10
GRAU SUNG AI DE (DIVE DEEPER) Chyum mungga madung:- Luka Laika 5:4-9 Madi shadaw ai chyum ga ni :- Luka Laika 4:18- 19, Pru mat wa ai laika 19:5-6. Ga Hpaw :- Karai Kasang a mungga gaw asak rawng ai, hpung shingkang hte hpring ai, tengman ai mungga re. Kam sham ai hte hkan nang hkan sa ai ni a matu, mungkan a shingra tara hku myit sawn sumru, galaw gun hpai yang n lu la lu ai, mau hpa chyeju ni hpe shabyin ya nga ai mungga mung re. Anhte langai hkrai (sh) dinghku ni (sh) amyu sha ni ja gumhpraw lam, arawng aya lam, hpaji lam, hkam ja lam, etc ni a matu tinang hkrai shakut yu yang n lu la lu ai mahkrum madup ni law law nga na ga ai re. De a majaw, myit daw nga ai ni, myit htum nga ai ni law law mung nga na re. Rai tim Yesu hpe kam sham ai myit kaba hte Shi a mungga hpe hkan nang let, bai shakut yu u. Teng sha mau hpa chyeju hpe mu lu na ga ai. Chyum masa ning pawt “Grau sung ai de” anhte langai hkrai (sh) anhte dinghku ni (sh) anhte Chyurum Wunpawng sha ni sit sa wa ga, ngu nna anhte myit yu ga yang, Yesu Simun hpe tsun ai ga gaw adingtawk sharin la mai ai lam rai nga ai. Luka. 5:4-9 hta Yesu gaw Simun hpe, hka sung ai shara de naw sit nna, nga ja na matu nanhte a sumgawn ni hpe jahkrat mu ngu nna tsun wu ai. Simun bai htan ai gaw, madu e mana tup anhte shakut ga ti mung, hpa mung n lu gaw ai, rai ti mung, na a ga majaw, ngai sumgawn jahkrat na we ai ngu htan let, 1

GRAU SUNG AI DE (DIVE DEEPER)

Embed Size (px)

DESCRIPTION

Kachin Online

Citation preview

KBC Ramma

GRAU SUNG AI DE

(DIVE DEEPER)

Chyum mungga madung:- Luka Laika 5:4-9

Madi shadaw ai chyum ga ni :- Luka Laika 4:18-19, Pru mat wa ai laika 19:5-6.

Ga Hpaw :- Karai Kasang a mungga gaw asak rawng ai, hpung shingkang hte hpring ai, tengman ai mungga re. Kam sham ai hte hkan nang hkan sa ai ni a matu, mungkan a shingra tara hku myit sawn sumru, galaw gun hpai yang n lu la lu ai, mau hpa chyeju ni hpe shabyin ya nga ai mungga mung re. Anhte langai hkrai (sh) dinghku ni (sh) amyu sha ni ja gumhpraw lam, arawng aya lam, hpaji lam, hkam ja lam, etc ni a matu tinang hkrai shakut yu yang n lu la lu ai mahkrum madup ni law law nga na ga ai re. De a majaw, myit daw nga ai ni, myit htum nga ai ni law law mung nga na re. Rai tim Yesu hpe kam sham ai myit kaba hte Shi a mungga hpe hkan nang let, bai shakut yu u. Teng sha mau hpa chyeju hpe mu lu na ga ai.Chyum masa ning pawt

Grau sung ai de anhte langai hkrai (sh) anhte dinghku ni (sh) anhte Chyurum Wunpawng sha ni sit sa wa ga, ngu nna anhte myit yu ga yang, Yesu Simun hpe tsun ai ga gaw adingtawk sharin la mai ai lam rai nga ai. Luka. 5:4-9 hta Yesu gaw Simun hpe, hka sung ai shara de naw sit nna, nga ja na matu nanhte a sumgawn ni hpe jahkrat mu ngu nna tsun wu ai. Simun bai htan ai gaw, madu e mana tup anhte shakut ga ti mung, hpa mung n lu gaw ai, rai ti mung, na a ga majaw, ngai sumgawn jahkrat na we ai ngu htan let, sumgawn jahkrat jang shanhte nga wu nawng kaba magawn la lu ma ai. Li lahkawng yan lup wa magang hkra bang jahpring la lu ma ai. N dai mabyin hta (1) Yesu gaw yawng mayawng hpe dang di lu ai wa re ngu ai hpe shadan shadawng dan nga ai zawn, (2) Myit mada shara n nga sai zawn san ai masa hta rai tim, myit n daw ai sha, Yesu a ga hta htep lahti hkan nang hkan sa let shakut shaja yang, mau hpa chye ju hte lam shagu, byin wa tai wa mai ai lam sakse madun nga ai.

Lawu na lam ni hpe myit n gun la let anhte langai hkrai (sh) anhte a dinghku (sh) Chyurum Wungpawng Sha ni a prat hpe gaw gap sa wa yang, teng sha awng dang ai lam lu la na ga ai.

1. Karai a yaw shada lam hta mahta nna asak hkrung lam hpe gaw gap ra ai (Seeing Life from Gods View)

Tinang a asak hkrung lam hpe gara ningmu hku yu mada nna mungkan hta asak hkrung nga ai kun? Masha gaw ga yun hpe la nna, Karai Kasang a n soi n sa bang ya ai hte hpan da hkrum ai wa re ai majaw, Karai Kasang hte tut nawng matut mahkai nga ra ai. Shaloi she, Karai Kasang a yaw shada lam hpe grau sung ai hku chye na wa let a sak hkrung lam hpe, Karai Kasang tsaw ra sharawng awng ai hku, gaw de lu nga ai. Shaloi mau hpa chyeju ni hpe shani shagu grau grau mu mada chye na hkam la lu wa na ra ai. Karai Kasang a hkrang bung sumla hte hpan da hkrum ai wa re ai the maren, Karai Kasang a yaw shada ai lam hpe n chye na ding sa, hpan da hkrum ai manu hpe n chye na lu ai zawn, asak hkrung ai a lachyum hpe mung n chye na lu ai. Dai lam ni hpe Karai Kasang gaw Yesu Hkristu hku nna hkum tsup kup hkra hpaw dan hpyan dan ai lam (revealation) hku sha chye na la mai ai. Dai re ai majaw, mungkan hpaji myit chye myit chyang, ja gum hpraw, arawng aya hte n rai, Yesu hta manoi let chyum mungga hta mahta ai asak hkrung lam hku sha, lu la mai nga ai. Dai shaloi asak hkrung lam a manu dan ai lam the, Karai Kasang a mai kaja ai lam ni hpe grau grau chye na hkam la lu na wa na re.

Shinggyim masha gaw shingra maka hta hkan nna prat pra tim mung, shinggyim masha hta rawng ai nsoi nsa gaw Karai Kasang kaw na re. Dai majaw, Karai Kasang a man e yawng gaw manu dan ai. Dai manu dan ai lam hpe chye na nna asak hkrung ra ai. Karai Kasang manu shadan ai hpe chye na nna asak hkrung ai ngu ai gaw Karai a chyeju hpe myit dik let Karai sharawng awng ai wa tai hkra chyoi pra ai Wenyi lam woi ai hku asak hkrung ai lam re. Tinang hkum hpe nanghpam lu sha ni hte (sh) n se n sa ai hku jahten sharun ai, masha shada n se n sa lam hku (sh) nanghpam lu sha jaw sha/ dut shabra ai hku (sh), myu sha shada dut sha ai hku (sh), masha wa a galu kaba wa na lam hpe hkan jahten sharun ai hku (sh), masha wa hpe n tara ai hku sut masa hte dip sha roi rip ai lam ni gaw, Karai shareng shagrau tawn ai, masha a manu hpe jahten shaza ai lam rai nga ai. Tinang hkum hpe mung ja gumhpraw , arawng ara, hpaji degree ni hta machyu let jahten shaza ai lam mung koi gam ra ai. Tinang kadai re ai ngu ai hpe grau sung ai hku chye na, manu shadan let, Karai Kasang a yaw shada lam hta mahta nna sak hkrung sa wa ra ai. Dai sha n ga masha wa hpe mung Karai a hkrang bung sumla hte hpan da hkrum ai ni hkrai re ai majaw tsaw ra ra ai, manu shadan ra ai, hkungga ra ai. Karai kasang a lata amu chyeju hpe manu shadan ai ni hpe Karai Karai mung lak san chyeju ni grau grau hkam la lu shangun na re.

2. Moi prat na Karai masa ningmu hpe tawn kau da let Prat ningnan hta pra ai Hkristan ni tai ra ai (from old world Christians to new world Christians)Karai Kasang gaw grai tsaw ai shara kaw ningngai nga ai wa ngu ai myit jasat makam kaw nna, Karai Kasang gaw mungkan masha ni hte rau nga nga ai Karai (Emanuela) ngu ai makam (from God above to God within) hta mahta nna, prat hpe gaw gap sa wa ra ai. Yesu Hkristu gaw, Ga Shaka dingsa prat na Israela myu ni a Karai Kasang ntsa chye na ai ningmu dingsa (Karai Kasang gaw grai tsaw ai shara, shinggyim masha hte grai tsan gang ai shara kaw nga ai Karai Kasang) hpe galai shai shangun mayu ai majaw, shinggyim hkum hkrang dagraw hkam la na shaloi Emanuela ( Karai Kasang anhte hte rau rai nga ai) mying hpe hkam la ai re (Mahte 1:23). Dai gaw, Karai Kasang anhte hte rau rai nga ai, yu nga ai, makawp maga nga ai, bau maka nga ai, chyeju jaw nga ai ngu ai hpung shingkang npu hta asak hkrung nga lu shangun ai lam re.

Htawm hpang prat (Si ai hpang na prat) sumsing mungdan hpe sha myit mada ala let myit dik nga ai kaw na, Yesu hte rau, sumsing mungdan a manu (value) ni rai nga ai tsaw ra ai lam, tara rap ra ai lam, shanglawt lu shangun ai lam, ngwi pyaw simsa ai lam, (love,justice, freedom and peace), ni, n dai mungkan hta nga wa hkra tsaw ra myit hte dau jau let sumsing mingdan a kashu kasha majing zawn asak hkrung sa wa shangun nga ai.

Htawm hpang prat, sumsing mungdan hpe sha myit mada ala let, myit dik nga ai ni gaw, n dai mungkan gaw anhte a nta n rai, anhte hte n seng ai, hpa myi byin yang byin anhte a lit n rai, ngu ai karai masa hta manoi ma ai. Myit dum ra ai gaw, Karai Kasang gaw mungkan ga hpe kasha shing tai hpe jaw kau ai du hkra tsaw ra ai (Yawhan. 3:16) ngu ai masa ni, Karai Kasang gaw kasha shingtai hpe mungkan ga de shangun dat nna, mayam ma nsam hpe dagraw let mungkan hpe dau jau ai lam ni, Yesu tsun ai Wa ngai hpe mungkan ga de shangun dat ai zawn ngai mung nanhte hpe mungkan de shangun dat ai (Yawhan 20:21) ngu ai masam lam ni hte, nhtan shai mat wa mai nga ai.

Yubak mara ngu ai ningmu ntsa kaw chuy sha mahta nna asak hkrung ai kaw nna, tsaw ra myit hta mahta nna asak hkrung ra sai (from sin-based to love-based). Sin-based Christians ni gaw yubak mara hpe shadawn jyit na shatai nna, tinang hkum (sh) masha wa hpe yu ai, masat ai, masa re. N kam sham shi ai ni a ntsa ngarai de sa na ni, tsa dan a kashu kasha ni (sh) n chyoi n pra ai, n ding n hpring ai ni, yu bak kap ai ni ngu yu masat ma ai. Dai majaw dai Hkristian ni gaw kaga ni hta grau dum ai, reng dum ai myit jasat, chyoi pra dum, dinghpring dum ai myit jasat hte kaga ni hpe lachyen ginhka ai myit jasat ni rawng wa ai. Rai tim mung, love-based Christians ni gaw, Karai Kasang gaw mungkan shinggyim masha yawng hpe tsaw ra ai. Kam sham ai wa hpe mung, rai n kam sham shi ai ni hpe mung Karai Kasang gaw tsaw ra ai ngu ai ningmu hte masha wa hpe yu masat ai re.Yesu tsun ai yubak lu ai wa hpe tsaw ra ai (rai tim yubak hpe matsat ai), hpyen wa hpe, htingbu wa hpe tsaw ra ra ai ngu ai Karai masa hta mahta nna mungkan hpe daw jau ai lam re. Masha hpe sha n rai, Karai a hpan da ai lata amu hpe, manu shadan let tsaw ra myit hte makawp maga daw jau ai lam re. Dai gaw Karai sharawng awng ai hkum hkrang, wuhpawng, mungkan, tai wa na matu asak hkrung ai, daw jau ai lam rai nga ai. Yesu gaw tsaw ra myit hta mahta nna, asak hkrung shangun nga ai. Dai majaw kaba dik ai hkang da ai lam hta Karai Kasang hpe tsaw ra ra ai lam hte, shinggyim masha hpe tsaw ra ra ai lam hkang da ai re (Mahte 22:37-39). 3. Hpan da ai lam hta mahta ai sasana (Creation-centered- mission) hpe shachyen shangun nga ai

Nga yawng dang hta hpe Karai Kasang hpan da ai re majaw manu dan ai, yaw shada ai lam the lachyum pru ai hkrai re ngu chyena hkam la let manu shadan ra ai, makawp maga ra ai, daw jau ra ai re.

Masha shada hpe mung Karai myi hte yu nna, masha shagu Karai Kasang a hkrang bung sumla hte bung ai shinggyim masha tai lu hkra daw jau ra ai. Hkum shan hte wenyi lahkawng yan hpe a hkyak shatai nna, Karai Kasang a mungdan a matu manu dan, bawng ring ai, sut su ai, mung masa ring chying let ti nang a shawng lam shim lam a matu hparan lu ai ningja rawng ai ni tai wa hkra daw jau ra ai. Masha gaw Wenyi gawng kya jang, hkum hkrang (sai shan) gawng kya wa ai zawn, hkum hkrang gawng kya jang wenyi mung gawng kya wa ai re. Lahkawng yan rau bawng ring wa ra ai. Karai Kasang gaw masha hpe tsaw ra nna, hkye la na matu she mungkan ga de yu sa ai re. Dai ni mung, shinggyim masha a matu shinggyim masha ni hte rau hkam sha nna, ndai dinghta mungkan hta bungli galaw nga ai Karai re.

Luka Laika. 4:18-19 hta Yesu gaw shi galaw na magam bungli ni hpe tsun dan nna, mungkan hta Karai a hkye la ai magam bungli hpe galaw lai wa sai. Matsan mayan ni hpe kabu gara shi ga hkaw tsun na matu, bawng dung ai ni hpe shalawt lu na matu, myi kyaw ai ni hpe myi bai mu shangun na matu, zingri zingrat hkrum ai ni hpe dat dat shangun na hte, madu a sharawng awng ai shaning hkaw tsun dan na matu, mungkan ga de du sa ai lam tsun da nga ai. Dai majaw, shinggyim hkum dagraw la let, shinggyim masha ni hte rau lu rau sha, rau jahpoi asawng zingri hkam let mungkan shinggyim masha ni hpe hkye la ai magam bungli galaw lai wa sai re. Bai Yesu gaw Nang ngai hpe mungkan ga de shangun dat ndai zawn, ngai mung shanhte hpe mungkan ga de shangun dat da mawe ai(Yawhan. 17:18) ngu nna, Kawa Karai Kasang shi hpe mungkan ga de shangun dat nna, shinggyim masha ni hpe daw jau ai zawn, dai ni anhte hpe mung shinggyim masha ni hpe daw, jau na matu mungkan ga de dat dat nga ai.

Israela ni Egutu mung e mayam tai hkrum ai shaloi na hkrap sharung ai n sen hpe na nna, hkye hkrang shaw la na matu( Pru. 3:7-10), Moshe hpe Karai Kasang tsun ai gaw na a lata hta hpa baw rawng a ta? Moshe kaw nga ai daw hkrawng hte, Moshe a atsam hpe Karai Kasang jai lang nna, Israela myu ni n myit hkawn lu ai, mau hpa magam bung li hpe, Karai Kasang galaw sai re. Dai ni mung anhte langai hkrai hpe, nang lu ai atsam hte, n dai dinghta mungkan hpe tsaw ra let shinggyim masha hpe daw jau na matu Yesu shangun nga ai re. Tinang a atsam myi, n greng tim, Karai Kasang jai lang jang, mau hpa magam bungli ni hpe anhte a asak hkrung lam hku nna Karai Kasang galaw mat wa na re. Kam sham myit hte, jai lang hkam ai asak hkrung lam rai na sha ahkyak nga ai.

Ga Hpum dim Yesu gaw Simun hpe, hka sung ai shara de naw sit nna, nga ja na matu nanhte a sumgawn ni hpe jahkrat mu ngu nna anhte a makam masham, arawn alai, myit masa ningja the daw jau ai lam ni hpe Yesu shi nan madun lai wa sai hpungda dep hkra hkan shadik shatup lu na matu shadum la nga ai re. Langai hkrai a asak hkrung lam, dinghku ni a asak hkrung lam, myu sha ni a sak hkrung lam grau grau mai kaja, chye chyang kunghpan, ringchying gan ga wa na matu, Yesu Hkristu hpe kam sham ai hte Shi a mungga hta, nhten ai myit n rawng ai sha, da kring da lang hkan nang hkan sa na matu saw nga ai re. Chyeju hte hpring ai, Karai Kasang a sali wunli tai ai masha, dinghku, amyu tai na matu re.

Yesu gaw, dai ni ngai kaw hkan nang marit (follow me),ngu nna shainggyim masha ni tengman ai Karai Kasang akashu kasha tai hkra daw jau ga nga nna saw nga ai re. Ngai hte rau, dip sha hkrum, roi sha hkrum, dut sha hkrum ai, masha n sawn hkrum ai ni hpe shalawt ga, nga nna anhte hpe shaga nga ai. Chyurum Whp My Shan i yawng hpe mung, Karai Kasang a lata la ai amyu tai let, Karai Kasang a hpung shingkang hpe mungkan hta shadan shadawng ga nga nna, anhte hpe dai ni Yesu saw nga ai. Nang Yesu hte rau n daw jau gwi na i? Grau dam lada ai hku daw jau na matu Yesu saw nga ai.

Karai Kasang a mungdan a kashu kasha langai a lit hpe, kang ka hkra gun hpai let, tinang a asak hkrung lam, dinghku a asak hkrung lam, myu a asak hkrung lam, Karai Kasang a chyeju hte hpring na matu grau grau shakut shaja, daw jau sa wa ga law!

Madi shadaw ai laika ni:-

Rick Warren, The Purpose Driven Life (Manila: OMF Literature Inc., 2002).

Stephen Glauz-Tadrank, Transforming Christianity: Ten Pathways to a New reformation ( New York: The Crossroad Publishing Company,1996).

William Barclay, The Gospel Of Luke ( Bangalore: Theological Publishcation,1994).

Ginlen shalai ai,

Rev. Dr. Lahpai Awng Li (MIT, Insein, Yangon).

PAGE 5