cuplikan menika pacelathon antawisipun Zulfulus kaliyan Tjoro.

Ing pacelathon menika kasebataken bilih boten perlu mikir negara

ingkang baken piyambakipun kepenak lan boten perlu cucul arta.

Tumindak menika kalebet korupsi awit Zulfulus ngginakaken arta

negara tanpa mikir karugenipun kangge negara, saha kanthi sengaja

pados cara supados Zulfulus boten cucul arta piyambak. Kasus

ingkang sami ugi kapanggihaken ing pethikan-pethikan menika:

9

Tinggi sing dadi panggee ja paa dililani menjang mantjatalpa

perlu golek saling omben. Lakune kabeh nunggang Tjoro. Dadi

kepenak. (Winduwinata, 1952: 67)

Djare tinggi-tinggi sing paa panggee kuwi jen lelungan ja ana

sing njambi njaut. Mangka nunggang Tjoro ora susah mbajar

ewe. Sing mbajar kas Kanilnagara. Sarehne ora tjutjul ewe,

mulane ja tansah wira-wiri, ngalor-ngidul, ngetan-ngulon.

(Winduwinata, 1952: 68)

Pethikan ing nginggil nedahaken bilih para panggedhe sami

ngginakaken jabatanipun kangge tumindak ingkang boten

samestinipun miturut paugeran ingkang gumathok. Kedahipun tindak

dhateng negara manca menika kangge kapentinganipun rakyat

ananging malah nuruti kapentingan pribadhi. Bab menika saged

kajumbuhaken kaliyan kabiasan nalika zaman pamerintahan orde

lama (zaman nalika dongeng kaanggit). Nalika oerde lama menika

gencar sanget ngadani kunjungan dhateng negara manca, ingkang

tindak boten namung presidhen ananging ugi para pejabat,

kadhangkala ngajak kulawarganipun. Bea saking kegyatan menika

boten wurung dipuntanggung negara. Bab menika ugi katingal saking

pethikan ing ngandhap menika:

Tinggi tjilik sing rada kepenak uripe mung sing kapinudjon duwe

sedulur tinggi gee. Kaja upamane sedulur-sedulure Zulfulus.

Uripe kena diarani kepenak. Jen Zulfulus lelungan nunggang

Tjoro, ora mung anak-bodjone, nanging sanadyan gotrane sing

ora dadi apa-apa ja sok dikon melu kabeh. Dene sing mbajari

ragade ja nagara. (Winduwinata, 1952: 71)

Ananging, ingkang tumindak korupsi menika boten namung

panggedhe. Panganggit ugi ngritik tindakan korupsi ingkang

dipuntindakaken dening kawula alit. Bedanipun, menawi tumindak

korupsi tiyang alit menika namung sekedhing tur malih ugi

10

dipunukum, beda kaliyan para panggedhe ingkang taksih saged

gesang bagya mulya. Pethikanipun ing ngandhap menika:

Ana tinggi tjilik, bodjone laranen. Arep ditunggangake tjoro

supaya bisa golek vitamine ing mantjatalpa, uwite kurang.

Wusana, metu kakendelane. Kurange uwit didjupukake saka

kantor, akehe patang puluh. Konangan, bandjur diukum.

Dikundjara sesasi. Olehe dadi djuru tulis dipotjot tidak dengan

hormat. (Winduwinata, 1952: 69).

b. Praktek Nepotisme

Nepotisme menika tumindak ingkang langkung milih sedulur

menapa kancanipun, adhedhasar sesambetan akrab boten

adhedhasar kaprigelanipun (http://asrihandayani.wordpress.com

/2010/03/31/pengertian-korupsikolusidan-nepotisme/ ). Wonten ing

dongeng Zulfulus tumindak korupsi menika katindakaken dening

Zulfulus ingkang ngangkat kulawarganipun dados pegawe negara

supados saged ndherek ten manca nagara dipunbayari negara. Kasus

menika saged katingal saking cuplikan, menika:

,,Amarga nindakake ajahaning pradja! Wruhanamu ja, tinggi

boo, jen anakku melu nunggang Tjoro tanpa mbajar ewe kuwi,

sababe, amarga duwe tugas kewadjiban untuk negara kita jang

tertjinta. Delengen lajange kekantjingan, jen ora ngandel. Anakku

kuwi sadjerone lelungan menjang mantjatalpa rak takdadekake

sekretarisku, hla bodjoku takdadekake verpleegsterku.

Keponakanku kae, sing sidji tak dadekake djurubasa, sing sidji tak

dadekake djurutik, sidjine takdadekake palaku. Jen manungsa

olehe ngarani: koerir! (Winduwinata, 1952: 71)

Cuplikan menika minangka kritik kangge para pejabat ing jaman

semanten, ingkang asring nglebetaken sodara, kanca, utawi

kenalanipun ing instutusi pamerintahan adhedhasar sesambetanipun

sampun akrab, boten ningali kaprigelanipun.

c. Dhiplomasi ingkang nyimpang saking paugeran

11

Dhiplomasi ingkang dipunkritik menika, dhiplomasi para pejabat

ingkang namung manut karepipun piyambak, lan namung golek

kantungan kagem awakipun piyambak.

Zulfulus kuwi mula wis patut dadi duta, amarga pinter bab

iplomasi. Mungguh tegese iplomasi kuwi: witjara sing ora

terang, ora tjea, ana djegalane. Witjara sing nuwuhake pikiran

ing atine kewan lija jen sakabehing tindak sing diusulake iku

nguntungake kewan lija mau, sanadyan ing sabenere sing untung

awake ewe. Kuwi jen iplomasi miturut sato-kewan. Jen miturut

manungsa beda. Djarene. (Winduwinata, 1952: 64).

Mulane lurah amben kulon ja rada uil. Kanane, jen tinggi amben

kanil sing menjang amben kulon sepuluh, tinggi amben kulon

sing menyang amben kanil telung puluh. Zulfulus kaget. Prasasat

ditjaut iki! Bandjur njang-njangan. iplomasi kuwi ora ana bedane

karo dol-tinuku ana ing pasar, nganggo njang-njangan barang.

(Winduwinata, 1952: 66).

2. Kemiskinan

Boten dados wewadi malih, menawi ing jaman pamerintahan

presidhen Soekarna menika, rakyat Indonesia gesang sarwi kakirangan.

Bab menika ugi langkung parah amargi wonten pejabat ingkang korupsi,

saengga ndadosaken para rakyat tambah sangsara. Kasus menika

dipunkritik ing pethikan-pethikan ing ngandhap menika:

Kotjapa jen pinudju ana dajoh saka mantjapalpa, tinggi tjilik ora

ana sing kumanan babar pisan. Amarga dajoh saka mantjatalpa

kuwi ana sing dremba-dremba, tur dikon urut katjang sok ana sing

ora gelem. Ana dajoh kok direh! Mulane manungsane kerep nglilir,

malah wis tau manungsane kaget, bandjur nggeblogi kasur ngiwa-

nengen. Tudjune olehe latihan mlaju karo nelik wis peng-

pengan. Adjaa rak akeh sing tiwas (Winduwinata, 1952: 70).

12

Wusana tinggi tjilik ora bisa ngombe apa-apa. Mulane awake saja

kuru-kuru. Mangka olehe dikon mbajar padjeg adjeg! Ora ana

sudane. Malah kepara ana unake (Winduwinata, 1952: 71).

Kotjapa kang kari ana ing Kanilnagara. Uripe saja sangsara. Akeh

kang paa mati kaliren (Winduwinata, 1952: 76).

Pethikan menika minangka kritikan dhateng pamerintah bab

kamiskinanipun para rakyat. Nalika semanten, rakyat menika sampun

sangsara awit, kabijakan pamarintah.

3. Moral

Perkawis kritikan moral wonten mriki nedahaken kritikan tumrap

sipat-sipat ingkang boten sae. Kritikan moral wonten dongeng Zulfulus

menika, antawisipun:

1. Cethil utawin pelit

Kritikan tumrap sipat cethil menika ketingal ing pethikan

ngandhap menika:

Sarehne dadi panggee, mulane bajare ja akeh. Nanging

senadyan mangkono, Zulfulus kuwi gemi banget. Malah tinggi sing

ora seneng olehe ngarani tjeil (Winduwinata, 1952: 59).

Cuplikan ing nginggil ngritik sipatipun manungsa ingkangn gemi

lan cethil kaliyan tiyang sanes senadyan sampun sugih. Perkawis

menika sampun asring kedadosan ing masyarakat, menawi tiyang

ingkang sampun sugih asring malik sipatipun dados pelit.

2. Boten Jujur

Kritikan dhateng sipat boten jujur ing dongeng menika, mliginipun

katujokaken dhateng para pejabat ingkang nyalah ginakaken

jabatanipun. Kritikan menika ketingal ing pethikan ngandhap menika:

,,... Jen manungsa sing turu ana ing ambenku kuwi vitamine

pepak. Mulane kowe saanak-bodjo utawa maneh panggee-

panggee ing kene tak suruhi tekaa ing ambenku, perlu ngombe

getihe manungsa kana.

13

..........................................................................................

,,Mengko isik ta, ki sanak. Jen njata manungsamu kuwi pepak

vitamine, hla kok awakmu ewe kuru?

,,O, keprije ta Ki Lurah ki! Olehku kuru iki rak saking kerepe

olehku pasa, saking bangete olehku prihatin. Mrihatinake tinggi

sainenging djagat. Ben paa ketrima uripe. (Winduwinata,

1952: 64-65).

Pacelathon menika nedahahen tumindak boten jujur Zulfulus

nalika badhe ngadani prajanjen kaliyan negara amben lor. Zulfulus

ngaku bilih manungsa ing amben kanthil menika pepak vitaminipun

sarta Zulfulus kuru amargi kerep pasa. Ananging, nyatanipun Zulfulus

kuru menika amargi manungsa ing amben kanthil menika kirang

vitamin. Kritiikan menika katujukaken dhateng sinten kemawon

ingkang asring ngendika goroh kangge nggayuh menapa ingkang

dipukajengaken. Pethikan sanes ingkang ngritik tumindak boten jujur

inggih menika:

Tinggi-tinggi sing diandel dening nagara dikon nukokake pangan

utawa butuh lija-lijane akeh sing paa ngapusi (Winduwinata,

1952: 76).

3. Pemimpin ingkang boten wicaksana

Kritikan dhateng pemimpin ingkang boten wicaksana menika

ketingal wonten pethikan ing ngandhap menika:

Sarehne Zulfulus mau dadi panggee, dadi panggaweane ja akeh

banget. Sing nindakake panggaweane sing akeh banget mau

punggawane sing tjatjahe ja akeh banget. Zulfulus ming saderma

mrentah lan ,,tahu beresnja (Winduwinata, 1952: 60).

Pethikan ing nginggil ngritik para pamimpin ingkkang namung

masrahaken sedaya pedamelan dhateng andhahanipun, lan namung

mangertos asilipun ingkang sae-sae kemawon.

,,Wis, wis, sedulur, olehe rembugan dipeot samene wae isik.

Besuk jen wis paa lerem anggone muring-muring, dibatjutake.

Saiki paa muliha. (Winduwinata, 1952: 75).

14

Pethikan menika, nedahaken Ki Lurah Rektarupa misah pepadon

antawisipun para bekel. Ki lurah menika mangertos bilih para bekel

kala wau rebat amargi konangan korupsi, ananging boten dipunukum

dening Ki Lurah, ananging malah dipunsuruhi wangsul. Menika

minangka kritikan dhateng pamerintahan Pak Soekarno ingkang kala

rumiyin ketok nglindhungi para koruptor.

4. Khukum

Kritik khukum menika ngengingi bab, khukum ingkang boten adil

lan namung berlaku dhateng tiyang miskin kemawon, ananging tiyang

ingkang sugih menapa gadhah pangkat nalika semanten kebal saking

ukum. Kritik menika ketingal saking pethikan ing ngandhap menika:

Ana tinggi tjilik, bodjone laranen. Arep ditunggangake tjoro

supaya bisa golek vitamine ing mantjatalpa, uwite kurang.

Wusana, metu kakendelane. Kurange uwit didjupukake saka

kantor, akehe patang puluh. Konangan, bandjur diukum.

Dikundjara sesasi. Olehe dadi djuru tulis dipotjot tidak dengan

hormat. (Winduwinata, 1952: 69).

Tjekaking tjarita, Zulfulus sakulawarga lan gotrane bandjur ngalih

menjang amben kulon. Miturut kabar saka persbureau Aneka, ana

ing kana uripe kepenak banget. Ora kekurangan vitamine, tur

kadjen-keringan. (Winduwinata, 1952: 69).

Olehe ngapusi nagara utawa ngapusi rajat ora mung trima ewon

utawa leksan, malah nganti jutan barang. Ewadene, seprene iseh

paa slamet, durung dilikwidir. (Winduwinata, 1952: 69).

Saking pethikan ing nginggil ketingal bilih panganggit ngritik

khukum ing jaman semanten ingkang boten mihak dhateng kawula alit.

Nalika wonten tiyang alit ingkang korupsi sekedhik kemawon, age-age

dipunukum. Kosok wangsulipun, para panggedhe ingkang korupsi kathah

malah wonten kenging ukuman babar pisan. Malah saged gesang bagya

mulya.

15

BAB IV

PANUTUP

A. Dudutan

Saking asiling panaliten menika saged dipunpendhet dudutan bilih

kritik sastra ing karya sastra menika, gadhah paedah kangge nedahaken

saha ngoreksi kasunyatan ing mayarakat ingkang nyimpang saking

norma. Kritik ing dongeng Zulfulus anggitanipun Prijana Winduwinata

menika kawujudaken ing pacelathonipun para paraga kalihan narasi

ingkang dipunserat dening paganggit. Wondene, kritik sastra ing dongen

Zulfulus anggitanipun Prijana Winduwinata menika ngewrat kritik bab

sekawan perkawis ing ngandhap menika:

1. Politik : Praktek Korupsi lan nepotisme sarta dhiplomasi

ingkang nyimpang saking paugeran.

2. Kemiskinan :Rakyat tansaya miskin lan sangsara

3. Moral :Sipat cethil utawi pelit, boten jujur, lan pemimpin

ingkang boten wicaksana.

4. Khukum : Ukum ingkang boten adil

16

DHAPTAR PUSTAKA

Hadiwardoyo, A. Purwa. 1990. Moral dan Masalahnya. Yogyakarta:

Kanisius.

Sarwadi. 1975. Sastra Kritik dalam Kesusastraan. Yogyakarta: Pustaka

Pelajar.

Semi, Atar. 1989. Kritik Sastra. Bandung: PT. Angkasa.

Sumardjo. 1982. Masyarakat dan Sastra Indonesia. Yogyakarta: Nur

Cahaya.

Suwardi. 2003. Metode Penelitian Sastra. Yogyakarta: Pena.

Tarigan, H. G. 1986. Sastra dan Ilmu Sastra. Jakarta: Pustaka Raya.

Winduwinata, Prijana. 1952. Dongeng Sato Kewan. Jakarta: Balai

Pustaka.